Detulonomo

31 Kaneko Mose ŵapitesoni pameso pa Ayisalayeli wosope ni kuŵecheta nawo maloŵe gakuyichisyaga. 2 Jwalakwe ŵatite, “Sambano pakwikana lelo ngwete yaka 120. Nganimba ngombwelesoni kumlongolela jemanja, pakuŵa Yehofa ŵasalile une kuti, ‘Mmwejo ngamjomboka nawo Yolodaniju.’ 3 Yehofa Mlungu jwenu ni juchaŵe pasogolo penu pamkomboka. Jwalakwe msyene ni juchachijipyajila mitundu josope ja ŵandu jachimsimane najo, mwamti jemanja chimchikombola kujitopola mitundu jeleji. Yoswa ni juchamlongolele jemanja pamkomboka lusulolu, mpela muŵaŵechetele Yehofa. 4 Yehofa chachijipyajila mitundu jeleji mpela yaŵatite pakugapyajila mamwenye gaŵili ga Aamoli, mwenye Sihoni soni Ogi pampepe ni yilambo yawo. 5 Yehofa chachimkamuchisya jemanja kuti mwagomeche adani ŵenuwo mwamti mkatendele jemanjajo mwakamulana ni malamusi gosope ganampele. 6 Jemanja mŵe ŵakulimba mtima soni mtende yindu mwamachili. Mkatenda woga kapena kutetemela pameso pa jemanjajo, pakuŵa Yehofa Mlungu jwenu akwenda ni jemanja. Jwalakwejo ngasamleka kapena kumjasa.”

7 Kaneko Mose ŵamŵilasile Yoswa pameso pa Ayisalayeli wosope ni kumsalila kuti, “Mŵe ŵakulimba mtima soni mtende yindu mwamachili, ligongo mmwejo ni ŵachimwalongolele ŵanduŵa pakwinjila m’chilambo chaŵalumbile Yehofa kwa achinangolo ŵawo kuti chachapa, mwamti mmwejo chimkape chilambocho mpela chipanje chawo. 8 Yehofa ni jwakwenda pasogolo penu soni chachipitilisya kuŵa ni mmwejo. Jwalakwe ngasamleka kapena kumjasa. Myoyo mkatenda woga kapena kutetemela.”

9 Pelepo Mose ŵalembile Chilamusi chelechi ni kuchipeleka kwa ŵakutaga mbopesi ŵa Chilefi, ŵakusanyakula libokosi lya chilanga lya Yehofa soni kwa achakulungwa wosope ŵa Ayisalayeli. 10 Kaneko Mose ŵalamwile jemanjajo kuti, “Pambesi pa yaka 7 yiliyose, pandaŵi jakwe jakuŵajilwa m’chaka chakwakululuchila ŵandu ngongole* chelechi, pandaŵi ja chisangalalo cha masakasa,* 11 Ayisalayeli wosope payiche kukuwonechela pameso pa Yehofa Mlungu jwenu kumalo gachachisagula jwalakwejo, jemanja mkaŵalanjeje Chilamusi chelechi kuti Ayisalayeli wosope apikane. 12 Mkasonganganyeje ŵandu wosope pampepe, achalume, achakongwe, ŵanache soni ŵandu ŵamitundu jine ŵakutama m’misinda jenu.* Mkasonganganyeje jemanjaji kuti apikane soni kulijiganya yakwamba Yehofa Mlungu jwenu, ni chakulinga chakuti amjogopeje jwalakwejo soni kuti akuyeje mwakusamala maloŵe gosope ga m’Chilamusi chelechi. 13 Pelepo ŵanache ŵawo ŵanganachimanyililaga Chilamusi chelechi chachipikana ni kulijiganya yakwamba Yehofa Mlungu jwenu. Jemanjajo chachimjogopaga jwalakwejo masiku gosope gachimkatameje m’chilambo chamkwawula kukuchijigala panyuma pakomboka Yolodaniju.”

14 Kaneko Yehofa ŵamsalile Mose kuti, “Mpikane, ndaŵi jakuti mmwejo m’we jiŵandichile. Myoyo mumŵilanje Yoswa ni kulongana najo ku chitenti chakusimanilana kuti ngamŵiche jwalakwejo kuŵa jwakulongolela.” Myoyo Mose soni Yoswa ŵalongene ni kwawula ku chitenti chakusimanilana. 15 Kaneko Yehofa ŵawonechele ku chitentiko mu liwunde lyakwima mpela chipilala, mwamti liwunde lya mpela chipilalalyo lyajimi pamlango wa chitenticho.

