Asangalaleje ni Yakukombola Kutenda Pakumtumichila Yehofa

 1. Ligongo chichi Yehofa jwangatulandanichisyaga ni ŵandu ŵane?

YEHOFA akusanonyela yindu yamitumitundu mwamti jwanganonyela kuti yindu yosope yiŵe yakulandana. Yeleyi yikusawonechela pa yindu yaŵapanganyisye kupwatikapo ŵandu. Pangali mundu jwampaka alandane ni wawojo ndendende. Myoyo Yehofa jwangalandanyaga mwaŵelele wawojo ni mundu jwine. Jwalakwe akusawungunya chenene yayili mumtima mwawo soni akusamanyilila mwaŵelele wawojo. (1 Sam. 16:7) Akusamanyilila mwaŵakulile wawojo, yindu yampaka akombole kutenda chenene soni yampaka ayilepele. Yehofa jwangajembecheyaga kuti chatendeje yindu yejinji kupunda yampaka akombole. Myoyo tukusosekwa tuliwoneje mpela mwakusatuwonela Yehofa. Yeleyi yichitukamuchisya kuŵa “ŵakulitimalika mu kaganisye ketu” mwakuŵambala kuliwona kuti tuli ŵangasosekwa kapena kuliwona kuti tuli ŵakusosekwa mnope kwapunda ŵane.—Alo. 12:3.

 2. Ligongo chichi nganiyiŵa yambone kulilandanichisya ni ŵandu ŵane?

² Nambope yili yakomboleka kulijiganya yindu yambone yakusatenda m’bale kapena mlongo jwakusatenda yejinji mu utumiki. (Aheb. 13:7) Myoyo mpaka tulijiganye kutyochela kwa jemanjaji yindu yine yampaka yitukamuchisye kuti tulalichileje mwakamula mtima. (Afil. 3:17) Nambope kusyasya mwakusatendela yindu ŵane kuli kwakulekangana ni kulilandanya ni jemanjajo. Kulilandanya ni ŵane mpaka kwatendekasyeje kuti ŵatendeleje ŵane jelasi, mpaka aŵe ŵakutenguka soni kulipikana kuti ali ŵangali mate. Mungani jipite jila twayiweni kuti naga tukutenda mpikisano ni abale ni alongo mumpingo, mpaka yitutendekasye kuti tukaŵa paunasi wambone ni Yehofa. Yehofa akusatusalila mwachinonyelo kuti, “Mundu jwalijose agalinjeje masengo gakwe mugaŵelele. Naga gali gambone, komboleka kusengwa ligongo lya masengo gakwego, pangalandanyichisya ni masengo gatesile jwine.”—Agal. 6:4.

 3. Ana ni yindu yapi yachenjile pakumtumichila Yehofa yele yikwakamuchisya kuŵa ŵakusangalala?

³ Yehofa akusasaka kuti wawojo asangalaleje ni mwakwawulila pasogolo pakumtumichila jwalakwe. Mwachisyasyo, naga ŵabatisidwe mpaka aŵe ŵakusangalala pakulola mwachakwanilichikwe chakulinga chawo. Pangali juŵakanganichisye kuti abatisidwe, mwamti ŵatesile yeleyi ligongo lyakumnonyela Mlungu. Aganichisye yindu yakukombola kutenda pakumtumichila Yehofa kutyochela paŵagambile kubatisidwa. Mwachisyasyo, ana apano ni pakunonyela mnope kuŵalanga soni kulijiganya Baibulo? Ana akusayiwona kuti akusapeleka mapopelo gakutyochela pasi pa mtima? (Sal. 141:2) Pakulalichila, ana akusatanda kukambilana ni mundu mwangasawusya soni kukamulichisya masengo chenene yindu yakwiganyila? Naga akwete liŵasa, ana Yehofa ŵakamuchisye kuti aŵe jwamlume jwambone, jwamkongwe jwambone kapena nangolo jwambone? Mpaka aŵe ŵakusangalala soni ŵakwikutila pakulola yakombwele kutenda pambali syelesi.

