Yehofa Atusimichisye Kuti Chilambochi Chichiŵa Paladaiso

 1. Ana jwakulochesya Yesaya jwasalile utenga wamtuli Ayisalayeli achimjakwe?

JWAKULOCHESYA Yesaya pakumlondesya Yehofa, jwasasile kuti jwalakwe ali “Mlungu jwakusaŵecheta yakuwona.” Liloŵe liŵaligopolele palilembali kuti “ yakuwona” m’ma Baibulo gane likusagopolela kuti “ame.” (Yes. 65:16) Maloŵe gakuti “ame” gakusagopolela kuti “elo yiŵe mmomo.” Ndaŵi syejinji maloŵega akusagakamulichisyaga masengo m’Baibulo pakusaka kulosya kuti yindu yasasile Yehofa kapena Yesu yili yisyesyene. Myoyo, maloŵe ga Yesaya gakwawula kwa Ayisalayeliga gagopolelaga kuti Yehofa pasasile kuti chachitenda yindu yineyakwe ndaŵi syosope yikusatendekwa. Mwamti jwalakwe alosisye kuti yeleyi yili yisyene mwakwanilisya yindu yosope yajwasasile kuti chachitenda.

 2. Ligongo chichi tukusosekwa kuyikulupilila yindu yasasile Yehofa kuti chachitutendela kusogoloku? Ana chitukambilane yiwusyo yapi?

² Ana m’weji mpaka tuyikulupilile yindu yosope yasasile Yehofa kuti chachitutendela kusogoloku? Pali pamasile yaka chiŵandika 800 kutyochela mundaŵi ja Yesaya, ndumetume Paulo jwasasile ligongo lyakwe mpaka tuyikulupilile yindu yasasile Yehofa kuti chachitenda. Paulo jwatite, “[Mlungu] nganaŵa alambwisye.” (Aheb. 6:18) Mwachisyasyo, chisima chachikusakoposya mesi gambone nganichiŵa chikopwesyesoni mesi ganjete. Myoyosoni Yehofa jwakusaŵecheta yakuwona nganaŵa alambwisye. Yeleyi yikusatutendekasya kuti tuyikulupilileje yindu yosope yasasile Yehofa. Munganiji chitukambilane yiwusyo ayi: Ana Yehofa asasile kuti chachitutendela chichi kusogoloku? Soni ana jwalakwe atesile uli pakusaka kutusimichisya kuti yasasileyi yichitendekwa?

 3. (a) Ana ŵakutumichila ŵa Mlungu akusasangalala mnope ni chilanga chapi? (Chiwunukuko 21:​3, 4) (b) Ana ŵandu ŵane akusaŵecheta yamtuli patukwasalila ya chilangachi?

³ Ŵakutumichila ŵa Yehofa wosope akusasangalala mnope pakuganichisya ya chilanga chatesile Yehofa chatukusaka tukambilane munganiji. (Aŵalanje Chiwunukuko 21:​3, 4.) Yehofa asasile kuti chachitupa chilambo chele “chiwa ngasichipagwasoni. Ngasipapagwasoni yakutesya chanasa, kulila kapena kupikana kupweteka.” Ŵajinji mwa m’weji tukusakamulichisya masengo maloŵega patukwalalichila ŵane. Ana ŵandu akusaŵecheta yamtuli patukwasalila yindu yatusalile Yehofayi? Ŵane mwajemanjaji mpaka atusalile kuti “Yindu yeleyi yili yakusangalasya nambo ngangukulupilila kuti mpaka yitendekwe.”

 4. (a) Ana Yehofa pajwasalaga ya chilangachi jwamanyililaga yamtuli? (b) Kupwatika pakusala ya chilangachi, ana Yehofa jwatesilesoni chichi?