16 Sambano Yehofa ŵamsalile Mose kuti, “Mpikane, mmwejo msigele panandi kuwa.* Nambo panyuma pa chiwa chenu ŵandu ŵeleŵa chachitanda kujitumichila milungu jachilendo* jachijikasyungulile m’chilambo chakwawulacho. Jemanjaji chachindeka une ni kasa chilanga changu chanatesile ni jemanjajo. 17 Pandaŵi jelejo ukali wangu uchagwila jemanjajo mwamti chinjaleka soni chinjasisila ngope jangu mpaka ali amasile wosope. Panyuma pakusimana ni yipwetesi soni yakusawusya yejinji, chachiŵecheta kuti, ‘Ana yakusawusya yayikutugwilayi ngaŵa yikututendechela ligongo lyakuti Mlungu nganaŵa pasikati petu?’ 18 Nambo palisiku lyelelyo chinjipitilisya kwasisila ngope jangu ligongo lya yakusakala yosope yaŵele ali mkutenda pakugalawuchila kwa milungu jine.

19 “Sambano jemanja mlembe nyimbo aji soni mwajiganye nyimboji Ayisalayeli. Mwajiganyeje nyimboji* kuti pandaŵi jachachileka kumpikanila Mlungu chijakumbusyeje yindu yanakalamwisye. 20 Une chingajinjisye jemanjaji m’chilambo chakwenda mkaka ni uchi, chanalumbile kwa achinangolo ŵawo kuti chinjapa. Jemanjaji pachakalyeje yakulya yamwelemo mpaka kwikuta soni yindu payichajendelaga chenene,* chachigalawuchila kwa milungu jine ni kutanda kujitumichila, mwamti chachitenda yindu mwanganjimbichisya soni chachikasa chilanga changu. 21 Pachachisimana ni yakupweteka soni yakusawusya yejinji, nyimbo jeleji jichakumbusya yindu yanakalamwisye jemanjajo. Nyimbo jeleji ŵanache ŵawo akajiliŵalila. Une ngumanyilila kala yakuganisya jemanjaji kuti akayitende atamose nganimbe kwajinjisya jemanjaji m’chilambo chanalumbile kuti chinjapa.”

22 Myoyo Mose ŵalembile nyimbo jeleji palisiku lyeleli ni kwajiganya Ayisalayeli.

23 Kaneko jwalakwe* ŵamŵisile Yoswa mwanache jwa Nuni kuti aŵe jwakulongolela, ni ŵamsalile kuti, “Mŵe ŵakulimba mtima soni mtende yindu mwamachili, ligongo mmwejo ni ŵachimwalongolele Ayisalayeliŵa pakwinjila m’chilambo chanalumbile kuti chinjapa jemanjajo, mwamti une chinjipitilisya kuŵa ni mmwejo.”

24 Mose paŵagambile kumalisya kulemba maloŵe gosope ga mu Chilamusichi m’buku, 25 ŵalamwile Alefi ŵaŵanyakulaga libokosi lya chilanga lya Yehofa kuti, 26 “Mjigale buku ja Chilamusi aji ni mkajiŵiche pambali pa libokosi lya chilanga lya Yehofa Mlungu jwenu. Bukuji jichiŵa umboni ŵakusisyana ni jemanja pachimchimjimuchila Mlungu. 27 Pakuŵa une ngumanyilila chenene mtima wenu wakwimuchila soni makani genu.* Naga mwaliji mkumjimuchila Yehofa pandaŵi janaliji ni umi pampepe ni jemanja, kuli wuli pachimbwepo, ngaŵa ni pachimpunde? 28 Sambano mwasonganganye achakulungwa wosope ŵa mu mbumba syenu soni ŵakulolela ŵenu kuti ayiche kwa une. Ayiche kuti alipikanile achimsyene maloŵe gangusaka kwasalila. Kwinani soni chilambo chapasi chiŵe mboni jangu kwa jemanjajo. 29 Unejo ngumanyilila chenene kuti pachingambe kuwapo, nditu jemanja chimtende yindu yakusakala soni chimgalawuchile kwine ni kuleka kukuya litala lyanamlamwile jemanja. Pambesi pakwe, nditu yakupweteka yichimgwila jemanja ligongo chimchitenda yindu yakusakala pameso pa Yehofa soni chimchimlemwechesya jwalakwejo pa yiliyose yichimchitendaga ni makono genu.”

30 Kaneko Mose ŵasasile maloŵe ga nyimbo jakuyichisyaji, kutandila kundanda mpaka kumbesi, Ayisalayeli wosope ŵaŵasongene ali mkupikana.