Ngani Syambone Syaŵalembile Luka

11 Sambano Yesu ŵaliji mkupopela pamalo ganegakwe. Paŵamalisisye kupopelako, jumo mwa ŵakulijiganya ŵakwe ŵamsalile jwalakwe kuti, “Ambuje, atujiganye kupopela mpela mwele Yohane ŵajiganyichisye ŵakulijiganya ŵakwe.”

2 Myoyo ŵasalile jemanjajo kuti, “Pamkupopela mjileje kuti, ‘Atati, lina lyawo lichimbichikwe.* Uchimwene wawo uyiche. 3 Atupeje chakulya lisiku lililyose mwakamulana ni chakulya chatukusosechela palisikulyo. 4 Soni atukululuchile yakulemwa yetu, ligongo m’wejisoni tukusakululuchila wosope ŵatuleŵele.* Soni akatujinjisya mu kulinjidwa.’”

5 Kaneko ŵasalile kuti, “Tujile kuti jumo mwa jemanja akwete mjakwe ni akwawula kwa mjakwejo sikati ja chilo ni kumsalila kuti, ‘Bwanawe, munjasime mitanda jitatu ja mkate* 6 ligongo mjangu jwine jugambile kusimana kwene kutyochela paulendo wakwe nambo nganingola kalikose kakuti nampe.’ 7 Nambo mjakwejo akwanga ali m’nyumba kuti, ‘Mkandagasya mmwe. Mbugele kala litanga, soni ŵanache ŵangu ni une tugonile kala. Nganimba njimwiche kuti nampe kandu.’ 8 Yisyene ngumsalichisya kuti, jwalakwe chachijimuka ni kumpa mjakwejo chilichose chakusaka, ngaŵape ligongo lyakuti ali mjakwe, nambo ligongo lyakuti ŵalimbichile mnope kuŵenda. 9 Myoyo ngumsalila jemanja kuti, mpitilisye kuŵenda, ni chachimpa. Mpitilisye kusosasosa, ni chimchipata. Mpitilisye kugogoda, ni chachimwugulila. 10 Pakuŵa jwalijose jwakuŵenda akusapochela, soni jwalijose jwakusosasosa akusapata, nambosoni kwa jwalijose jwakugogoda, chachimwugulila. 11 Yisyene, ana ŵani mwa jemanja naga mwanagwe amŵendile somba, akusampa lijoka mmalo mwa sombajo? 12 Kapena naga amŵendile lindanda, ana chachimpa likoloto? 13 Sambano, naga jemanja, atamose mli ŵakusakala, mkusakombola kwapa ŵanache ŵenu yindu yambone, kuli wuli Atati ŵenu ŵali kwinani! Ana ngasapeleka msimu weswela kwa wosope ŵakumŵenda?”

14 Pandaŵi jine, Yesu ŵakopwesye chiŵanda chakumlepelekasya mundu kuŵecheta. Chiŵandacho pachakopweche, mundu jwangaŵechetajo jwaŵechete mwamti ŵandu ŵasimonjile mnope. 15 Nambo ŵane mwa jemanjajo ŵatite, “Jweleju akusakoposya yiŵanda ni machili ga Belesebule,* jwakulamulila jwa yiŵanda.” 16 Nambo ŵane pakusaka kumlinga, ŵatandite kumsalila kuti ŵalosye chimanyisyo chakutyochela kwinani. 17 Yesu pakumanyilila nganisyo syawo, ŵasalile jemanjajo kuti, “Uchimwene uliwose wegaŵikane ukusamalaga, soni liŵasa lililyose lyegaŵikane nganiliŵa litemi. 18 Myoyosoni naga Satana jugaŵikangene, ana uchimwene wakwe mpaka ulimbe chamtuli? Pakuŵa jemanja mkuŵecheta kuti une ngukoposya yiŵanda ni machili ga Belesebule. 19 Naga une ngusakoposya yiŵanda ni machili ga Belesebule, nambi ŵanache ŵenu akusakoposya yiŵanda ni machili ga ŵani? Ni ligongo lyakwe ŵanache ŵenuwo chachimlamula kuti mli ŵakulemwa. 20 Nambo naga une ngusakoposya yiŵanda ni machili ga Mlungu,* nikuti Uchimwene wa Mlungu umyichile jemanja mwakusisimusya. 21 Naga mundu jwamachili soni jwakola yida yakuputila ngondo akulondela nyumba jakwe, yindu yakwe yikusaŵa yakusunjika chenene. 22 Sambano, naga mundu jwine jwamachili mnope akwika ni kulimbana najo mpaka kumgomeka, mundu jwamachili mnopeju akusasumula yida yosope yaŵadalilaga mundujo, kaneko akusayigaŵanya kwa ŵandu ŵane yindu yosope yasumwileyo. 23 Jwalijose jwanganaŵa ku mbali jangu akulimbana ni une, soni jwalijose jwangangamuchisya kusonganganya akusabalalikanganya.