⁴ Yehofa paŵamsalilaga ndumetume Yohane kulemba yakwamba mwawuchiŵela umi mu Paladaiso, jwalakwe jwamanyililaga kuti m’weji masiku agano tuchasalilaga ŵane ya chembecheyochi patukulalichila ngani syakwamba Uchimwene. Yehofa jwamanyililesoni kuti yichiŵa yakusawusya kwa ŵandu ŵajinji kukulupilila chilanga chatesile jwalakwe chakwamba “yindu yasambano.” (Yes. 42:9; 60:2; 2 Akoli. 4:​3, 4) Sambano, ana mpaka tutende uli kuti m’weji tukulupilileje soni twasimichisyeje ŵane yakuti maloŵe ga pa Chiwunukuko 21:​3, 4 gachikwanilichikwa? Yehofa nganagamba kutusalila yindu yakusangalasyayi nambo jwapelechesoni magongo gakupikanika gakututendekasya kuti tuyikulupilileje. Ana jwalakwe apeleche magongo gamtuli?

 5. Ana ni magongo gapi gakututendekasya kulupilila kuti Mlungu chachikwanilisya yajwasasile pakwamba ya Paladaiso? Ana magongoga tukusagapata kwapi?

⁵ Panyuma pakusala ya chilambo chasambano, mu ndime syakuyichisya tukusapata magongo gakututendekasya kulupilila yasasile Yehofayi. Tukusaŵalanga kuti, “Pelepo juŵatemi pampando waumwenye jula ŵaŵechete kuti, ‘Alole. Ngupanganya yindu yosope kuti yiŵe yasambano.’ Ŵaŵechetesoni kuti, ‘Mlembe yeleyi, ligongo maloŵega gali gakudalilichika soni gasyesyene.’ Jwalakwejo ŵasalilesoni une kuti, ‘Maloŵe gala gakwanilichikwe, une ndili Alefa soni Omega, ndanda soni mbesi.’”—Chiw. 21:​5, 6a.

 6. Ligongo chichi maloŵe gakutusimichisya gagakusasimanikwa pa Chiwunukuko 21:​5, 6 gakusatutendekasya kulupilila mnope yasasile Mlungu yakwamba Paladaiso?

⁶ Ligongo chichi maloŵe ga m’Baibuloga gakusalimbisya chikulupi chetu pa yindu yasasile Yehofa kuti chachitutendela? Pa ndimesi, yakutenda Yehofa mpaka tuyilandanye mpela kuti jwalakwejo akusayinila chikalata chakutusimichisya kuti chachikwanilisya yindu yasasile kuti chachitenda. Yasasile Mlungu kuti chachitutendelayi yikusasimanikwa pa Chiwunukuko 21:​3, 4. Nambo kaneko, mu ndime 5 ni 6, tukusapata maloŵe ga Yehofa gagali mpela chidindo chachikusatusimichisya kuti maloŵe gakwe gachikwanilichikwa. Sambano kwende tulole maloŵe gaŵakamulichisye masengo Yehofa pakutusimichisya yeleyi.

 7. Ligongo chichi kummanyilila jwakuŵecheta pa Chiwunukuko 21:5 kuli kwakamuchisya mnope?

⁷ Maloŵe ga Mlungu gakwasimichisya ŵandu kuti chachitenda yasasile gatandite mwakusala ya msyene maloŵego. Maloŵega gakusati, “Juŵatemi pampando waumwenye jula ŵaŵechete kuti.” (Chiw. 21:5a) Maloŵega gali gakusosekwa mnope ligongo gali gamo mwa maloŵe gajwaŵechete Yehofa msyene m’buku ja Chiwunukuko kwa maulendo gatatu. Pelepa, Yehofa nganakamulichisya masengo lilayika lyamachili kapena Yesu pakuŵecheta maloŵe gakusimichisyaga. Mmalomwakwe, jwalakwe jwaŵechete jika maloŵega. Yeleyi yikulosya kuti mpaka tukulupilile yindu yakuyichisya yajwasasile Yehofa. Yili myoyo ligongo lyakuti Yehofa ‘nganaŵa alambwisye.’ (Tit 1:2) Mwamti maloŵega gakusatutendekasya kuti tuyikulupilileje mnope yindu yatukusaŵalanga pa Chiwunukuko 21:​5, 6.

