NGANI JAKULIJIGANYA 5
Tulongane Nawo
“Tulongane nawo ligongo tupikene kuti Mlungu ali ni ŵalakwe [“jemanja,” NW].”—SAK. 8:23.
NYIMBO 26 Mwandendele Une
YACHITULIJIGANYEa
Ŵangondolo sine (“ŵandu likumi”) apochele upile wakutumichila Yehofa pampepe ni ŵasagulwe (“Myuda”) (Alole ndime 1-2)
1. Ana Yehofa ŵasasile kuti chichitendekwa chichi mundaŵi jetu jino?
Yehofa ŵasasile yakwamba ndaŵi jetu jino kuti, “Ŵandu likumi kutyochela ku mitundu ja ŵandu ŵakuŵecheta yiŵecheto yakulekangana tachikamula mkanjo wa Myuda ni kuŵecheta kuti, ‘Tulongane nawo, ligongo tupikene kuti Mlungu ali ni [“jemanja,” NW].’” (Sak. 8:23) Maloŵe gakuti “Myuda” gakwimila ŵandu ŵele Mlungu ŵasagwile ni msimu weswela. Jemanjaji akusakolanjidwasoni kuti “ŵandu ŵa ku Isalaeli” kapena kuti Isalaeli jwa Mlungu. (Aga. 6:16) “Ŵandu likumi kapena kuti 10” akwimila ŵakwete chembecheyo chakutama pachilambo chapasi mpaka kalakala. Jemanjaji akusamanyilila kuti Yehofa ŵapele upile ŵasagulweŵa nambosoni kuti wuli upile kumtumichila Yehofajo pampepe ni jemanjajo.
2. Ana “ŵandu likumi” ‘akusalongana nawo’ ŵasagulwe mwamtuli?
2 Atamose kuti yili yangakomboleka kumanyilila lina lya mundu jwalijose jwali jwamsagulwe pachilambo pano,b nambope ŵakwete chembecheyo chakutama pachilambo chapasi mpaka “ajawule nawo” ŵasagulweŵa kapena kuti kutenda nawo yindu yine yimpepe. Ana yeleyi mpaka yikomboleche chamtuli? Baibulo jikusati “ŵandu likumi” “chachikamula mkanjo wa Myuda, ni kuŵecheta kuti ‘tulongane nawo, ligongo tupikene kuti Mlungu ali ni jemanja.’” Ndime ja m’Baibulo jikusala ya Myuda jumpepe. Nambo maloŵe gakuti “nawo” soni gakuti “jemanja” gakulosya kuti apali ŵajinji. Yeleyi yikugopolela kuti liloŵe lyakuti Myuda ngalikwimila mundu jumo, nambo likwimila gulu josope ja ŵasagulwe. Ŵandu ŵanganaŵa ŵasagulwe akusatumichila Yehofa yimpepe ni ŵasagulwe. Nambope jemanjaji, ngakusaŵawona ŵasagulwe mpela kuti ali achimlongola ŵawo soni akusamanyilila kuti Yesu ni jwali Mlongola jwawo.—Mat. 23:10.
3. Ana ngani ajino chijinjaje yiwusyo yapi?
3 Ligongo lyakuti masiku agano tukutama yimpepe ni ŵandu ŵasagulwe, mwine ŵane mpaka asimonjeje kuti, (1) Ana ŵasagulwe akusosekwa kuliwona mwamtuli? (2) Ana tukusosekwa kutenda yindu mwamtuli ni ŵandu ŵakusalya mkate soni kumwa finyo pa Chikumbuchilo? (3) Ana tukusosekwa kudandawula ligongo lya kukwela kwa chiŵalanjilo cha ŵandu ŵakusalya mkate soni kumwa finyo pa Chikumbuchilo? Ngani ajino chijijanje yiwusyoyi.
ANA ŴASAGULWE AKUSOSEKWA KULIWONA MWAMTULI?
4. Ana ni maloŵe gapi gagakusimanikwa pa 1 Akolinto 11:27-29 gele ŵasagulwe akusosekwa kugaganichisya mwakusamala, soni ligongo chichi?