24 “Msimu wakusakala pawukopweche mwa mundu, ukusajendaga m’malo gangali mesi kusosasosa pakuti utameje. Nambo pawulepele kupata pakutama, ukusati, ‘Chimbujilesoni m’nyumba jangu jinakopweche jila.’ 25 Pawuwujile, ukusasimana m’nyumbamo muli mwepyajile chenene soni mwesalalisye. 26 Kaneko ukusajawula kukujigala misimu jinesoni 7 jakusakala mnope kuwupunda welewo, ni jikusajinjila mwa mundujo ni kutanda kutama mwelemo. Pambesi pakwe, yitendo ya mundujo yikusaŵa yakusakala mnope kupunda yapandanda.”

27 Sambano paŵaŵechetaga yeleyi, jwamkongwe jwine mu gulu ja ŵandujo ŵamsalile Yesu mwakwesya maloŵe kuti, “Jwana upile jwamkongwe jwele chitumbo chakwe chamnyakwile mmwejo soni jwele maŵele gakwe mwajonjile!” 28 Nambo Yesu ŵatite, “Iyayi, ŵakwete upile ali ŵandu ŵele akusagapikanila maloŵe ga Mlungu ni kugasungaga!”

29 Ŵanduwo paŵaliji mkutupilatupilape, Yesu ŵatandite kwasalila kuti, “M’bado* awu uli m’bado wakusakala. Ukusosasosa chimanyisyo, nambo ngasiwupochela chimanyisyo chilichose akaŵe cha Yona basi. 30 Mpela mwele Yona ŵaŵele chimanyisyo kwa ŵandu ŵa ku Ninefe, ni muchachiŵelasoni Mwanache jwa mundu ku m’bado welewu. 31 Mwenye jwamkongwe jwakummwela juchijimuka pampepe ni ŵandu ŵa m’bado awu pa lisiku lyakuwelusya, mwamti chachalosya kuti ali ŵakulemwa, pakuŵa mwenyejo jwatyochele kumalile ga chilambo ni kwika kukupikana lunda lwa Solomo. Nambotu jwine jwakupunda Solomo ali apano. 32 Ŵandu ŵa ku Ninefe chachijimuka pampepe ni m’bado awu pa lisiku lyakuwelusya, mwamti chachiwulosya kuti uli wakulemwa, ligongo jemanjaji ŵagalawiche mtima paŵapikene yaŵalalichile Yona. Nambotu jwine jwakupunda Yona ali apano. 33 Mundu papambile nyali, jwangajiŵika pamalo gakusisika kapena kujiwunichila ni lukalala,* nambo akusajiŵika pa chakuŵikapo nyali ni chakulinga chakuti mundu pajinjile m’nyumbamo akuwoneje kuŵala. 34 Nyali ja chilu jili liso lyenu. Naga liso lyenu likulola pa chindu chimo, chilu chenu chosope chichiŵa m’lilanguka, nambo naga lili lyakusakala,* chilu chenu chichiŵa m’chipi. 35 Myoyo, mkusosekwa kusamala, kuti kuŵala kwakuli mwa mmwejoko kukaŵa chipi. 36 Sambano naga chilu chenu chosope chili chakuŵala chenene ngasigalila mbali jilijose jakola chipi, nikuti chilucho chichiŵa chakuŵala mnope mpela mwajikusatendela nyali pajikummulichila mmwejo ni kuŵala kwakwe.”