 8. Ana Yehofa jwasasile yamtuli pakusaka kulosya kuti maloŵe gakwe gachikwanilichikwa? (Yesaya 46:10)

⁸ Sambano kwende tukambilane liloŵe lyakuti “Alole.” (Chiw. 21:5) Liloŵe lya Chigiliki lyaŵaligopolele kuti “alole” likusasimanikwa maulendo gejinji m’buku ja Chiwunukuko. Buku jine jakulondesya ya Baibulo jasasile kuti liloŵeli ŵalikamulichisye masengo m’litala lyakuti mundu jwakuŵalanga nganijo akoleje mtima wakusaka kumanyilila yindu yakuyichisya yajikusala nganijo. Ana ni yindu yapi yakusayisala pasogolo pa liloŵeli? Pasogolo pakwe pana maloŵe ga Mlungu gakuti, “Ngupanganya yindu yosope kuti yiŵe yasambano.” Yisyene kuti pelepa Yehofa akuŵecheta yindu yayichitendekwa kusogolo. Nambo kwa jwalakwe yindu yeleyi yili yangakayikasya mwamti jwayisasile mpela kuti yitandite kala kutendekwa.—Aŵalanje Yesaya 46:10.

 9. (a) Ana maloŵe gakuti “ngupanganya yindu yosope kuti yiŵe yasambano” gakusajimila yindu yiŵili yapi yakusaka kutenda Yehofa? (b) Ana “kwinani” soni “chilambo chapasi” yayipali apanoyi yichisimana ni yamtuli?

⁹ Kwende tukambilane maloŵe gane gagakusasimanikwa pa Chiwunukuko 21:5. Maloŵe gakwe gali gakuti, “Ngupanganya yindu yosope kuti yiŵe yasambano.” Mu chaputalachi, maloŵega gakusajimila yindu yiŵili yakusaka kutenda Yehofa yayili kuwuchisya ni kulinganyasoni. Chandanda, ana Yehofa chachiwuchisyasoni chichi? Pa Chiwunukuko 21:​1, tukusaŵalanga kuti, “Kwinani kwakala soni chilambo chapasi chakala yaliji yili yityosile.” Palilembali “kwinani kwakala” kukwimila maboma ga ŵandu gagakusalongoleledwa ni Satana soni yiŵanda yakwe. (Mat. 4:​8, 9; 1 Yoh. 5:19) Mu Baibulo, maloŵe gakuti “chilambo” mpaka gajimile ŵandu ŵakutama m’chilambomo. (Gen. 11:1; Sal. 96:1) Myoyo, “chilambo chapasi chakala” chikwimila ŵandu ŵakusakala ŵa masiku agano. Yehofa ngasagamba kulinganya “kwinani” soni “chilambo chapasi” yayipali apanoyi, nambo chachiyijonanga mwamti ngasiyisimanikwasoni. Jwalakwe chachiwuchisya kwinani soni chilambo chapasi yayipaliyi ni “kwinani kwasambano soni chilambo chapasi chasambano.” Yeleyi yikwimila boma jasambano soni ŵandu ŵasambano.

10. Ana ni yindu yapi yachachiyitenda Yehofa kuŵa yasambano?

¹⁰ Pa Chiwunukuko 21:​5, tukusaŵalangasoni yindu yaŵasasile Yehofa pakwamba ya yindu yachachiyitenda kuŵa yasambano. Pandimeji Yehofa nganasala kuti, “Ngupanganya yindu yosope yasambano.” Mmalomwakwe, jwalakwe jwatite, “Ngupanganya yindu yosope kuti yiŵe yasambano.” Yehofa chachichitenda chilambochi soni ŵandu kuŵa yasambano mwakuyitendekasya kuti yiŵe yamlama. Mpela mwajwaŵechetele Yesaya, chilambo chosopechi chichiŵa mpela mgunda wakusalala wa Edeni. M’wejisoni tuchiŵa ŵasambano. Yichiŵa myoyo ligongo lyakuti ŵalemale, ŵangalola soni ŵangapikana chachaposya. Nambosoni ŵawe chachijimuka ku chiwa.—Yes. 25:8; 35:​1-7.