4 Ŵasagulwe akusosekwa kuganichisya mwakusamala maloŵe gagakusimanikwa pa 1 Akolinto 11:27-29. (Aŵalanje.) Ana ŵasagulwe mpaka alye mkate soni kumwa finyo pa Chikumbuchilo ‘mwangaŵajilwa’ chamtuli? Mpaka yiŵe myoyo naga mundujo akulya mkate soni kumwa finyo ali mkumanyilila kuti akusatenda yakutindana ni malamusi ga Yehofa. (Aheb. 6:4-6; 10:26-29) Ŵasagulwe akusamanyilila kuti akusosekwa kuŵape ŵakulupichika naga akusaka kuja kupochela ‘mbote ja kwinani jakwaŵilanjila Mlungu kupitila mwa Klistu Yesu.’—Afil. 3:13-16.
5. Ana Aklistu ŵasagulwe akusosekwa kuliwona mwamtuli?
5 Msimu wa Yehofa ukusiwakamuchisya ŵakutumichila ŵa Yehofa kuti aŵeje ŵakulinandiya mmalo mwakulikwesya. (Aef. 4:1-3; Akolo. 3:10, 12) Myoyo, ŵasagulwe ŵangaliwonaga kuti ali ŵakusosekwa kupunda ŵane. Akusamanyilila kuti Yehofa ngakusiŵapa jemanjaji msimu weswela wejinji kupunda wakusapochela ŵakutumichila ŵane. Ŵangaganisyaga kuti akusawupikanichisya chenene usyesyene wa m’Baibulo kupunda jwalijose. Soni jemanjaji nganaŵa amsalile mundu jwine kuti une sagulidwe mwamti sambano chindande kulya soni kumwa pa Chikumbuchilo. Mmalo mwakwe jwalakwe akusamanyilila kuti pangali mundu jwine jwakusiŵasalila ŵane ya kwawula kwinani akaŵe Yehofape.
6. Mwakamulana ni 1 Akolinto 4:7, 8, ana ŵasagulwe akusosekwa kutenda yindu mwamtuli?
6 Atamose kuti ŵasagulwe akusawuwona kuŵa upile wekulungwa kuŵilanjidwa kwinani, nambope jemanjaji ŵangasakaga kuti ŵandu ŵane ŵatendeleje yindu m’litala line lyakwe. (Afil. 2:2, 3) Jemanjaji akusamanyililasoni kuti paŵasagulidwe, Yehofa nganakunda kuti jwalijose amanyilile ya kusagulidwaku. Myoyo mundu jwamsagulwe jwangasimongaga ŵandu ŵane pakukayichila yakuti jwalakwe asagulidwe. Jwamsagulweju akusamanyilila kuti Baibulo jikusatusalila kuti tukajanguyaga kumkulupilila mundu jwakusala kuti Mlungu ampele udindo winewakwe. (Chiw. 2:2) Mklistu jwamsagulwe jwangasakaga kuti ŵandu ampeje ulemu winewakwe. Myoyo jwalakwe pasimene ni ŵandu ngakusiŵasalilaga kuti ali jwamsagulwe soni jwangalikwesyaga.—Aŵalanje 1 Akolinto 4:7, 8.
7. Ana ŵasagulwe akusosekwa kuŵambala kutenda chichi, soni ligongo chichi?
7 Aklistu ŵasagulwe ngakusaliwona kuti akusosekwa kukungulukaga ni ŵasagulwepe mpela kuti ali mu kagulu kanekakwe kapajika. Jemanjaji ŵangasonganaga malo gamo kuti akambilaneje yakwayana ni kusagulwa kwawo kapena kusimana panepakwe kuti alijiganyeje Baibulo yimpepe. (Aga. 1:15-17) Naga ŵasagulwe akutenda yeleyi nikuti mpaka atendekasye kuti mpingo ukaŵa wakamulana. Jemanjaji mpaka aŵesoni kuti akulimbana ni msimu weswela wawukusakamuchisyaga ŵandu kuti aŵe ŵakamulana.—Alo. 16:17, 18.
ANA TUKUSOSEKWA KUTENDA YINDU MWAMTULI NI ŴASAGULWE?