 4. Ana chitukambilane chichi munganiji?

⁴ Twakamuchisyeje ŵane kuti asangalaleje ni yindu yakutenda pakumtumichila Yehofa. Mpaka twakamuchisyesoni jemanjaji kuti akaliwanichisyaga ni ŵandu ŵane. Munganiji chitulole yampaka atende achinangolo pakwakamuchisya ŵanache ŵawo, yampaka atende ŵalombane kuti akamusyaneje jwine ni mjakwe nambosoni yampaka atende achakulungwa ŵamumpingo pakwakamuchisya abale ni alongo. Pakumalisya chitukambilane mfundo sine sya m’Baibulo syampaka situkamuchisye kuti tukoleje yakulinga yakuŵajilwa, mwakamulana ni mwayiŵelele yindu paumi wetu soni yatukusakombolaga kutenda.

 5. Mwakamulana ni Aefeso 6:4, ana achinangolo akusosekwa kuŵambala chichi?

⁵ Achinangolo ngakusasosekwa kulandanya yakusatenda mwanache jwine ni mjakwe, kapena kumtuma mwanache yindu yanganaŵa akombwele. Kum’wanichisya mwanache ni mwakusatendela mjakwe kapena kumsalila yindu yanganaŵa akombwele mpaka yigambe kumtendekasya mwanachejo kuti akasangalalaga. (Aŵalanje Aefeso 6:4.) Mlongo Sachikob jwatite, “Achitichala ŵangu ŵasakaga kuti ngomboleje mnope kwapunda achimjangu ŵa mkalasi. Konjechesya pelepa mama ŵangu ŵasakaga kuti ngomboleje chenene kusukulu ni chakulinga chakuti achitichala soni baba ŵangu ŵanganaŵa ŵa Mboni akoleje nganisyo syambone pakwamba ya ŵandu ŵa Mlungu. Mamaŵa ŵasakaga kuti palembile mayeso ngomboleje 100 pa 100 yanayiwonaga kuti yili yangakomboleka. Atamose kuti papitile yaka chimalichisye sukulu, nambope ndaŵi sine ngusalipikana kuti Yehofa jwangasangalalaga atamose ndili mkutenda yindu yambone.”

 6. Ana achinangolo mpaka alijiganye chichi pa maloŵe ga pa Salimo 131:1, 2?

⁶ Chindu chakusosekwa mnope champaka alijiganye achinangolo chikusimanikwa pa lilemba lya Salimo 131:1, 2. (Aŵalanje.) Mwenye Daudi jwasasile kuti, ‘nganajigalikaga ni yindu yapenani,’ kapena kuganichisya mnope yindu yanganaŵa akombwele kutenda. Ligongo lyakuti jwalakwe jwaliji jwakulinandiya ‘jwatondweŵe ni kuwusimana mtima’ kapena kuti jwaliji jwakwikutila ni kusangalala. Ana achinangolo mpaka alijiganye chichi pa maloŵe gaŵaŵechete Daudi? Kuti achinangolo aŵe ŵakulinandiya akusosekwa kuŵambala kutenda yindu yanganaŵa akombwele. Akajembecheyagasoni kuti ŵanache ŵawo mpaka atendeje yejinji kupunda yampaka akombole. Achinangolo mpaka ŵakamuchisye ŵanache ŵawo kumanyilila yindu yampaka akombole soni yanganaŵa akombwele kutenda. Mpaka ŵakamuchisyesoni kuti akoleje yakulinga yampaka ayikwanilisye. Yeleyi mpaka yakamuchisye ŵanacheŵa kuliwona kuti ali ŵakusosekwa. Mlongo Marina jwatite, “Mama ŵangu nganalandanyaga une ni yaŵakombolaga kutenda achalumbuŵangu kapena ŵanache ŵane. Ŵanjiganyisye kuti mundu jwalijose pana yakusakombola kutenda kulekangana ni ŵane soni jwalijose ali jwakusosekwa kwa Yehofa.”

7-8. Ana jwamlume mpaka alosye chamtuli kuti akusiŵachimbichisya ŵamkwakwe?

