Kutenda Yindu Yakumsangalasya Mlungu

1, 2. Apelece yisyasyo ya ŵandu ŵaŵawonaga Yehofa kuti ali acimjakwe.

ANA mpaka asace mundu jwatuli kuti aŵe mjawo? Mwangakayicila, mpaka asace kunguluka ni mundu jwampaka akamulane najo nganisyo, yakunonyela, soni yitendo. Soni mpaka asacilile kuti aŵe mjakwe jwa mundu jwandamo syambone mpela cilungamo ni canasa.

² Kwandaŵi jelewu, Mlungu aŵele ali mkusagula ŵandu kuti aŵe acimjakwe. Mwambone, Yehofa ŵasasile kuti Abulahamu ali mjakwe. (Yesaya 41:8; Yakobo 2:23) Mlungu ŵasasilesoni ya Daudi kuti ali “jwapamtima pangu,” ligongo jwalakwe ŵaliji mundu jwele Yehofa ŵamnonyelaga. (Masengo 13:22) Yehofa ŵam’wonaga jwakulocesya Daniyele mpela “mundu jwakunonyelwa mnope.”​—Danieli 9:23.

 3. Ligongo cici Mlungu akusasagula ŵandu ŵane kuti aŵe acimjakwe?

³ Ligongo cici Yehofa ŵawonaga mwanja Abulahamu, Daudi, soni Daniyele kuŵa acimjakwe? Jwalakwe ŵamsalile Abulahamu kuti: ‘ligongo mmwejo mpikanile maloŵe gangu.’ (Genesis 22:18) M’yoyo, Yehofa akusaŵa paunasi ni ŵandu ŵakusatenda yakusasaka jwalakwejo. Jwalakwe ŵasalile Ayisalayeli kuti: “Mpikanileje maloŵe gangu ni cinjiŵa Mlungu jwenu, soni jemanja caciŵa ŵandu ŵangu.” (Yeremiya 7:23) Naga akumpikanila Yehofa, wawojosoni mpaka aŵe mjakwe!

4, 5. Ana Yehofa akusalosya catuli macili gakwe kwa ŵandu ŵakwe?

⁴ Agambe ganisya umbone wakuŵa mjakwe jwa Mlungu! Baibulo jikusasala kuti Yehofa akusosasosa mapesa “kuti alosye macili gakwe kwa ŵandu ŵali ni mtima wakulungama kwa jwalakwejo.” (2 Mbiri 16:9) Ana Yehofa akusalosya catuli macili gakwe kwa wawojo? Litala limo likusimanikwa pa Salimo 32:8, patukusaŵalanga kuti: “Une [Yehofa] cinjimpa lunda, soni cinjimlanjisya litala lyakuti mjende. Cinjimpa malamusi ni kumlolela.”

⁵ Gelega gali maloŵe gakulimbikasya gakulosya kuti Yehofa akusatusamalila! Jwalakwe cacalongolela, soni kwacenjela pakutenda yagakusasala maloŵe gakwe. Mlungu akusaka kwakamucisya kupilila pakulinjidwa, soni pali pa yipwetesi. (Salimo 55:22) M’yoyo, naga akumtumicila Yehofa ni mtima wosope, mpaka aŵe ŵakusimicisya mpela jwamalumbo juŵatite: “Mbisile Yehofa paujo pangu ndaŵi syosope. Pakuŵa ali kumkono wangu wamlyo, ngasindunganyika.” (Salimo 16:8; 63:8) Kusala yisyene, Yehofa mpaka ŵakamucisye kutenda yindu yakumsangalasya jwalakwe. Nambope, mpela muŵalijiganyicisye kala, pana mmagongo jwa Mlungu jwangakusasaka kuti wawojo atendeje yeleyi.

