Undumetume Wakwakamucisya Ŵandu Pasimene ni Ngosi sya M’cipago

1, 2. (a) Ana Aklistu ŵa ku Yudeya ŵasimene ni cakusawusya camtuli? (b) Ana abale ŵalosisye camtuli kwanonyela Aklistu ŵa ku Yudeya?

CA M’MA 46 C.E., mu Yudeya mwapali sala jekulungwa. Ŵakulijiganya ŵa Klistu ŵaŵatamaga mumkuliwu, yasawusyaga kusuma yakulya ligongo lyakuti yadulaga mnope. Salaji jayice pakogoya mnope. Nambope yaliji yakuti capate cikamucisyo kutyocela kwa Yehofa mu litala lyakuti pangali jwakulijiganya jwalijose jwa Klistu juŵapocele cikamucisyo kupitila m’litalali. Ana ni cici cacatendekwe?

² Ligongo lyakuti Aklistu ŵa Ciyuda soni ŵamitundu jine ŵaŵatamaga ku Antiokeya jakwayiye mnope nganiji, ŵasonjile mbiya kuti sikakamucisye acalongo acimjawo ŵa ku Yelusalemu soni ku Yudeya. Kaneko ŵamsagwile Banaba ni Saulo kuti akapelece cikamucisyoci kwa acakulungwa ŵa mumpingo ku Yelusalemu. (Aŵalanje Masengo 11:27-30; 12:25.) Ana akuganisya kuti cinonyelo ciŵalosisye abale ŵa ku Antiokeyaci, cakwayiye mwamtuli abale ŵa ku Yudeya, ŵaŵaliji pa sala jakogoya mnope?

3. (a) Ana ŵandu ŵa Mlungu ŵa masiku agano, akusalosya camtuli kuti akukuya cisyasyo ciŵalosisye Aklistu ŵa ku Antiokeya? Apelece cisyasyo. (Alolesoni libokosi lyakuti “Masengo Getu Gekulungwa Gandanda Gakwakamucisya Ŵandu M’masiku Getu Gano.”) (b) Ana mu mtwe awuno citukambilane yiwusyo yapi?

³ Yayatendekwe pandaŵiji yakuti Aklistu ŵa mkuli wine ŵatumisye cikamucisyo kwa Aklistu ŵa mkuli wine, yaliji yandanda kulembedwa m’Baibulo. Masiku agano tukusakuya cisyasyo caŵalosisye abale ŵa ku Antiokeya. M’yoyo, patupikene kuti abale ŵetu ŵa mkuli wine asimangene ni yakulingwa kapena ngosi ja m’cipago, tukusitwakamucisyaga.a Undumetume wakwakamucisya ŵakukulupilila acimjetu pandaŵi jajitendekwe ngosi ja m’cipago, uli wakulandana ni maundumetume gane. Kuti tupikanicisye yeleyi kwende tukambilane yiwusyo yakuyicisyayi, Ana ni ligongo cici tukusosekwa kugawonaga masengo gakwakamucisya ŵane kuŵa undumetume? Ana ni magongo gapi gagakusatutendekasya kukamula masengo gakwakamucisya ŵane pajitendekwe ngosi ja m’cipago? Ana tukusapata majali gamtuli patukukamula masengoga?

4. Ana Paulo ŵasalile Aklistu ŵa ku Kolinto yamtuli pakwamba ya undumetume wa Ciklistu?

⁴ Mu cikalata cakwe caŵili cakwawula kwa Aklistu ŵa ku Kolinto, Paulo jwalondesisye kuti Aklistu akwete maundumetume gaŵili gakulandana. Maloŵe ga Pauloga gajawulaga kwa Aklistu ŵasagulwe. Atamose kuti yili m’yoyo, maloŵega gakukamulasoni masengo kwa Aklistu ‘ŵangondolo sine’ masiku agano. (Yoh. 10:16) Mbali jimo ja undumetumewu, jili “undumetume wakwakamulanya ŵandu.” Tukusatenda yeleyi patukukamula masengo gakulalicila soni kwajiganya ŵandu. (2 Akoli. 5:18-20, NW; 1 Tim. 2:3-6) Mbali jine ja undumetume wetu jili yatukusatenda pakwakamucisya ŵakulupilila acimjetu. Pelepatu Paulo jwasalaga ya “undumetume wakwakamucisya ŵandu.” (2  Akoli. 8:4, NW) M’yoyo malemba gaŵili gatugakamwile maloŵega, gana maloŵe gakuti undumetume. Liloŵe lyakuti undumetume ŵaligopolele kutyocela ku liloŵe lya Cigiliki lyakuti di·a·ko·niʹa. Ligongo cici liloŵeli lili lyakusosekwa mnope?