Ngatukusosekwa kwatendekasya ŵasagulwe kapena ŵaliwose ŵakwete udindo wakulongolela kuwoneka mpela ali ŵapenani mnope (Alole ndime 8)f
8. Ligongo chichi tukusosekwa kuŵa ŵakusamala ni mwatukusatendela ni ŵandu ŵakusalya mkate soni kumwa finyo pa Chikumbuchilo? (Alole maloŵe gamwiŵanda.)
8 Ana tukusosekwa kutenda yindu mwamtuli ni abale ni alongo ŵasagulwe? Kuli kulemwa kumchimbichisya mundu mwakupelenganya malile, atamose kuti ali Mklistu jwamsagulwe. (Mat. 23:8-12) Baibulo pajikusala ya achakulungwa ŵamumpingo, jikusatulimbikasya kuti ‘tusyasyeje chikulupi chawo,’ nambo jangasala kuti tum’woneje mundu jwine mpela mlongola jwetu. (Aheb. 13:7) Yili yisyene kuti Baibulo jikusati ŵane akusasosekwa “kupochela uchimbichimbi.” Nambo ngatukusapeleka uchimbichimbi ligongo lyakuti ali ŵasagulwe, nambo ligongo lyakuti ‘akusalongolela chenene’ soni ‘akusakamula masengo gakulalichila ni kwiganya maloŵe ga Mlungu.’ (1 Tim. 5:17) Naga tukwapa ŵasagulwe ulemu ŵakupelenganya nikuti tuchatendekasya kuti adandawuleje.c Kapenasoni mpaka twatendekasye kuti atande kulikwesya. (Alo. 12:3) Pangali jwalijose jwetuwe jwampaka asache kwatendekasya Aklistu ŵasagulweŵa kuti atende ulemwa wekulungwawu.—Luk. 17:2.
9. Ana mpaka tulosye chamtuli kuti tukusachimbichisya Aklistu ŵasagulwe?
9 Ana mpaka tulosye chamtuli kuti tukusachimbichisya ŵandu ŵasagulidwe ni Yehofa? Nganituŵa twawusisye jemanjaji kuti atusalile mwayaŵelele kuti aŵe ŵasagulwe. Ngatukusosekwa kwinjilila ngani jeleji ligongo ngajikutuŵandika. (2 Ates. 3:11) Ngatukusosekwa kuganisya kuti ŵamkwakwe ŵa mundu jwamsagulidwe, achinangolo kapena ŵachibale ŵakwe alisoni ŵasagulwe. Ngani ja kola chembecheyo chakwawula kwinani nganijiŵa jakujigalila kutyochela kumtundu. Mlungu ni jwakusampa mundu chembecheyochi. (1 Ates. 2:12) Ngatukusosekwa kuwusya yiwusyo yampaka yakuŵasye ŵane. Mwachisyasyo, nganituŵa twawusisye ŵamkwakwe m’bale jwamsagulwe mwakupikanila pakuyiwona kuti chachitamaga pachilambo chapasi mpaka kalakala kuli kwangali ŵamkwakwe. Tuŵeje ŵakusimichisya kuti m’chilambo chasambano, Yehofa ‘chachichipa chaumi chilichose yachikusaka.’—Sal. 145:16.
10. Ana mpaka tulichenjele chamtuli patukuŵambala “kwalumba ŵandu ŵane”?
10 Naga ngatukwawona ŵasagulwe kuti ali ŵapenani mnope kwapunda ŵane nikuti tuchilichenjela achimsyewe. Chamtuli? Baibulo jikusatusalila kuti ŵasagulwe ŵane chachilepela kuŵa ŵakulupichika. (Mat. 25:10-12; 2 Pet. 2:20, 21) Nambo naga tukuŵambala ‘kwalumba ŵandu ŵane,’ nikuti nganituŵa twasyasisye pa yiliyose yakusatenda, atamose ŵali ŵasagulwe kapena ŵakumanyika mnope soni ŵatumichile Yehofa kwandaŵi jelewu. (Yud. 16) Jemanjaji paŵele ŵangakulupichika kapena kutyoka mumpingo, nikuti ngasituleka kumkulupilila Yehofa kapena kumlambila.