 6. Ana Satana ŵasasile yatuli pakwamba ya ŵandu?

⁶ Mtwe 11 wa m’buku ajino wasasile yaŵatesile Satana pakanila ulamusi wa Mlungu. Satana ŵajimbile magambo Mlungu kuti ali jwakulambusya, soni kuti nganiciŵa cilungamo kuti Yehofa ŵajimile Adamu ni Hawa upile wakulisagulila yakutenda, cinga yambone kapena yakusakala. Adamu ni Hawa ali alemwisye, soni cilamboci cili citandite kugumbala ni ŵanace ŵawo, Satana ŵakayicile lisosa lya ŵandu pakumtumicila Mlungu. Satana ŵasasile kuti, ‘Ŵandu akusamtumicila Mlungu ngaŵa ligongo lyakumnonyela. Agambe kumba lipesa, mpaka nalekasye wosope kumtumicila Mlungu.’ Ngani ja Yobu jikusalosya kuti Satana ŵakulupililaga yeleyi. Ana Yobu ŵaliji ŵani, soni ana kukayicila kwa Satana kwamkwayiye catuli?

7, 8. (a) Ana cici camtendekasisye Yobu kuŵa mundu jwambone kwapunda ŵandu wosope ŵa mundaŵi jakwe? (b) Ana Satana ŵakayicile cici pa kutumicila kwa Yobu?

⁷ Yobu ŵapali ciŵandika yaka 3,600 yipiteyo. Jwalakwe ŵaliji mundu jwambone, ligongo Yehofa ŵatite: “Pangali jwine cisawu jwalakwe, mundu jwangali cakulemwa, jwakulupicika, jwakogopa Mlungu, soni jwakuyiŵambala yakusakala.” (Yobu 1:8) Yobu ŵatendaga yakumsangalasya Mlungu.

⁸ Satana ŵakayicile lisosa lya Yobu pakumtumicila Mlungu. Satana ŵasasile kwa Yehofa kuti: “Ana wawo nganaŵika uŵigo pa jwalakwe [Yobu], pa nyumba jwakwe, ni pa yosope yakwete? Ampele upile pa masengo ga makono gakwe, soni yilango yakwe yitupile pacilambo cosope. Nambope, sambano atambasukule mkono wawo ni kwaya yakwe yosope, alole naga ngaŵatukana pelanga.”​—Yobu 1:10, 11.

 9. Ana Yehofa ŵatesile cici pakumjanga Satana, soni ligongo cici?

⁹ M’yoyo Satana ŵasasile kuti Yobu ŵamtumicilaga Mlungu ligongo lya yindu yambone yaŵapataga. Kaneko Satana ŵasasile kuti naga Yobu akulinjikwa, mpaka alece kutumicila Mlungu. Ana Yehofa akajanjile uli ngani jiŵajitandisye Satanaji? Pakuŵa kuti nganiji jakwayaga lisosa lya Yobu pakumtumicila Mlungu, Yehofa ŵakundile kuti Satana amlinje Yobu. Yeleyi, yikalosisye naga Yobu akusamnonyela Mlungu kapena iyayi.

10. Ana Yobu ŵalinjikwe catuli, soni jwalakwe ŵatesile cici?

¹⁰ Mwangacelewa, Satana ŵamlinjile Yobu m’matala gakulekanganalekangana. Ŵawiyi ŵayice ni kwiŵa yilango yine ya Yobu, soni yine ŵayiwuleje. Ŵamasengo ŵakwe ŵajinji ŵawulajikwe. Yeleyi yatendekasisye kuti Yobu alaje mnope. Likungu line lyayice pandaŵi jele ŵanace ŵa Yobu ŵakwana 10 ŵawile ni cimbungo. Atamose kuti ŵasimene ni yakogoyayi, “Yobu nganalemwa, soni nganaŵeceta kuti Mlungu atesile yangalumbana.”​—Yobu 1:22.

11. (a) Ana Satana ŵasasilesoni cici pakwamba ya Yobu, soni Yehofa ŵajanjile catuli? (b) Ana Yobu ŵaŵecete cici ali alwasile ulwele wakogoya?

