Ngani Syambone Syaŵalembile Mateyu

13 Palisiku lilyolyo, Yesu ŵakopweche m’nyumbajo ni kuja kutama mungulugulu nyasa. 2 Kaneko kwayiche ŵandu ŵajinji mwamti jwalakwejo jwakwesile mwiboti ni kutama pasi. Ŵandu wosopewo ŵajimi mungulugulu nyasa. 3 Kaneko ŵatandite kwajiganya ­yindu yejinji kupitila mu yiwani­chisyo. Ŵatite, “Apikane! Mundu jwine jwakumisa mbeju jwapite kukumisa mbeju. 4 Paŵaliji mkumisa, sine syagwilile mumbali mwa msewu, mwamti yijuni yayiche ni kulya mbejusyo. 5 Mbeju sine syagwilile palwala, soni mwachitemachitema syatandite kumela ligongo paliji pana litaka lyamnono. 6 Nambo lyuŵa palyakwesile, syatiniche ni kuwa ligongo michiga jakwe nganijijinjila pasi. 7 Mbeju sine syagwilile pamiŵa, soni miŵasyo syakusile ni kulepelekasya mbejusyo kukula. 8 Nambo mbeju sine syagwilile pa litaka lyachajila ni kutanda kusogola. Sine syasogwele songolo 100, sine 60 soni sine 30. 9 Jwalijose jwakwete mawiwi apikane.”

10 Kaneko ŵakulijiganya ŵakwe ŵayiche kwa jwalakwejo ni kumwusya kuti, “Ligongo chichi akwajiganya ŵanduŵa pakamulichisya masengo yiwanichisyo?” 11 Jwalakwe ŵajanjile kuti, “Mlungu ampele jemanja upile wakupikanichisya yakusisika yakwamba Uchimwene wakwinani, nambo jemanjajo nganiŵapa. 12 Pakuŵa jwalijose jwakwete yindu, chachipochela yejinji, soni yichitupa mnope. Nambo jwalijose jwanganakola yindu, chachimsumula atamose yindu yamnono yakwete. 13 Ni ligongo lyakwe ngwajiganya jemanjajo pakamulichisya masengo yiwanichisyo. Pakuŵa akusalola, nambo kulola kwawo kuli kwangali mate, soni akusapikana, nambo kupikana kwawo kuli kwangali mate, nambosoni ŵangapikanichisya kugopolela kwakwe. 14 Mwamti jemanjajo akukwanilisya yakulochesya ya Yesaya, yayikusati: ‘Chimchipikana nditu nambo ngasimpikanichisya kugopolela kwakwe ata panandi, soni chimchilola nditu nambo ngasimmanyilila ata panandi. 15 Pakuŵa ŵandu ŵeleŵa ajumwisye mitima jawo, soni ni mawiwi gawo apikene, nambo ngakutenda kalikose. Awugele meso gawo kuti akalola chilichose, soni awugele mawiwi gawo kuti akapikana kandu ni kupikanichisya kugopolela kwakwe m’mitima jawo kaneko ni kugalawuka mtima kuti naposye.’*

16 “Nambo jemanja mkwete upile ligongo meso genu gakusalola soni mawiwi genu gakusapikana. 17 Pakuŵa ngumsalichisya kuti, ŵakulochesya ŵajinji soni ŵandu ŵane ŵakulungama ŵasachililaga ali ayiweni yindu yamkuyiwona jemanjayi nambo nganayiwona, soni ŵasachililaga ali apikene yindu yamkupikana jemanjayi nambo nganayipikana.

