Esitele

2 Panyuma pa yeleyi, ukali wa Mwenye Ahasiwelo uli utondweŵe, ŵakumbuchile yaŵatesile Fasiti soni yaŵalamwile kuti amtende jwalakwejo. 2 Kaneko ŵamasengo ŵa mwenyewo ŵaŵechete kuti, “Atumisye achalume kuti ŵasosele wawojo mwenye asikana ŵakusalala ŵele nganagonejepo ni jwamlume. 3 Soni wawojo mwenye asagule ŵakutumichila mu yigawo yosope ya mu umwenye wawo kuti asonganganye asikana wosope ŵakusalala ŵele nganagonejepo ni jwamlume. Ŵasonganganye asikanaŵa ni kwika nawo ku Susani,* msinda waumwenye wakola yakulichenjela.* Ayiche nawo asikanawo kunyumba ja achakongwe. Hegayi jwali jwakutumichila jwa mwenye soni jwamchele,* nambosoni jwakusalolela achakongwe, ŵasamalileje asikanaŵa. Nambosoni asikanawo apakaleje mawuta gakulisalalisya. 4 Msikana juchamnonyele wawo mwenye, jwelejo ni juchaŵe ŵamkwawo wawojo mwenye kuti ajinjile mmalo mwa Fasiti.” Yaŵaŵechete ŵamasengo ŵa mwenyeyi yasangalesye mwenyewo, mwamti ŵayitesile.

5 Sambano ku Susani,* msinda waumwenye wakola yakulichenjela,* kwapali jwamlume jwine jwa Chiyuda lina lyakwe Moledekayi. Moledekayiju jwaliji mwanache jwa Yayili. Yayili jwaliji mwanache jwa Simeyi. Simeyi jwaliji mwanache jwa Kisi jwa mu mbumba* ja Benjamini. 6 Jwalakwe ŵajigalidwe ku ukapolo kutyochela ku Yelusalemu yimpepe ni ŵandu ŵaŵajigalidwe pampepe ni Mwenye Yekoniya* jwa ku Yuda. Jemanjaji ŵajigalidwe ni Mwenye Nebukadinesala jwa ku Babulo kwawula nawo ku ukapoloko. 7 Jwalakwe ni juŵamlelaga* Hadasa* jwali Esitele. Esiteleju ŵaliji mwanache jwa alongo ajawo* ŵa baba ŵawo Moledekayijo. Ŵamlelaga ligongo lyakuti Esitelejo nganakola babagwe kapena mamagwe. Msikanaju jwaliji jwakusalala mnope soni jwaliji jwamgumbiche chenene. Babagwe ni mamagwe ŵa msikanaju paŵajasiche, Moledekayi ŵamjigele jwalakwe kuti aŵe mpela mwanache jwakwe. 8 Maloŵe ga mwenye soni lilamusi lyawo palyapikaniche, ŵasongangenye asikana ku Susani,* msinda waumwenye wakola yakulichenjela.* Hegayi ni juŵalolelaga jemanjaji. Nombenajo Esitele ŵamjigele ni kwawula ku nyumba ja mwenye, mwamti Hegayi juŵalolelaga achakongwe ŵamsamalilagasoni jwalakwe.

9 Sambano msikanajo ŵamsangalesye Hegayi soni ŵamnonyele,* mwamti ŵalinganyisye yakuti msikanaju apakaleje mawuta gakulisalalisya soni alyeje yakulya yambone. Ŵampelesoni asikana 7 ŵakutyochela ku nyumba ja mwenye kuti amtumichileje. Nambosoni ŵamsamichisye jwalakwejo pampepe ni asikana ŵakumtumichilawo ku malo gambone mnope kunyumba ja achakongwejo. 10 Esitele nganaŵecheta chilichose chakwayana ni ŵandu ŵakwe kapena ŵachibale ŵakwe, pakuŵa Moledekayi ŵamsalile jwalakwejo kuti akamsalila yeleyi jwalijose. 11 Lisiku lililyose, Moledekayi ŵajendaga kusogolo kwa luŵala lwa nyumba ja achakongwe ni chakulinga chakuti amanyilile mwaŵelele Esitele, soni kuti amanyilile yayikumtendechela jwalakwejo.

