Ana Ngondo ja Alimagedo ni Chichi?

Alimagedo jili ngondo jakumalisya japasikati pa maboma ga ŵandu ni Mlungu. Mabomaga gakusasisyanaga ni Mlungu pakana kupikanila ulamusi wakwe. (Salimo 2:2) Myoyo ngondo ja Alimagedo jimachimasya ma ulamusi ga ŵandu.—Daniele 2:44.

Liloŵe lyakuti “Alimagedo” likusasimanikwa pa Chiwunukuko 16:16. Pangalisoni pane palikusimanikwa liloŵeli. Buku ja Chiwunukukoji jikusala mwakulochesya kuti pa “malo gele pa chiŵecheto cha Chihebeli. . . gakusakonjidwa kuti Alimagedo,” “ayimwene ŵa pa chilambo chosope chapasi” chachasonganya ‘ku ngondo ja pa lisiku lyekungwa lya Mlungu Jwamachiligosope.’—Chiwunukuko 16:14.

Ana ni ŵani ŵachachiputaga ngondo ja Alimagedo? Yesu ni juchachililongolela likuga lya asilikali wakwinani kuti lipunde pa ngondo jakulimbana ni achimmagongo wa Mlungu. (Chiwunukuko 19:11-16, 19-21) Achimmagongo kapena kuti adani ŵa Mlungu ŵeleŵa ali ŵandu ŵakusasisyaga ulamusi wa Mlungu soni kumtendela Mlungu yachipongwe.—Esekiele 39:7.

Ana ngondo jeleji jichitendechela ku yilambo ya ku Middle East? Iyayi. Ngondoji jichiŵa ja pachilambo chosope ngaŵaga malo kapena dela jimo.—Yelemiya 25:32-34; Esekiele 39:17-20.

Maloŵe gakuti Alimagedo ndaŵi sine gakusagopoleledwa kuti Halimagedo (mu Chehebeli Har Meghiddohnʹ). Maloŵega gakusagopolelaga “Litumbi lya Megido.” Pandanda Megido lyaliji lina lya msinda ŵa ku Yisalayeli. Ku dela jeleji ŵandu ŵaputilagako ngondo syakogoya. Soni sine mwa ngondo syelesi akusasikolanga m’Baibulo. (Ŵakulamula 5:19, 20; 2 Ayimwene 9:27; 23:29) Nambope atamose kuti yili myoyo, Alimagedo nganigaŵa malo gasyesyene chiŵandika ni msinda wa Megido. Ku delaji kwangali litumbi lyekulungwa kapena malo gakwanila gakuti achimmagongo wosope ŵa Mlungu nikwanilako. Atamose ali apwatikenye yiŵata yosope ya Yeseleeli, maloga ngaŵa gakwanila kuputa ngondo. Mmalo mwakwe, maloŵe gakuti Alimagedo gakwamba kusala yayakutendekwa yapachilambo chosope yele mitundu ja ŵandu jichikamulana kuti jilimbane ni ulamusi wa Mlungu kakumalisya.

Ana yindu yichiŵa uli pandaŵi ja ngondo ja Alimagedo? Atamose kuti ngatukumanyilila yachachitenda Mlungu pakamulichisya masengo machili gakwe, nambo yatukumanyilila ni yakuti jwalakwe chachikamulichisya masengo yida mpela muŵatendelaga kalakala. Kalako Mlungu ŵakamulichisye masengo matalila, yisichinya (yifomelesi), ula ja machili, moto soni sulufule, njasi ni milili. (Yobu 38:22, 23; Esekiele 38:19, 22; Habakuku 3:10, 11; Sakaliya 14:12) Tukumanyililasoni kuti ligongo lya chisokonasyo, ŵane mwa chimmagongoŵa chachiwulaganaga jika. Mwamti jemanjaji chachimanyilila kuti Mlungu ni jwakuyitendekasya yeleyi.—Esekiele 38:21, 23; Sakaliya 14:13.

Ana tujile kuti chilambochi chichimala pangondo ja Alimagedo? Iyayi, tukuti myoyo ligongo lyakuti Mlungu ŵapanganyisye yakuti ŵanduwe kumangwetu kuŵe pachilambopa chapasipa. (Masalimo 37:29; 96:10; Jwakulalichila 1:4) Myoyo mmalo mwakwajonanga ŵandu wosope, Alimagedo jichakulupusya ŵandu ŵane. Yeleyi yili myoyo ligongo lyakuti ngondoji jichikulupusya “likuga lya ŵandu ŵangaŵalanjika” ŵali ŵakutumichila ŵa Mlungu.—Chiwunukuko 7:9, 14; Salimo 37:34.

M’Baibulo maloŵe gakuti chilambo, ndaŵi sine gakusasalaga ya ŵandu ŵakusakala ŵakusisyana ni Mlungu. (1 Yohane 2:15-17) Mwamti Alimagedo jichiŵa “mbesi ja chilambo chapasi.”—Mateyu 24:3, Buku Jeswela.

Ana Alimagedoji jichitendekwa chakachi? Yesu pakusala ya yisawusyo yakogoya mnope, yayichiyika pakusawusya mnope pandaŵi ja Alimagedo jwatite, “Nambo lisiku kapena ndaŵi jakwe pangali jwakujimanyilila. Atamose uneji Mwanache ngangumanyilila, nambo Atati jikape ni ŵakumanyilila.” (Mateyu 24:21, 36) Atamose yili myoyo, Baibulo jikusasalaga kuti Alimagedo jichitendekwa mu ndaŵi jakuŵapo kwa Yesu jajatandite mu 1914.—Mateyu 24:37-39.