Buku Jandanda ja Samuyele

2 Kaneko Hana ŵapopesile kuti:

11 Kaneko Elikana ŵapite kumangwakwe ku Lama, nambo kamnyamatako kaŵele jwakutumichila jwa Yehofa, soni Eli juŵaliji jwakutaga mbopesi ni juŵamlongolelaga.

12 Sambano ŵanache ŵachalume ŵa Eli ŵaliji ŵakusakala. Jemanjaji nganamchimbichisyaga Yehofa. 13 Ŵandu payiche ni mbopesi syawo, jemanjaji mmalo mwakujigala mbali jawo ŵatendaga yakuyichisyayi: Mundu jwalijose pakupeleka mbopesi, jwakutumichila jwa ŵakutaga mbopesi ŵayikaga ni foloko jekulungwa mmyala mwakwe nyamajo jili mkutokota. 14 Kaneko jwalakwe ŵajigalaga foloko jekulungwajo ni kujijinjisya mu mpika, kapena mu mpoto wakola mikonjo jiŵili, mu mpoto wangali mkonjo, kapena mu mpoto wakola mkonjo umo. Chilichose chachitotile folokojo, jwakutaga mbopesijo ŵachijigalaga kuti alye. Yeleyi ni yaŵatendaga jemanjajo ku Silo kwa Ayisalayeli wosope ŵayiche kweleko. 15 Nambosoni atamose jwakupeleka mbopesi mkanaŵe kutinisya mawuta, jwakutumichila jwa ŵakutaga mbopesi jwayikaga ni kumsalila jwalakwejo kuti, “Mumbe nyama jakuti ngamjochele jwakutaga mbopesi. Jwalakwe ngapochela nyama jeteleche kwa mmwejo, nambo jangateleka.” 16 Jwakupeleka mbopesijo pamjanjile jwalakwejo kuti, “Mjembecheye kaje tutinisye mawutaga kaneko ni mjigale chilichose chamkusaka.” Pelepo jwalakwe ni ŵajangaga kuti, “Pangali yeleyo, mumbe panopano, naga mkukanya chingambe kumsumula!” 17 Myoyo ulemwa wa ŵakutumichilawo waliji wekulungwa mnope pameso pa Yehofa, pakuŵa achalumewo nganasichimbichisyaga mbopesi syakupeleka kwa Yehofa.

18 Sambano Samuyele ŵaliji mkutumichila pa meso pa Yehofa atamose kuti ŵaliji kamnyamata. Jwalakwe ŵawalaga chakuwala cha efodi. 19 Nambosoni mama ŵakwe ŵamtotelaga kamalaja kangali makono. Soni ŵayikaga nako kamalajako kukumpa jwalakwe chaka chilichose payiche ni ŵamkwakwe kukupeleka mbopesi ja pachaka. 20 Pelepo Eli ŵampele upile Elikana soni ŵamkwakwewo mwakwasalila kuti, “Yehofa ampe mwanache jwine kupitila mwa jwamkongweju kuti mwanachejo ajinjile mmalo mwa mwanache jumwampeleche kwa Yehofa.” Kaneko jemanjajo ŵawujile kumangwawo. 21 Yehofa ŵamkumbuchile Hana mwamti jwalakwe ŵaŵelechesoni ŵanache ŵane. Jwalakwe ŵaŵeleche ŵanache ŵane ŵatatu ŵachalume soni ŵaŵili ŵachakongwe. Nambo Samuyele, kamnyamata kala, kapitilisye kukula pameso pa Yehofa.

22 Sambano Eli ŵakalambele mnope, nambo jwalakwe ŵapikene yosope yaŵatendaga ŵanache ŵakwe ŵachalume kwa Ayisalayeli wosope. Ŵapikenesoni kuti jemanjajo ŵagonaga ni achakongwe ŵaŵatumichilaga pamlango wakwinjilila mu chitenti chakusimanilana. 23 Jwalakwe ŵasalilaga ŵanache ŵakwewo kuti, “Ligongo chichi mkutenda yeleyi? Yindu yangupikana kwa ŵandu wosope yakwamba jemanja yili yakusakala. 24 Iyayi achiŵanangu mleche kutenda yeleyo. Ngani syangupikana ali mkusala ŵandu ŵa Yehofasi nganisiŵa syambone. 25 Naga mundu amleŵele mjakwe, mundu jwine mpaka amŵende Yehofa kuti amsalalile mtima jwakulemwajo.* Nambo naga mundu amleŵele Yehofa, ana ŵani ŵampaka ampopelele jwalakwe?” Nambo ŵanachewo ŵakanile kwapikanila baba ŵawowo, pakuŵa Yehofa ŵaliji ali asimichisye yakwawulaga jemanjajo. 26 Nambope Samuyele kamnyamata kala kapitilisye kukula soni Yehofa ni ŵandu ŵakanonyelaga mnope kamnyamataka.