⁷ Jwamlume akusosekwa kwachimbichisya ŵamkwakwe. (1 Pet. 3:7) Kuchimbichisya kwakukusala pelepa kukusagopolela kupikanila mwakuwusimana mtima soni kwawona ŵane kuŵa ŵakusosekwa. Mwachisyasyo, jwamlume akusiŵachimbichisya ŵamkwakwe mwakwawona kuti ali mundu jwakusosekwa mnope. Ngakusajembecheya kuti jwamkongwejo atendeje yindu yejinji kupunda yampaka akombole. Soni jwalakwe ngakusiŵawanichisya ŵamkwakwe ni mwaŵelele achakongwe ŵane. Ana mpaka papagwe yakusawusya yamtuli naga jwamlume akwalandanya ŵamkwakwe ni achakongwe ŵane? Jwamlume jwine jwanganaŵa jwa Mboni ŵalandanyaga ŵamkwakwe lina lyakwe Rosa ni mwaŵelele achakongwe ŵane. Maloŵe gakunyosya gaŵaŵechetaga jwamlumeju gatendekasyaga kuti ŵamkwakweŵa akasangalalaga soni kulikayichila yakuti pana mundu jwakusamnonyela jwalakwe. Mlongoju jwatite, “Ngusasosechela kuti jwine angumbusyeje ndaŵi syosope kuti Yehofa akusambona kuti ndili jwakusosekwa.” Mwakulekangana ni yeleyi, jwamlume jwa Chiklistu akusasosekwa kwachimbichisya ŵamkwakwe. Jwalakwe akusasosekwa kumanyilila kuti yakusatenda mpaka yikwaye unasi wakwe ni ŵamkwakwe soni ni Yehofa.c

⁸ Jwamlume jwakusiŵachimbichisya ŵamkwakwe akusaŵecheta yindu yambone yakwamba ŵamkwakwe atamose pali pana ŵandu. Jwalakwe akusiŵayamichila ŵamkwakwe soni kwasalila kuti akusiŵanonyela. (Mis. 31:28) Yeleyi ni yayamkamuchisyesoni Katerina jwatumsasile mungani jipite jila. Ŵamkwakwe ŵamkamuchisye jwalakwe kuti akalipikanaga kuti ali jwangali mate. Katerina paŵaliji mwanache, ndaŵi syejinji mamagwe ŵam’wanichisyaga mwakusatendela yindu ni asikana ŵane kupwatikapo achimjakwe. Yeleyi yamtendekasisye Katerina kutanda kuliwanichisya ni mwaŵelele ŵandu ŵane, soni jwapitilisye kutenda yeleyi atamose pa ndaŵi jele jwaŵele jwa Mboni sya Yehofa. Ŵamkwakwe ŵelesoni ali ŵa Mboni sya Yehofa ŵamkamuchisye jwalakwe kuti aleche kulipikana chamti yeleyi nambosoni kuti atande kuliwona mwakuŵajilwa. Jwalakwe jwatite, “Ŵamkwanguŵa akusanonyela, akusayamichila yindu yambone yandesile nambosoni akusambopelelaga. Akusangumbusya ndamo syambone mnope syakwete Yehofa nambosoni kungamuchisya kuti nganisyeje mwakuŵajilwa.”

9-10. Ana achakulungwa ŵamumpingo ŵamkamuchisye chamtuli mlongo jwine kuti aleche kuliwanichisya ni ŵane?

⁹ Ana achakulungwa ŵa mumpingo mpaka ŵakamuchisye chamtuli ŵandu ŵakwete ndamo jakuliwanichisya ni achimjawo? Aganichisye chisyasyo cha Mlongo Hanuni. Jwalakwe ali mwanache, achinangolo ŵakwe nganamnonyelaga. Jwalakwe jwatite, “Natendaga sooni nambosoni nayiwonaga kuti ŵanache ŵane ni ŵali ŵambone mnope kumbunda une. Kutandila ndili mwanache natandite kuliwanichisya ni ŵane.” Atamose mlongoju paŵalijiganyisye usyesyene nganalekape kuliwanichisya ni ŵandu ŵane. Yakuyichisya yakwe jwalakwe jwatandite kuliwona kuti ali jwangasosekwa mumpingo. Nambope patukuŵecheta pano jwalakwe akutenda upayiniya soni ali jwakusangalala. Ana ni chichi chachamkamuchisye mlongoju kuti achenje ndamo syakwe?

