Yiwusyo Yakutyocela Kwa Ŵakuŵalanga

Mwambone, m’bale jwine jwele mwanagwe ŵaliwuleje, ŵaliwusisye kuti, ‘Ana Yehofa ŵamanyilile mkanipaŵe kuti ŵamkwangu ni une tucikombola kupilila mwanace jwetu pacaciliwulaga? Ana yeleyi yatendekwe ligongo lyakuti Mlungu ŵamanyililaga kuti mpaka tukombole kupilila?’ Nambo ana pana magongo gakupikanika gakututendekasya kulupilila kuti Yehofa akusatenda yindu m’litala lyeleli?

Panyuma pakugaganicisya cenene maloŵe ga Paulo gagali pa 1 Akolinto 10:13, twayiweni kuti pangali magongo galigose ga m’Malemba gakututendekasya kulupilila kuti Yehofa akusamanyilila mkanipaŵe yampaka tupilile ni pakulola yeleyo akusasagula yakulingwa yakuti tusimane nayo. Kwende tulole magongo mcece gatukusalila yeleyi.

Ligongo lyandanda, Yehofa ŵapele ŵandu ufulu wakusagula yakutenda. Jwalakwe akusasaka kuti tusaguleje jika yakutenda paumi wetu. (Deut. 30:19, 20; Yos. 24:15) Naga tukusagula kutenda yakuŵajilwa, mpaka tumjegamile jwalakwe kuti atulongoleleje. (Miy. 16:9) Nambo naga tukusagula kutenda yakulemweceka, tucisosekwa kusimana ni yakuyicisya yakwe. (Aga. 6:7) Yikaŵe kuti Yehofa akusasagula yakulingwa yakuti tusimane nayo, ana ngamkaniyiŵa mpela kuti akutusumula ufulu wakusagula yakutenda?

Lyaŵili, Yehofa ngakusatuŵambasya ku ‘ndaŵi ni yakutendekwa yangayijembeceya.’ (Mlal. 9:11) Ndaŵi sine, ngosi syakogoya mnope mpaka situtendecele mwine ligongo lyakuti tuli pamalo gangaŵajilwa soni pandaŵi jangaŵajilwa. Mwambone, Yesu ŵasasile ya ngosi jajatendekwe pele ŵandu ŵakwana 18 ŵawile ligongo lyakuti sanja jagwilile. Jwalakwe ŵalosisye kuti yeleyi nganiyitendekwa mwalisosa lya Mlungu. (Luk. 13:1-5) M’yoyo, ana yili yakupikanika kuganisya kuti Mlungu mpaka asagule mkanipaŵe ŵandu ŵacakulupuce soni ŵacawe naga jikutendekwa ngosi?

Lyatatu, jwalijose jwetuwe akusosekwa kulosya kuti ali jwakulupicika kwa Mlungu. Akumbucile kuti Satana ŵasasile kuti ŵakutumicila ŵa Yehofa nganaŵa ajendelecele kuŵa ŵakulupicika naga asimene ni yakulingwa. (Yobu 1:9-11; 2:4; Ciu. 12:10) Yikaŵe kuti Yehofa akusatuŵambasya ku yakulingwa yineyakwe ligongo akuyiwona kuti ngatukombola kupilila, ana yeleyi ngamkaniyikamulana ni yaŵaŵecete Satana yakuti tukusatumicila Mlungu pakusaka kupata yineyakwe?

Lyamcece, Yehofa ngakusasosekwa kumanyilila mkanipaŵe yosope yayicitutendecela. Nganisyo syakuti Mlungu akusasagula mkanipaŵe yakulingwa yakuti tusimane nayo sikulosya kuti jwalakwe akusamanyilila yosope yakwayana ni sogolo jetu. Nambo nganisyo syelesi sili syangakamulana ni Malemba. Yili yisyene kuti Mlungu mpaka amanyilile yamsogolo. (Yes. 46:10) Nambo Baibulo jikusasala kuti jwalakwe akusasagula ndaŵi jakuti ayimanyilile yindu. (Gen. 18:20, 21; 22:12) Yehofa ali jwacinonyelo soni jwacilungamo, m’yoyo jwalakwe akusakamulicisya masengo macili gakwe gakumanyilila yamsogolo mwakuŵajilwa pakucimbicisya ufulu wetu wakusagula yakutenda. Ana yeleyi ngaŵa ni yatukwenela kwembeceya kutyocela kwa Mlungu jwetu jwakusacimbicisya ufulu wetu soni jwakusakamulicisya masengo ndamo syakwe syapenani mwakuŵajilwa?—Deut. 32:4; 2 Akoli. 3:17.

