Masengo ga Ŵandumetume

2 Sambano pa lisiku lya Chisangalalo cha Pentekosite, ŵakulijiganya wosope ŵala ŵasongangene pampepe. 2 Mwakusisimuchisya, papikaniche masegwe kutyochela kwinani, mpela mkokomo wa mbungo, mwamti masegwego gagumbele m’nyumba muŵaliji jemanjajo. 3 Kaneko pawoneche malamba ga moto gakuwoneka mpela malulumi ni gagaŵikangene, mwamti lilamba lililyose lyayiche pa jwalijose jwa jemanjajo. 4 Pelepo msimu weswela waŵele pa jemanjajo. Kaneko ŵatandite kuŵecheta yiŵecheto yakulekanganalekangana, mwakamulana ni yawatite msimuwo pakwalongolela.

5 Pandaŵijo, Ayuda ŵakogopa Mlungu ŵakutyochela m’yilambo yakulekanganalekangana pachilambo chapasi ŵaliji mkutama ku Yelusalemu. 6 Myoyo masegwego pagapikaniche, ŵandu ŵasongene pampepe, nambosoni ŵasimonjile mnope ligongo ŵaliji mkwapikana ŵakulijiganyawo ali mkuŵecheta mu yiŵecheto yakulekanganalekangana ya ŵanduwo. 7 Nditu yeleyi yasimonjesye mnope jemanjaji mwamti ŵatite, “Alole, ana ŵandu wosope ŵakuŵechetaŵa ngaŵa ali ŵakutyochela ku Galileya? 8 Nambi yikukomboleka uli kuti jwalijose jwa m’weji ŵapikaneje jemanjaji ali mkuŵecheta mu chiŵecheto chakwe?* 9 Pasikati petu pana ŵandu ŵakutyochela ku Pati, Mediya, Elamu, Mesopotamiya, Yudeya, Kapadokiya, Ponto, soni ku Asiya. 10 Ŵanesoni ali ŵakutyochela ku Fulugiya, Pamfuliya, Iguputo, madela gane ga ku Libiya gakuŵandikana ni ku Kulene, nambosoni ŵandu ŵakutyochela ku Loma. Pa wosopem’we, ŵane ali Ayuda soni ŵane ali ŵakwinjila Chiyuda. 11 Panasoni ŵandu ŵakutyochela ku Kelete soni ku Alabiya. Wosopem’we tukwapikana jemanjaji ali mkuŵecheta mu yiŵecheto yetu yindu yamachili yatesile Mlungu.” 12 Yisyene, wosopewo ŵasimonjile mnope mwamti ŵaliji mkuwusyana kuti, “Ana yeleyi yikugopolela chichi?” 13 Nambo ŵandu ŵane ŵaliji mkwanyosya. Ŵaliji mkuŵecheta kuti, “Akolelwe jemanjajo.”

14 Sambano Petulo pampepe ni ŵandumetume ŵane 11 ŵala ŵajimi. Kaneko jwalakwe ŵatandite kuŵecheta kwa ŵanduwo mwakwesya maloŵe kuti, “Jemanja ŵandu ŵa ku Yudeya nambosoni wosope ŵamkutama ku Yelusalemu, mpikanichisye yangusaka kumsalilayi. 15 Ŵandu aŵa nganakolelwa, mpela yamkuti pakuganisya jemanja, pakuŵa akuno kuli kundaŵi.* 16 Nambo yakutenda jemanjaji ni yaŵasasile Yoweli. Jwalakwe ŵatite, 17 “Mlungu akuŵecheta kuti, ‘Mundaŵi jakumalisya chinjipeleka msimu wangu kwa ŵandu ŵakulekanganalekangana, mwamti ŵanache ŵenu ŵachalume ni ŵachakongwe chachisala yamsogolo, anyamata ŵenu chachiyiwona yindu m’mesomkulola soni ŵachikulile chachisagamila sagamisi. 18 M’masiku gelego chinjipelekasoni msimu wangu kwa achikapolo ŵangu ŵachalume soni ŵachakongwe, mwamti nombe nawo chachisala yamsogolo. 19 Soni chinjitenda yakusimonjesya kwinani soni pachilambo chapasi. Yakusimonjesya yakwe yichiŵa myasi, moto soni lyosi. 20 Lyuŵa lichitenda chipi soni mwesi uchichejela mpela myasi. Yeleyi yichitendekwa lisiku lyekulungwa soni lyakuchimbichika lya Yehofa mkaniliyiche. 21 Soni jwalijose jwakuŵilanjila pa lina lya Yehofa chachikulupuka.”’

