Chikalata Chandanda Chakwawula kwa Akolinto

15 Achalongo achimjangu, sambano ngusaka kumkumbusya ya ngani syambone sinalalichile kwa jemanja, syele mwasipochele soni mkupitilisya kusikuya. 2 Ngani syambone syanalalichile kwa jemanja sikumkulupusya pamkupitilisya kusisunga chenene. Naga ngamkutenda myoyo, nikuti chikulupi chenu chili changali masengo.

3 Yindu yakusosekwa mnope yanapochele ni yanamjiganyisyesoni jemanja. Yindu yakwe yili yakuti, Klistu ŵawile kuti atugopole ku ulemwa mpela mwagakusaŵechetela Malemba. 4 Jwalakwe ŵasichidwe m’malembe, kaneko ŵajimwiche pa lisiku lyatatu mwakamulana ni yagakusaŵecheta Malemba. 5 Nambosoni ŵawonechele kwa Kefa, kaneko kwa ŵakulijiganya ŵakwe 12 ŵala. 6 Kaneko ŵawonechelesoni kwa achalongo achimjetu ŵakupunda 500 pandaŵi jimo, mwamti ŵajinji mwa jemanjaji ali chiŵela umi mpaka apano, nambo ŵane ŵawile. 7 Panyuma pakwe ŵawonechele kwa Yakobo, kaneko kwa ŵandumetume ŵane wosope. 8 Nambo pambesi pakwe ŵawonechele kwa une mpela likandi lyangakwana masiku.

9 Pakuŵa une ndili jwamnandi mnope mwa ŵandumetume wosope, soni nganimba jwakuŵajilwa kukolanjidwa kuti ndumetume ligongo nawulagasisye mpingo wa Mlungu. 10 Nambo ligongo lya umbone mtima wekulungwa wa Mlungu ndili jwandumetume. Umbone mtima wekulungwa wa Mlunguwo utesile yejinji paune, ligongo ngamwile masengo gekulungwa kupunda ŵane wosopewo. Nambotu nganiliŵa ligongo lya machili gangu, nambo ligongo lya umbone mtima wekulungwa wele Mlungu ŵandosisye. 11 Nambope, chinga une kapena jemanjajo, wosope tukusalalichila yakulandana, soni yeleyo ni yamwayikulupilile.

12 Naga tukusalalichila kuti Klistu ŵajimwiche ku chiwa, sambano ligongo chichi ŵane mwa jemanja mkusaŵecheta kuti ŵawe ngasajimuka? 13 Naga yili yisyene kuti ŵawe ngasajimuka, nikutitu Klistu nganajimukasoni. 14 Nambo naga Klistu nganajimuka, nikuti kulalichila kwetu kuli kwangali masengo soni chikulupi chenu chili changali masengo. 15 Nambosoni naga yili yisyene kuti ŵawe ngasajimuka, nikuti tuŵele mboni syaunami sya Mlungu ligongo tukusatendela umboni wakuti Mlungu ŵamjimwisye Klistu, nambo chitamilecho nganamjimusya. 16 Pakuŵa naga ŵawe ngasajimuka, nikuti Klistu nganajimukasoni. 17 Nambosoni naga Klistu nganajimuka, nikuti chikulupi chenu chili changali masengo, soni mli chiŵela mu ulemwa wenu. 18 Nambosoni, nikuti wosope ŵaŵawile ali kumkulupilila Klistu, chawo pangali. 19 Naga chembecheyo chetu pa Klistu chili cha umi awunope, nikuti tuli ŵakutesya chanasa mnope kupunda ŵane wosope.