5. Ligongo cici Paulo jwasasile kuti masengo gakwakamucisya ŵandu ŵasimene ni ngosi ja m’cipago ulisoni undumetume?

⁵ Paulo ŵakamulicisye masengo liloŵe lya Cigilikili pa maundumetume gosopega. Jwalakwe jwakamulenye masengo gakwakamucisya ŵandu pajitendekwe ngosi ja m’cipago ni maundumetume gane gosope gakusakamula Aklistu m’mipingo. Jwalakwe jwatite, “Pana maundumetume gakulekanganalekangana nambo pana Ambuje ŵamope, soni pana masengo gakulekanganalekangana, . . . ,” Nambo masengo gosopega gakusakomboleka ni msimu umope.” (1 Akoli. 12:4-6, 11, NW) Pelepa Paulo jwalosyaga kuti maundumetume gakulekanganalekangana ga mumpingo gali “undumetume wapajika.”b (Alo. 12:1, 6-8) Ni ligongo lyakwe yili yangasimonjesya kuti jwalakwe jwakamulicisye masengo ndaŵi jakwe ‘pakupeleka cikamucisyo kwa ŵandu ŵa Mlungu.’—Alo. 15:25, 26.

6. (a) Mwakamulana ni yaŵasasile Paulo, ana ligongo cici masengo gakwakamucisya ŵandu ŵasimene ni ngosi ja m’cipago jili mbali jakulambila kwetu? (b) Alondesye mwagakusajendela masengo getu gakwakamucisya ŵane pasimene ni ngosi ja m’cipago pacilambo cosope. (Alole libokosi lyakuti “Pajitendekwe Ngosi.” peji 214)

⁶ Paulo jwakamucisye Aklistu ŵa ku Kolinto kumanyilila kuti masengo gakwakamucisya ŵandu pandaŵi jasimene ni ngosi ja m’cipago, galiji mbali ja undumetume wawo soni kulambila kwawo Yehofa. Jwalakwe jwayiwonaga kuti, Aklistu akusapeleka cikamucisyoci ligongo lyakuti “akusajiticisya ngani syambone syakusala ya Klistu.” (2 Akoli. 9:13) M’yoyo, ligongo lyakuti Aklistu akusaŵaga ŵakusacilila kuya yaŵajiganyisye Klistu, jemanjaji akusiŵakamucisya ŵakulupilila acimjawo. Paulo jwasasile kuti, yakusatenda Aklistu pakwakamucisya ŵakulupilila acimjawo, yikusalosyaga kuti “Mlungu ŵasalalile mtima mnope.” (2 Akoli. 9:14; 1 Pet. 4:10) Sanja ja Mlonda ja December 1, 1975, pakulondesya yamasengo gakwakamucisya ŵandu pasimene ni ngosi sya m’cipago jatite, “Tukakayicilaga amtapanandi kuti Yehofa soni Yesu akusawuwona undumetumewu kuŵa wakusosekwa mnope.” Kusala yisyene masengo gakwakamucisya ŵandu pasimene ni ngosi sya m’cipago uli undumetume wapajika.—Alo. 12:1,  7; 2 Akoli. 8:7; Aheb. 13:16.

7, 8. Ana ni ligongo lyapi lyandanda lyatukusatendela undumetume wakwakamucisya ŵandu ŵasimene ni ngosi ja m’cipago? Alondesye.

⁷ Ana cakulinga cetu pamasengo gakwakamucisya ŵane cili cici? Paulo jwajanjile ciwusyoci mu cikalata cakwe caŵili cakwawula kumpingo wa ku Kolinto. (Aŵalanje 2 Akolinto 9:11-15.) Mu ndimesi, Paulo jwasasile magongo kapena yakulinga yekulungwa yitatu yayikusatutendekasya kuti tukamuleje nawo ‘masengo . . . gakwatendela ŵandu ŵa Mlungu,’ gagali masengo gakwakamucisya ŵane. Kwende tukambilane magongoga.

