Chikalata Chaŵili Chakwawula kwa Akolinto

9 Sambano pakwamba ya utumiki wakwakamuchisya ŵaswelawo, ngangusosekwa kuti ndende yakumlembela. 2 Pakuŵa ngumanyilila kuti jemanja mli ŵakusachilila kupeleka soni yeleyi ngusayiŵecheta mwakulilapilila kwa achalongo achimjetu ŵa ku Makedoniya. Ngusinasalila jemanjaji kuti, achalongo achimjetu ŵa ku Akaya aŵele ŵakoseka kwa chaka sambano, soni kusachilila kwenu kwalimbikasisye ŵajinji mwa jemanjaji. 3 Nambo ngwatumisya achalongo achimjetu kweleko, ni chakulinga chakuti kulilapilila kwetu pa jemanja pangani jeleji kukaŵa kwangali mate, soni kuti jemanja mŵe ŵakoseka yisyesyene mpela munaŵechetele. 4 Naga ngwika kweleko ni achalongo achimjetu ŵa ku Makedoniya ni kumsimana jemanja mkanimŵe koseka, m’wejo pampepe ni jemanja tuchitenda sooni ligongo twaliji mkumkulupilila. 5 Myoyo naganisisye yakwalimbikasya achalongo achimjetu kuti alongole kwika kweleko, ni chakulinga chakuti amkamuchisye kulokotela chile yakupeleka yamwasasile kuti chimpeleche yila. Naga mkutenda yeleyi timchilosya kuti mwaliji ŵakoseka kupeleka mwakusachilila ngaŵaga mwakumkanganichisya.

6 Nambo pakwamba ya ngani jeleji, mmanyilile kuti, jwalijose jwakupanda yapanandi tachigowolasoni yapanandi, soni jwalijose jwakupanda yejinji tachigowolasoni yejinji. 7 Jwalijose atende mwakamulana ni yasimichisye mumtima mwakwe, ngaŵaga mwakudandawula kapena mwakulikanganichisya, pakuŵa Mlungu akusamnonyela mundu jwakupeleka mwakusangalala.

8 Nambosoni, Mlungu mpaka akombole kumlosya jemanja umbone mtima wekulungwa, ni chakulinga chakuti mkasoŵa kandu nambo kuti mkole yindu yosope yakumkamuchisya kutenda yindu yiliyose yambone. 9 Yeleyi yikukamulana ni yagakusasala Malemba kuti, “Jwalakwe ŵagaŵile ŵandu mwakoloŵa makono. Jwalakwe ŵapele ŵandu ŵakulaga. Chilungamo chakwe chichitama mpaka kalakala.” 10 Sambano jwele jwakusapeleka mbeju mwakoloŵa makono kwa jwakupanda soni jwakusapeleka yakulya kuti ŵandu alye, chachimpa jemanja mbeju syejinji kuti mpande, soni chachitupiya yagowola yenu yachilungamo.* 11 Mlungu akumpa upile jemanja pa chilichose kuti mkomboleje kupeleka mwakoloŵa makono. Yeleyi yikutendekasya kuti ŵandu amyamichileje Mlungu ligongo lya yakupeleka yenu yatukwagaŵila ŵane. 12 Yeleyi yili myoyo ligongo lyakuti utumiki wakwakamuchisya ŵandu watukutendawu nganiwuŵa wakwamba kwapa ŵaswelawo yakusosechela yawope, nambo ulisoni wakwatendekasya ŵandu kuti amyamichileje Mlungu. 13 Jemanjaji akusamyamichila Mlungu ligongo lyakuti chikamuchisyo chamkupeleka chikulosya kuti mkusakuyaga ngani syambone syamkusalalichila syakwamba Klistu, soni kuti mli ŵakoloŵa makono kwa jemanjaji soni kwa ŵandu wosope. 14 Sonitu jemanjaji akusampopelela jemanja soni akusamnonyela mnope ligongo lya umbone mtima wekulungwa wele Mlungu awulosisye pa jemanja.

15 Tukumyamichila Mlungu ligongo lyakutupa mtuka wakwe walulele wanganituŵa tukombwele kuwulondesya.