¹¹ Satana nganaleka kumlagasya Yobu. Jwalakwe ŵaganisisye kuti Yobu komboleka kupilila konasika kwa ndundu syakwe, kuwulajikwa kwa ŵamasengo ŵakwe, soni ciwa ca ŵanace ŵakwe, nambo mpaka alece kumtumicila Mlungu naga jwalakwe alwasile. Yehofa ŵamkundile kuti Satana amlinje Yobu mwakumtendekasya kulwala ulwele wakogoya, soni wakupweteka. Nambo, atamose yeleyi nganiyimtendekasya Yobu kuleka kumkulupilila Mlungu. Mmalo mwakwe, jwalakwe ŵaŵecete ni mtima wosope kuti: “ Mpaka une kuwa ngasindeka kuŵa jwagoloka!”​—Yobu 27:5.

12. Ana yitendo ya Yobu yalosisye catuli kuti yaŵaŵecetaga Satana yaliji yawunami?

¹² Yobu nganamanyililaga kuti Satana ni juŵatendekasyaga yakusawusya yosope yaŵasimanaga nayo. Jwalakwe nganamanyililaga ngani jiŵajitandisye Satana jakwamba ulamusi wa Yehofa, m’yoyo Yobu ŵaganisyaga kuti Mlungu ni juŵatendekasyaga yakusawusyayo. (Yobu 6:4; 16:11-14) Nambope, jwalakwe ŵaŵele jwagoloka pameso pa Yehofa. Kulupicika kwa Yobu kwalosisye kuti yaŵaŵecete Satana yakuti jwalakwe ŵamtumicilaga Mlungu ligongo lya yindu yambone yaŵapataga yaliji yawunami!

13. Ana cici cicatendekwe ligongo lya kulupicika kwa Yobu?

¹³ Kulupicika kwa Yobu kwamkamucisye Mlungu kwanga mwamacili yaŵakayicilaga Satana. Yisyene, Yobu ŵaliji mjakwe jwa Yehofa, soni Mlungu ŵamjaliwe ligongo lyakuŵa jwakulupicika.​—Yobu 42:12-17.

14, 15. Ligongo cici mpaka tujile kuti ngani jaŵajitandisye Satana jakwamba Yobu jikusakwaya ŵandu wosope?

¹⁴ Ngani jakwamba kuŵa ŵagoloka pameso pa Mlungu jiŵajitandisye Satana, ngaŵaga kuti jamkwayaga Yobu jika. Wawojosoni jikwakwaya. Yeleyi yikuwonecela cenene pa lilemba lya Miyambo 27:11, pele Maloŵe ga Yehofa gakusati: “Mwanangu, m’ŵeje ŵalunda, ni m’wusangalasye mtima wangu; kuti namjanje jwele jwakunyosya.” Maloŵega ŵagalembile pali papite yaka yejinji ciwile Yobu, nambo gakulosya kuti Satana ŵaŵele ali mkumnyosyape Mlungu, soni ŵandu ŵakusamtumicila. Naga tukutenda yindu m’litala lyakumsangalasya Yehofa, tucikamucisya kwanga unami wa Satana, soni tucitendekasya mtima wa Yehofa kusengwa. Ana wawojo akuganisya uli? Ana ngaŵa mkuŵa yakusangalasya kamucisya nawo pakwanga unami wa Satana, atamose kuti kutenda yeleyi kukusasaka kucenga yindu yine paumi wawo?

¹⁵ Apikane yaŵaŵecete Satana: “Cilicose cakwete mundu cacipeleka kulipa umi wakwe.” (Yobu 2:4) Satana paŵasasile kuti “mundu,” ŵagopolelaga kuti nganiji jikwaya ŵandu wosope. Jeleji jili ngani jakusosekwa mnope. Satana akusakayicila kuŵa kwawo ŵakulupicika kwa Mlungu. Jwalakwe akusaka kwawona wawojo ali alesile kuŵa ŵakulupicika kwa Mlungu, soni kuleka kuya matala gakwe gakulungama pasimene ni yakusawusya. Ana Satana mpaka atende catuli yeleyi?