ANA TUDANDAWULEJE NI KUTUPA KWA ŴAKUSALYA MKATE SONI KUMWA FINYO PA CHIKUMBUCHILO?
11. Ana paŵele pali mkutendekwa chichi pangani ja chiŵalanjilo cha ŵakusalya mkate soni kumwa finyo pa Chikumbuchilo?
11 Kwa yaka yejinji, chiŵalanjilo cha ŵandu ŵaŵalyaga mkate soni kumwa finyo pa Chikumbuchilo chatulukaga mnope. Nambo apano chiŵalanjilochi chigamba kwela chaka chilichose. Ana tukusosekwa kudandawula ni yeleyi? Iyayi. Kwende tukambilane ligongo lyakwe.
12. Ligongo chichi ngatukusosekwa kudandawula ya chiŵalanjilo cha ŵandu ŵakusalya mkate kapena kumwa finyo pa Chikumbuchilo?
12 “Ambuje akwamanyilila ŵele ŵali ŵakwe.” (2 Tim. 2:19) Mwakulekangana ni Yehofa, abale ŵakusaŵalanga ŵandu ŵalile mkate soni kumwa finyo pa Chikumbuchilo ŵangamanyilila mundu jwasagulidwe yisyesyene. Myoyo chiŵalanjilochi chikusapwatika ŵandu ŵakuganisya kuti ali ŵasagulwe nambo ali nganaŵa. Mwachisyasyo, ŵandu ŵane ŵaŵalyaga soni kumwa pa Chikumbuchilo, kupita kwandaŵi ŵalesile. Ŵane mpaka alye mkate soni kumwa finyo ligongo lya ungakamula mtwe, yampaka yatendekasye kuliwona kuti chakalamulile yimpepe ni Klistu kwinani. Kusala yisyene ngatukumanyilila chiŵalanjilo cha ŵasagulwe ŵasigele pachilambo chapasichi.
13. Ana Baibulo jikusasalaga chiŵalanjilo cha ŵasagulwe ŵachachiŵa chiŵela pachilambo chapasi yisawusyo yekulungwa payichitandaga?
13 Ŵasagulwe ŵane chachiŵape ali apali pandaŵi jele Yesu chachiyika kukwajigala kuti ajawuleje kwinani. (Mat. 24:31) Baibulo jikusasala kuti m’masiku gambesi, pachipagwa ŵasagulwe ŵamnono ŵachachiŵa chiŵela pachilambo chapasi. (Chiw. 12:17) Nambo jangasala kuti pachilambochi pachisigala ŵasagulwe ŵalingwa pandaŵi jakutanda kwa yisawusyo yekulungwa.
Ana ngatukusosekwa kutenda chichi patukum’wona mundu jwine ali mkulya mkate soni kumwa finyo pa Chikumbuchilo? (Alole ndime 14)
14. Mwakamulana ni Aloma 9:11, 16, ana tukusosekwa kumanyilila yamtuli pakwamba ya kasagulidwe ka Aklistu ŵasagulwe?
14 Yehofa akusasagula jika ndaŵi jakusaka kumsagula mundu. (Alo. 8:28-30) Yehofa jwatandite kwasagula ŵandu pandaŵi jele Yesu ŵajimwiche kuŵawe. Yikuwoneka kuti m’yaka 100 yandanda Aklistu wosope ŵaliji ŵasagulwe. M’yaka yakuyichisya, ŵandu ŵajinji ŵaŵalikolangaga kuti ali Aklistu nganamkuyaga Klistujo yisyesyene. Atamose kuti yaliji myoyo, Yehofa aŵele ali mkusagula ŵandu ŵane ŵaŵaliji Aklistu ŵasyesyene kuti aŵe ŵasagulwe. Jemanjaji ŵaliji mpela tiligu jwele Yesu ŵasasile kuti chachikula pasikati pa namsongole. (Mat. 13:24-30) M’masiku gambesi gano Yehofa akupitilisyape kusagula ŵandu ŵachachiŵa m’likuga lya ŵa 144,000.d Myoyo, naga Mlungu akwasagulape jemanjaji chilambochi mkanichimale, ngatukusosekwa kumkayichila jwalakwe. (Aŵalanje Aloma 9:11, 16.)e Ngatukusosekwa kutenda yindu mpela muŵatendele ŵamasengo ŵaŵakolasile Yesu mu chisyasyo chine. Ŵamasengoŵa ŵadandawile ni muŵatendele msyene mgunda pakupeleka malipilo kwa ŵandu ŵaŵakamwile masengo chakumbesi.—Mat. 20:8-15.