11. Ana Yehofa ŵamlamwile chichi Yohane soni ligongo chichi?

¹¹ Ana ni yindu yine yapi yajwasasile Yehofa pakutusimichisya kuti chachikwanilisya chilanga chakwe? Yehofa ŵamsalile Yohane kuti, “Mlembe yeleyi, ligongo maloŵega gali gakudalilichika soni gasyesyene.” (Chiw. 21:5) Yehofa nganagamba kumlamula Yohane kuti alembe, nambo jwapelechesoni ligongo lyakulembela yeleyo. Jwalakwe jwatite, “Ligongo maloŵega gali gakudalilichika soni gasyesyene.” Yeleyi yikugopolela kuti yindu yajwasasile Mlungu kuti chachitenda yili yakudalilichika soni yisyesyene. Tuli ŵakusangalala kuti Yohane jwapikanile lilamusi lyakuti “mlembe.” Yeleyi yikusatupa upile wakuŵalanga yindu yajwasasile Mlungu yakwamba Paladaiso ni kuganichisyaga yindu yambone yatukwembecheya kusogoloku.

12. Ligongo chichi yili yakupikanika kuti Yehofa asale maloŵe gakuti, “Maloŵe gala gakwanilichikwe”?

¹² Ana kaneko Mlungu jwaŵechete chichi? Jwalakwe jwatite, “Maloŵe gala gakwanilichikwe.” (Chiw. 21:6) Pelepa, Yehofa jwaŵechete mpela kuti yindu yosope yajwayisasile yakwamba Paladaiso yikwanilichikwe kala. Yehofa akwete ufulu wakuŵecheta m’litala lyeleli ligongo pangali champaka chimlepelekasye kukwanilisya chakulinga chakwe. Kaneko, Yehofa jwasasilesoni chindu chine chakutusimichisya kuti maloŵe gakwe gachikwanilichikwa. Ana chinduchi chili chichi?

13. Ligongo chichi Yehofa jwaŵechete maloŵe gakuti “Une ndili Alefa soni Omega”?

¹³ Mpela mwatuŵechetele kundanda kula, Yehofa jwaŵechete msyene kwa maulendo gatatu m’buku ja Chiwunukuko. (Chiw. 1:8; 21:​5, 6; 22:13) Kwa maulendo gosopega, Yehofa jwaŵechetaga maloŵe gakulandana gakuti, “une ndili Alefa soni Omega.” Chilembo chakolanjidwa kuti alefa ni chichaliji chandanda mu afabeti ja Chigiliki, soni chilembo chakolanjidwa kuti omega chaliji chakumalisya mu afabetiji. Myoyo, pakamulichisya masengo maloŵe gakuti “Alefa soni Omega,” Yehofa jwalosisye kuti patandite kutenda chindu chinechakwe akusachimalisya chenene.

14. (a) Asale yakutendekwa yayalosisye mpela kuti Yehofa aŵechete maloŵe gakuti “Alefa,” soni yakutendakwa yayichilosya mpela kuti jwalakwe aŵechete kuti “Omega”? (b) Ana pa Genesesi 2:​1-3 pakutusimichisya chichi?