22 “Jemanja ŵandu ŵa ku Yisalayeli, mpikane ayi: Jemanja mkumanyilila chenene kuti Yesu jwa ku Nasaleti ŵatumidwe ni Mlungu. Mlungujo ŵatendaga yindu yamachili soni yakusimonjesya pasikati penu kupitila mwa jwalakwejo. 23 Mundu jweleju, jemanja mwampeleche kwa ŵandu ŵangakuya malamusi kuti amwulaje mwakumkomela pachitela. Mlungu ŵayimanyi kala yeleyi soni yatendekwe mpela muŵasachilaga. 24 Nambo Mlungujo ŵamgopwele jwalakwejo ku yakupweteka ya chiwa mwakumjimusya, ligongo yaliji yangakomboleka kuti chiwacho chikole machili gakumlepelekasya jwalakwejo kwimuka. 25 Daudi ŵaŵechete yakwamba jwalakwejo kuti, ‘Yehofa ali pasogolo pangu ndaŵi syosope. Jwalakwejo ali kumkono wangu wamlyo kuti ngatenganyika mpaka kalakala. 26 Ni ligongo lyakwe ngusangalala mnope mumtima mwangu soni lulumi lwangu lukuŵecheta mwakusangalala mnope. Une chinjiŵape ndili mkwembecheya, 27 ligongo wawojo ngasandeka une m’Malembe,* soni ngasakunda kuti jwakulupichika jwawo awole. 28 Wawojo ŵamanyisye une litala lya ku umi. Chinjiŵa jwakusangalala mnope kuŵa pameso pawo.’

29 “Achalongo achimjangu, ngusaka nalondechesye chenene yakwamba nangolo jwetu Daudi. Jwalakweju ŵawile soni ŵamsichile m’malembe, mwamti malembe gakwego gapali mpaka lelo. 30 Jwalakweju jwaliji jwakulochesya soni jwamanyililaga kuti Mlungu ŵalumbile kuti jumo mwa ŵanache ŵakwe chachitama pampando wakwe waumwenye. 31 Myoyo, jwalakwe jwakuweni chile kwimuka kwa Klistu, soni jwasasile kuti Klistujo ngasamleka m’Malembe* soni chilu chakwe ngasachileka kuti chiwole. 32 Mlungu ŵamjimwisye Yesu jweleju, soni wosopem’we tuli mboni sya yeleyi. 33 Jwalakwejo ŵamkwesisye ni kumŵika kumkono wamlyo wa Mlungu soni ŵapochele msimu weswela wele Atati ŵamsalile kuti chachimpa. Myoyo jwalakwejo ni jwatumisye yamkuyiwonayi soni yamkuyipikanayi. 34 Daudi nganajawula kwinani, nambo msyenejo ŵaŵechete kuti, ‘Yehofa ŵasalile Ambuje ŵangu kuti, “Mtame kumkono wangu wamlyo 35 mpaka pachinjaŵika adani ŵenu pasi mpela chakupondapo sajo syenu.”’ 36 Myoyo, nyumba josope ja Yisalayeli jikusosekwa kumanyilila nditu kuti Yesu jweleju, jwele jemanja mwamwuleje mwakumkomela pachitela, Mlungu ŵamŵisile kuŵa Ambuje soni Klistu.”

37 Sambano ŵanduwo paŵapikene maloŵe gelega, yaliji mpela asomedwe mumtima. Myoyo ŵamwusisye Petulo pampepe ni ŵandumetume ŵanewo kuti, “Achalongo achimjetu, ni tutende uli sambano?” 38 Petulo ŵajanjile kuti, “Mgalawuche mtima, soni jwalijose jwa jemanja abatisidwe m’lina lya Yesu Klistu kuti akululuchidwe yakulemwa yakwe. Kaneko chimchipochela msimu weswela wele Mlungu akusawupeleka mwalulele. 39 Pakuŵa Mlungu ŵasasile kuti chachipeleka msimuwo kwa jemanja soni ŵanache ŵenu, nambosoni kwa wosope ŵakutama kwakutalika, wosope ŵele Yehofa Mlungu jwetu akwaŵilanjila kwa jwalakwejo.” 40 Petulo ŵalondechesyesoni chenene yindu yine yejinji. Nambosoni ŵaliji mkwachondelela jemanjajo kuti, “Mlilekanganye ni ŵandu ŵa m’bado* wakusakalawu kuti mkajonasika.” 41 Myoyo ŵandu wosope ŵaŵagapochele mwakusangalala maloŵe gakwego ŵabatisidwe, mwamti palisiku lyelelyo ŵandu ŵakwana 3,000 ŵajonjechekwe pagulu ja ŵakulijiganyawo. 42 Ŵanduŵa ŵalipelekaga pakulijiganya yindu kutyochela kwa ŵandumetumewo, pakusongana, kulya pampepe, nambosoni kupopela.

43 Nditu jwalijose ŵaliji mkumjogopa Mlungu, soni ŵandumetumewo ŵatandite kutenda yakusimonjesya yejinji. 44 Wosope ŵaŵaŵele ŵakulupilila ŵasongene pampepe soni ŵaliji mkugaŵana yiliyose yaŵakwete. 45 Nambosoni ŵaliji mkusumisya migunda jawo soni yindu yawo yosope. Mbiya syakwesyo ŵasigaŵanyaga kwa jwalijose, mwakamulana ni kusoŵa kwakwe. 46 Lisiku lililyose jemanjaji ŵaliji mkusongana ku nyumba ja Mlungu. Ŵalijisoni mkuŵilangana ku nyumba syawo ni kulyaga pampepe nambosoni ŵaliji mkugaŵana yakulya mwakusangalala mnope soni mwakusachilila. 47 Ŵalijisoni mkumchimbichisya Mlungu, nambosoni ŵandu wosope ŵaliji mkwanonyela jemanjaji. Lisiku lililyose Yehofa ŵaliji mkonjechesya ŵandu ŵele jwalakwejo ŵaliji mkwakulupusya.