LIJIGANYO 48
Tusaguleje Achimjetu Mwalunda
Achimjetu ŵapamtima akusatukamuchisya kuti tuŵeje ŵakusangalala pandaŵi jambone soni akusatulimbikasyaga payisawisye. Nambope Baibulo jikusatukalamusya kuti jwalijose nganaŵa aŵele mjetu jwambone. Sambano ana mpaka tusagule chamtuli achimjetu ŵambone. Kwende tukambilane yiwusyo yakuyichisyayi.
1. Ana yakusatenda achimjetu mpaka yitukwaye chamtuli?
Ndaŵi syejinji ŵanduwe tukusajigalila yitendo ya ŵandu ŵatukusanonyela kukunguluka nawo. Achimjetuŵa mpaka aŵe ŵambone kapena ŵakusakala. Soni mpaka tujigalile ndamo syawo chinga tukusakunguluka nawo meso ni meso kapena kupitila pa intaneti. Ni ligongo lyakwe Baibulo jikusati, “mundu jwakwenda ni ŵandu ŵalunda nombe najo akusaŵa jwalunda, nambo jwakwenda ni yisilu [ŵangamnonyela Yehofa] nombe najo tachijonasika.” (Misyungu 13:20) Myoyo achimjetu ŵakusamnonyela soni kumlambila Yehofa mpaka atukamuchisye kuŵa paunasi ni jwalakwe soni kusagula yindu mwalunda. Nambo naga ŵandu ŵangamnonyela Yehofa akuŵa achimjetu ŵapamtima, nikuti ngasituŵa paunasi wambone ni Yehofa. Ni ligongo lyakwe Baibulo jikusatulimbikasya kuti tusaguleje achimjetu mwalunda. Naga achimjetu akusamnonyela Yehofa yikusatukamuchisya m’weji soni jemanjajo. Mwamti ‘tukusalimbikasyana mitima ni kamuchisyana jwine ni mjakwe.’—1 Atesalonika 5:11.
2. Ana kasagule ketu ka achimjetu mpaka kamkwaye chamtuli Yehofa?
Yehofa akusasagula achimjakwe mwalunda. Ni ligongo lyakwe Baibulo jikusati “ŵandu ŵakulungama akusiŵaŵika mlikuga lya ŵandu ŵakwe ŵakusiŵakulupilila.” (Misyungu 3:32) Ana Yehofa mpaka apikane uli mumtima naga achimjetu ali ŵangamnonyela jwalakwe? Jwalakwe jwangasangalalaga. (Aŵalanje Yakobo 4:4.) Konjechesya pelepa, naga tukwaŵambala ŵandu ŵakusakala soni tukuŵa paunasi ni Yehofa ni kwanonyelaga ŵandu ŵakusamnonyela jwalakwe, jwalakwe chachiŵa jwakusangalala soni tuchiŵa achimjakwe.—Salimo 15:1-4.
KULIJIGANYA YEJINJI
Kwende tulijiganye ligongo lyakwe kusagula achimjetu ŵambone kuli kwakusosekwa. Soni yampaka atende kuti akole achimjawo mpela ŵeleŵa.
3. Aŵeje ŵakusamala pakusagula achimjawo
Ŵandu ŵangamnonyela Yehofa soni ŵangakuya malamusi gakwe nganaŵa aŵele achimjetu ŵambone. Alolele FIDIYO, kaneko akambilane chiwusyo achi.
Ana mpaka tutande chamtuli kukunguluka ni ŵandu ŵakusakala mwangamanyilila?
Aŵalanje 1 Akolinto 15:33, kaneko akambilane yiwusyo ayi:
Ana ni ŵandu ŵapi ŵanganaŵa aŵele achimjawo ŵambone? Ligongo chichi?
Aŵalanje Salimo 119:63, kaneko akambilane chiwusyo achi:
Ana ni yindu yapi yakusosekwa kulola mwa mundu jwakusaka kuŵa mjawo?