⁸ Ligongo lyandanda, Undumetume ŵakwakamucisya ŵandu pasimene ni ngosi sya m’cipago ukusacimbicisya Yehofa. Cayiwone kuti mu ndime msanosi, Paulo jwasalile acalongo acimjakwe mwakuwilisyawilisya kuti atendeje masengo ligongo lya Yehofa. Ndumetumeju jwakumbwisye jemanjaji ya ‘kumtogolela kapena kuti kum’yamicila Mlungu,’ soni kuti “ŵajinji tacimtogolela Mlungu kwejinji.” (Ndime 11, 12) Jwasasilesoni kuti masengo gakwakamucisya Aklistu pajitendekwe ngosi gakusakamucisya “kumlumba Mlungu” soni kuyamicila “umbone mtima wekulungwa wa Mlungu.” (Ndime 13, 14, NW) Paulo jwamalisisye kulondesya ya undumetumewu mwakusala kuti, “Kwende tumtogolele Mlungu.”—Ndime 15; 1 Pet. 4:11.

9. Apelece cisyasyo cakulosya kuti masengo gakwakamucisya ŵandu ŵasimene ni ngosi ja m’cipago, gakusigakamucisya ŵandu kucenga kaganisye kawo.

⁹ Mwakulandana ni Paulo, ŵakutumicila ŵa Mlungu masiku agano akusawuwona kuŵa upile kwakamucisya ŵane pasimene ni ngosi ja m’cipago. Ligongo akusaŵa ali mkumcimbicisya Yehofa soni kulosya umbone wa yijiganyo yakwe. (1 Akoli. 10:31; Tit. 2:10) Yeleyi yili yisyene ligongo masengoga gakusakamucisya kutyosya nganisyo syakulemweceka syakwete ŵandu ŵane pakwamba ya Yehofa ni Mboni syakwe. Aganicisye ya cisyasyo aci, Jwamkongwe jwine jwaŵisile cimanyisyo palitanga lyakwe cicakwete maloŵe gakuti, “Ngangusaka Ŵamboni sya Yehofa Kwika Panyumba Jangu.” Nambo lisiku line jwamkongweju ŵaweni ŵamasengo ŵakamucisya pajitendekwe ngosi ali mkulinganya nyumba jijajonasice ciŵandika nyumba jakwe. Kwa masiku gakuŵalanjika, jwalakwe jwasimongaga kwawona ŵanduŵa ali mkukamula masengoga mwakukamulana mnope, mwamti lisiku line jwapite papopo kuti akamanyilile ŵanduŵa. Ali amanyilile kuti ali Ŵamboni sya Yehofa, yamkwayiye mnope mwamti jwaasasile kuti, “Mbele ndili mkwawona jemanja mwakulemweceka.” Yakuyicisya yakwe, jwatyosisye cimanyisyo cila palitanga lyakwe.

10, 11. (a) Ana ni yisyasyo yapi yayikusalosya ligongo lyaŵili lyatukusakamulila masengo gakwakamucisya ŵandu ŵasimene ni ngosi ja m’cipago? (b) Ana kabuku kapi kakakusakamucisya ŵandu ŵakusakamula masengo gakwakamucisya ŵandu ŵasimene ni ngosi ja m’cipago? (Alole libokosi lyakuti “Cida Cakwakamucisya Ŵandu Ŵakusiŵakamucisya Ŵane pa Ngosi ja m’Cipago.”)

