Mpaka Akole Mtendele Atamose Pakusimana ni Yakusawusya

 1. Ana “mtendele wa Mlungu” uli chichi? Ana mtendele welewu ukusatukamuchisya chamtuli? (Afilipi 4:6, 7)

PANA mtundu wine wamtendele wele chilambochi ngachikusawumanyilila. Welewu uli “mtendele wa Mlungu,” watukusawupata ligongo lyakuŵa paunasi wambone ni Mlungu. Patukwete mtendele wa Mlunguwu, tukusayiwona kuti tuli pamalo gambone. (Aŵalanje Afilipi 4:6, 7.) Tukusasangalalasoni kuŵa paunasi wambone ni ŵandu ŵakusamnonyela Mlungu. Nambosoni tukusasangalala kuŵa paunasi wambone ni “Mlungu jwamtendele.” (1 Ates. 5:23) Patukummanyilila chenene Mlungu, kumdalila, nambosoni kumpikanila, mtendele wakwe mpaka ututamiche mtima mmalo patukusimana ni yakusawusya.

 2. Ligongo chichi ngatukusosekwa kukayichila yakuti yili yakomboleka kola mtendele wa Mlungu?

² Ana yili yakomboleka kupata mtendele wa Mlungu patukusimana ni yakusawusya mpela paubuchile mlili, ngosi syachilengedwe, payikutendekwa yachiwawa, kapena patukulagasidwa? Yakusawusya yeleyi mpaka yitutendekasyeje woga. Nambope Yesu jwasalile ŵakumkuya ŵakwe kuti, “Mkalagasika mumtima mwenu kapena kutenda woga.” (Yoh. 14:27) Yili yakusangalasya kuti abale ni alongo ŵajinji aŵele ali mkupikanila maloŵe ga Yesuga. Ni chikamuchisyo cha Yehofa, jemanjaji akombwele kupata mtendele atamose ali mkulimbana ni yakusawusya.

 3. Ana mlili mpaka usokonasye chamtuli mtendele wetu?

³ Milili mpaka jichenje chilichose paumi wetu. Aganichisye yawatite pakwakwaya ŵandu ŵajinji mlili wa COVID-19. Ŵakuwungunya ŵane, ŵapatile kuti ŵajinji mwa ŵandu ŵaŵaŵechetene nawo ŵasasile kuti pandaŵi ja mliliji nganapataga lugono. Pandaŵiji ŵandu ŵalagasikaga mnope nganisyo, kumwa mnope ukana soni kukamulichisya masengo mnope mitela jakusokonasya mtwe. Nambosoni, patendekwaga yindu yejinji yangasa soni ŵandu ŵajinji ŵaliwulagaga. Naga kumangwawoko kuli kubuchile mlili, ana mpaka atende wuli kuti akalagasikaga mnope nganisyo soni kusangalalaga ni mtendele wa Mlungu?

 4. Ligongo chichi kumanyilila yajwalochesye Yesu yakwamba masiku gakumalisya yikusatupa mtendele?

⁴ Yesu jwalochesye kuti m’masiku gakumalisya pachilambopa pachiŵa milili “mmalo gakulekanganalekangana.” (Luk. 21:11) Kumanyilila yeleyi mpaka kutupe mtendele, ligongo yikusatukamuchisyaga kuti tukasimongaga pajibuchile milili. Payikutendekwa yeleyi tukusamanyilila kuti ni yaŵasasile Yesu yila. Mwamti yikusatukamuchisyaga kupikanila malangiso gaŵapeleche Yesu gakuti, “Mkasimtenda woga ni yeleyi.”—Mat. 24:6.

 5. (a) Mwakamulana ni Afilipi 4:8, 9, ana tukusasosekwa kuŵenda chichi kwa Mlungu paubuchile mlili? (b) Ana wawojo apatile umbone wamtuli ligongo lya kamulichisya masengo Baibulo jakwamba kupikanila?