¹⁴ Yehofa ali ampanganyisye Adamu soni Hawa, jwasasile chakulinga chakwe kwa ŵandu soni chilambo chapasichi. Baibulo jikusasala kuti, “Mlungu ŵasalile jemanjajo kuti, ‘Mŵelekane soni mtupe. Mgumbalane pachilambo chosope soni mchigomeche.’” (Gen. 1:28) Pelepa Yehofa jwasasile ya chakulinga chakwe kwa ŵandu soni chilambochi. Yeleyi yaliji mpela kutanda kwa chakulinga chakwe kapena kuti “Alefa.” Myoyo chakulinga chakwechi pachichikwanilichikwa pandaŵi jele ŵanache ŵakupikanila ŵa Adamu ni Hawa chachigumbala pachilambopa ni kuchichenga kuŵa Paladaiso, pelepo yichiŵa mpela kumalisya kwa chakulinga chakwe kapena kuti “Omega.” Yehofa pajwamalisisye kupanganya “kwinani ni chilambo chapasi soni yindu yosope yayili mwelemo,” jwatesile yindu yakulosya kuti chakulinga chakwechi chichikwanilichikwa. (Aŵalanje Genesesi 2:​1-3.) Yehofa jwasasile kuti lisiku lya 7 lili lyapadela. Ana yeleyi yikugopolela chichi? Pelepa Yehofa jwasimichisye kuti chachikwanilisya chakulinga chakwe pa ŵandu soni chilambo chapasi. Mwamti chakulingachi chichikwanilichikwa chenene kumbesi kwa lisiku lya 7.

15. Ligongo chichi yajwatesile Satana yikawoneche mpela kuti awatangenye chakulinga cha Mlungu kwa ŵandu?

¹⁵ Adamu ni Hawa ali amjimuchile Mlungu, ŵaŵele ŵakulemwa mwamti ŵapelele ŵanache ŵawo ulemwawo soni chiwa. (Alo. 5:12) Pelepa yawoneche mpela kuti Satana awatangenye chakulinga cha Mlungu chakuti chilambochi chigumbale ni ŵandu ŵamlama soni ŵakupikanila. Ana Satana jwakombwele kumlepelekasya Yehofa kukwanilisya chakulinga chakwe? Komboleka Satana jwaganisyaga kuti Yehofa gamsigalile mapulani gamnono. Mwine jwaganisyaga kuti pulani jimo ja Yehofa jaliji kumwulaga Adamu ni Hawa ni kupanganyasoni liŵasa line lyamlama kuti chakulinga chakwe kwa ŵandu chikwanilichikwe. Nambo yikaŵe kuti Mlungu jwatesile yeleyi, Satana akasasile kuti Mlungu ali jwaunami. Tukuŵecheta yeleyi ligongo lyakuti pa Genesesi 1:​28, Yehofa ŵasalile Adamu ni Hawa kuti ŵanache ŵawo chachigumbala pachilambopa.

16. Ana Satana komboleka kuti jwaganisyaga kuti chamtendekasye Yehofa kuŵa jwakulepela m’litala lyapi?

¹⁶ Ana komboleka kuti Satana jwaganisyaga kuti Mlungu mpaka akamulichisye masengo pulani jine japi? Mwine jwalakwe jwaganisyaga kuti Yehofa chamkunde Adamu ni Hawa kuŵeleka ŵanache ŵangali umlama ŵele ngamkaniyikombolekasoni kuŵa ŵamlama. (Jwak. 7:20; Alo. 3:23) Mwangakayichila nikuti apasoni Satana akasasile kuti Yehofa ali jwakulepela. Yikaliji myoyo ligongo lyakuti pulaniji ngamkanijikwanilisya chakulinga cha Mlungu chakuti chilambochi chigumbale ni ŵanache ŵamlama soni ŵakupikanila ŵa Adamu ni Hawa.

17. Ana Yehofa jwamasisye chamtuli kwimuchila kwa Satana soni Adamu ni Hawa? Ana yakuyichisya yakwe yichiŵa yamtuli? (Alole chiwulili.)

