NGANI JAKULIJIGANYA 17
Yampaka Alijiganye Mwanja Mama Kutyochela kwa Yunisi
“Mkasimkana yakumjiganya mama ŵenu. Ligongo majiganyo gawo tigamkamuchisye kusalalisya ndamo jenu mpela yachikusatendela chisoti chakusalala ku mtwe kwenu, soni chuma cha mlukosi mwenu.”—MIS. 1:8, 9.
NYIMBO NA. 137 Achakongwe Ŵakulupichika, Alongo Ŵachiklistu
YACHITULIJIGANYEa
Mamagwe Timoteo soni angangagwe akusangalala jwalakwe pakubatisidwa (Alole ndime 1)
1-2. (a) Ana Yunisi ŵaliji ŵani? Ana jwasimene ni yakusawusya yamtuli paŵamjiganyaga mwanache jwakwe? (b) Alondesye chiwulili cha pachikuto.
ATAMOSE kuti Baibulo jangasala yakwamba ubatiso wa Timoteo, nambope ngatukukayichila kuti Yunisi ŵaŵaliji mamagwe Timoteo ŵasangalele mnope palisikuli. (Mis. 23:25) Agambe ganichisya muŵapikanile mamagweŵa paŵam’weni Timoteo ali ajimi mmesi. Ngatukukayichila kuti mamagwe Timoteo yalumo ni angangagwe ŵasangalele mnope. Yunisi jwasangalele mnope paŵam’weni Timoteo ali mkutiŵila mmesi. Mamagwe Timoteo ŵayikene pakugwisya misosi ligongo lya kusangalala. Atamose kuti yaliji yakusawusya, Yunisi jwakombwele kumjiganya mwanache jwakweju kuti amnonyeleje Yehofa soni Yesu Klistu. Ana Yunisi jwalimbene ni yakusawusya yamtuli kuti akombole kutenda yeleyi?
2 Timoteo jwakulile mliŵasa lya achinangolo ŵakulekangana dini. Babagwe ŵaliji ŵa Chigiliki soni mamagwe ni angangagwe ŵaliji ŵa Chiyuda. (Mase. 16:1) Mamagwe ni angangagwe paŵatandaga Chiklistu, Timoteo jwaliji jwachinandipile. Nambo babagwe nganaŵa Mklistu. Ana pelepa Timoteo akajawulaga ku dini japi? Jwalakwe jwaliji ali akusile mwamti akakombwele kulisagulila jika yakutenda. Ana jwalakwe akasagwile kwakuya babagwe? Ana akapitilisye kukuya misyungu ja Chiyuda jaŵalijiganyisye kutandila ali mwanache? Kapena akaŵele jwakulijiganya jwa Yesu Klistu?
3. Mwakamulana ni Misyungu 1:8, 9, ana Yehofa akusagawona chamtuli masengo gakusakamula mwanja mama pakwakamuchisya ŵanache ŵawo kuti alijiganye usyesyene?
3 Nombe masiku agano, mwanja mama ŵa Chiklistu akusaganonyela maŵasa gawo. Kupunda chilichose, jemanjaji akusasaka kwakamuchisya ŵanache ŵawo kuti aŵeje paunasi wambone ni Yehofa. Mlungu jwetu akusayamichila kulingalinga kwawo. (Aŵalanje Misyungu 1:8, 9.) Yehofa ŵalongolele achinangolo ŵajinji kuti akombole kwakamuchisya ŵanache ŵawo kulijiganya usyesyene.
4. Ana masiku agano mwanja mama akusasimana ni yakusawusya yamtuli?
4 Mwachipago, ndaŵi sine mwanja mama akusadandawulaga naga ŵanache ŵawo chachisagula kumtumichila Yehofa mpela muŵatendele Timoteo. Nambosoni achinangolo akusamanyilila yakusasimana nayo ŵanache ŵawo m’chilambo cha Satanachi. (1 Pet. 5:8) Kupwatika pelepa, achinangolo ŵajinji akusalela jika ŵanache ŵawo kapena akusaŵa kuti ali paulombela ni jwamlume jwangakusamtumichila Yehofa. Mwachisyasyo, mlongo jwine lina lyakwe Christineb jwatite, “Ŵamkwangu ŵaliji mundu jwambone nambo nganasangalalaga panajiganyaga ŵanache kuti aŵe ŵa Mboni sya Yehofa. Kwa yaka yejinji natamilaga kulila soni kudandawula naga ŵanache ŵangu chachitanda kumtumichila Yehofa.”