Nambi ana maloŵe ga Paulo gakuti, ‘Mlungu . . . ngasakunda kuti tulinjidwe kupunda pampaka tukombole kupilila’ gakugopolela cici? Paulo ŵasasile maloŵega pakulosya yakusatenda Yehofa patusimene ni yakulingwa ngaŵaga mkanitusimane nayo. Maloŵega gakutusimicisya kuti cinga mpaka tusimane ni yakulingwa yatuli paumi wetu, Yehofa cacitukamucisya naga tukumkulupilila. (Sal. 55:22) Kwende tulole magongo gaŵili gele Paulo ŵaŵecetele maloŵega.

Ligongo lyandanda, tukusasimana ni yakulingwa yele ŵandu wosope akusasimana nayo. Pakuŵa tukutama m’cilambo cakusakala ca Satanaci, wosope citusimaneje ni yakulingwa, soni mwine yakogoya mnope. Nambo naga tukusamjegamila Mlungu, nganituŵa tulepele kupilila yakulingwa yeleyi. (1 Pet. 5:8, 9) Mu lilemba lya 1 Akolinto 10:13, Paulo ŵasalaga ya yakulingwa yaŵasimene nayo Ayisalayeli m’cipululu. (1 Akoli. 10:6-11) Yakulingwa yeleyi nganiyiŵa yacilendo kwa ŵandu soni ngaŵa kuti Ayisalayeli ŵakulupicika akalepele kuyipilila. Kwa maulendo mcece, Paulo ŵasasile kuti “ŵane mwa jemanjaji” nganapikanila. Nambotu cakutesya canasa caliji cakuti, Ayisalayeli ŵanewo ŵatesile yakulemweceka ligongo lyakuti nganamjegamila Mlungu.

Lyaŵili, “Mlungu ali jwakulupicika.” Ngani syakusala mwele Mlungu ŵatendelaga yindu ni ŵandu ŵakwe sikusatusimicisya kuti jwalakwe akusalosya cinonyelo cangamala “kwa ŵandu ŵakusamnonyela soni kusunga malamusi gakwe.” (Deut. 7:9) Ngani syelesi sikusalosyasoni kuti Mlungu akusakwanilisya ndaŵi syosope yaŵalagucisye. (Yos. 23:14) Pakulola yeleyi, ŵandu ŵakusamnonyela soni kumpikanila Mlungu mpaka akole cikulupi cakuti, (1) jwalakwe ngasakunda kuti yakulingwa yampaka asimane nayo yikule ni kwika pakuti nganaŵa akombwele kupilila, soni (2) “jwalakwe cacipeleka litala lyakulupucila” kwa jemanjajo.

Ana Yehofa akusapeleka catuli litala lyakulupucila kwa ŵandu ŵakusamjegamila jwalakwejo pasimene ni yakulingwa? Naga jwalakwe akusaka, mpaka agambe kututyocesya yakulingwayo. Nambope akumbucile yaŵasasile Paulo kuti, “Jwalakwe [Yehofa] cacipeleka litala lyakulupucila kuti tupakombole kupilila.” M’yoyo, ndaŵi syejinji, jwalakwe ‘akusapeleka litala lyakulupucila’ mwakutupa yindu yatukusosecela kuti tupakombole kupilila yakulingwayo. Kwende tulole yine mwa yindu yakusatenda Yehofa pakutupa litala lyakulupucila:

• Jwalakwe “akusatutondoya mu yakulingwa yetu yosope.” (2 Akoli. 1:3, 4) Yehofa mpaka atamilikasye mtima soni nganisyo syetu pasi kupitila m’Maloŵe gakwe, msimu wakwe weswela, soni cakulya causimu cakusatupa kapolo jwakulupicika.—Mat. 24:45; Yoh. 14:16; Alo. 15:4.

• Mpaka atulongolele pakamulicisya masengo msimu weswela. (Yoh. 14:26) Patusimene ni yakulingwa, msimu wa Mlungu mpaka utukamucisye kumbucila yajikusasala Baibulo ni kusagula yindu mwakuŵajilwa.

• Mpaka akamulicisye masengo malayika gakwe kuti gatukamucisye.—Ahe. 1:14.

• Mpaka atukamucisye kupitila mwa ŵakulambila acimjetu ŵampaka atulimbikasye ni maloŵe kapena kututendela yineyakwe.—Akolo. 4:11.

Sambano, ana tukusosekwa kugapikana mwatuli maloŵe ga Paulo ga pa 1 Akolinto 10:13? Yehofa jwangasagula yakulingwa yakuti tusimane nayo. Nambo patusimene ni yakulingwa mpaka tusimicisye kuti, naga tukusamkulupilila mnope Yehofa, jwalakwe ngasakunda kuti yakulingwayo yikule kwikana pakuti nganituŵa tukombwele kupilila. Ndaŵi syosope jwalakwe cacipeleka litala lyakulupucila kuti tupakombole kupilila. Yeleyitu yili yakulimbikasya mnope!