“Mkasimtenda Woga. Cinamkamucisye”

TUWANICISYE kuti akwenda mu msewu cilo mnope. Kaneko akupikana kuti mundu jwine akwakuya munyuma mwawo. Pajimi, mundu jula akwimasoni. Pakutanda kwenda mwakwanguya, mundu jula akutandasoni kwenda mwakwanguya. Kaneko wawojo akutanda kuwutucila ku nyumba ja mjawo jajili pakuŵandicila. Mjawojo paŵawugulile litanga ni kwinjila, mtima wawo ukutamilicika pasi pakumanyilila kuti akulupwice.

Komboleka kuti yatuyisasileyi nganiyatendeceleje, nambo mwine akwete yakusawusya yine yapaumi yayikwalagasya nganisyo. Mwambone, ana yikwasawusya kumasya cakulemwa cine cakwe cakusasacilila cili cimasile, nambo akwamba kuwilisya kucitenda? Ana atemi kwandaŵi jelewu ali nganaŵa pamasengo soni akulepela kugapata atamose kuti akulingalinga kugasosasosa? Ana akusalaga nganisyo pakuganicisya mwayiciŵela yindu pacacikalambala soni kola yakusawusya yejinji m’cilu? Kapena ana pana cindu cine cakwe cacikwalagasya nganisyo?

Cinga akwete yakusawusya yatuli, nambo ana nganaŵa asangalele kola mjawo jwapamtima jwampaka amsalileje yakusawusya yawoyo soni jwampaka ŵapeje cikamucisyo cakusosecela? Ana akwete mjawo jwapamtima jweleju? Elo, akwete. Yehofa ali mjawo jwapamtima, mpela muŵaŵelelesoni kwa Abulahamu, mpela mwalikusaŵecetela lilemba lya Yesaya 41:8-13. Pa ndime 10 ni 13 ja lilembali, Yehofa akwasalila ŵakutumicila ŵakwe kuti, “Mkasimtenda woga, pakuŵa ndili namwe. Mkasimdandawula, pakuŵa ndili Mlungu jwenu. Cinamlimbisye, soni cinamkamucisye. Cinamkamule mwamacili ni mkono wangu wamlyo wacilungamo. Pakuŵa une, Yehofa Mlungu jwenu, namkamwile mkono wenu wamlyo, une ngumsalila kuti, ‘Mkasimtenda woga. Cinamkamucisye.’”

Ana maloŵega nganigaŵa gakulimbikasya? Agambe kuliwanicisya kuti Yehofa akwasalila gele maloŵega. Lilemba lila, ngalikusala kuti wawojo akwenda yalumo ni Yehofa ali ŵakamwile pamkono. Yikaŵe kuti akwenda najo yalumo nikuti mkono wakwe wamlyo ukakamwile mkono wawo wamciji. Nambo likulosya kuti Yehofa ni ‘mkono wakwe wamlyo wacilungamo,’ akamwile ‘mkono wawo wamlyo’, mpela kuti akwawuta kwatyosya mu yakusawusya yawo. Yehofa paŵakamwile mkono wawo wamlyo akusaŵa ali mkwalimbikasya ni kwasalila kuti, “Mkasimtenda woga. Cinamkamucisye.”

Ana akusam’wona Yehofa mpela Atati ŵawo ŵacinonyelo soni Mjawo jwampaka ŵakamucisye pasimene ni yakusawusya? Yehofa akusasamala ya wawojo, soni ali jwakusacilila kwakamucisya. Pasimene ni yakusawusya, jwalakwe akusasaka kuti wawojo alipikaneje kuŵa ŵakuteteyeka ligongo lyakuti akusiŵanonyela mnope. Kusala yisyene, Yehofa ali “cikamucisyo cakusimanikwa mwangasawusya pandaŵi ja yipwetesi.”—Sal. 46:1.

Ŵandu ŵajinji akusalijimba magambo ligongo lya ndamo syakusakala syaŵatendaga munyuma soni akusakayicila naga Mlungu mpaka ŵakululucile. Naga nombe nawo akusalipikana m’yoyo, akusosekwa kuganicisya ya mundu jwakulupicika Yobu juŵasasile ya ‘yakulemwa yaŵatesile ali mnyamata.’ (Yobu 13:26) Jwamalumbo Daudi ŵalipikenesoni mwakulandanamo soni ŵam’ŵendile Yehofa kuti, ‘akakumbucila yakulemwa yanatesile ndili mnyamata.’ (Sal. 25:7) Ligongo lyakuti tuli ŵangali umlama, wosopewe ‘tuli ŵakulemwa soni ŵakupelembela pa lumbili lwa Mlungu.’—Alo. 3:23.