5. Ana chitukambilane chichi mu nganiji?
5 Naga ali nangolo jwa Chiklistu, mpaka akombole kwalela ŵanache ŵawo mpela muŵatendele Yunisi. Mu nganiji chitukambilane yampaka atende mwanja mama pakusyasya chisyasyo cha Yunisi pakwajiganya ŵanache ŵawo kupitila mu yakusaŵecheta soni mu yakusatenda. Chitulolesoni yampaka atende Yehofa pakwakamuchisya jemanja.
ŴAJIGANYEJE ŴANACHE ŴAWO KUPITILA MU YAKUSAŴECHETA
6. Mwakamulana ni 2 Timoteo 3:14, 15, ana Timoteo jwaŵele chamtuli Mklistu?
6 Timoteo pajwaliji jwachinyamata, mamagwe ŵatesile yakakombwele pakumjiganya “Malemba ga Mlungu,” mpela muŵagamanyililaga Ayuda. Yisyene kuti mamagwe Timoteo nganamanyililaga yejinji yakwamba Yesu Klistu. Nambope, yaŵalijiganyaga Timoteo kutyochela m’Malemba yikamkamuchisye kuti aŵe Mklistu. Nambo ana jwalakwe jwaŵele Mklistu? Ligongo lyakuti jwaliji jwachinyamata, jwalakwe jwakwete ufulu wakusagula kutendaga yindu mpela Mklistu. Mwangakayichila, Timoteo ‘jwapitilisye kukulupilila’ mbali jamnono ja usyesyene wakwamba Yesu ligongo lya kulingalinga kwa mamagwe. (Aŵalanje 2 Timoteo 3:14, 15.) Mamagwe Timoteo ŵasangalele mnope ligongo ŵakombwele kumjiganya mwanache jwawo yakwamba Yehofa atamose kuti yaliji yakusawusya. Yunisi jwatesile yindu mwakamulana ni lina lyakwe lyalyatyochele ku maloŵe gakuti “kugomeka.”
7. Ana Yunisi akamkamuchisye chamtuli mwanache jwakwe panyuma pakubatisidwa?
7 Kubatisidwa chaliji chindu chakusosekwa mnope pa umi wa Timoteo. Nambo Yunisi jwadandawulagape yakwamba mwanagweju. Ana mwanacheju akawukamulichisye masengo chamtuli umi wakwe? Ana akakungulukaga ni achimjakwe ŵa ndamo syakusakala? Ana akapite kusukulu ja kwa Atene ni kutanda kukulupilila yijiganyo yaunami? Ana jwalakwe akakamulichisye masengo ndaŵi jakwe, machili gakwe, soni unyamata wakwe pakusosasosa mbiya? Yunisi ngamkanamsagulila yakutenda Timoteo, nambo akagambile kumkamuchisya kuti asagule mwalunda. Ana akatesile chamtuli yeleyi? Mamagwe Timoteo akatesile yeleyi mwakupitilisya kumjiganya mwanache jwakwe kuti amnonyeleje Yehofa soni Yesu. Ngaŵa kuti achinangolo ŵakulekangana dinipe ni ŵakusalaga kwajiganya ŵanache ŵawo. Atamose kwa achinangolo wosope ŵali mu usyesyene mpaka alajeje kwajiganya ŵanache ŵawo kuti amtumichileje Yehofa mwakulupichika. Ana achinangolo ŵeleŵa mpaka alijiganye chichi kwa Yunisi?