¹⁰ Ligongo lyaŵili, ‘tukusakamucisya yakusoŵa’ ya ŵakulupilila acimjetu. (2 Akoli. 9:12a) Tukusaŵa ŵakusacilila kupeleka cikamucisyo capandaŵi jakwe soni kunandiya yakusawusya yasimangene nayo abale ni alongo ŵetu. Tukusatenda yeleyi ligongo lyakuti, abale ni alongo ŵa Ciklistu akusapanganya ‘cilu cimpepe’ soni kuti “naga ciŵalo cimo cikupikana kupweteka, yiŵalo yosope yikusapikana kupweteka.” (1 Akoli. 12:20, 26) M’yoyo cinonyelo soni canasa, yikusiyatendekasya abale ni alongo masiku agano kwimicila kaje yatesileje ni cakulinga cakuti akakamucisye kwajitendekwe ngosi ja m’cipago. Akusatenda yeleyi mwakusonganganya yida yakuja kamulicisya masengo pakwakamucisya ŵakulupilila acimjawo. (Yak. 2:15, 16) Mwacisyasyo, ku Japan mu 2011, jatendekwe ngosi ja matumbela gamacili gagakusatendekwa ligongo lya cisicinya (tsunami). M’yoyo ofesi ja nyambi ja ku United States, jaŵendile cikamucisyo ku Komiti ja Masengo Gakutaŵa ja Upande kuti jipate abale ŵakumanyilila cenene masengo ŵampaka ajawule kukukamucisya kutaŵa Nyumba sya Ucimwene sisyajonasice. Ana abale ŵatesile cici ali apikene cimanyisyoci? Mwangapita ndaŵi, abale ni alongo ŵakulipeleka ŵakwana ciŵandika 600 ŵalipelece kuti akakamucisye masengoga. Mwamti ŵajiticisye kwawula ku Japan pakamulicisya masengo mbiya syawo. Ligongo lya yeleyi ofesi ja nyambi ja ku United States jatite, “Tutesile lung’wanu mnope ni mwajipocelele ŵandu nganiji.” M’bale jwa ku Japan ali am’wusisye m’bale jwine cacamtendekasisye kwika kukukamucisya masengoga, m’baleju jwatite, “Abale ŵetu ŵa ku Japan kuno ali mbali ja ‘cilu cetu.’ M’yoyo yayikwasawusya abaleŵa soni yakuti kapikane kupweteka, m’wejisoni yikutukwaya.” Ligongo lyakwanonyela ŵane, abale ni alongo aŵisile umi wawo pangosi pakusaka kwakamucisya ŵakulupilila acimjawo.c—1 Yoh 3:16.

¹¹ Ŵandu ŵanganaŵa Ŵamboni akusayamicila masengo getu gakwakamucisya ŵandu pandaŵi jasimene ni ngosi ja m’cipago. Mwacisyasyo mu 2013, m’cilambo ca United States mu upande wa Arkansas mwatendekwe ngosi ja m’cipago. Nyusipepala jine pakusala yaŵatite abale pakulipeleka kukamucisya masengo pandaŵiji, jatite, “Mboni sya Yehofa sikusisyakosecelekasya ŵandu ŵawo ŵakulipeleka kuti akwanisye kukamula cenene masengo pandaŵi jajitendekwe ngosi ja m’cipago.” Kusala yisyene, mpela mujwasalile ndumetume Paulo, ‘tukusakamucisya yakusoŵa’ ya abale ŵetu.

12-14. (a) Ana ligongo lyatatu lyakukamulila masengo gakwakamucisya ŵandu pasimene ni ngosi ja m’cipago lili lyakusosekwa camtuli? (b) Ana ni maloŵe gapi gaŵaŵecete ŵakutumicila ŵane gagakulosya kuti kupitilisya kutenda yindu yausimu kuli kwakusosekwa mnope?

¹² Ligongo lyatatu, tukusitwakamucisya ŵandu ŵasimene ni ngosi sya m’cipago kuti atandilesoni kutenda yindu yausimu mwakutamilicika. Ligongo cici kutenda yeleyi kuli kwakusosekwa mnope? Paulo akusala kuti, “ŵandu ŵajinji tacimtogolela Mlungu,” ligongo lya cikamucisyoci. (2 Akoli. 9:12b) Kusala yisyene ŵandu ŵakulaga ni ngosi ja m’cipago mpaka am’yamicile mnope Yehofa ligongo lyakutandilasoni kutenda yindu yausimu mwakutamilicika. (Afil. 1:10) Mu 1945, Sanja ja Mlonda jine jatite, “Paulo jwajiticisye . . . yakuti abale apeleceje yakupeleka kuti yikakamucisye . . . abale ŵa Ciklistu ŵasimene ni yakusawusya. Cikamucisyoci cikusacakamucisya Aklistuŵa kuŵa ŵakusangalala soni ŵagopoka kukamula masengo gakumtumicila Yehofa mwamacili.” Cakulingaci nganicicengasoni masiku agano. Abale ŵakulaga ni ngosi ja m’cipago pakutandilasoni kulalicila, akusaŵa ali mkulilimbikasya acimsyene soni kwalimbikasya acimjawo ŵaŵandikene nawo nyumba.—Aŵalanje 2 Akolinto 1:3, 4.