⁵ Paubuchile mlili mpaka tudandawuleje mnope soni mpaka tutendeje woga. Yeleyi ni yayamtendechele mlongo jwine lina lyakwe Desi.b Pandaŵi jine mpwawo babagwe mlongoju, soni mwanache jwamlume jwa akuluŵawo babagwe, yalumo ni dokotala jwawo ŵajasiche ni ulwele wa COVID-19. Yili yitendekwe yeleyi, mlongoju jwajogopaga kuti mpaka ajigale ulwelewu mwinesoni ni kwapela mamagwe ŵaŵaliji ŵachikulile. Jwalakwe jwadandawulagasoni kuti masengo gakwe mpaka gamale. Myoyo jwayiwonaga kuti chiyiŵeje yakusawusya kupata mbiya syakusumila yakulya soni kulipila nyumba. Ligongo lya yeleyi, jwadandawulaga mnope mwamti chilo nganapataga lugono. Nambo kaneko mlongoju jwapatilesoni mtendele. Ana yakomboleche chamtuli? Jwapopelaga kwa Yehofa ni kumŵenda kuti amkamuchisye kumalana ni kulagasika nganisyoko soni kuti aganichisyeje yindu yambone. (Aŵalanje Afilipi 4:8, 9.) Mlongoju jwampikanilaga Yehofa ali mkuŵecheta, jwatendaga yeleyi pajwakamulichisyaga masengo Baibulo jakwamba kupikanila. Jwalakwe jwatite, “Mwajwaŵalanjilaga jwakuŵalanga Baibulojo, yandamikaga mtima pasi soni yangumbusyaga ya chanasa chakwete Yehofa.”—Sal. 94:19.

 6. Ana kulijiganya pajika soni misongano ja mpingo yakamuchisye chamtuli wawojo?

⁶ Mlili paubuchile mpaka yiŵe yakusawusya kuti tutendeje yindu yosope yatwatendaga. Nambo tukakundaga kuti mliliwo utulepelekasyeje kutenda yindu mpela kulijiganya ndaŵi syosope soni kusimanikwa pamisongano. Ngani sya ŵandu ŵane syasikusasimanikwa m’mabuku soni m’mafidiyo getu, mpaka syakamuchisye kumanyilila kuti Aklistu achimjetu akumtumichila Yehofa mwakulupichika atamose kuti akusimana ni yakusawusya. (1 Pet. 5:9) Misongano ja mpingo mpaka jakamuchisye kuti aganichisyeje yindu yambone yayikusasimanikwa m’Baibulo. Mpaka japesoni upile wakulimbikasidwa soni wakwalimbikasya ŵane. (Alo. 1:11, 12) Pakuganichisya yakusatenda Yehofa pakwakamuchisya ŵakutumichila ŵakwe pakulwala, pakutenda woga, kapena pakutenda lipowo, chikulupi chawo chichiŵa chakulimba, soni ngasakayichila yakuti jwalakwe chachakamuchisyasoni wawojo.

 7. Ana mpaka alijiganye chichi kwa ndumetume Yohane?

⁷ Atendeje yakomboleka kuti aŵechetaneje ni abale ni alongo ŵawo. Paubuchile mlili, ndaŵi sine mpaka tusosekwe kuti tutameje mwakutalikangana atamose patuli yimpepe ni Aklistu achimjetu. Pandaŵi mpela jeleji, mpaka alipikane mpela mwajwapikanile ndumetume Yohane. Jwalakwe jwasakaga kuwonegana meso ni meso ni mjakwe lina lyakwe Gayo. (3 Yoh. 13, 14) Nambope, Yohane jwamanyilile kuti chipajigale ndaŵi mkanaŵe kuwonegana ni Gayo. Myoyo Yohane jwatesile yakakombwele. Jwalakwe jwamlembele Gayo chikalata. Naga ndaŵi sine yili yangakomboleka kuti awonegane ni abale ni alongo meso ni meso, mpaka alinje kwajimbila foni, kapena kwalembela mameseji. Pakuŵechetana ndaŵi syosope ni Aklistu achimjawo, chachimalana ni lipowo soni chachipata mtendele. Aŵechetanejesoni ni achakulungwa ŵa mumpingo pakuyiwona kuti akulagasika nganisyo, soni ayamichileje chikamuchisyo chaŵapele.—Yes. 32:1, 2.

 8. Ana ngosi syachilengedwe mpaka sisokonasye chamtuli mtendele wawo?

⁸ Pasimene ni ngosi syachilengedwe mpela kusefuchila kwa mesi, chifomelesi, kapena moto, mpaka alagasiche nganisyo kwandaŵi jelewu. Naga mundu jwakusamnonyela jwawile pajatendekwaga ngosi kapena naga katundu jwawo jwajonasiche, mpaka adandawuleje mnope ni yeleyi. Nambosoni mpaka ayiwoneje kuti nganakola chembecheyo chilichose, mwinesoni mpaka aŵeje ŵakutumbila. Kutenda yeleyi kwangalosyaga kuti akusanonyela yindu yakuchilu kapena nganakola chikulupi. Mpaka atende yeleyi ligongo lyakuti asimene ni yakusawusya, sonitu ŵandu ŵane mpaka ajembecheyeje kuti wawojo chayiwoneje yindu mwakulemwecheka. (Yoh. 1:11) Nambopetu, mpaka apate mtendele atamose ali asimene ni yakusawusya yekulungwa mnope. Ana yeleyi mpaka yikomboleche chamtuli?