8. Ana mwanja mama mpaka atende chichi pakwakamuchisya ŵamkwawo kwajiganya ŵanache?
8 Ŵajiganyeje Baibulo ŵanache ŵawo. Mwanja mama naga achiŵamkwawo ali mu usyesyene, Yehofa akusasaka kuti ŵakamuchisyeje ŵamkwawo pakwajiganya ŵanache. Mpaka atende yeleyi mwakulolechesya kuti Kulambila kwa Peŵasa kukutendekwa ndaŵi syosope. Aŵecheteje yakulimbikasya kwa ŵanache ŵawo yakwamba dongosoloji soni atendeje yakuti kulambilako kuŵeje kwakusangalasya. Komboleka mpaka ŵakamuchisye ŵamkwawo kusagula ngani syampaka alijiganye pa Kulambila kwa Peŵasa. Kupwatika pelepa, naga ŵanache ŵawo akusile mwamti mpaka apindule pakulijiganya kabuku kakuti Asangalaleje Mpaka Kalakala, mpaka aŵeje yalumo ni ŵamkwawo pakwajiganya ŵanachewo.
9. Ana mwanja mama ŵele ŵamkwawo nganaŵa mu usyesyene mpaka apate kwapi chikamuchisyo?
9 Mwanja mama ŵane akusalijiganya Baibulo ni ŵanache ŵawo mwine ligongo lyakuti ali jika kapena ŵamkwawo nganaŵa mu usyesyene. Naga mwelemu ni mwayiŵelele ni wawojo, ngakusosekwa kudandawula mnope. Yehofa chachakamuchisya. Pakwajiganya ŵanache ŵawo, akamulichisyeje masengo yindu yajikusatupa gulu jakwe yakamuchisya pakwiganya. Mpaka atende chenenesoni kwawusya achinangolo ŵane ŵakusamanyilila yindu kuti ŵakamuchisye kumanyilila mwampaka akamulichisye masengo yinduyi pakulambila kwa peŵasa.c (Mis. 11:14) Yehofa mpaka ŵakamuchisyesoni kuti ŵapikanichisyeje ŵanache ŵawo. Amŵendeje kuti ŵakamuchisye kumanyilila yayili munganisyo mwa ŵanache ŵawo. (Mis. 20:5) Mpaka ŵawusye ŵanache ŵawo chiwusyo mpela chakuti, ‘Ana ni chakusawusya chekulungwa chapi chakusasimana nacho kusukulu?’ Chiwusyo mpela chelechi mpaka chikamuchisye kuti atande kuŵechetana ngani jakamuchisya.
10. Ana mpaka ŵajiganye ŵanache ŵawo yakwamba Yehofa m’matala gane gapi?
10 Apateje matala gakulekanganalekangana gakwajiganyila ŵanache ŵawo yakwamba Yehofa. Ŵasalileje ŵanache ŵawo yakwamba Yehofa soni yindu yejinji yaŵatendele. (Det. 6:6, 7; Yes. 63:7) Yeleyi mpaka yiŵe yakamuchisya naga nganaŵa akombwele kwajiganya ŵanache ŵawo panyumba. Mlongo Christine jwatumsasile kundanda kula jwasasile kuti, “Kukambilana ni ŵanache ŵangu yindu yausimu kwaliji kwakusawusya mwamti nagambaga kamulichisya masengo upile uliwose wawupatikene. Pambite kukwenda ni ŵanache ŵangu kapena kukwela wato, twaŵechetaga yakwamba masengo gakusimonjesya ga Yehofa soni yindu yejinji yausimu. Ŵanache ŵangu paŵakusile nalimbikasisye kuti alijiganyeje Baibulo pajika.” Kupwatika pelepa, aŵecheteje yambone yakwamba gulu ja Yehofa soni abale ni alongo. Akanyosyaga achakulungwa ŵamumpingo. Yakusaŵecheta kwa ŵanacheŵa yakwamba achakulungwa ŵa mumpingo mpaka yakamuchisye kuti ndaŵi jine ŵanachewo chiŵaŵende lunda jemanjajo.
