Chikalata Chakwawula kwa Agalatiya

6 Achalongo achimjangu, naga mundu ajigele litala lyakulemwecheka atamose mwangamanyilila, jemanja ŵele msimu weswela ukumlongolela mlinjelinje kumkamuchisya mundujo ni mtima wakufasa. Nambo pamkutenda yeleyi msamaleje kogopela kuti jemanjasoni mpaka mlinjidwe. 2 Mpitilisye kunyakulilana yakusitopesya. Naga mkutenda myoyo chimchiŵa kuti mkukwanilisya chilamusi cha Klistu. 3 Naga mundu akuliwona kuti ali jwakusosekwa mnope nambo ali nganaŵa, nikuti akulilambusya jika. 4 Nambo jwalijose agalinjeje masengo gakwe, soni naga gali gambone nikuti chachikola ligongo lyakusangalalila ni masengo gakwego, soni akalandanyaga masengo gakwego ni ga mundu jwine. 5 Pakuŵa jwalijose chachitwichila katundu jwakwe.*

6 Jwalijose jwakulijiganya maloŵe ga Mlungu agaŵaneje yindu yambone ni mundu jwakumjiganya maloŵego.

7 Mkasimlilambusya.* Mlungu ngakomboleka kumloŵesya. Pakuŵa chilichose chapandile mundu chachigowolasoni chichocho. 8 Naga mundu akupanda ni chakulinga chakusaka kuchisangalasya chilu chakwe, chachigowola chiwa* kutyochela ku chilu chakwecho. Nambo mundu jwakukunda kulongoleledwa ni msimu weswela, chachigowola umi wangamala ligongo lya msimuwo. 9 Myoyo kwende tukaleka kutenda yindu yambone, pakuŵa pandaŵi jakwe tuchigowola naga ngatukupela. 10 Ni ligongo lyakwe naga mpaka tukombole, kwende twatendeleje yambone ŵandu wosope, mnopemnope ŵakulupilila achimjetu.

11 Mlole yilembo yekulungwakulungwa yele namlembele ni mkono wangu.

12 Wosope ŵakulilosya kwa ŵane mpela kuti ali ŵambone,* ni ŵele ŵakumchisya jemanja kuti mwumbaleje. Jemanjaji akusatenda yeleyi kuti akalagasidwa ligongo lya chitela chakulagasichila* cha Klistu. 13 Pakuŵa atamose ŵele ŵakuwumbalawo ŵangakuya Chilamusi, nambo akwamba kusaka kuti jemanja mwumbale ni chakulinga chakuti alilapilileje ligongo lya yindu yatesile pachilu chenucho. 14 Nambo une ngangusaka kulilapilila. Naga kuli kulilapilila, chinalilapilile ligongo lya Ambuje ŵetu Yesu Klistu ŵele ŵawilile pachitela chakulagasichila.* Kupitila mwa Ambujewo, une ngusachiwona chilambochi kuti chawulajidwe,* nombe nacho chilambochi chikusambona une kuti nawulajidwe. 15 Chinga mundu akuwumbala kapena iyayi, yeleyo yangali masengo, nambo chakusosekwa mnope chili kupagwasoni. 16 Kwa wosope ŵakukuya yatusasileyi, nditu ŵele ŵali Yisalayeli jwa Mlungu, Mlungujo ŵape mtendele soni ŵatendele chanasa.

17 Kutandila apano, pakasimanikwa mundu jwalijose jwakundagasya, pakuŵa chilu changu chikwete maŵasi gakulosya kuti ndili kapolo jwa Yesu.

18 Umbone mtima wekulungwa wa Ambuje ŵetu Yesu Klistu uŵe ni jemanja achalongo achimjetu ligongo lya mtima wambone wamkulosya. Ame.