Ekisodo

23 “Mkawandisyaga ngani janganijiŵa jisyesyene. Mkapelechelaga umboni waunami kwa mundu jwakusakala jwakusaka kwawulasya ŵane. 2 Mkasimkuyaga gulu ja ŵandu ŵakutenda yakusakala, soni mkapindimasyaga chilungamo mwakupeleka umboni waunami pagamba kukuya gulu ja ŵandu. 3 Mkatendaga lusagu pamkwelusya magambo ga mundu jwakulaga.

4 “Naga mjisimene ng’ombe kapena bulu jwa mdani jwenu ali asokonechele, mkusosekwa mumwusyeje kwa msyene. 5 Naga mum’weni bulu jwa mundu jwakusamŵenga mmwejo ali agwile ligongo lya katundu jwatwichile, ngamkusosekwa gamba kumpita. Mkusosekwa kumkamuchisya kugopola katundu pa bulujo.

6 “Mkapindimasya kulamula kwachilungamo pa magambo ga mundu jwakulaga jwakutama pasikati penu.

7 “Mkajinjililaga nawo magambo gangali umboni, soni ngamkusosekwa kuwulaga mundu jwangalemwa soni jwakulungama, pakuŵa une ngasinamwona mundu jwakusakala kuti ali jwakulungama.

8 “Mkapochelaga kandu kakuwonga pa magambo, pakuŵa kandu kakuwonga kakusatendekasya ŵandu kuti akakuya chilungamo, soni mpaka kasokonasye maloŵe ga ŵandu ŵakulungama.

9 “Ngamkusosekwa kumtendela yangasa mlendo jwakutama pasikati penu, pakuŵa jemanja mkumanyilila mwayikusaŵela mundu pali mlendo m’chilambo chine, ligongo jemanjasoni mwaliji achalendo pamwatamaga m’chilambo cha Iguputo.

10 “Kwa yaka 6 mkusosekwa mpandeje mbeju m’migunda mwenu soni mtyosyeje mumgunda mbeju syenu syasikomele. 11 Nambo m’chaka cha 7 mwulecheje mgunda wenu wangalima kuti ugoneleje. Mu chaka chelechi mundu jwakulaga jwa mtundu wenu alyeje yakulya ya mumgunda wenuwo, soni yachasigasyeyo yinyama yakwitinji yichilya. Mtendeje yeleyi ni mgunda wenu wa mipeleya soni wa maolifi.

12 “Mkusosekwa mkamuleje masengo genu kwa masiku 6, nambo palisiku lya 7 mpumulileje masengo genugo ni chakulinga chakuti ng’ombe jenu soni bulu jwenu apumule, soni kuti mwanache jwa kapolo jwenu jwamkongwe soni mlendo jwakutama pasikati penu alipumusye.

13 “Mlolechesye kuti mkutenda yosope yanamsalileyi, soni ngamkusosekwa kukolanga mena ga milungu jine. Mena gelega gakapikanika mli mkugakolanga ni pakamwa penu.

14 “Katatu pachaka, mkusosekwa mundendeleje chisangalalo. 15 Mkusosekwa mtendeje Chisangalalo cha Mikate* Jangali Yakusasaŵisya. Chimchilyaga mikate jangali yakusasaŵisya kwa masiku 7 mpela yandite pakumlamula jemanja. Chimchilyaga mikate jeleji pandaŵi jakwe, m’mwesi wa Abibu,* ligongo pandaŵi jeleji jemanja mwakopweche m’chilambo cha Iguputo. Pakaŵa jwalijose jwachachiwonechelaga kwa une yalayalape. 16 Chimchisosekwagasoni kutenda Chisangalalo cha Yagowola* pamtyosisye yisogosi yandanda kwiwula kutyochela mumgunda wenu. Nambosoni kumbesi kwa chaka chimchisosekwaga kutendaga Chisangalalo cha Kututa Yagowola.* Chimchitendaga chisangalalo chelechi pamtutile yisogosi yenu yosope yampatile kutyochela pa masengo genu gakumigunda. 17 Katatu pachaka, achalume ŵenu wosope akusosekwa akawonecheleje pameso pa Ambuje ŵakuwona, Yehofa.