¹⁷ Yehofa jwalinganyisye yakumasya kwimuchila kwa Satana soni Adamu ni Hawa m’litala lyele Satanajo nganaliganichisyaga. (Sal. 92:5) Mmalo mwakulosya kuti ali jwaunami, Yehofa jwalosisye kuti akusasala yisyesyene mwakumkunda Adamu ni Hawa kuŵeleka ŵanache. Nambosoni mmalo mwakulosya kuti ali jwakulepela, Yehofa jwalosisye kuti pangali champaka chimlepelekasye kukwanilisya chakulinga chakwe. Jwalakwe jwalinganyisye yakuti chakulinga chakwe chikwanilichikwe mwakupeleka “mwanache” jwakuti chiŵakulupusye ŵanache ŵa Adamu ni Hawa. (Gen. 3:15; 22:18) Yaliji yakuti mwanache jwelejo chachipeleka umi wakwe kuti ŵawombole ŵandu. Apatu Yehofa ŵampitile pasi Satana ligongo jwalakwe nganaganichisyaga ya pulaniji. Yaliji myoyo ligongo Yehofa jwalinganyisye pulaniji ligongo lyakwanonyela mnope ŵandu. (Mat. 20:28; Yoh. 3:16) Satana nganakola ndamoji ligongo lyakuti ali jwakulinonyela. Sambano ana mbopesi jakuwombolaji jichitendekasya kuti patendekwe chichi? Kumbesi kwa yaka 1000 ya ulamusi wa Klistu, ŵanache ŵakupikanila soni ŵamlama ŵa Adamu ni Hawa chachitama mu paladaiso pachilambopa mpela mujwasachilaga Yehofa pandanda. Mwamti pandaŵijo, yichiŵa mpela Yehofa akuŵecheta kuti, “Omega.”

18. Ana Yehofa atusimichisye yindu yitatu yapi? (Alole libokosi lyakuti “Yindu Yitatu Yakutukamuchisya Kuyikulupilila Yasasile Yehofa.”)

¹⁸ Mwakamulana ni yatukambileneyi, ana mpaka twasimichisye chamtuli ŵandu ŵakusakayichila yakuti chilanga cha Mlungu chakwamba Paladaiso chichikwanilichikwa? Chandanda, Yehofa msyene ni jwasasile yeleyi. Buku ja Chiwunukuko jikusati, “Juŵatemi pampando waumwenye jula ŵaŵechete kuti, ‘Alole. Ngupanganya yindu yosope kuti yiŵe yasambano.’” Jwalakweju akwete lunda, machili, soni ali jwakusachilila kukwanilisya chakulinga chakwe. Chaŵili, Yehofa akusamanyilila kuti yindu yosope yajwasasile kuti chachitenda yichikwanilichikwa. Jwalakwe jwatite, “Maloŵega gali gakudalilichika soni gasyesyene. . . . Maloŵe gala gakwanilichikwe.” Chatatu, Yehofa patandite kutenda chindu chinechakwe akusachimalisya chenene. Mwamti ni ligongo lyakwe jwalakwe jwatite, “Une ndili Alefa soni Omega.” Kusala yisyene, Yehofa chachilosya kuti Satana ali jwaunami soni jwakulepela.

19. Ana mpaka atende chichi ŵandu pakukayichila yasasile Mlungu yakwamba Paladaiso?

¹⁹ Tukumbuchileje kuti ndaŵi jilijose patukwasalila ŵane yakwamba chakulinga cha Mlungu, tukusaŵa kuti tukulimbisya chikulupi chetu payindu yasasile Yehofayi. Myoyo ndaŵi jine pachachimŵalanjilaga mundu maloŵe gakulimbikasya ga pa Chiwunukuko 21:​4, jwalakwejo ni kuŵecheta kuti, “Yindu yeleyi yili yakusangalasya nambo ngangukulupilila kuti mpaka yitendekwe,” ana wawojo chachitenda chichi? Mpaka amŵalanjile yayili mu ndime 5 ni 6, ni kumlondechesya yatite Yehofa pakusimichisya maloŵe gakwega mwakusayinila mpela chidindo chakwe.—Yes. 65:16.