11. Mwakamulana ni Yakobo 3:18, ligongo chichi yili yakusosekwa kwikasya mtendele panyumba?
11 Ayikasyeje mtendele panyumba. Ndaŵi syosope alosyeje kuti akusiŵanonyela ŵamkwawo soni ŵanache ŵawo. Ŵachimbichisyeje ŵamkwawo pakuŵechetana ni ŵanache ŵawo soni ŵajiganyeje ŵanachewo kutenda yakulandanayo. Yeleyi yichikamuchisya kuti panyumba pawo paŵeje pamtendele soni yichakamuchisya ŵanache ŵawo kuti alijiganye yakwamba Yehofa mwangasawusya. (Aŵalanje Yakobo 3:18.) Aganichisye chisyasyo cha m’bale Jozsef, jwakutenda upayiniya wapadela ku Romania. Jwalakwe pajwakulaga, babagwe ŵatendekasyaga kuti ŵandu ŵa mwiŵasa mwawo yiŵe yakusawusya kumtumichila Yehofa. M’baleju jwatite, “Mama ŵalingagalingaga kuti panyumbapa paŵeje pana mtendele. Baba paŵaŵechetaga mwaukali, mama ŵaŵechetaga mwakuwusimana mtima. Mama paŵayikopochele kuti ngatukwachimbichisya baba soni kwapikanila, ŵatuŵalanjilaga lilemba lya Aefeso 6:1-3. Kaneko ŵatusalilaga ndamo syambone syakwete Baba. Ŵatukamuchisyagasoni kumanyilila ligongo lyakwe tukusosekwa kwachimbichisya. Yeleyi yakamuchisye kuti yakusawusya yinandipe.”
ŴAJIGANYEJE ŴANACHE ŴAWO KUPITILA MU YAKUTENDA YAWO
12. Mwakamulana ni 2 Timoteo 1:5, ana chisyasyo cha Yunisi chamkamuchisye chamtuli Timoteo?
12 Aŵalanje 2 Timoteo 1:5. Mamagwe Timoteo, ŵapeleche chisyasyo chambone kwa mwanache jwawo. Jwalakwe jwamjiganyisye mwanache jwakwe kumanyilila kuti chikulupi chisyesyene chikusapwatikapo yitendo. (Yak. 2:26) Mwangakayichila, Timoteo komboleka kuti jwayiwonaga kuti mamagwe akwete ndamo syambone ligongo akusamnonyela Yehofa. Timoteo jwayiweni kuti kutumichila Yehofa kwatendekasyaga mamagwe kusangalala. Ana chisyasyo cha Yunisi chamkamuchisye chamtuli Timoteo? Mpela mwajwaŵechetele ndumetume Paulo, Timoteo jwajigalile chikulupi cha mamagwe. Nambotu yeleyi nganiyitendekwa mwangosi. Timoteo jwachiwonaga chisyasyo cha mamagwe mwamti jwajigalile chisyasyo chawo. Mwakulandana ni yeleyi, masiku agano mwanja mama ŵajinji akombwele kwayika pamtima ŵa mwiŵasa mwawo mwangalajila “kuŵecheta maloŵe.” (1 Pet. 3:1, 2) Nombe wawojo mpaka atende yeleyi. Ana mpaka atende chamtuli?
13. Ligongo chichi mwanja mama akusasosekwa kuŵa paunasi wambone ni Yehofa?
13 Kuŵa paunasi wambone ni Yehofa kuŵeje chindu chakusosekwa mnope paumi wawo. (Det. 6:5, 6) Mpela mwakusatendala mwanja mama ŵajinji, wawojosoni akusalijimaga yejinji. Jemanja achinangolo akusalijima ndaŵi jawo, mbiya, lugono soni yindu yine pakusaka kwasamalila ŵanache ŵawo. Nambo ngakusosekwa kuŵaga ŵakutanganidwa mnope ni kwasamalila ŵanache ŵawo mpaka kwika pakulepela kupata ndaŵi jakulimbisya unasi wawo ni Yehofa. Ndaŵi syosope apateje ndaŵi jakupopela pajika, jakulijiganya pajika, soni jakusimanikwa pamisongano ja mpingo. Naga akutenda yeleyi, chachiŵa pa unasi wambone ni Yehofa. Nambosoni chachiŵa chisyasyo chambone ku liŵasa lyawo soni kwa ŵandu ŵane.