Maloŵe gagali mu buku ja Yesaya mtwe 41, ŵalembele ŵandu ŵa Mlungu ŵakala. Jemanjaji ŵalemwisye mnope pameso pa Yehofa mwati jwalakwe ŵapele cilango mwakunda kuti ajigalwe ku ukapolo ku Babulo. (Yes. 39:6, 7) Nambope, Mlungu ŵasasile mkanipaŵe kuti ŵandu ŵacacipitikuka mtima ni kuwujila kwa jwalakwe, cacakulupusya ku ukapoloko. (Yes. 41:8, 9; 49:8) Yehofa akusalosyasoni cinonyelo soni canasa cakwe moŵa agano kwa ŵandu ŵapitikwice mtima yisyesyene soni ŵakusaka kumsangalasya jwalakwe.—Sal. 51:1.

Kwende tulole cisyasyo ca m’bale jwine lina lyakwe Takuya.a Jwalakwe ŵasacililaga kuleka ndamo syakwe syakusakala syakulolela yakuŵagula soni kung’andila kuyalo. Ndaŵi ni katema, jwalakwe ŵawilisyaga kutenda ndamosi. Ana yeleyi yamkwayaga catuli? Jwalakwe ŵatite, “Nalipikanaga kuŵa jwangali mate, nambo pambosesile kwa Yehofa ni kum’ŵenda kuti angululucile, jwalakwe ŵalimbisyaga.” Ana Yehofa ŵamlimbisyaga catuli? Acakulungwa ŵa mumpingo wa Takuya ŵamsalile jwalakwe kuti ndaŵi jilijose jatandite kusacilila kutenda yakusakalayo, ŵajimbileje foni. Jwalakwe ŵasasile kuti, “Yaŵaga yakusawusya kuti najimbile fonijo, nambo panajimbile, yalimbikasyaga mnope.” Kaneko acakulungwa ŵa mumpingowo ŵalingenye yakuti jwakulolela mkuli akatende ulendo wakucinga kwa Takuya. Jwakulolela mkulijo ŵamsalile jwalakwe kuti, “Nganimbika akuno mwangosi. Nambo mbice ligongo lyakuti acakulungwa ŵa mumpingo asacile kuti une yice. Jemanjajo asagwile kuti namjendele m’mwejo.” Takuya ŵatite, “Uneji ni junalemwaga, nambo Yehofa, kupitila mwa acakulungwa ŵa mumpingo ŵangamucisye.” Takuya ŵapite pasogolo mpaka ŵaŵele mpayiniya jwakutamilicika soni apano akutumicila ku ofesi ja nyambi. Mwakulandana ni yaŵatesile Mlungu pakumkamucisya m’baleju, nombe nawo cacakamucisya patesile yakulemwa.

Ŵandu ŵajinji akusalaga nganisyo ligongo lyakuti nganaŵa pamasengo. Ŵandu ŵane akusatyosegwa pamasengo mwati akusalaga kupata litala line lyakupatila mbiya. Agambe ganicisya mwampaka apikanile mumtima mwawo naga ŵandu akwakana kwalemba masengo. Ŵandu ŵane payikwatendecela yeleyi, akusatanda kuliwona kuŵa ŵangali mate. Ana Yehofa mpaka ŵakamucisye catuli? Jwalakwe nganaŵa ayicile kwapa masengo gambone, nambo candanda mpaka ŵakamucisye kumbucila maloŵe gaŵalembile Mwenye Daudi kuti, “Naliji mwanace, nambo sambano ngusile, nambo nganinam’woneje mundu jwalijose jwakulungama ali amlesile, kapena ŵanace ŵakwe ali mkuŵendaŵenda yakulya.” (Sal. 37:25) Yehofa akusiŵawona wawojo kuŵa ŵapajika, soni ni “mkono wakwe wamlyo wacilungamo,” mpaka ŵakamucisye kupata yakusosecela yawo kuti ajendelecele kumtumicila jwalakwe.

