Chikalata Chaŵili Chakwawula kwa Timoteyo

3 Nambo mmwejo mmanyilile kuti, masiku gakumalisya jichiŵa ndaŵi jakusawusya soni jakogoya. 2 Pakuŵa ŵandu chachiŵa ŵakulinonyela, ŵakunonyela mbiya, ŵakulipikana, ŵakulikwesya, ŵakunyosya, ŵangapikanila achinangolo, ŵangayamika, soni ŵangakulupichika. 3 Chachiŵasoni ŵanganonyela achalongo achimjawo, ŵangasaka kukamulana ni ŵane, ŵakwalambuchisya achimjawo, ŵangalilekasya, ŵakogoya, ŵanganonyela yindu yambone, 4 ŵakwapeleka achimjawo kwa adani, ŵangapikana ya ŵane, ŵakunyada, soni ŵakunonyela yakusangalasya mmalo mwakumnonyela Mlungu. 5 Nambosoni chachiwonekaga mpela ŵandu ŵakulipeleka kwa Mlungu nambo umi wawo uchiŵa wakutindana ni kulipeleka kwawoko. Ŵandu ŵamti myiyi mwaŵambaleje. 6 Pasikati pa ŵandu ŵeleŵa pakusapagwa achalume ŵane, ŵele mwaukalamusi akusajinjilaga m’majumba ni kwanyenjelelaga achakongwe. Achakongwe ŵeleŵa akusaŵa ŵangalimba m’chikulupi soni ŵakusitopelwa ni yakulemwa yakwika ligongo lya yakumbila yakulekanganalekangana. 7 Jemanjaji akusaŵa ali mkulijiganya ndaŵi syosope, nambo ŵangapikanichisyaga yijiganyo yisyesyene.

8 Mpela muŵatendele Yane soni Yambule pakumsisya Mose, jemanjajisoni akusasisyaga yijiganyo yisyesyene. Achalume ŵeleŵa ali ŵakusokonechela nganisyo, soni Mlungu ŵakanile jemanjaji ligongo ŵangatenda yindu mwakamulana ni yatukusakulupilila. 9 Ŵandu ŵeleŵa yindu ngasiyajendela chenene, ligongo kuloŵela kwawo kuchiwonechela kwa wosope mpelaga muyaŵelele ni achalume ŵaŵili ŵala. 10 Nambo mmwejo mkuyisye chenene yakwiganya yangu, ndamo syangu, yakulinga yangu, chikulupi changu, kuwusimana mtima kwangu, chinonyelo changu soni kupilila kwangu. 11 Nambosoni mmwejo mkumanyilila chenene kulagasidwa kwangu soni yipwetesi yanasimene nayo ku Antiyokeya, ku Ikoniyo soni ku Lusitala. Unejo nalasile mnope, nambope Ambuje ŵangulupwisye ku yakupweteka yosopeyo. 12 Pajatu ŵakulijiganya wosope ŵa Yesu ŵakusachilila kutama ni umi wakulipeleka kwa Mlungu nombenawo chachilagasidwa. 13 Nambo ŵandu ŵakusakala soni ŵaunami chachiŵa ali mkusakalilape, mwamti chachasokonasyaga ŵane soni ŵandu chachasokonasyaga jemanjajo.

14 Nambo mmwejo mpitilisye kukuya yindu yamwalijiganyisye. Yindu yeleyi mwayikulupilile panyuma pakuyisimichisya kuti yili yisyesyene, pakuŵa mkwamanyilila chenene ŵandu ŵaŵamjiganyisye yinduyo. 15 Nambosoni kutandila pamwaliji mwanache mmanyilile malemba geswela, gele gampaka gampe lunda kuti chimkulupuche kupitila mu kukulupilila kwenu Klistu Yesu. 16 Malemba gosope galembedwe mwakulongoleledwa ni Mlungu, soni gali gakamuchisya pakwiganya, pakwamuka, pakongola yangalondeka, soni pakamuchisya kuti tutendeje yakuŵajilwa, 17 ni chakulinga chakuti jwakutumichila jwa Mlungu aŵe jwakwanila chenene soni jwakoseka kutenda masengo galigose gambone.