Chikalata cha Yakobo

1 Une Yakobo, kapolo jwa Mlungu soni jwa Ambuje Yesu Klistu, ngusilembela chikalatachi mbumba 12 syasibalalikangene ni kutamaga m’yilambo yakulekanganalekangana.

Mpochele moni wangu jemanja wosope.

2 Achalongo achimjangu, mŵeje ŵakusangalala pamkusimana ni yakulingwa yakulekanganalekangana. 3 Jemanjasoni mkumanyilila kuti naga chikulupi chenu chikulinjidwa yikusamkamuchisya kuti pambesi pakwe mŵe ŵakupilila. 4 Nambo mkunde kuti kupililako kumalisye masengo gakwe, ni chakulinga chakuti mŵeje ŵakwanila chenene, ŵangali chakulemwecheka chilichose soni ŵangapelembela pa chilichose.

5 Myoyo naga jwine lunda lukumpelembela, amŵendeje Mlungu, mwamti chachimpa, pakuŵa Mlungujo akusapeleka mwakoloŵa makono kwa wosope, soni akusapeleka kwa mundu mwangamnyosya.* 6 Nambo jwakuŵendajo aŵendeje ni chikulupi soni akakayichilaga ata panandi, pakuŵa mundu jwakukayichila ali mpela matumbela ga panyasa gagakusajigalikaga ni mbungo ni kwawulaga aku nakuku. 7 Sonitu mundu jwakayichilajo akajembecheyaga kuti ­chapochele chilichose kutyochela kwa Yehofa 8 ligongo mundu jwelejo ali jwakayikakayika soni jwangatamilichika mu yakutenda yakwe yosope.

9 Nambo mlongo mjetu jwakutuluka asangalale ligongo lyakuti Mlungu amkwesisye, 10 soni jwakusichila asangalale ligongo lyakuti Mlungu amtulwisye, pakuŵa jwakusichila chachijumula mpela mwayikusaŵela ni liluŵa lyakwitinji. 11 Lyuŵa likusakopoka ni kuŵala mnope mpaka kunyalisya yakumela. Kaneko maluŵa ga yakumelayo gakusagwa pasi soni kusalala kwakwe kukusamalila papopo. Mwakulandana ni yeleyi, jwakusichila chachijonasika ali mkulimbana ni yachipanje yakweyo.

12 Jwakusangalala ali mundu jwakupitilisya kupilila pakulinjidwa, ligongo Mlungu pachachimjitichisya jwalakwejo chachimpa umi mpela malipilo gakwe.* Yehofa ŵaŵechete kuti chachipeleka umi welewu kwa ŵandu ŵakusamnonyela Jwalakwe. 13 Mundu pakulinjidwa, akaŵechetaga kuti, “Mlungu ni jwakulinga une.” Pakuŵa Mlungu ngaŵa mkumlinga ni yindu yakusakala, soni jwalakwejo nganaŵa amlinjile mundu ni yindu yakusakala. 14 Nambo mundu jwalijose akusalinjidwa ni yakumbila ya mtima wakwe yele yikusamkopa ni kumlambusya.* 15 Sambano kukumbilako pakukusile,* kukusaŵeleka ulemwa. Kaneko ulemwawo pawutendekwe, ukusayikasya chiwa.

16 Achalongo achimjangu ŵa­pamtima, mkasimlilambusya.* 17 Mtuka uliwose wambone soni wamlama ukusatyochela ­kwinani, pakuŵa ukusatuluka kutyochela kwa msyene yakumulichila yakwinani. Jwalakwejo ŵangachenga mpela kuchengachenga kwa m’bulili. 18 Jwalakwe ŵatupele umi patwapikanile maloŵe gakwe gagali gasyesyene, pakuŵa chakulinga chakwe chaliji chelechi. Ŵatesile yeleyi kuti m’weji tuŵe ŵandanda kutusagula pasikati pa ŵandu wosope.

19 Achalongo achimjangu ŵapamtima, ngusaka mmanyilile ayi: Mundu jwalijose aŵeje jwakwanguya kupikana, jwangawutuchila kuŵecheta soni jwangatumbila chitema, 20 ligongo mundu patumbile jwangatenda yindu yambone pameso pa Mlungu. 21 Myoyo, mjase kwakutalika yindu yosope yakunyalaya soni kandu kalikose kakusakala.* Mmalomwakwe, Mlungu pakupanda maloŵe gakwe mwa jemanja mgapocheleje mwakuwusimana mtima ligongo gachimkulupusya.

22 Nambope mtendeje yagakusaŵecheta maloŵego. Mkaŵa mundu jwakwamba kupikanape maloŵego, ni kulilambusyaga munganisyo mwenu kuti yeleyi yili yakwanila. 23 Pakuŵa mundu jwakwamba kupikanape maloŵe nambo ngatenda yigakuŵecheta maloŵego ali mpela mundu jwakulilolela ngope jakwe pegalasi. 24 Jwalakwe akusalilolelaga, nambo patyosile akusaliŵalila ndaŵi jijojo mwakuwonechela. 25 Nambo mundu jwakusalolechesya mu lilamusi lyamlama* lyele likusagopola ŵandu soni akusatendaga yalikuŵecheta lilamusilyo, jwalakwejo nganaŵa mpela mundu jwakupikana ni kuliŵalila. Nambo jwalakwejo akusatendaga masengo ga Mlungu, mwamti chachiŵa jwakusangalala pakugatenda masengogo.

26 Naga jwine akuganisya kuti akutumichila Mlungu mwakuŵajilwa* nambo chitamilecho ali ngakulamulila* lulumi lwakwe, jwalakwejo akulilambusya mumtima mwakwe, soni kutumichila kwakwe Mlungu kuli kwangali masengo. 27 Kutumichila kwakuli kweswela soni kwakuŵajilwa* pameso pa Mlungu jwetu jwalisoni Atati ŵetu ni aku: Kwasamalila ŵanache ŵamasije soni achakongwe ŵamasije pakusimana ni yakusawusya, soni kuliŵambasya ku yindu yangalumbana ya m’chilambochi.