Chisogosi chewole chikusawosyaga yosope. Ana kukunguluka ni mundu jwakusakala mpaka kwakwaye chamtuli wawojo?
4. Ŵandu ŵakulekangana ni m’weji mpaka aŵe achimjetu ŵambone
Baibulo jikusatusalila ya Daudi soni Yonatani ŵa ku Isalaeli ŵaŵaliji ŵakulekangana yaka. Konjechesya pelepa Yonatani jwaliji mwanache jwa mwenye. Atamose yaliji myoyo nambo jemanjaji ŵaliji pa ujakwe wambone. Aŵalanje 1 Samuele 18:1, kaneko akambilane chiwusyo achi:
Ligongo chichi ngatukusosekwa kusagula achimjetu ŵayaka yakulandana ni yetu kapena kusagula pakujigalila kapate kawo?
Aŵalanje Aloma 1:11, 12, kaneko akambilane chiwusyo achi:
Ana achimjetu ŵakusamnonyela Yehofa mpaka atulimbikasye chamtuli?
Mu fidiyo jakuyichisyaji, alole yaŵatesile mnyamata jwine kuti apate achimjakwe. Alolele FIDIYO, kaneko akambilane yiwusyo ayi.
Mu fidiyoji, ana ligongo chichi achinangolo ŵa Akili ŵadandawulaga yakwamba achimjakwe ŵakusukulu?
Ligongo chichi kundanda jwalakwe ŵanonyelaga achimjakweŵa?
Ana jwalakwe jwatesile yamtuli kuti apate achimjakwe ŵambone?
5. Ana mpaka tutende yamtuli kuti tukole achimjetu ŵambone?
Alole yampaka tutende kuti tukole achimjetu ŵasyesyene soni yampaka tutende kuti tuŵe mundu jwambone. Alolele FIDIYO.
Aŵalanje Misyungu 18:24 soni 27:17, kaneko akambilane yiwusyo ayi:
Ana achimjetu ŵasyesyene mpaka atukamuchisye chamtuli?
Ana wawojo akwete achimjawo mpela ŵeleŵa? Naga nganakola mpaka atende yamtuli kuti akole?
Aŵalanje Afilipi 2:4, kaneko akambilane chiwusyo achi:
Kuti akole mjawo jwambone, akusosekwa kuŵa mundu jwambone. Ana mpaka atende yeleyi mwamtuli?
Kuti apate achimjawo ŵambone nikuti wawojosoni akusosekwa kuŵa mundu jwambone
YAKUSAŴECHETA ŴANDU ŴANE: “Mpaka tusagule jwalijose kuŵa mjetu.”
Ana mpaka ajile uli ni nganisyo syelesi?
YALIJIGANYISYE
Patukusagula achimjetu mwalunda, yikusamsangalasyaga Yehofa, soni yikusaŵaga yakutukamuchisya m’weji.
Yiwusyo Yakuwilisya
Ana kasagule ketu ka achimjetu kukusamkwayaga chamtuli Yehofa?
Ana ni ŵandu ŵamtuli ŵampaka tuŵambale kwatenda kuŵa achimjetu?
Ana mpaka tutende yamtuli kuti tuŵe paunasi wakulimba ni ŵandu ŵambone?
YAKULINGA YINESONI
Alole mwakusati kutukamuchisya achimjetu ŵambone pandaŵi ja yipwetesi
“Tukamulaneje Mnope Mbesi Pajikuŵandichila” (Sanja ja Mlonda, Nofemba 2019)
Alole yindu yampaka yakamuchisye kola achimjawo ŵambone.
Ana akusosekwa kumanyilila yamtuli pangani jakupata ŵakunguluka nawo pa intaneti?
Akamulicisyeje Masengo Mwalunda Malo Gakungulucila ga pa Intaneti (4:12)
Mungani jakuti “Nasachililaga Kupata Baba” alole yayamtendekasisye mundu jwine kuti asagulesoni achimjakwe ŵane.
“Baibulo Jikusachenga Umi wa Ŵandu” (Sanja ja Mlonda, Epulo 1, 2012)