¹⁰ Hanuni jwasasile kuti achakulungwa ŵamumpingo ŵachinonyelo ni ŵaŵamkamuchisye. Achakulungwaŵa ŵamsalile jwalakwe kuti ali mundu jwakusosekwa mnope mumpingo soni ali chisyasyo chambone. Jwalakwe jwalembile kuti, “Ndaŵi sine achakulungwaŵa ŵandumaga kuti nalimbikasye alongo ŵakusimana ni yakusawusya. Yeleyi yangamuchisyaga kulipikana kuti ndili jwakusosekwa. Ngukumbuchila lisiku line achakulungwa ŵamumpingo ali mkuyamichila ligongo lyakwalimbikasya alongo ŵachisikana. Ŵambalanjile lilemba lya 1 Atesalonika 1:2, 3. Yeleyi yandendekasisye kuŵa jwakusangalala mnope. Mwamti ngusinayamichila achakulungwa ŵamumpingo ŵamboneŵa, ligongo apano ngusaliwona kuti ndili jwakusosekwa mgulu ja Yehofa.”

11. Ana mpaka twakamuchisye chamtuli “ŵandu ŵali ŵakulinondiya” ŵakwasala pa Yesaya 57:15?

¹¹ Aŵalanje Yesaya 57:15. Yehofa akusiŵasamalilaga mnope ŵandu “ŵakulinondiya ni ŵakusamkulupilila jwalakwe.” Ngaŵa achakulungwape ŵamumpingo ŵampaka ŵalimbikasye ŵane. Wosopewe mpaka twalimbikasye abale ni alongo. Litala limo lyampaka twalimbikasye jemanjaji lili kwalosya kuti tukusitwaganichisya. Yehofa akusasaka kuti twalosyeje jemanjaji kuti jwalakwe akusiŵanonyela mnope soni kuti ali ŵakusosekwa. (Mis. 19:17) Mpaka twakamuchisyesoni abale ni alongo ŵetu mwakulosya kuti tuli ŵakulinandiya. Ngatukusosekwa kutendaga yindu yagamba kuliganichisya jikape ligongo yeleyi mpaka yatendekasyeje ŵandu ŵane kuti atutendeleje jelasi. Mmalo mwakwe tukusosekwa kukamulichisya masengo yindu yosope yatukumanyilila soni yatukusakombola kutenda kuti twalimbikasye ŵane.—1 Pet. 4:10, 11.

12. Ligongo chichi ŵandu wamba ŵamnonyelaga Yesu? (Alole chiwulili chapachikuto.)

¹² Mwaŵatendelaga Yesu yindu ni ŵakulijiganya ŵakwe mpaka yitukamuchisyesoni m’weji kumanyilila mwatukusosechela kutendela yindu ni ŵandu ŵane. Pangali mundu jwalijose juŵalandanaga ni Yesu pandaŵi jaŵaliji pa chilambo chapasi. Nambope atamose yaliji myoyo jwalakwe jwaliji “jwakutulala mtima soni jwakulinandiya.” (Mat. 11:28-30) Jwalakwe nganalikwesyaga mwakulilosya kuti ali jwalunda soni jwakumanyilila yejinji. Jwaŵechetaga yakuti ŵandu yikasawusya kupikana. Yiwanichisyo yaŵakamulichisyaga masengo yaliji yangasawusya kupikana atamose kwa ŵandu ŵaŵawonekaga kuti ali ŵakunyoseka. (Luk. 10:21) Mwakulekangana ni mwaŵatendelaga achimlongola ŵadini ŵaŵaliji ŵakulinonyela, Yesu nganiŵatendekasya ŵandu kulipikana kuŵa ŵangasosekwa pameso pa Mlungu. (Yoh. 6:37) Mmalo mwakwe jwaganichisyagasoni ŵandu wamba.