14-15. Ana alijiganyisye chichi kwa Leanne, Maria, soni João?
14 Aganichisye yisyasyo ya ŵachinyamata ŵane ŵaŵatandite kumtumichila Yehofa pakujigalila chisyasyo cha mama ŵawo. Mwachisyasyo mwanache jwamkongwe jwa Mlongo Christine lina lyakwe Leanne jwatite, “Nganitulijiganyaga Baibulo naga baba ali pamlango. Nambo mama ŵalimbichilaga mnope kusimanikwa pamisongano ja mpingo. Atamose kuti nganitulijiganya mnope Baibulo, yitendo yawo yatukamuchisye kola chikulupi. Twamanyilile kuti ŵa Mboni sya Yehofa akusajiganya usyesyene mkanituŵe kutanda kusimanikwa pamisongano ja mpingo.”
15 Nombe Maria, jwele babagwe ŵamlekasyaga jwalijose kwawula kumisongano ŵatite,“Mama ŵaliji mlongo jwakulimba mtima. Panaliji mwanache, ndaŵi sine nakanaga kutenda yine yakwe ligongo lyakogopa yachaŵechete ŵane. Nambo kulimba mtima kwawo nambosoni yaŵatiga pakumŵika Yehofa pamalo gandanda, yangamuchisye kuti ndeche kwajogopa ŵandu.” Nombesoni João, jwele babagwe ŵalekasyaga kambilana yakwamba Baibulo pamlango pawo jwatite, “Chindu chachangamuchisye mnope chaliji chakuti, mama ŵakundaga kutenda chilichose pakusaka kwasangalasya baba. Nambo nganakundaga kuti chilichose chalepelekasye kuŵa paunasi wambone ni Yehofa.”
16. Ana chisyasyo cha mwanja mama mpaka chakamuchisye chamtuli ŵane?
16 Mwanja mama akumbuchileje kuti chisyasyo chawo mpaka chakamuchisye ŵane. Ana yeleyi mpaka yikomboleche chamtuli? Agambe ganichisya yachatite pakumkamuchisya ndumetume Paulo chisyasyo cha Yunisi. Ndumetume Paulo jwalembile kuti chikulupi cha Timoteo ‘chatandite kuŵa, . . . ni Yunisi.’ (2 Tim. 1:5) Ana Paulo jwachiweni kwapi kandanda chikulupi cha Yunisi? Komboleka ndumetume Paulo jwasimene ni Loisi soni Yunisi ku Lusitala paulendo wakwe wandanda wa umishonale. Nambosoni pandaŵi jelejo ni paŵakamuchisye achakongwe ŵaŵiliwo kuti aŵe Aklistu. (Mase. 14:4-18) Agambe ganisya, Paulo pajwamlembelaga Timoteo pali papitile yaka chiŵandika 15, jwalakwe jwaliji chiŵela kumbuchila chikulupi cha Yunisi, mwamti ŵamkamulichisye masengo kuŵa chisyasyo chambone kujigalila. Ngatukukayichila kuti chisyasyo chakwe chambone chamlimbikasisye ndumetumeju soni Aklistu ŵane ŵajinji ŵa mundaŵi jakwe. Myoyo, naga akulela jika ŵanache ŵawo kapena wawojo ni ŵamkwawo ali ŵalekangane dini, akakayichilaga yakuti chikulupi chawo chikusalimbikasya ŵane.
