Asosesoseje Cindu Cambone Mnope Kupunda Golidi

M’MATALA gane, ŵakulijiganya Baibulo ali mpela ŵandu ŵakuwungunya golidi. Ŵakulijiganyaŵa akusasosekwa kutenda mtawu soni kwendelecela kuwungunya Malemba kuti apate lunda. Mpela ŵakulijiganya Baibulo, ana mpaka tulijiganye cici kutyocela pa yakusatenda ŵandu kuti apate golidi?

Agambe ganicisya ali mkwenda mungulugulu lusulo ni akukawona kaganga kakunyesima mnope. Kaneko akwima ni kukalokota. Panyuma pakwe ali ŵakusangalala kuyiwona kuti apatile kaganga ka golidi. Kagangaka kali kamwana pakukawanicisya ni kamtwe ka macesi soni kangasimanikwa kaŵilikaŵili pakuwanicisya ni maganga ga dayimondi. Kaneko akutanda kulolesyalolesya naga mpaka apate tuganga twa golidi twejinji.

Mwakulandana ni yeleyi, palisiku lyangaliŵalicika munyumamo, Jwamboni sya Yehofa ŵasimene wawojo kandanda ni kutagulilana nawo utenga wa cembeceyo wawukusasimanikwa m’Baibulo. Mwangakayicila, akusakumbucila muŵapikanile mumtima pandaŵi jawo jandanda jaŵapatile golidi jwausimu. Komboleka kuti ndaŵi jeleji ni jaŵamanyilile lina lya Mlungu lyakuti Yehofa kutyocela m’Baibulo. (Sal. 83:18) Kapena komboleka kuŵa ndaŵi jaŵalijiganyisye kuti mpaka aŵe mjakwe jwa Yehofa. (Yak. 2:23) Pandaŵiji ŵamanyilile kuti apatile cindu cambone mnope kupunda golidi jusyesyene, soni komboleka kuti ŵaliji ŵakusacilila kuti apate golidi jwausimu jwamjinji.

Ndaŵi sine tuganga twa golidi tukusasimanikwa mu sulo. Ŵandu ŵakusawungunya golidi akusampataga jwamjinji mu sulosyo ni kusumisya mbiya syejinji.

Paŵatandite kulijiganya Baibulo ni Jwamboni sya Yehofa, komboleka kuti ŵalipikanaga mpela mundu jwakuwungunya ni kupata golidi jwamjinji. Kuganicisya malemba ga m’Baibulo kwakamucisye kuti amanyilile yindu yejinji yakwamba Mlungu. Paŵajendelecelaga kulijiganya usyesyene wa m’Baibulo ŵamanyilile yampaka atende kuti am’ŵandicile Yehofa soni kwendelecela kuŵa m’cinonyelo cakwe kuti capocele umi wangamala.—Yak. 4:8; Yuda 20, 21.

Mpela mwele mundu jwakuwungunya golidi akusasosasosa malo gampaka apate golidi jwamjinji, wawojosoni komboleka kuti ŵatendaga mtawu kuwungunya yindu yausimu. Panyuma pakulijiganya usyesyene wakusosekwa wa m’Baibulo, ŵatesile yakomboleka kuti alipelece kwa Yehofa soni kubatiswa.—Mat. 28:19, 20.

Mundu jwakuwungunya golidi mpaka apate tuganga twa golidi twamnono m’maganga gekulungwa. Nambo m’maganga gane mukusasimanikwa golidi jwamjinji nditu mwati akusagakasa kuti ajigale golidijo. Ŵandu ngakusayicila kum’wona golidi m’maganga ligongo lyakuti ndaŵi syejinji m’liganga lyekulungwa mpaka musimanikwe golidi jwamnono. Nambo atamose yili myoyo, ŵandu akusalimbicila kasa magangago kuti apate golidi pakumanyilila kuti ali jwambiya syejinji.

Mundusoni palijiganyisye ‘yijiganyo yandanda ya m’Baibulo,’ akusasosekwa kulijiganya Baibulo mwamtawu kuti apate yindu yine yakusosekwa yampaka ayikamulicisyeje masengo. (Ahe. 6:1, 2) Ana mpaka atende wuli kuti kulijiganya kwawo Baibulo kuŵeje kwakamucisya atamose kuti aŵele ali mkulijiganya kwa ndaŵi jelewu?

Ajendelecele kola mtawu wakulijiganya. Akoleje lung’wanu lwakumanyilila yindu yejinji. Pakutenda yeleyi cacipata golidi jwausimu jwapenani mnope jwali lunda lwa Mlungu soni malamusi gakutulongola. (Alo. 11:33) Kuti agapikanicisyeje Malemba, mpaka atende cenene kamulicisya masengo yindu yakuwungunyila yatukwete. Aŵejesoni ŵakusacilila kwaŵenda ŵane kuti ŵakamucisyeje soni kwawusya yiwusyo ya m’Baibulo yakwete. Mwambone, mpaka ŵawusye kuti ŵasalile malemba soni ngani syasikusakamucisya soni kwalimbikasya jemanjajo. Ŵasalilejesoni ŵane yindu yambone yapatile palijiganyisyeje Maloŵe ga Mlungu.

Nambo cakulinga cawo cikagamba kuŵape kumanyilila yindu. Ndumetume Paulo ŵatukalamwisye kuti “kumanyilila yindu kukusamtendekasya mundu kuŵa jwakulikwesya.” (1 Akoli. 8:1) M’yoyo atendeje mtawu kuti aŵepe ŵakulinandiya soni ŵakulimba m’cikulupi. Kutenda kulambila kwa peŵasa soni kulijiganya Baibulo pajika mpaka kwakamucisye kuti atendeje yindu mwakamulana ni yakusasaka Yehofa, soni yicalimbikasya kuti ŵakamucisyeje ŵane. Cakupunda pa yosope, caciŵa ŵakusangalala mnope pakumanyilila kuti apatile cindu cambone mnope kupunda golidi.—Miy. 3:13, 14.