 9. Ana Yesu jwasasile yamtuli yakutukamuchisya kosechela ngosi syachilengedwe?

⁹ Aganichisye yajwalochesye Yesu. Mwakulekangana ni ŵandu ŵane kuchilamboku ŵangakusajembecheya kuti ngosi syachilengedwe mpaka syakwaye, m’weji tukusajembecheya kuti ngosi syachilengedwe chisitupilejetupileje soni mpaka situkwaye. Yesu jwasalile ŵakumkuya ŵakwe kuti, “yisichinya yekulungwa” soni ngosi syachilengedwe sine sichitendekwa mbesi mkanijiyiche. (Luk. 21:11) Jwalakwe jwasasilesoni kuti pachiŵa “Ungapikanila malamusi.” Yeleyi ni yayikutendekwa masiku agano, ligongo ŵandu akuwulagana, kutenda yachiwawa, nambosoni yawuchigaŵenga. (Mat. 24:12) Yesu nganasala kuti ŵandu ŵangakusamtumichila Mlungu ni ŵachachisimana ni yakusawusyayi. Nambo, atamose ŵandu ŵajinji ŵakusamtumichila Yehofa akusalaga ni ngosi syachilengedwe. (Yes. 57:1; 2 Akoli. 11:25) Yehofa nganaŵa atuchenjele mwakusimonjesya ku ngosi syachilengedwe syosope, nambope jwalakwe chachitupa yosope yatukusosekwa kuti tukalagasikaga nganisyo soni kutukamuchisya kuŵa pamtendele.

10. Ligongo chichi kukosechela chile ngosi syachilengedwe kukusalosya kuti tukwete chikulupi? (Misyungu 22:3)

¹⁰ Yikusaŵaga yangasawusya kuŵa ŵakuwusimana mtima pajikutendekwa ngosi jachilengedwe naga tukosechele chenene. Nambo ana kukosechela chenene ngosi syachilengedwe kukusagopolela kuti nganitukola chikulupi kwa Yehofa? Ngaŵa myoyo. Nambo mmalomwakwe tukusalosya chikulupi chakuti jwalakwe chatusamalile. Chamtuli? Maloŵe ga Mlungu gakusatusalila kuti tuŵeje ŵakoseka pachikwika chakogoya. (Aŵalanje Misyungu 22:3.) Soni kupitila mungani sya m’magasini getu, misongano ja mpingo, nambosoni yimanyisyo yapandaŵi jakwe, gulu ja Mlungu jiŵele jili mkutuŵenda kuti tukosecheleje chenene ngosi mkanijitendekwe.c Ana tukusamdalilaga Yehofa? Naga tukusatenda myoyo, nikuti tuchipikanila malangisoga apanopano mkanijitendekwe ngosijo.

11. Ana tukulijiganya chichi kutyochela kwa Margaret?

¹¹ Aganichisye yaŵasimene nayo mlongo jwine lina lyakwe Margaret. Ŵaboma ŵamsalile jwalakwe kuti akopoche mnyumba jakwe ligongo lyakuti kudelaji kwabuchile moto wakogoya. Nambo ligongo lyakuti ŵandu ŵajinji ŵasakaga kutila pandaŵi jimo, msewu wagumbele ni magalimoto yayatendekasisye kuti kwenda kuŵe kwakusawusya mnope. Soni ligongo lyakuti lyosi lyepiliwu lyaliji palipose, Margaret nganakombola kukopoka mu galimoto jakwe. Nambo jwalakwe jwakulupwiche ligongo lyakuti jwakosechele. Mlongoju jwasunjile mapu mu kachikwama kakwe gagamkamuchisye kupata msewu wine ni kukopoka mu delaji. Jwalakwe jwamanyililaga kwampaka atilile pakutendekwe ngosi jachilengedwe. Kukosechela kwamkamuchisye Margaret kuti akulupuche pangosiji.