Kumjiganya mwanache kuti atande kumnonyela Yehofa kukusajigala ndaŵi. Ngakusosekwa kuwujila munyuma (Alole ndime 17)
17. Ana akusosekwa kutenda chichi naga akuyiwona kuti ŵanache ŵawo ngakukamulichisya masengo yakwajiganya?
17 Nambi wuli naga akuyiwona kuti ŵanache ŵawo ngakukamulichisya masengo yakwajiganya? Akumbuchileje kuti kumjiganya mwanache kukusajigala ndaŵi. Mpela yatite pakulosya pa chiwulilicho, papandile mbeju, ndaŵi sine mpaka akayicheleje naga jichikula nikwika pakusogola yisogosi. Atamose kuti nganaŵa amanyilile naga mbejujo jichisogola, akusapitilisyape kwitilila pakusaka kujikamuchisya kuti jikule chenene. (Maliko 4:26-29) Mwakulandana ni yeleyi, nombe wawojo ndaŵi sine mpaka akayichileje naga akwayika pamtima ŵanache ŵawo. Nganaŵa akombwele kuchenga yindu yele ŵanache ŵawo mpaka asagule kutenda. Nambo naga akupitilisya kutenda yampaka akombole pakwajiganya, chachakamuchisya jemanjajo kuti aŵe paunasi wambone ni Mlungu.—Mis. 22:6.
AMDALILEJE YEHOFA
18. Ana Yehofa mpaka ŵakamuchisye chamtuli ŵanache ŵawo kuti akule mwausimu?
18 Kutandila mu ndaŵi ja m’Baibulo, Yehofa ŵakamuchisye ŵachinyamata ŵajinji kuti aŵe paunasi wambone ni jwalakwe. (Sal. 22:9, 10) Jwalakwe mpaka ŵakamuchisyesoni ŵanache ŵawo kukula mwausimu naga yeleyi ni yakusasaka ŵanachewo. (1 Akoli. 3:6, 7) Atamose kuti ŵanachewo mpaka awonecheje kuti ngakwenda chenene, nambo Yehofa chachipitilisya kwalolela mwachinonyelo. (Sal. 11:4) Pakulosya panandi pajakwe kuti “ali ŵakuŵajilwa,” jwalakwe chachitendapo kandu kuti ŵakamuchisye. (Mase. 13:48, NWT; 2 Mbi. 16:9) Jwalakwe chachakamuchisya kuti aŵechete chindu chambone pandaŵi jakusosechela ŵanachewo kuti achipikane. (Mis. 15:23) Kapena mpaka atendekasye kuti m’bale jwine kapena mlongo asamile mumpingo mwawo jwampaka akalosyeje kuti akutenda chidwi ni ŵanachewo. Atamose ŵanache ŵawo pakusile, Yehofa mpaka atendekasye kuti akumbuchile chindu chine chakwe chaŵalijiganyisye kalakala. (Yoh. 14:26) Pakupitilisya kwajiganya ŵanache ŵawo kupitila mu maloŵe soni mu yitendo yawo, Yehofa chachapa upile.
19. Ligongo chichi mpaka aŵe ŵakusimichisya kuti Yehofa akusangalala ni wawojo?
19 Kuti Yehofa ŵanonyeleje, yangadalila mwakutendela yindu ŵanache ŵawo. Yehofa akusiŵanonyelaga ligongo wawojo akusamnonyela jwalakwe. Naga akulela jika ŵanache ŵawo, Yehofa akwasimichisya kuti chachiŵa Mtati jwa ŵanache ŵawo nambosoni jwakwachenjela wawojo. (Sal. 68:5) Nganaŵa akombwele kwatendekasya ŵanache ŵawo kuti asaguleje yambone kapena iyayi. Nambo naga akupitilisya kumdalila Yehofa soni kutendaga yampaka akombole, chachimsangalasya jwalakwe.
NYIMBO NA. 134 Ŵanache Ali Mtuka Wakutyochela kwa Yehofa
a Nganiji jikulondesya yampaka alijiganye mwanja mama Ŵachiklistu kwa Yunisi, mamagwe Timoteo. Chijakamuchisyesoni kulola yampaka atende kuti ŵakamuchisye ŵanache ŵawo kuti ammanyilile soni kumnonyela Yehofa.
b Mena gane munganiji tugachenjile.
c Mwachisyasyo alole mtwe 50 mu kabuku kakuti Asangalaleje Mpaka Kalakala soni ngani jakuti “Njira Zopangira Kulambira kwa Pabanja Kapena Kuphunzira Baibulo Patokha,” mu Sanja ja Mlonda ja Ogasiti 15, 2011, pp. 6-7.