¹³ Kwende tulole ndemanga syaŵaŵecete abale ŵane ŵaŵapocele cikamucisyo paŵasimene ni ngosi sya m’cipago. Cikamucisyoci cakamucisye kutandilasoni kulalicila. Yeleyi yalimbisye cikulupi cawo. M’bale jwine jwatite, “Kwawula kukulalicila kwayikasisye majali gejinji muliŵasa lyetu. Kwatondoya ŵane mwakwalalicila kwatukamucisye kunandiya kulagasika nganisyo kwetu.” Mlongo jwine jwatite, “Kujigala mbali muyakutendekwa yausimu kwangamucisye kumalana ni nganisyo syaganicisya ya yindu yangu yayajonasice. Yangamucisye kola mtendele wa mumtima.” Mlongo jwinesoni jwatite, “Atamose kuti yindu yayice pakusawusya mnope pa umi wetu, nambo masengo gakulalicila gakamucisye liŵasa lyetu. Kuŵecetana ni ŵane pakwamba ya cembeceyo catukwete soni ya cilambo casambano yalimbisye cikulupi cetu cakuti yindu yosope yene yiciŵa yasambano.”

¹⁴ Cindu cine causimu cakusosekwa kutenda ŵakulupilila acimjetu pasimene ni ngosi sya m’cipago, cili kutandilasoni kusongana ni mpingo mwacitema. Kwende tuganicisye yayamtendecele Mlongo Kiyoko jwele pandaŵijo ŵakwete yaka ya m’ma 50. Katundu jwakwe josope jwajonasice. Jwalakwe jwagambile kusigala ni masilipasi soni yakuwala yaŵawete, mwamti nganakola pakamula. Kaneko jwamkulungwa jwa mumpingo jwine jwamsalile mlongoju kuti catendele misongano mu galimoto jakwe. Kiyoko jwatite, “Jwamkulungwaju ni ŵamkwakwe, mlongo jwine soni une twatendele msonganowu m’galimoto jakwe. Msonganowu waliji wangasaka yejinji nambope wamasisye mwakusimonjesya kulagasika nganisyo kwangu. Nalipikanaga kuti ndili pamtendele. Msonganowu wangamucisye kumanyilila macili gajikwete misongano ja Ciklistu.” Mlongo jwinesoni pakusala yakusosekwa kwa misongano jiŵasimanikwe panyuma pakusimana ni ngosi ja m’cipago, jwaŵecete kuti, “Misonganoji jangamucisye kuŵa jwakupilila.”—Alo. 1:11, 12; 12:12.

15, 16. (a) Ana Aklistu ŵa ku Kolinto soni m’mikuli jine ŵapatile majali gamtuli ligongo lyakukamula masengo gakwakamucisya ŵandu ŵasimene ni ngosi ja m’cipago? (b) Ana m’wejisoni tukusapataga majali gamtuli patukukamula masengoga masiku agano?

¹⁵ Pakulondesya ya undumetumewu, Paulo jwasalilesoni Aklistu ŵa ku Kolinto ya majali gampaka apate jemanjajo soni Aklistu ŵane ligongo lyakukamula nawo undumetumewu. Jwalakwe jwatite, “Sambano akumpopelela jemanja [Aklistu Ŵaciyuda ŵa ku Yelusalemu ŵaŵapocele cikamucisyo] kulosya kuti akusamnonyela ligongo Mlungu amsalalile mtima mnope.” (2 Akoli. 9:14, NW) Kusala yisyene, koloŵa magasa kwa Aklistu ŵa ku Kolinto kwatendekasisye Aklistu Ŵaciyuda kwapopelela jemanjajo soni ŵandu ŵamitundu jine. Yeleyi yatendekasisye kuti anonyelaneje mnope.

¹⁶ Pakamulicisya masengo maloŵe ga Paulo gakusala yaumbone wawukusayika ligongo lya undumetume wakwakamucisya ŵane pajitendekwe ngosi ja m’cipago, Sanja ja Mlonda ja December 1, 1945, jatite, “Naga ŵandu ŵa Yehofa ŵamkuli wine akupeleka cikamucisyo kwa Aklistu acimjawo ŵamkuli wine, yikusakamucisya kuti ŵanduwo aŵe ŵakamulana mnope.” Yeleyi ni yayikwatendecela Aklistu ŵakusakamula masengo gakamucisya ŵane pajitendekwe ngosi ja m’cipago. Jwamkulungwa jwa mumpingo jwajwakamucisye pandaŵi jagasewucile mesi jwatite, “Kamula undumetumewu kwangamucisye kuŵandikana mnope ni abale ŵangu kupundana ni kalakose.” Mlongo juŵayamicile ligongo lyakupocela cikamucisyo panyuma pakusimana ni ngosi ja m’cipago jwatite, “Ubale wetu wapacilambo cosope ukulosya kuti tusigele panandi kwinjila mu Paladaiso.”—Aŵalanje Misyungu 17:17.