12. Ligongo chichi tukusapikanila malangiso gakutukamuchisya pajikutendekwa ngosi?

¹² Ndaŵi sine kuti tukulupuche soni kuti tukaŵika ŵandu ŵane pangosi, ŵaboma mpaka atusalile kuti tutile kapena kukuya malangiso gane gakwe. Payitendekwe yeleyi, ŵandu ŵane yikusiyasawusya kupikanila malangisogo ligongo lyakuti ŵangasaka kutyoka pamalo gawo kapena kuleka katundu jwawo. Ana Aklistu akusatenda wuli? Baibulo jikusatusalila kuti, “Mpikanileje ulamusi uliwose wapanganyisye ŵandu, pakuŵa yeleyo ni yakusaka Ambuje. Chinga ali mwenye, mwapikanileje ligongo ali ŵakulungwa kumpunda mmwejo. Chinga sili nduna, msipikanileje pakuŵa mwenye ni ŵasitumile.” (1 Pet. 2:13, 14) Nombe gulu ja Yehofa jikusatupasoni malangiso gakutukamuchisya pajikutendekwa ngosi. Ndaŵi syosope tukusapochela malangiso gakutusalila kuti tupelecheje manambala getu ga foni kwa achakulungwa ŵa mumpingo ni chakulinga chakuti jemanjajo chakombole kulumbikana ni uweji pajitendekwe ngosi. Ana wawojo ŵapeleche nambala jawo kwa achakulungwa ŵa mumpingo? Mpaka tupochelesoni malangiso gakutusalila kuti tutile kapena tukatyoka pamalo gatukusatama. Nambosoni ndaŵi sine mpaka atupe malangiso gakutukamuchisya kupata yindu yatukusosechela, kapena yampaka tutende kuti twakamuchisye ŵane. Naga tukulepela kukuya malangiso gatupochelego, mpaka tuŵiche pangosi umi wetu kapena wa achakulungwa ŵa mumpingo. Tukumbuchileje kuti achalume ŵakulupichikaŵa akusatulolelaga ndaŵi syosope. (Aheb. 13:17) Mlongo Margaret jwatumkolasile jula jwatite, “Nakombwele kulupuka ligongo lyakupikanila malangiso ga achakulungwa ŵa mumpingo soni malangiso ga mu gulu ja Yehofa.”

13. Ana chichi chachikusakamuchisya Aklistu ŵatisile msimangwawo kuŵa ŵakusangalala soni kola mtendele?

¹³ Abale ni alongo ŵetu ŵajinji ŵatisile msimangwawo ligongo lya ngosi syachilengedwe kapena ngondo. Atamose kuti yili myoyo jemanjaji akusatenda yampaka akombole kuti apitilisye kutenda yindu yakwayana ni kumtumichila Yehofa. Yakusatenda jemanjaji, yikusalandana ni yaŵatendaga Aklistu ŵa m’yaka 100 yandanda ŵaŵapitilisye ‘kulalichila ngani syambone sya maloŵe ga Mlungu’ atamose kuti ŵalagasidwaga. (Mase. 8:4) Kulalichila kwakamuchisyaga jemanjaji kuganichisya mnope ya Uchimwene wa Mlungu mmalo mwakuganichisya yakusawusya yaŵasimanaga nayo. Yakuyichisya yakwe, jemanjaji ŵaŵaga ŵakusangalala soni ŵapataga mtendele.

14. Ana kulagasidwa mpaka kusokonasye chamtuli mtendele wetu?

¹⁴ Kulagasidwa mpaka kusokonasye yindu yayikusatutendekasya kola mtendele. Tukusasangalala mnope patukusongana pampepe mwa ufulu, kulalichila mwagopoka, nambosoni kutenda masengo getu gatukusatendaga ndaŵi syosope mwangajogopa kuti chitutaŵidwe. Nambo naga nganitukola ufulu wakutendela yeleyi, mpaka tulagasicheje nganisyo ligongo lyakogopa yampaka yitutendechele. Kutenda yeleyi nganikuŵa kwachilendo. Nambope, tukusasosekwa kuŵa ŵakusamala mnope. Yesu jwalosisye kuti kulagasidwa mpaka kwakuŵasye ŵakumkuya ŵakwe. (Yoh. 16:1, 2) Sano ana mpaka tupitilisye chamtuli kola mtendele patukulagasidwa?