15. Ana wasagulwe wosope ali mbali ja “kapolo jwakulupichika ni jwalunda,” jwakukolanjidwa pa Mateyu 24:45-47? Alondesye.
15 Ngaŵa kuti wosope ŵakwete chembecheyo cha kuja kutama kwinani ali m’likuga lya “kapolo jwakulupichika ni jwalunda.” (Aŵalanje Mateyu 24:45-47, NW.) Mpela mwayaŵelele m’yaka 100 yandanda, masiku agano Yehofa soni Yesu akusakamulichisya masengo abale ŵamnono kuti ŵalisyeje kapena kuti kwajiganya ŵandu ŵajinji. M’yaka 100 yandanda, Aklistu ŵasagulwe ŵamnono ni ŵaŵakamwile masengo gakulemba Malemba ga Chigiliki ga Chiklistu. Masiku agano Aklistu ŵasagulwe ŵamnono ni ŵakwete udindo wakupeleka “yakulya pandaŵi jakwe” kwa ŵandu ŵa Mlungu.
16. Ana alijiganyisye chichi munganiji?
16 Ana nganiji jitujiganyisye chichi? Yehofa asagwile yakwapa ŵandu ŵajinji umi wangamala pachilambo chapasichi, nambosoni kwapa umi wa kwinani ŵandu ŵamnono ŵachachilamulila ni Yesu. Yehofa akusapeleka mboto kwa ŵakutumichila ŵakwe wosope ŵakwimila “Myuda” soni “ŵandu likumi.” Jwalakwe akusasaka kuti ŵakutumichila ŵakwe wosopeŵa apikanileje malamusi gakulandana soni wosope aŵeje ŵakulupichika. Yehofa akusasakaga kuti wosope tuŵe ŵakulinandiya, ŵakamulana patukumtumichila nambosoni tulimbichileje kulimbikasya mtendele mumpingo. Pajikuŵandichila mbesi ja chilambochi, kwende wosope tumtumichilejepe Yehofa soni kumkuya Klistu mpela “likuga limo.”—Yoh. 10:16.
a Chikumbuchilo cha chaka achino chichitendekwe Lyaŵili pa Epulo 7. Ana tuchisosekwa kwawona mwamtuli ŵachachilyaga mkate soni kumwa finyo pa lisikuli? Ana tukusosekwa kudandawula ligongo lyakuti chiŵalanjilo cha ŵakulya mkate soni kumwa finyo chikukwela mnope? Munganiji chitukambilane kwanga kwa yiwusyoyi kwelesoni kwasimanikwe mungani jine mu Sanja ja Mlonda ja Januwale 2016.
b Mwakamulana ni Salimo 87:5, 6, komboleka kuti msogolomu Mlungu chachisala mena ga ŵandu ŵakulamulila ni Yesu kwinani.—Alo. 8:19.
c Alole libokosi lyakuti “Chinonyelo ‘Changatenda Yangaŵajilwa,’” mu Sanja ja Mlonda ja Januwale 2016.
d Atamose kuti pa Masengo 2:33 pakusasala kuti msimu weswela ukusapelechedwa kupitila mwa Yesu, nambo Yehofa ni jwakusasagula mundu jwalijose.
e Kuti amanyilile yejinji, alole ngani jakuti “Mafunso Ochokera kwa Owerenga,” mu Sanja ja Mlonda ja Chicheŵa ja Meyi 1, 2007.
NYIMBO 34 Kwenda Mwakulupichika
f KULONDESYA CHIWULILI: Agambe ganichisya kuti jwakwimila likuga lyakulongolela ni ŵamkwakwe ali asyungulilidwe ni ŵandu ŵajinji ŵakusaka kwajambula pamsongano. Yeleyi ngayikusapeleka ulemu atapanandi.