KAMCANDA KAKUTUMICILA MLUNGU

ANA akukawona wuli kamcandaka kusalala! Kamcandaka lina lyakwe lili Samuyele. Mundu jwasajice mkono wakwe pamtwe pa Samuyelejo ali jwamkulungwa jwa ŵambopesi lina lyakwe Eli. Ŵakwika najo Samuyele kwa Eliwo ali Elikana baba ŵakwe Samuyele, soni Hana mama ŵakwe.

Pandaŵiji Samuyele agambile kola yaka mcece kapena msano basi. Nambo catameje ni Eli apano pa tenti jakulambilila Yehofa, yimpepe ni ŵambopesi ŵane. Ana ligongo cici Elikana ni Hana ŵampelece mundu jwamnandi mnopeju Samuyele kuti akatumicileje Yehofa pa tenti jakulambilila? Kwende tulole.

Pagambile kupita yaka yakuŵalanjika kutyocela ndaŵi jele Hana ŵadandawulaga mnope. Ŵadandawulaga ligongo lyakuti jwalakwe nganakola mwanace, nambo ŵamsakaga mnope mwanace. Sambano lisiku line Hana paŵapite ku tenti jakulambilila Yehofa, ŵapelece lipopelo acitiji: ‘Oo Yehofa, akasandiŵalila une! Naga akumba mwanace, ngwasimicisya kuti cinjimpeleka kwa wawojo kuti ŵatumicileje umi wakwe wosope.’

Yehofa ŵajanjile lipopelo lya Hana, ni pajapite miyesi jakuŵalanjika ŵaŵelece mwanace lina lyakwe Samuyele. Hana ŵakanonyelaga kamcanda kakweko, ni ŵatandite kukajiganya pakwamba ya Yehofa kali kacinandipile mnope. Hana ŵasalile ŵamkwakwe kuti: ‘Samuyele pacagambe kula mwati ngaŵa mkusosekwa kumlela, cinjimpeleka ku tenti jakulambilila kuti akamtumicileje Yehofa kweleko.’

Yeleyi ni yakutenda Hana ni Elikana paciwulilipa. Samuyele ali jwakusangalala kumtumicila Yehofa pa tenti ja Yehofaji ligongo acinangolo ŵakwe ŵamjiganyisye cenene. Caka cilicose Hana ni Elikana akwisa kukulambila pa tenti japajikaji, soni kukulola kamcanda kawo. Soni caka cilicose Hana ŵayikaga nako kamkanjo kasambano kangali makono kaŵampanganyicisyaga Samuyele.

Yaka payikupita, Samuyele akwendelecela kutumicila pa tenti ja Yehofa, soni Yehofa ni ŵandu akumnonyela Samuyele. Nambo Ofini ni Pinihasi ŵali ŵanace ŵacalume ŵa jwamkulungwa jwambopesi Eli nganaŵa ŵanace ŵambone. Jemanjaji akutenda yakusakala yejinji, soni akwatendekasya ŵane kuti akapikanilaga Yehofa. Eli akusosekwa kwalekasya kuti akatumicilagasoni mpela ŵambopesi, nambo ngakwalekasya.

Mcanda Samuyele ngakukunda kuti yindu yakusakala yayikutendekwa pa tenti jakulambilila yimtendekasye kuleka kutumicila Yehofa. Nambo papite ndaŵi jelewu ciŵecetele Yehofa kwa mundu jwalijose, ligongo lyakuti ŵandu ŵakuŵalanjikape ni ŵakumnonyela Yehofa yisyesyene. Samuyele pakusile panandi yikutendekwa yakuyicisyayi:

Maloŵe gamjimwisye Samuyele ali agonile mu tenti jakulambilila. Jwalakwe akwanga kuti: ‘Une ndili apano.’ Jwalakwe akwimuka nikuwutucila kwa Eli, acitiji: ‘Wawojo ambilasile, sambano une yice.’

Nambo Eli akwanga kuti: ‘Nganinam’ŵilanga, jawulani mkagone.’ M’yoyo Samuyele akwawula kukugona.

Kaneko akupikanasoni kuŵilanga: ‘Samuyele!’ Samuyele akwimukasoni kaŵili nikuwutucila kwa Eli. Samuyele akuŵeceta kuti: ‘Wawojo ambilasile, sambano une yice.’ Nambo Eli akwanga kuti: ‘Mwanangu, nganinam’ŵilanga. Mkagonesoni.’ M’yoyo Samuyele akuwujilasoni kukugona.

Maloŵe gala gakuŵilangasoni katatu kuti: ‘Samuyele!’ Sambano Samuyele akwimuka nikuwutucila kwa Eli. Jwalakwe akuŵeceta kuti: ‘Une ndili apano, ligongo ngangukayicila kuti wawojo pandema ajino atekumbilanga.’ Sambano Eli akumanyilila kuti komboleka kuŵa Yehofa jwakuŵilanga. Sambano akumsalila Samuyele kuti: ‘Jawulani mkagonesoni, naga akum’ŵilangasoni, mkajanje kuti: “Aŵecete Yehofa, pakuŵa jwakutumicila jwawo akupikana.”

Samuyele akwanga yeleyi Yehofa pakum’ŵilangasoni. Sambano Yehofa akumsalila Samuyele kuti capelece cilango kwa Eli ni ŵanace ŵakwe. Kaneko Ofeni ni Pinihasi akuwa pakuputana ngondo ni Afilisiti, soni Eli pakupikana yayitendece akugwa pasi, nikutemanguka lukosi lwakwe nikuwa. Sambano maloŵe ga Yehofa gakwanilicikwe.

Samuyele akukula, nikuŵa jwakwelusya jwakumalisya jwa Ayisalayeli. Pakucekulupa, ŵandu akum’ŵenda kuti: ‘Msagule mwenye jwakuti atulamulileje.’ Samuyele ngakusaka kutenda yeleyi, ligongo kusyesyene Yehofa ali mwenye jwawo. Nambo Yehofa akumsalila kuti ŵapikanile ŵanduwo.