Genesesi

1 Pandanda Mlungu ŵapanganyisye kwinani* ni chilambo chapasi.

2 Pandaŵijo chilambo chapasi chaliji changali uwoneche usyesyene soni chaliji changali kandu kalikose. Mesi gejinji mnope gagumbele palipose mwamti chipi chawunichile mesi gosopego, soni machili ga Mlungu* galiji mkusyungulila penani pa mesigo.

3 Sambano Mlungu ŵatite, “Kuŵe lilanguka.” Ni kwalangwiche. 4 Ni kaneko Mlungu ŵaliweni lilangukalyo kuti lyaliji lyambone, soni Mlungu ŵalilekangenye lilangukalyo ni chipi. 5 Pelepo Mlungu ŵalikolasile lilangukalyo kuti Musi, nambo chipicho ŵachikolasile kuti Chilo. Ni papali ligulo soni papali kundaŵi, pa lisiku lyandanda.

6 Kaneko Mlungu ŵatite, “Paŵe malo gangali chilichose pasikati pa mesi, soni paŵe chakulekanganya pasikati pa mesi ni mesi gajakwe.” 7 Myoyo Mlungu ŵapanganyisye malo gangali chilichosego soni ŵagagaŵenye mesi kuti gane gaŵe pasi soni kuti gane gaŵe penani pa malo gangali chilichosego. Mwamti yaŵele myoyo. 8 Ni Mlungu ŵagakolasile malo gangali chilichosego kuti Kwinani.* Ni papali ligulo soni papali kundaŵi, pa lisiku lyaŵili.

9 Kaneko Mlungu ŵatite, “Mesi gagali pasi gasongangane nikuŵa malo gamo soni mkuli uwonechele.” Mwamti yaŵele myoyo. 10 Mlungu ŵawukolasile mkuliwo kuti Chilambo Chapasi, nambo mesi gagasongangenego ŵagakolasile kuti Nyasa. Mwamti Mlungu ŵayiweni kuti yili chenene. 11 Kaneko Mlungu ŵatite, “Pachilambo chapasi pamele manyasi, pamelesoni yakumela yakola mbele, pamelesoni yitela yakusogola yisogosi soni yakola mbeju mwakamulana ni mtundu wakwe.” Mwamti yaŵele myoyo. 12 Pachilambo chapasi pamesile manyasi, yakumela yakola mbele soni yitela yakusogola yisogosi yakola mbeju mwakamulana ni mtundu wakwe. Mwamti Mlungu ŵayiweni kuti yili chenene. 13 Ni papali ligulo soni papali kundaŵi, pa lisiku lyatatu.

14 Kaneko Mlungu ŵatite, “Kwinani kuŵe yakumulichila kuti yilekanganye pasikati pa musi ni chilo, soni kuti yiŵe yimanyisyo yakulosya nyengo soni masiku ni yaka. 15 Yakumulichilayo yiŵe kwinani kuti yimulichileje pachilambo chapasi.” Mwamti yaŵele myoyo. 16 Myoyo Mlungu ŵapanganyisye yakumulichila yiŵili yekulungwakulungwa. Ŵapanganyisye chakumulichila chekulungwa mnope kuti chimulichileje musi soni chakumulichila chamwana kuti chimulichileje chilo. Ŵapanganyisyesoni ndondwa. 17 Myoyo Mlungu ŵayiŵisile yakumulichilayi kwinani kuti yimulichileje pachilambo chapasi 18 soni kuti yimulichileje musi ni chilo, nambosoni kuti yilekanganyeje kuŵala ni chipi. Mwamti Mlungu ŵayiweni kuti yili chenene. 19 Ni papali ligulo soni papali kundaŵi, pa lisiku lyamcheche.

20 Kaneko Mlungu ŵatite, “M’mesi muŵe yaumi yejinji, soni paŵe yaguluka kuti yigulucheje mwinani.” 21 Myoyo Mlungu ŵapanganyisye yinyama yekulungwakulungwa ya m’mesi soni yaumi yiliyose yakutama m’mesi mwakamulana ni mtundu wakwe. ŵapanganyisyesoni yaguluka mwinani mwakamulana ni mtundu wakwe. Mwamti Mlungu ŵayiweni kuti yili chenene. 22 Pelepo Mlungu ŵayipele upile yakupanganyikwayo, ŵatite, “Mŵelekane soni mtupe ni mgumbale m’nyasa mosope. Nambosoni yaguluka mwinani yitupe mnope pachilambo chapasi.” 23 Ni papali ligulo soni papali kundaŵi, pa lisiku lyamsano.

24 Kaneko Mlungu ni ŵatite, “Pachilambo chapasi paŵe yaumi mwakamulana ni mitundu jakwe. Paŵe yinyama yakulanga, yinyama yakwaŵa soni yinyama yamwitinji mwakamulana ni mitundu jakwe.” Mwamti yaŵele myoyo. 25 Myoyo Mlungu ŵapanganyisye yinyama yamwitinji mwakamulana ni mitundu jakwe. Ŵapanganyisyesoni yinyama yakulanga mwakamulana ni mitundu jakwe soni yinyama yosope yakwaŵa pasi mwakamulana ni mitundu jakwe. Mwamti Mlungu ŵayiweni kuti yili chenene.

26 Kaneko Mlungu ŵatite, “Kwende tupanganye mundu m’chiwanichisyo chetu kuti aŵe jwakulandana ni m’weji. Aloleleje somba sya m’nyasa, yaguluka mwinani soni yinyama yakulanga. Alolelejesoni chilambo chosope soni yinyama yakwaŵa pachilambo chapasi.” 27 Myoyo Mlungu ŵampanganyisye mundu m’chiwanichisyo chakwe. Ŵampanganyisye mundujo m’chiwanichisyo cha Mlungu, ŵampanganyisye jwamlume ni jwamkongwe. Nambosoni Mlungu ŵapele upile jemanjajo. 28 Soni Mlungu ŵasalile jemanjajo kuti, “Mŵelekane soni mtupe. Mgumbalane pachilambo chosope soni mchigomeche. Mloleleje somba sya m’nyasa, mlolelejesoni yaguluka mwinani nambosoni chaumi chilichose chakwenda pachilambo chapasi.”

29 Kaneko Mlungu ŵatite, “Nampele jemanja chakumela chilichose chakusogola mbeju cha pachilambo chapasi soni nampele chitela chilichose chakusogola yisogosi. Nampele yeleyi kuti yiŵe yakulya yenu. 30 Nayipelechesoni yakumela yosope kuti yiŵe yakulya ya chinyama chilichose cha mwitinji soni kuti yiŵe yakulya ya chaguluka chilichose cha mwinani ni chaumi chilichose chakwenda pachilambo chapasi.” Mwamti yaŵele myoyo.

31 Pambesi pakwe Mlungu ŵalolite yindu yosope yiŵapanganyisye, mwamti ŵayiweni kuti yili chenene kwabasi. Ni papali ligulo soni papali kundaŵi, pa lisiku lya 6.