16. (a) Ana Satana akusakamulicisya masengo matala gapi pakwalekanganya ŵandu ni Mlungu? (b) Ana Satana mpaka akamulicisye masengo matala gelega mwatuli kwa wawojo?

¹⁶ Mpela mwatulijiganyicisye mu Mtwe 10, Satana akusakamulicisya masengo matala gakulekanganalekangana kuti ŵatyosye ŵandu kwa Mlungu. Konjecesya pelepa, jwalakwe akusakamula ŵandu ‘mpela lisimba lyakubangula kapena kuti lyakutongola, acimsosaga jwakuti amlye.’ (1 Petulo 5:8) Yakusatenda Satana mpaka yiwonecele naga acimjawo, acanasi ŵawo, kapena ŵane akwalekasya kulijiganya Baibulo, soni pakukamulicisya masengo yakulijiganyayo.a (Yohane 15:19, 20) Konjecesya pelepa, Satana “akulilandanya jika kuti awonece mpela lilayika lya lilanguka.” (2 Akolinto 11:14) Mwa ukalamusi, Satana akusakamulicisya masengo matala gangawonecela pakusaka kwatega kuti akatamaga ni umi wakumsangalasya Mlungu. Jwalakwe mpaka ŵatengusye mwakwatendekasya kuti aliwoneje kuŵa ŵangaŵajilwa kumsangalasya Mlungu. (Miyambo 24:10) Cinga Satana akuŵa ‘mpela lisimba lyakutongola’ kapena mpela “lilayika lya lilanguka,” lisosa lyakwe lili limpepe: Jwalakwe akusasala kuti wawojo pakulinjidwa kapena pasimene ni yipwetesi, calece kumtumicila Mlungu. Ana mpaka ajanje catuli yakuŵeceta ya Satanayi, soni kulosya kulupicika kwawo kwa Mlungu, mpela muŵatendele Yobu?

17. Ana ligongo lyekulungwa lyakupikanila malamusi ga Yehofa lili lyapi?

¹⁷ Mpaka ajanje yakusakayicila Satana mwakutenda yindu yakumsangalasya Mlungu. Ana mpaka atende wuli yeleyi? Baibulo jikusajanga kuti: “Mwanonyeleje Ambuje Mlungu jwenu, ni mtima wenu wosope, ni umi wenu wosope ni lunda lwenu losope, ni macili genu gosope.” (Maliko 12:30) Pacikukula cinonyelo cawo kwa Mlungu, cacisacilila mnope kutenda yakusasaka jwalakwe. Ndumetume Yohane ŵalembile kuti: “Kumnonyela Mlungu kuli kugapikanila malamusi gakwe.” Naga akusamnonyela Mlungu ni mtima wawo wosope, caciwona kuti malamusi gakwe “nganigaŵa gakusitopesya.”​—1 Yohane 5:3.

18, 19. (a) Ana malamusi gane ga Yehofa gali gapi? (Alole libokosi pa peji 122) (b) Ana tukumanyilila wuli kuti Mlungu jwangasaka yejinji kwetuwe?

¹⁸ Ana malamusi ga Yehofa gelega ni gapi? Gane mwa malamusiga gakupwatikapo ndamo syatukusosekwa kusiŵambala. Mwambone, alole libokosi papeji 122, lya mtwe wakuti “Aŵambaleje Yitendo Yakusayiŵenga Yehofa.” Pelepo cayiwone yitendo yajikusalekasya Baibulo mwakupikanika cenene. Kwamba kuyiwona kandanda, yitendo yine mpaka yiwonece mpela ngaŵa yakusakala. Nambo panyuma pakuganicisya mwakusokoka ya malemba gagali m’libokosilyo, caciluwona lunda lwa m’malamusi ga Yehofa. Kucenga yitendo yawo mpaka kuŵe kwakusawusya mnope. Nambope, kutenda yindu yakumsangalasya Mlungu kukusatutendekasya kuŵa ŵakusengwa. (Yesaya 48:17, 18) Soni yili yindu yampaka ayikombole. Ana tukumanyilila yeleyi catuli?