18 “Mkapelekaga mbopesi ja myasi kwa une pampepe ni chindu chilichose chesasaŵe. Nambosoni mbopesi ja mawuta jampeleche pa yisangalalo yangu ngajikusosekwa kugona mpaka kundaŵi.

19 “Mkusosekwa mpelecheje ku nyumba ja Yehofa Mlungu jwenu, yisogosi yandanda kwiwula yambone mnope kutyochela mumgunda wenu.

“Mkatelekaga mwanache jwa mbusi mu mkaka wa mamagwe.

20 “Une chinamtumichisye jemanja lilayika kuti limloleleje soni kuti limlongolele mpaka jemanja mkayiche kumalo kwanamlinganyichisye. 21 Mlipikanile lilayikalyo soni mkuye yalikumsalila. Ngamkusosekwa kulijimuchila lilayikalyo ligongo naga mkutenda yeleyo lilayikalyo ngasilimkululuchila yakulemwa yenu, pakuŵa lina lyangu lili mwa lilayikalyo. 22 Nambo naga mkukuya maloŵe gakwe soni kutenda yosope yangumsalila, une chinjasisya adani ŵenu, soni chinjilimbana ni ŵele ŵakulimbana ni jemanja. 23 Pakuŵa lilayika lyangu lichimlongolela jemanja mpaka kuja kwika kwali Aamoli, Ahiti, Apelesi, Akanani, Ahifi soni Ayebusi. Nambosoni une chinjajonanga jemanjajo. 24 Ngamkusosekwa kujitindiŵalila milungu jawo kapena kukunda kuti mjitumichileje, soni ngamkusosekwa kusyasya yitendo ya jemanjaji, nambo mkusosekwa kujijonanga milungu jawojo soni kukasanya yipilala yawo yapajika. 25 Mumtumichileje Yehofa Mlungu jwenu, soni jwalakwe chachiyipa upile yakulya yenu soni mesi genu. Une chinjityosya yilwele pasikati penu. 26 Achakongwe ŵa m’chilambo chenu ngasajasanga* kapena kuŵa ŵangaŵeleka, soni une chinjimpa jemanja umi welewu.

27 “Jemanja mkanimyiche kweleko, une chinjatendekasya ŵanduwo kuti anjogope. Soni chinjasokonasya ŵandu wosope ŵachimchisimana nawo, mwamti chinjitendekasya adani ŵenu wosope kumtila jemanja ligongo lyakwagomeka. 28 Jemanja mkanimyiche kweleko, une chinjatendekasya ŵanduwo kwasa mtima,* mwamti yeleyi yichatendekasya Ahifi, Akanani soni Ahiti kutyoka pameso penu. 29 Une ngasinatopola jemanjajo pameso penu kwa chaka chimpepe. Chinjitenda yeleyi kuti chilambocho chikaŵa masame soni kuti yinyama yamwitinji yikatupa mnope pasikati penu. 30 Une chinjatopolaga jemanjajo pasikati penu mwapanandipanandi mpaka jemanja mli mtupile mnope ni kuchijigala chilambocho.

31 “Malile genu gachiŵa kutyochela ku Nyasa Jechejewu mpaka kuja ku nyasa ja Afilisiti, soni kutyochela ku chipululu mpaka ku Lusulo,* pakuŵa ŵandu ŵakutama m’chilambocho chinjapeleka mmyala mwenu soni jemanja chimchatopola ŵanduwo pameso penu. 32 Mkasimtenda chilanga chilichose ni jemanjajo kapena ni milungu jawo. 33 Mkasimwakunda jemanjajo kutama m’chilambo chenu ni chakulinga chakuti akamtendekasya jemanja kundemwechesya une. Naga mkutumichila milungu jawo, mwangakayichila chimchisimana ni yakogoya.”