37 Paŵamalisisye kuŵecheta yeleyi, Mfalisi jwine ŵamŵendile jwalakwejo kuti akalye najo yimpepe. Myoyo jwalakwe ŵapite kukwinjila m’nyumba ja Mfalisijo ni kutanda kulya patebulo. 38 Nambo Mfalisi jula jwasimonjile mnope pakumwona jwalakwejo ali atandite kulya mkananaŵe* mmyala. 39 Nambo Ambujewo ŵamsalile jwalakwejo kuti, “Jemanja Afalisi mkusalimbana ni kuchapa kusa kwa chikapu ni mbale, nambo mumtima mwenu mkusakumbila kusumula yindu ya ŵandu soni kutenda yakusakala. 40 Jemanja ŵandu ŵangali lunda! Ana jwele juŵapanganyisye kusa, nganapanganyasoni mkati? 41 Naga yindu yayili mumtima mwenu yikumlimbikasya kwatendela yambone ŵandu ŵakulaga, chimchiŵa ŵaswela mu yindu yenu yosope. 42 Mkwete likungu* jemanja Afalisi, ligongo mkusapeleka chalikumi cha tumbeju twa minti ni twa luwe* soni tumbeju twine twa m’matimbe, nambo ngamkusakosya chilungamo ni chinonyelo cha Mlungu! Yindu yeleyi yaliji yakusosekwa kuti myitendeje, nambo yikamtendekasyaga kulepela kutenda yindu yineyo. 43 Mkwete likungu jemanja Afalisi, ligongo mkusanonyela kutama m’mipando jakusogolo* m’masunagoge, soni mkusanonyela yakuti ŵandu ampeje moni mwauchimbichimbi m’misika! 44 Mkwete likungu jemanja, ligongo mli mpela malembe gangawoneka chenene pagali,* gele ŵandu akusagapondaga nambo ngamanyilila kuti akuponda pa malembe!”

45 Nambo mundu jwine jwakumanyilila mnope Chilamusi ŵamsalile Yesu kuti, “Mwalimu, yakuŵechetayitu akutunyosya ni m’we ŵakwe.” 46 Jwalakwejo ŵajanjile kuti, “Mkwetesoni likungu jemanja ŵakumanyilila Chilamusi, ligongo mkusimwatwika ŵandu katundu jwawusito, nambo jemanja mwachimsyene ngamkusakwaya katundujo atamose ni chala chenu!

47 “Mkwete likungu jemanja, ligongo mkusataŵaga malembe ga ŵakulochesya, nambo chitamilecho achinangolo ŵenu ni ŵaŵawuleje jemanjajo! 48 Pakutenda yeleyi mkulosya kuti mkumanyilila yiŵatesile achinangolo ŵenuwo, nambo mkukamulana nawope, ligongo jemanjajo ni ŵaŵawuleje ŵakulochesya soni jemanjamwe ni ŵamkutaŵa malembe gawo. 49 Ni ligongo lyakwe lunda lwa Mlungu lukusati, ‘Chinjatumichisya jemanjajo ŵakulochesya soni ŵandumetume, nambo chachawulaga soni ŵane chachalagasya. 50 Ligongo lya yeleyi, m’bado awu uchijanga magambo ga myasi ja ŵakulochesya wosope ŵaŵapali kutyochela paŵachitamilikasisye chilambo,* 51 kutandila ni myasi ja Abele mpaka myasi ja Sekaliya, jwele ŵamwulajile pasikati pa malo gakupelechela mbopesi ni nyumba ja Mlungu.’ Nditu ngumsalichisya kuti magambo ga myasijo gachiŵa pa m’bado awu.

52 “Mkwete likungu jemanja ŵakumanyilila mnope Chilamusi, ligongo mwasumwile ŵandu makiyi gakuwugulila mlango wakamuchisya kumanyilila ya Mlungu. Jemanja mwachimsyene mwalepele kwinjila, nambo mkwalepekasyasoni ŵane ŵakusaka kwinjila!”

53 Sambano Yesu paŵakopweche m’nyumbamo, alembi ni Afalisi ŵatandite kumgungumuchila soni kutanda kumwusya yiwusyo yejinji. 54 Jemanjaji ŵaliji mkwembecheya kuti jwalakwejo chaŵechete yineyakwe yakuti amjimbe nayo magambo.