18 “Sambano mpikane ngopolelo ja chiwanichisyo cha mundu jwakumisa mbeju chila. 19 Mbeju syasyagwilile mumbali mwa msewu sila, sikwimila mundu jwakugapikana maloŵe ga Uchimwene ni ngapikanichisya ngopolelo jakwe. Kaneko jwakusakala jula akusayika ni kukwakula yosope yayapandidwe mumtima mwakwe. 20 Pakwamba ya mbeju syasyagwilile palwala, sikwimila mundu jwakugapikana maloŵe soni mwachitema akusagapochela mwakusangalala. 21 Nambo ligongo lyakuti maloŵego nganigatamilichika mnope mumtima mwakwe soni kuti gakusatama kwa ndaŵi jamnono, pasimene ni yakusawusya kapena pakulagasidwa ligongo lya maloŵego, akusajasa chikulupi ndaŵi jijojo. 22 Pakwamba ya mbeju syasyagwilile pamiŵa, sikwimila mundu jwakugapikana maloŵe, nambo yakudandawulisya ya mu ndaŵi* ajino soni chinyengo cha chipanje yikusalepelekasya maloŵego kukula, soni gangasogola. 23 Nambo pakwamba ya mbeju syasyagwilile palitaka lyachajila, sikwimila mundu jwakugapikana maloŵe ni kupikanichisya ngopolelo jakwe, jwakusasogola mbeju, jwine 100, jwine 60 soni jwine 30.”

24 Ŵasalilesoni chiwanichisyo chine kuti, “Uchimwene wakwinani mpaka tuwulandanye ni mundu juŵamisile mbeju syambone mumgunda mwakwe. 25 Nambo ŵandu ali mkugona, mdani jwakwe jwayiche ni kumisasoni namsongole mumgunda wa tiliguwo ni kutyoka. 26 Tiligujo pajwakusile ni kusogola, namsongole jwawonechele. 27 Myoyo ŵamasengo ŵa msyenemgundajo ŵayiche kwa jwalakwejo ni kumwusya kuti, ‘Ambuje, ana ngati ŵamisile mbeju syambone mumgunda wawo? Nambi namsongoleju jutyochele kwapi?’ 28 Jwalakwe ŵajanjile kuti, ‘Mdani jwangu ni jwatesile yeleyi.’ Ŵamasengo ŵakwewo ŵamwusisyesoni kuti, ‘Sambano, ana akusaka kuti tujawule tukamchuŵe?’ 29 Jwalakwe ŵajanjile kuti, ‘Iyayi, kogopela kuti pakuchuŵa namsongolejo mpaka achuŵe yimpepe ni tiligu. 30 Ayileche yosopeyo yikulile pampepe mpaka pandaŵi jakugowola. Pandaŵi jakugowolajo chinjasalila ŵagowola kuti, Chandanda asonganganye namsongole ni kumtaŵa matitamatita kuti akamponye pamoto, kaneko asonganganye tiligu ni kumŵika mungokwe jangu.’”

31 Ŵasalilesoni chiwanichisyo chine kuti, “Uchimwene wakwinani uli mpela kambeju* kamwana mnope kaŵajigele mundu jwine ni kukapanda mumgunda mwakwe. 32 Kambeju keleka kali kamwana mnope pa mbeju syosope, nambo pakamesile, kakusakula mnope kupunda mbeju syosope sya kumatimbe ni kuŵa chitela, mwamti yijuni yamwinani yikusayika ni kupata malo gakutama mu nyambi syakwe.”

33 Ŵasalilesoni chiwanichisyo chine kuti, “Uchimwene wakwinani uli mpela yakusasaŵisya yele jwamkongwe jwine ŵayijigele ni kuyiwanganya ni utandi wakwana mbale sitatu mpaka mtanda wosope wasasaŵile.”

34 Yesu ŵaŵechete yindu yosopeyi ku gulu ja ŵandujo kupitila mu yiwanichisyo. Yisyene, pangali chilichose chaŵaŵechete ni jemanjajo mwangakamulichisya masengo yiwanichisyo, 35 pakwanilisya yaŵaŵechete Mlungu kupitila mwa jwakulochesya juŵatite, “Chinjiwugula pakamwa pangu ni kuŵecheta kupitila mu yiwanichisyo. Chinjiwandisya yindu yayasisiche kutandila pandanda.”*