13. Ana mwaŵatendelaga yindu Yesu ni ŵakulijiganya ŵakwe yalosyaga chamtuli kuti jwakwete chinonyelo?

¹³ Mwaŵatendelaga yindu Yesu ni ŵakulijiganya ŵakwe yalosyagasoni kuti ali jwachinonyelo. Jwalakwe jwamanyililaga kuti ŵakulijiganya ŵakweŵa ŵaliji ŵakulekangana pa katende kawo kayindu nambosoni muyaŵelele yindu paumi wawo. Yeleyi yikulosya kuti jemanjaji ngamkanakola maudindo gakulandana kapena kukamula masengo gakulandana pali mu utumiki. Nambope Yesu jwayamichile kulipeleka kwa jwalijose pajika. Ndamo ja Yesu jakupikanichisya mwaŵelele mundu jikusawonechela chenene muchisyasyo chaŵapeleche jwalakwe cha matalenti. Mu chisyasyo chelechi bwana ŵampele jwamasengo jwakwe yakutenda “mwakamulana ni lunda lwakwe.” Pa ŵamasengo ŵaŵili ŵaŵaliji ŵalunda, jumo jwapatile yejinji kumpunda mjakwe. Nambope bwana jwawo jwayamichile wosope ni maloŵe gakulandana gakuti, “Mwatesile chenene kwabasi, m’chanda jwangu jwambone ni jwakulupichika.”—Mat. 25:14-23.

14. Ana mpaka tumsyasye chamtuli Yesu mwaŵatendelaga yindu ni ŵane?

¹⁴ Yesu akusatenda yindu ni m’weji ndaŵi syosope mwachinonyelo. Jwalakwe akusamanyililaga kuti yindu yatukusakombolaga kutenda nambosoni mwayiŵelele yindu pa umi wetu yili yakulekangana, mwamti akusaŵa jwakusangalala pakutuwona tuli mkutenda yindu yampaka tukombole. Myoyo tukusosekwa kutenda yindu mpela mwakusatendela Yesu. Ngatukososekwa kwatendekasya ŵakulambila achimjetu kuti alipikaneje kuŵa ŵangali mate kapena kwatendesya sooni ligongo lyakuti akulepela kutenda yejinji mpela mwakusatendelaga ŵandu ŵane. Tusosejesoseje matala gakwayamichila abale ni alongo ŵetu ligongo akutenda yiliyose yampaka akombole pakumtumichila Yehofa.

15-16. Ana kola yakulinga kwamkamuchisye chamtuli mlongo jwine?

¹⁵ Kola yakulinga yakumtumichila Yehofa yikusatukamuchisya kuti tukole sogolo jambone soni umi wambone. Nambo kuti yeleyi yikomboleche, tukusosekwa tukoleje yakulinga mwakamulana ni mwayiŵelele yindu paumi wetu soni yindu yatukusakombola kutenda ngaŵaga mwakamulana ni mwakusatendela ŵandu ŵane. Naga ngatukujigalila yindu mwakusatendela ŵane mpaka yitukamuchisye kuti tukakuŵala kapena kuŵa ŵangasangalala. (Luk. 14:28) Aganichisye chisyasyo cha mlongo jwine lina lyakwe Midori.

¹⁶ Babagwe mlongoju ŵamtesyaga sooni jwalakwe mwakum’wanichisya ni mwakusatendela yindu achapwakwe soni achalumbugwe nambosoni achimjakwe ŵane ŵa mkalasi. Mlongoju jwatite, “Nalipikanaga kuti ndili jwangali mate.” Nambo pajwakulaga jwatandite kulipikana kuti ali jwakusosekwa. Jwalakwe jwatite, “Naŵalangaga Baibulo lisiku lililyose ni chakulinga chakuti mbate mtendele wamumtima soni yeleyi ni yayangamuchisyaga kulipikana kuti Yehofa akusanonyela.” Konjechesya pelepa jwalakwe jwaliŵichile yakulinga soni jwamŵendaga Yehofa kuti amkamuchisye kwanilisya yakulingayo. Yeleyi yimkamuchisye kuti asangalaleje ni yindu yakukombola kutenda pakumtumichila Yehofa.

17. Ana mpaka tupitilisye chamtuli kuchenga ‘mitima ni nganisyo’ syetu kuti siŵeje syasambano? Ana yeleyi mpaka yiŵe ni yakuyichisya yamtuli?