12 Msikana jwalijose jwakolaga ndaŵi jakwe jakuja kuwonechela kwa Mwenye Ahasiwelo. Jwalakwe jwajawulaga kuja kuwonechela kwa mwenyewo panyuma pa myesi 12 jakulisalalisya jaŵampaga jwamkongwe jwalijose. Pa myesi jeleji ŵaŵaga kuti amalisisye kulisalalisya. Kwa myesi 6, asikanaŵa ŵapakalaga mawuta ga mule, soni kwa myesi 6 jine ŵapakalaga mawuta ga basamu soni mawuta ga mitundu jakulekanganalekangana kuti asalale. 13 Panyuma pa yeleyi, jwamkongwejo jwaŵaga kuti akoseche kuja kuwonegana ni mwenye. Nambosoni ŵampaga chilichose chaŵendile pakutyoka kunyumba ja achakongwe kwawula kunyumba ja mwenye. 14 Ligulo msikanajo jwajawulaga kwa mwenye soni pakuchele jwatyokaga kwa mwenyewo ni kwawula ku nyumba jaŵili ja achakongwe. Sasigasi juŵaliji jwakutumichila jwa mwenye soni juŵaliji jwamchele ni juŵamsamalilaga msikanajo kweleko. Sasigasijo jwalolelaga achakongwe ŵapambali ŵa mwenye, mwamti msikanajo nganajawulagasoni kwa mwenyewo kulekapo naga mwenyewo amnonyele soni amŵilasisye mwakumkolanga lina.

15 Kaneko jakwanile ndaŵi jakuti Esitele akawonechele kwa mwenye. Esitele jwaliji mwanache jwa Abihayilo ŵaŵaliji alongo ajawo ŵa babagwe Moledekayi. Moledekayijo ŵamjigele Esiteleju kuti aŵe mpela mwanache jwakwe. Pandaŵi jele Esitele ŵajawulaga kuja kuwonechela kwa mwenyeko, nganaŵenda chilichose kulekapo yaŵamsalile Hegayi jwakutumichila jwa mwenye juŵaliji jwamchele soni juŵalolelaga achakongwe. (Pandaŵi josopeji, jwalijose jwam’weni Esitele ŵamnonyelaga.) 16 Esitele ŵamjigele kuja kuwonechela ku nyumba jaumwenye ja Mwenye Ahasiwelo m’mwesi wa 11 wawuli mwesi wa Tebeti,* m’chaka cha 7 cha ulamusi wa mwenyewo. 17 Mwenyewo ŵamnonyele mnope Esitele kupunda achakongwe ŵane wosope, mwamti mwenyewo ŵasangalele najo mnope kupunda asikana ŵane ŵala. Myoyo jwalakwe ŵam’wechiche Esitelejo nduŵila jaumwenye kumtwe kwakwe, mwamti jwaŵele ŵamkwawo mwenye mmalo mwa Fasiti. 18 Kaneko mwenyewo ŵalinganyichisye pwando ŵakulongolela ŵakwe wosope soni ŵakutumichila ŵakwe. Pwandoji jaliji ja Esitele. Nambosoni mwenyewo ŵalamwile kuti akayidi ŵa mu yigawo* yawo yosope ŵagopole soni mwenyewo ŵapelekaga mituka mwakamulana ni chipanje chaŵakwete.

19 Sambano paŵasongangenyesoni kaŵili asikana ŵala, Moledekayi ŵaliji ali atemi pa geti ja mwenye. 20 Esitele nganaŵecheta chilichose pakwamba ya ŵachibale ŵakwe soni ya ŵandu ŵa mtundu wakwe, mwakamulana ni yaŵamlamwile Moledekayi. Esitelejo jwapitilisye kumpikanila Moledekayi mpela muŵatendelaga pandaŵi jiŵamlelaga.

21 M’masiku gelego Moledekayi paŵaliji mkutama pa geti ja mwenye, Bigitani soni Telesi ŵaŵaliji nduna siŵili sya mwenye soni ŵaŵalondelaga pageti, ŵatumbile mnope, mwamti ŵalinganyisye yakumwulaga Mwenye Ahasiwelo. 22 Nambo Moledekayi ŵamanyilile yeleyi, mwamti ndaŵi jijojo ŵamsalile Esitele juŵaliji ŵamkwawo mwenye. Kaneko Esitelejo ŵasalile yeleyi mwenyewo mmalo mwa Moledekayijo. 23 Myoyo ŵajiwungunyisye nganiji soni ŵapatile kuti yili yisyene, mwamti achalumewo ŵakoleche pachitela. Yeleyi ŵayilembile mu buku ja mbili ja mundaŵijo mwenyewo ali mkulola.