36 Kaneko paŵajisalile gulu ja ŵandujo kuti jijawuleje, jwalakwe jwajinjile m’nyumba. Ŵakulijiganya ŵakwe ŵayiche ni kumsalila kuti, “Atusalile ngopolelo ja chiwanichisyo cha namsongole mumgunda chila.” 37 Jwalakwe ŵajanjile kuti, “Jwakumisa mbeju syambone ali Mwanache jwa mundu, 38 soni mgunda uli chilambo. Pakwamba ya mbeju syambone, syelesi sikwimila ŵanache ŵa Uchimwene, nambo namsongole akwimila ŵanache ŵa jwakusakala jula, 39 soni mdani juŵamisile namsongole ali Satana. Ndaŵi jakugowola jili kumala kwa ndaŵi* ajino, soni ŵakugowola ali malayika. 40 Myoyo, mpela muyaŵelele kuti namsongole ŵamsongangenye ni kumponya pamoto, ni mwayichiŵelasoni pambesi pa ndaŵi* ajino. 41 Mwanache jwa mundu chachitumisya malayika gakwe, soni gachityosya mu Uchimwene wakwe yindu yosope yakuŵasya soni ŵandu wosope ŵangapikanila malamusi, 42 ni chachaponya mu chilangali cha moto. Kweleko ni kuchachilila soni kulumanya meno. 43 Pandaŵi jelejo ŵakulungama chachiŵala mnope mpela lyuŵa mu Uchimwene wa Atati ŵawo. Jwalijose jwakwete mawiwi apikane.

44 “Uchimwene wakwinani uli mpela chipanje chachasisiche mumgunda, chele mundu jwine ŵachipatile ni kuchisisasoni. Ligongo lya chisangalalo, jwalakwe jwapite kukusumisya yindu yosope yaŵakwete ni kusuma mgundawo.

45 “Uchimwene wakwinani uli mpelasoni jwamalonda jwakwendajenda kupita mchisosasosa ngale* syambone. 46 Paŵapatile ngale jimo ja mtengo wapenani, ndaŵi jijojo jwapite kukusumisya yindu yosope yaŵakwete ni kujisuma.

47 “Uchimwene wakwinani uli mpelasoni likoka lyaŵaliponyisye m’nyasa ni lyakamwile somba sya mitundu jakulekanganalekangana. 48 Palyagumbele, ŵaliwutile ku mkuli, soni paŵatemi pasi ŵasagwile somba syambone ni kusiŵika mu lukalala,* nambo somba syangasosekwa kulya ŵasijasile. 49 Mwelemu ni mwayichiŵelasoni pambesi pa ndaŵi* ajino. Malayika gachijawula kukulekanganya ŵandu ŵakusakala pasikati pa ŵandu ŵakulungama 50 ni chachaponya mu chilangali cha moto. Kweleko ni kuchachilila soni kulumanya meno.”

51 Jwalakwe ŵawusisye kuti, “Ana mkupikanichisya kugopolela kwa yindu yosopeyi?” Ŵakulijiganyawo ŵajanjile kuti, “Elo.” 52 Kaneko ŵasalile jemanjajo kuti, “Pakuŵa mpikanichisye, mundu jwalijose jwakusajiganya ŵandu pagulu, palijiganyisye yakwamba Uchimwene wakwinani akusaŵa mpela msyenenyumba, jwakusakoposya mwakusunjila chipanje chakwe yindu yasambano ni yakala.”

53 Yesu paŵamalisisye kulondesya yiwanichisyoyi, ŵatyosile kweleko. 54 Paŵayiche mu dela jakumangwakwe, ŵatandite kwajiganya ŵandu mu sunagoge jwawo, mwamti ŵanduwo ŵasimonjile mnope ni ŵaŵechetaga kuti, “Ana mundu jweleju jukukombola chamtuli kola lunda lwelelu soni kutenda yakusimonjesya mpela yeleyi? 55 Ana jweleju ngaŵa mwanache jwa akalipentala ŵala? Ana mamagwe ngaŵa Maliya, soni achapwakwe ngaŵa Yakobo, Yosefe, Simoni soni Yudasi? 56 Soni achalumbugwe wosope, ngaŵa tukusatama nawo kunokuno? Sambano yindu yosopeyi ŵayijigele kwapi?” 57 Ligongo lya yeleyi, ŵanduwo ŵalepele kumkulupilila. Nambo Yesu ŵasalile jemanjajo kuti, “Jwakulochesya jwangachimbichika mu dela jakumangwakwe atamose ni ŵamwiŵasa mwakwe.” 58 Myoyo jwalakwe nganatenda masengo gamachili gejinji kweleko ligongo lyakusoŵa kwa chikulupi kwa ŵanduwo.