20 Nambotu Klistu ŵajimwiche ku chiwa soni ŵaŵele chisogosi chandanda kwa ŵandu ŵaŵawile. 21 Pakuŵa chiwa chayiche kupitila mwa mundu jumo, kwimuka kwa ŵandu ŵawe kwayichesoni kupitila mwa mundu jumo. 22 Mpela mwayiŵelele kuti ŵandu wosope akuwa ligongo lya Adamu, myoyosoni wosope chachikola umi ligongo lya Klistu. 23 Nambo jwalijose chachijimuka pandaŵi jakwe. Jwandanda Klistu, jwali chisogosi chandanda, kaneko ŵele ŵali ŵakwe ŵa Klistu pandaŵi ja kuŵapo* kwakwe. 24 Pambesi pakwe, pachachimasya maboma gosope, ulamusi wosope soni machili gosope, chachipeleka Uchimwene kwa Mlungu jwakwe, jwalisoni Atati ŵakwe. 25 Pakuŵa jwalakwe akusosekwa kulamulila mpela mwenye mpaka Mlungu ali aŵisile adani wosope pasi pa sajo syakwe. 26 Kaneko chiwa, chachili mdani jwakumalisya, chachichigomeka. 27 Mlungu “ŵaŵisile yindu yosope pasi pa sajo syakwe.” Nambo paŵaŵechete kuti, ‘yindu yosope ŵayiŵisile pasi pakwe,’ yindu yeleyo ngayikupwatikapo Mlungu, jwele juŵayiŵisile yindu yosopeyo pasi pakwe. 28 Nambo pachachimalisya kuŵika yindu yosope pasi pakwe, Mwanachejo chachiliŵikasoni pasi pa Mlungu, jwele juŵaŵisile yindu yosope pasi pakwe. Chachitenda yeleyi kuti Mlungu aŵe yindu yosope kwa jwalijose.

29 Naga ŵawe ngasajimuka, ana ŵele ŵakubatisidwa kuti aŵe ŵawe tachitenda uli? Naga ŵawe ngasajimuka, nambi ligongo chichi akupochelasoni ubatiso wa mtundu welewu? 30 Sambano ni ligongo chichi tukuŵikaga umi wetu pangosi ndaŵi jilijose? 31 Chiwa ngusajenda nacho lisiku lililyose. Ngumsalila yeleyi mwakusimichisya achalongo achimjangu, pakuŵa ngusamnyadila jemanja ŵamkusakulupilila mwa Ambuje ŵetu Klistu Yesu. 32 Naga une nalimbene ni yinyama yamwitinji panaliji ku Efeso mpelaga muŵatendele ŵandu ŵane,* ana yeleyo yana umbone uliwose kwa une? Naga ŵawe ngasajimukasoni, “kwende tugambeje kulya ni kumwa, ligongo malaŵi chituwe.” 33 Mkasimlilambusya.* Kusyoŵekana ni ŵandu ŵayitendo yakusakala kukusajonanga ndamo syambone. 34 Mŵeje ŵaganisya chenene soni mleche kutenda yakusakala, pakuŵa ŵane ngakummanyilila Mlungu. Nguŵecheta yeleyitu kuti namtesye sooni.

35 Nambope, mwine ŵane mpaka ajile kuti, “Ana ŵawe chachiji­muka chamtuli? Naga chachijimuka, ana chachijimuka ni chilu chamtuli?” 36 Mundu jwakuloŵela mmwe, ana ngamkumanyilila kuti chindu champandile chikusatanda kaje kuwa kuti chiŵesoni ni umi? 37 Sonitu pakupanda, ngamkusapanda mmela ŵawukusakopokawo nambo mkusapandaga mbeju basi, chinga ja tiligu kapena mbeju jine jilijose. 38 Nambotu Mlungu ni jwakusajipa mbejujo chilu mwakamulana ni kusaka kwakwe, mbeju jilijose akusajipaga chilu chakwe. 39 Pakuŵa minowu josope ngajikusaŵaga jakulandana. Pana mnowu wa ŵandu, ni pana mnowu wa yinyama, soni pana mnowu wa yijuni, soni wine wa somba. 40 Panasoni yilu yakwinani soni yilu ya pachilambo chapasi. Nambo uchimbichimbi wa yilu yakwinani uli wine, soni uchimbichimbi wa yilu ya pachilambo chapasi uli winesoni. 41 Uchimbichimbi wa lyuŵa uli wine, soni uchimbichimbi wa mwesi uli wine, nambosoni uchimbichimbi wa ndondwa uli winesoni. Atamose uchimbichimbi wa ndondwa jine ukusalekanganasoni ni uchimbichimbi wa ndondwa jijakwe.