27 Mundu jwine jwa Mlungu ŵayiche kwa Eli ni kumsalila jwalakwe kuti, “Yehofa aŵechete kuti, ‘Ana une nganinalimanyikasya kwa nangolo jwenu soni kwa liŵasa lyakwe pandaŵi jele jemanjajo ŵaliji achikapolo ku nyumba ja Falawo ku Iguputo? 28 Nangolo jwenujo namsagwile pasikati pa mbumba* syosope sya Isalayeli kuti andumichile une mpela jwakutaga mbopesi, soni kuti ajawuleje pamalo gangu gakupelechela mbopesi kukupeleka mbopesi sya nyama, kuti atinisyeje mbopesi sya yakununjila, soni kuti awaleje efodi pameso pangu. Nambosoni une napeleche kwa nyumba ja nangolo jwenu mbopesi syosope syakocha ni moto syakutyochela kwa Ayisalayeli.* 29 Ligongo chichi jemanja ngamkuchimbichisya* mbopesi syangu syele nalamwile ŵandu kuti apelecheje m’nyumba jangu? Ligongo chichi mkwachimbichisya mnope ŵanache ŵenu ŵachalume kupunda une? Jemanja mkutenda yeleyi mwakulijimbasya mwachimsyene pakujigala mbali syambone mnope pa mbopesi jilijose jakusapeleka ŵandu ŵangu Ayisalayeli.

30 ‘“Ni ligongo lyakwe Yehofa Mlungu jwa Ayisalayeli aŵechete kuti, “Yili yisyene yakuti naŵechete kuti ŵandu ŵa m’nyumba jenu soni ŵa m’nyumba ja nangolo jwenu chachijenda pameso pangu ndaŵi syosope.” Nambo sambano Yehofa akuti, “Yeleyo ngayiŵasoni myoyo, ligongo ŵandu ŵakusanjimbichisya unesoni chinjachimbichisya. Nambo ŵandu ŵakusanyosya unesoni chinjawona kuŵa ŵangali mate.” 31 Sambano mpikane masiku gakwika gele une chinjimasya machili genu soni machili ga ŵandu ŵa m’nyumba ja nangolo jwenu. Mwamti pangali mundu jwa m’nyumba jenu jwele chachitama ni umi mpaka kalambala. 32 Pandaŵi jele chinjatendelaga yindu yambone Ayisalayeli chimchigamba kumwona mdani m’nyumba jangu, soni m’nyumba mwenu ngasimusimanikwa mundu jwamkalambale. 33 Pana mundu jwine jwele ngasinamtyosya pamasengo gakutumichila pamalo gakupelechela mbopesi. Jwalakwe ni juchachitendekasya meso genu kupela soni chachimyikachisya yakutesya chanasa. Nambo ŵandu ŵajinji ŵa m’nyumba jenu, ŵandu ŵane chachawulaga ni upanga.* 34 Yindu yachiyatendechele ŵanache ŵenu ŵaŵili ŵachalume, ŵali Hofini soni Pinihasi chiyiŵe yimanyisyo kwa mmwejo, yindu yakwe yili yakuti: Ŵanache wosopeŵa chachiwa lisiku limo. 35 Kaneko chinjisagula jwakutaga mbopesi jwangu jwakulupichika. Jwalakwe chachitenda yindu mwakamulana ni yakusaka ya mtima wangu, soni une chinjimtaŵila jwalakwejo nyumba jajichitama mpaka kalakala, mwamti jwalakwe chachijenda pameso pa jwakusagulidwa jwangu ndaŵi syosope. 36 Jwalijose jwakusigala m’nyumba mwenu chachiyika ni kutindiŵala kwa jwalakwe kuti apochele mbiya syamalipilo soni kuti apochele mkate ni kuŵechetaga kuti, “Chonde angunde kuti ngamuleje nawo masengo ga ŵakutaga mbopesi ni chakulinga chakuti mbateje yakulya.”’”