17. (a) Ana maloŵe gagali pa Yesaya 41:13 gakusakamulana camtuli ni masengo gakwakamucisya ŵandu ŵasimene ni ngosi ja m’cipago? (b) Apelece yisyasyo yayikusalosya kuti masengo gakwakamucisya ŵandu ŵasimene ni ngosi ja m’cipago gakusacimbicisya Yehofa soni kulimbisya mkamulano wetu. (Alole libokosi lyakuti “Ŵamasengo Ŵakulipeleka Pacilambo Cosope Akusakamucisya Ŵandu.”)

¹⁷ Ŵakusakamula masengo gakwakamucisya ŵane, payice kwajitendekwe ngosi, ŵandu ŵakwembeceya cikamucisyowo akusakuwona kwanilicikwa kwapajika kwa usyesyene waŵawusasile Mlungu wakuti, “Une Ambuje Mlungu jwenu, ngumlimbisya ni kumsalila kuti, ‘Mkatenda woga; tinjimkamucisya.’” (Yes. 41:13) Mlongo jwine juŵakulupwice pa ngosi ja m’cipago jwatite, “Panyuma pakulola yindu yayijonasice, nalipikene kuŵa jwangali cembeceyo cilicose, nambo nam’weni Yehofa ali mkungamucisya. Cikamucisyo cinapocele kutyocela kwa abale caliji cekulungwa mnope mwamti nganimba ngombwele kucilondesya.” Panyuma pakutendekwa ngosi ja m’cipago, acakulungwa ŵaŵili ŵa mumpingo ŵalembile cikalata cakulondesya muŵapikanilaga abale ni alongo ŵa mumpingo mwawo. Ŵalembile kuti, “Cisicinya ciyikasisye yakupweteka mnope, nambo Yehofa atukamucisye kupitila mwa abale ŵetu. Tuŵele tuli mkupikana ya masengo gakwakamucisya ŵandu pasimene ni ngosi ja m’cipago, nambo lelo tuciweni cikamucisyoci ni meso getu.”

18. Ana akusosekwa kutenda cici kuti akamule nawo masengo gakwakamucisya ŵandu ŵasimene ni ngosi ja m’cipago? (Alolesoni libokosi lyakuti “Masengo Gagacenjile Cakulinga ca Umi Wakwe.”)

¹⁸ Ana akusaka kumanyilila cisangalalo cacikusayika ligongo lyakamula masengo gakwakamucisya ŵandu pajitendekwe ngosi ja m’cipago? Naga kwanga kwawo kuli elo, nikuti akusosekwa kumanyilila kuti ŵandu ŵakusakamula masengo gakwakamucisya ŵane pasimene ni ngosi ja m’cipago, akusiŵasagula kutyocela m’makuga gakutaŵa Nyumba sya Ucimwene. M’yoyo, akusosekwa kuŵenda mafomu gakuwucisya undumetumewu kwa acakulungwa ŵa mumpingo. Jwamkulungwa jwa mumpingo jwaŵele ali mkutenda masengoga kwandaŵi jelewu jwatite, “Mundu mkanajawule kukamucisya ku malo kujitendekwe ngosi ja m’cipago, candanda Komiti Jakamucisya Pangosi Jacipago jikusosekwa jimjiticisye kaje.” Kutenda yeleyi kukusakamucisya kuti masengogo gatendekwe mwakulongosoka.

19. Ana masengo gakwakamucisya ŵandu ŵasimene ni ngosi ja m’cipago gakusalosya camtuli kuti tuli ŵakulijiganya ŵa Klistu ŵasyesyene?

¹⁹ Masengo gakwakamucisya ŵane pasimene ni ngosi ja m’cipago lili litala lyekulungwa lyakulosya kuti tukusapikanila lilamusi lya Yesu lyakuti, “Mnonyelaneje jwine ni mjakwe.” Patukunonyelana m’litala lyeleli, tukusalosya kuti tuli ŵakulijiganya ŵasyesyene ŵa Yesu. (Yoh. 13:34, 35) Yili yakusangalasya kuti tukwete abale ni alongo ŵajinji masiku agano ŵakusakamula masengoga mwakulipeleka mnope. Pakukamula masengoga, akusaŵa ali mkumcimbicisya Yehofa ligongo lyakuti akwakamucisya ŵakulupilila acimjawo ŵakuwukamucisya Ucimwene wa Mlungu mwakulupicika.