42 Mwelemutu ni mwayiŵelelesoni ni kwimuka kwa ŵandu ku chiwa. Chilu chikusapandidwa* chili chakomboleka konasika, nambo chikusajimuka chili changakomboleka konasika. 43 Chilu chikusapandidwa chili changachimbichika, nambo chikusajimuka chili chakuchimbichika. Chikusapandidwa chili changali machili, nambo chikusajimuka chili chana machili. 44 Chilu chikusapandidwa chili chikwete mnowu, nambo chikusajimuka chili chausimu. Naga pana chilu chakola mnowu nikuti panasoni chilu chausimu. 45 Pakuŵa yalembedwe kuti, “Adamu juŵaliji mundu jwandanda jwaŵele mundu jwaumi.” Adamu jwakumalisya jwaŵele msimu wakupeleka umi. 46 Atamose yili myoyo, chausimucho nganichiŵa chandanda. Chandanda chaliji chakola mnowu, kaneko payiche chausimucho. 47 Mundu jwandanda jwatyochele pachilambo chapasi, soni jwapanganyidwe ni luwundu. Mundu jwaŵilijo jwatyochele kwinani. 48 Mpela mwayiŵelele ni mundu jwakupanganyidwa kutyochela ku luwundujo, ni mwaŵelelesoni wosope ŵakupanganyidwa kutyochela ku luwundu. Myoyosoni mpela mwaŵelele jwakwinanijo, ni mwaŵelelesoni wosope ŵakwinani. 49 Nambosoni, mpela mwatukusawonechela mwakulandana ni jwakutyochela ku luwundujo, tuchiŵasoni ŵakulandana ni jwakwinanijo.

50 Achalongo achimjangu, ngumsalila mwakusimichisya kuti, mnowu soni myasi nganiyiŵa yipochele Uchimwene wa Mlungu. Nambosoni chakonasika nganichiŵa chipochele ungajonasika. 51 Ngusaka kumsalila yakusisika ya Mlungu yakuti, ngaŵa kuti wosope tuchiwa, nambo wosope tuchichenga, 52 m’kandaŵi kamnono, mkukupila kwa liso, pa kulila kwa lipenga lyakumalisya. Pakuŵa lipengalyo palichilila, ŵawe chachijimuka ali ŵangakomboleka konasika, soni m’weji tuchichenga. 53 Pakuŵa chakomboleka konasikachi chichichenga ni kuŵa changakomboleka konasika, soni chakomboleka kuwachi chichichenga ni kuŵa changakomboleka kuwa. 54 Nambo chakomboleka konasikachi pachichichenga ni kuŵa changakomboleka konasika, soni chakomboleka kuwachi pachichichenga ni kuŵa changakomboleka kuwa, pelepo maloŵe gagalembedwe gala gachikwanilichika, gakuti, “Chiwa ngasichiwonekasoni mpaka kalakala.” 55 “Mmwe chiwa, kupunda kwenu kuli kwapi? Mmwe chiwa, ululu wenu uli kwapi?” 56 Ulemwa ni wawukusakoposya machili gakuyikasya chiwa, soni Chilamusi ni chachikusapeleka machili ku ulemwa. 57 Nambo tukuyamichila Mlungu ligongo akusatukamuchisya kuti tupunde kupitila mwa Ambuje ŵetu Yesu Klistu.

58 Myoyo achalongo achimjangu ŵapamtima, mŵeje ŵakulimbangana, soni ŵangatenganyika. Ndaŵi syosope mŵeje ni yakutenda yejinji pa masengo ga Ambuje, soni mmanyilileje kuti masengo gamkutenda pakwatumichila Ambuje nganigaŵa gangali mate.