15. Ligongo chichi ngatukusosekwa kogopa kulagasidwa? (Yohane 15:20; 16:33)

¹⁵ Maloŵe ga Mlungu gakusatusalila kuti, “Ŵakulijiganya wosope ŵa Yesu ŵakusachilila kutama ni umi wakulipeleka kwa Mlungu nombenawo chachilagasidwa.” (2 Tim. 3:12) M’bale Andrei jwalasile mnope kuti apikanichisye yeleyi pagalekasidwe masengo getu m’chilambo chakwe. Jwalakwe jwaganisyaga kuti, ‘Akuno tupali ŵamboni ŵajinji. Ana mpaka yikomboleche chamtuli ŵaboma kututaŵa wosopewe?’ Nambo mmalo mwakuti jwalakwe akole mtendele, kaganisye keleka kamtendekasisye kuti alagasicheje nganisyo. Nambo abale ŵane, ŵajilesile nganijo mmyala mwa Yehofa, mwamti jemanjaji nganaganisyaga yakuti nganaŵa ataŵidwe. Jemanjaji ŵamanyililaga kuti mpaka ataŵidwe, nambo nganalagasikaga nganisyo mpela M’bale Andrei. Myoyo m’baleju jwajigalile chisyasyo cha abale ŵane ŵala mwamti jwatandite kumdalila Mlungu. Kaneko mkanipapite ndaŵi m’baleju jwatandite kola mtendele, mwamti apano akusangalala atamose kuti akulagasidwa. Yeleyisoni mpaka yitutendechele uweji. Yesu pajwatusalile kuti tujembecheyeje kulagasidwa, jwasasilesoni kuti mpaka tupitilisye kuŵa ŵakulupichika.—Aŵalanje Yohane 15:20; 16:33.

16. Ana tukusasosekwa kupikanila malangiso gapi ŵaboma palekasisye masengo getu?

¹⁶ Ŵaboma palekasisye masengo getu, mpaka tupochele malangiso kutyochela ku ofesi ja nyambi soni kwa achakulungwa ŵa mumpingo. Malangisoga gakusaŵa gakutuchenjela. Nambosoni gakusatukamuchisya kuti tupocheleje yindu yakutukamuchisya kuŵa paunasi wambone ni Yehofa, soni kuti tupitilisye kulalichila mwampaka tukombolele. Myoyo atendeje yampaka akombole pakupikanila malangiso gapochele atamose yili mkuti ngakugapikanichisya. (Yak. 3:17) Kupwatika pelepa, ngakusosekwa kwambaga kumsalila jwalijose yindu yakwamba abale ni alongo ŵetu kapena yakwamba masengo ga mpingo.—Jwak. 3:7.

17. Mwakulandana ni ŵandumetume ŵa m’yaka 100 yandanda, ana tuli ŵakusachilila kutenda chichi?

¹⁷ Ligongo limo lyekulungwa lyalikusamtendekasya Satana kulimbana ni ŵakutumichila ŵa Mlungu lili lyakuti jemanjaji akwete “masengo gakutendela umboni yakwamba Yesu.” (Chiw. 12:17) Myoyo akatendaga woga ni Satana soni chilambo chakwechi. Kulalichila soni kwajiganya ŵane atamose tuli mkulagasidwa kukusatukamuchisya kuŵa ŵakusangalala soni kola mtendele. Aklistu ŵa m’yaka 100 yandanda paŵalamulidwe ni achakulungwakulungwa ŵaboma kuti aleche kulalichila, jemanjajo ŵampikanile Mlungu. Jemanjaji ŵapitilisye kulalichila, mwamti yakamuchisye kuŵa ŵakusangalala. (Mase. 5:27-29, 41, 42) Yisyene kuti masengo getu pagalekasisye tukusasosekwa kutenda yindu mwalunda patukulalichila. (Mat. 10:16) Nambope patukutenda yampaka tukombole, tuchikola mtendele wawukusayika ligongo lyakumsangalasya Yehofa soni ligongo lyakulalichila utenga wakulupusya umi.

18. Ana mtendele usyesyene mpaka tuwupate kwapi?

¹⁸ Ndaŵi syosope tukulupilileje kuti atamose pandaŵi jatukusimana ni yakusawusya yili yakomboleka kola mtendele. Tukusosekwa tukumbuchileje kuti mtendele watukusasosechela uli mtendele wa Mlungu. Mtendele welewu ukusatyochela kwa Yehofape. Amdalileje jwalakwe paubuchile mlili, pajitendekwe ngosi jachilengedwe, kapena pakulagasidwa. Tukalekanganaga ni gulu jakwe. Pakutenda yeleyi “Mlungu jwamtendele chachiŵa ni jemanja.” (Afil. 4:9) Mungani jakuyichisya tuchikambilana yampaka tutende kuti twakamuchisye Aklistu achimjetu ŵakusimana ni yakusawusya kuti akole mtendele wa Mlungu.