¹⁹ Yehofa akusasaka kuti tutendeje yindu yampaka tuyikombole. (Deuteronomo 30:11-14) Jwalakwe akusamanyilila yampaka tukombole kutenda, soni kupelembela kwetu kupunda acimsyewe. (Salimo 103:14) Konjecesya pelepo, Yehofa mpaka atupe macili kuti tumpikanileje. Ndumetume Paulo ŵalembile kuti: “Mlungu ali jwakulupicika, jwalakwejo ngaŵa mkunda kuti jemanja mlinjidwe mwakupundanganya macili genu. Nambo pandaŵi jitimcilinjidwaga, jwalakwejo tacimlinganyicisya litala lyakuti mkulupucile, pakumpa jemanja macili kuti mpimilile.” (1 Akolinto 10:13) Kuti tukombole kupilila, Yehofa mpaka atupe “macili gekulungwa.”​—2 Akolinto 4:7.

20. Ana akusosekwa kola ndamo syapi syakusangalasya Mlungu, soni ligongo cici sili syakusosekwa?

²⁰ Kuti tumsangalasye Yehofa pakusasosekwa yinesoni, ngaŵagape kuŵambala yakusayiŵenga. Akusosekwasoni kunonyela yindu yakusayinonyela jwalakwejo. (Aloma 12:9) Ana wawojo ngakusasacilila kuŵa mjakwe jwa mundu jwakwete nganisyo, yakunonyela, soni ndamo mpela syawo? Yeleyi ni yakusatendagasoni Yehofa. M’yoyo alijiganye kunonyela yindu yakusayinonyela Yehofa. Yine mwa yinduyi ayikolasile pa lilemba lya Salimo 15:1-5, lyalikusala ya ŵandu ŵele Yehofa akusawona kuŵa acimjakwe. Acimjakwe ŵa Yehofa akusalosya ndamo syele ‘msimu wa Mlungu ukusatendekasya’ kuti akole. Ndamo syakwe sili, “cinonyelo, lukondwa, mtendele, kuwusimana mtima, umbone mtima, . . . kulupicika, kulisinga nambosoni kuligosa.”​—Agalatia 5:22, 23.

21. Ana cici campaka cakamucisye kuti akole ndamo syakumsangalasya Mlungu?

²¹ Kuŵalanga, soni kulijiganya Baibulo ndaŵi syosope kucakamucisya kuti akole ndamo syakumsangalasya Mlungu. Kulijiganyasoni yakusasaka Mlungu kucakamucisya kola nganisyo syakamulana ni sya Mlungu. (Yesaya 30:20, 21) Pacikukula cinonyelo cawo kwa Yehofa, kusacilila kwawo kumnonyelesya Mlungu kucikulagasoni.

22. Ana paciŵa yakuyicisya yatuli naga akutenda yindu yakumsangalasya Mlungu?

²² Pakusasosekwa mtawu kuti tutendeje yindu yakumsangalasya Yehofa. Baibulo jikusalosya kuti tukusosekwa kuleka umi wetu wakala wakusakala ni kola umi wasambano. (Akolose 3:9, 10) Nambo pakwamba ya malamusi ga Yehofa, jwamalumbo ŵalembile kuti, “Pakugasunga pana mbote jekulungwa.” (Salimo 19:11) Wawojosoni caciyiwona kuti kutenda yindu yakumsangalasya Mlungu kuli kwambone mnope. Kutenda yeleyi kucakamucisya kwanga unami wa Satana, soni kutendekasya mtima wa Yehofa kusangalala!