¹⁷ Pakusajigala ndaŵi kuti tuchenje nganisyo syetu soni mwatukusayiwonela yindu. Yehofa akusatulimbikasya kuti “mitima ni nganisyo syetu sichenjeje kuŵa syasambano.” (Aef. 4:23, 24) Nambope kuti tukombole kutenda yeleyi tukusosekwa kupopelaga, kulijiganya Maloŵe ga Mlungu soni kuganichisyaga yatulijiganyisye. Tukusosekwa kukamulichisya masengo yindu yeleyi soni kumŵenda Yehofa kuti atupeje machili. Msimu weswela wa Yehofa uchitukamuchisya kuti tumalane ni nganisyo silisyose syakuliwanichisya ni ŵane. Yehofa mpaka atukamuchisye kumanyilila naga tutandite jelasi kapena kulikwesya nambosoni mpaka atukamuchisye kuchenga ndamo syelesi mwachitema.

18. Ana lilemba lya 2 Mbili 6:29, 30, mpaka lyalimbikasye chamtuli?

¹⁸ Aŵalanje 2 Mbili 6:29, 30. Yehofa akusamanyilila yali mumtima mwetu. Jwalakwe akusamanyililasoni yatukulimbana nayo, yatukutenda pakulimbana ni ndamo syakusakala nambosoni ungali umlama wetu. Yehofa pakutuwona tuli mkulingalinga kulimbana ni yindu mpela yeleyi ni pakusatunonyela mnope.

19. Ana Yehofa akusalondesya chamtuli mwakusatuwonelaga m’weji?

¹⁹ Yehofa pakulondesya yakusati pakutunonyela, akusawanichisya chinonyelo chachikusapagwa pasikati pa mwanache ni nangolo jwakwe. (Yes. 49:15) Aganichisye ya nangolo jwine lina lyakwe Rachel. Jwalakwe jwatite, “Mwanache jwangu jwamkongwe lina lyakwe Stephanie jwapali ndaŵi jakwe mkanijikwane. Panagambile kumwona mwanacheju ali napagwape jwawonekaga kuti ali jwamwana mnope soni jwangali mate. Mwanacheju ŵamŵisile pa malo gakuteteyeka gakusasunjila ŵanache ŵapagwile masiku gangakwana. Nambope mwesi ŵandanda watwaliji kuchipatala madokotala gambaga upile wakuti namkumbatileje mwanacheju. Ndaŵi jeleji jakamuchisye mnope kuti nonyelaneje ni mwanacheju. Apano sambano mwanacheju akwete yaka 6, nambo msingu wakwe ukusawonekape kuti ali jwamwana pakuwanichisya ni achimjakwe ŵaŵapali nawo chaka chimo. Nambo ngusinamnonyela mwanacheju ligongo apitile mu yakusawusya yejinji soni jukusandendekasya kuŵa jwakusangalala.” Mpela mwayiŵelele ni nangolo jweleju, yili yakulimbikasyatu kumanyilila kuti Yehofa akusatunonyela mnope pandaŵi jakutuwona tuli mkulimbana ni yejinji ni chakulinga chakuti tumtumichileje jwalakwe ni mtima wetu wosope.

20. Mpela jwakutumichila jwa Yehofa, ana ni ligongo lyapi lyampaka lyatendekasye kuŵa ŵakusangalala?

²⁰ Ligongo lyakuti wawojo ali jwakutumichila jwa Yehofa, ali ŵakusosekwa mnope m’gulu jakweji nambosoni pangali mundu jwalijose jwakulandana ni wawojo. Yehofa nganatenda yakuti aŵe pa unasi ni wawojo ligongo lyakuti ali ŵambone mnope kwapunda ŵane. Jwalakwe jwakundile kuti aŵe najo pa unasi ligongo ŵayiweni kuti wawojo ali ŵakulinandiya soni ali ŵakusachilila kulijiganya yindu nambosoni mpaka achenje ndamo syawo mwangasawusya. (Sal. 25:9) Mpaka aŵe ŵakusimichisya kuti Yehofa akusaŵa jwakusangalala pakwawona wawojo ali mkutenda yampaka akombole. Kupilila kwawo soni kuŵa ŵakulupichika uli umboni wakuti akwete “mtima wambone soni wakupikanila.” (Luk. 8:15) Myoyo apitilisyeje kumtendela Yehofa yindu yiliyose yampaka akombole. Yeleyi yichakamuchisya kuti aŵeje ŵakusangalala ni yiliyose yakukombola kutenda.