Sara jwakusatama ku Colombia, ŵayiweni yaŵatite Yehofa pakumkamucisya. Jwalakwe ŵaliji pamasengo gambone mnope soni ŵapocelaga mbiya syejinji, nambo gam’malilaga ndaŵi jejinji. Nambope, ŵasacililaga kutenda yejinji pakumtumicila Yehofa, m’yoyo ŵalesile masengogo ni kutanda upayiniya. Nambo yaliji yakusawusya kuti apate masengo gangam’malila ndaŵi. M’yoyo, kaneko ŵatandite kusumisya ice-cream, nambo panandipanandi mbiya syakwe syatandite kumala mwati ŵalesile malondago. Sara ŵatite, “Pamasile yaka yitatu, nambo ngum’yamicila Yehofa ligongo ŵangamucisye kupilila.” Jwalakwe ŵalijiganyisye kulekanganya pasikati pa yindu yakusosecela ni yindu yakonjecesya yatukusasaka. (Mat. 6:33, 34) Kaneko, abwana ŵakwe ŵa kumasengo kuŵakamulaga kula ŵam’ŵilasilesoni kuti akakamuleje masengo gaŵakamulaga pandanda. Sara ŵajanjile kuti cakunde kuti akamulaje masengogo kwa ndaŵi jamnono soni naga campeje ndaŵi jakuti atendeje yindu yausimu. Atamose kuti apano ngakupata mbiya syejinji mpela muŵapatilaga munyuma, nambo jwalakwe akwendelecela kutenda upayiniya. Jwalakwe ŵasasile kuti mundaŵi josopeji, awuweni mkono wacinonyelo wa Yehofa uli mkumkamucisya.

Ŵandu ŵajinji pakukula ni kwika pa kupumula pamasengo, akusalaga nganisyo pakuganicisya naga cacikola mbiya syakwanila kulisamalila kwa umi wawo wosope. Akusadandawulasoni pakuganicisya ya yakusawusya ya m’cilu yacacisimanaga nayo pakalambele. Mwangakayicila jwaliji mwenye Daudi juŵam’ŵendile Yehofa kuti, ‘Akasanjasa pangalambele. Akasandeka macili gangu pagamasile.’—Sal. 71:9, 18.

Ana cici campaka cakamucisye ŵakutumicila ŵa Yehofa kulipikana kuŵa ŵakuteteyeka pakalambele? Akusosekwa kwendelecela kusya cikulupi cawo mwa Mlungu soni asimicisyeje mtima kuti jwalakwe cacapa yakusosecela yawo. Nambope, naga munyuma ŵakwete umi wapenani mnope, mpaka asosekwe kucenga kuti akole umi wangasaka yejinji soni wakwikutila ni yindu yamnono yakwete. Pakutenda yeleyi, caciyiwona kuti kulya “liponda” m’malo mwa “nyama ja ng’ombe jakwimbala” kuli kwambone soni kwakamucisya m’cilu mwawo. (Miy. 15:17) Naga akusaŵika nganisyo syawo syosope pakumtumicila Yehofa, jwalakwe cacapa yakusosecela yawo atamose pakalambele.

Kwende tulole cisyasyo ca José ni Rose, ŵaŵele ali mkutumicila Yehofa mu undumetume wandaŵi syosope kwa yaka yakupunda 65. Kwa yaka yeleyi, jemanjaji ŵasamalilaga babagwe Rose, ŵaŵasosecelaga cikamucisyo ndaŵi syosope. Nambosoni, José ŵalagaga ni ulwele wa khansa mwati ŵamtendagatendaga opaleshoni soni kupocela mitela jine. Ana Yehofa alikamucisye catuli liŵasa lyakulupicikali? Jwalakwe alikamucisye kupitila mu liŵasa lya Tony ni Wendy ŵali mu mpingo mwawo. Liŵasali lyapele jemanjaji kajumba kuti atamejemo. Tony ni Wendy ŵalingenye kajumbaka kuti catamejemo apayiniya kwalulele. Ndaŵi jamunyuma, Tony paŵaliji ku sukulu ŵam’wonaga José ni Rose paliwindo ali mkwawula mu undumetume wa mumgunda ndaŵi syosope. Jwalakwe ŵanonyelaga jemanjaji ligongo lya mtawu wawo, soni mtawu wawowu wamlimbikasisye mnope. Pakulola kuti liŵasali liŵele lili mkutumicila Yehofa kwa yaka yejinji, Tony ni Wendy ŵasagwile yakuti alipe kajumbaka kuti litameje. Kwa yaka 15, jemanjaji aŵele ali mkwasamalila José ni Rose ŵele sambano akwete yaka ya m’ma 80. José ni Rose akusayiwona kuti cikamucisyo calikusapeleka liŵasa lya Tony ni Wendy cili mtuka wakutyocela kwa Yehofa.

Mlungu akwapasoni wawojo mkono wakwe wamlyo wacilungamo. Ana cakamule mkono wa Mlunguju jwakwasalila kuti, “Mkasimtenda woga. Cinamkamucisye”?