Canasa​—Ndamo Jajikusawonecela M’maloŵe Soni mu Yitendo

NDAMO jacanasa jikusaŵa jakulimbikasya mnope. Tukusaŵa ŵakusangalala mnope patumanyilile kuti mundu jwine jwakwe akusatuganicisya. Pakuŵapo jwalijose akusasangalala patendeledwe canasa, ana mpaka tukusye camtuli ndamoji?

Canasa cikusapwatikapo kola lung’wanu ni yakusosecela ya ŵandu ŵane. Ndamoji jikusawonecela mu yakuŵeceta soni mu yitendo yetu. Ligongo lyakuti ndamoji jikusawonecela mu yitendo yetu, nganikuŵa kwakwanila ngamba kulosya pangope kuti tukwete canasa. Tukusalosya canasa cisyesyene ligongo lya cinonyelo. Konjecesya pelepa, canasa jili mbali jimo ja ndamo syawukusakoposya msimu weswela wa Mlungu, syakusasosekwa Aklistu kuti akole. (Aga. 5:22, 23) Paligongo lyeleli, jwalijose jwetuwe akusosekwa kukusya ndamo ja canasa. M’yoyo, kwende tulole yakusati Yehofa soni Mwanagwe pakulosya ndamoji soni yampaka tutende kuti tujigalile cisyasyo cawo.

Yehofa ali Mlungu jwacanasa soni akusamganicisya jwalijose kupwatikapo ŵandu “ŵangayamicila soni ŵakusakala.” (Luk. 6:35) Mwacisyasyo, Yehofa “akusaŵalisya lyuŵa lyakwe pa ŵandu ŵakusakala ni ŵambone, soni akusagwicisya wula ŵandu ŵakulungama ni ŵangalungama ŵakwe.” (Mat. 5:45) Atamose ŵandu ŵangakusam’wona Yehofa mpela Mkupanganya jwawo akusasangalalape ni canasa cakwe.

Canasa cekulungwa ca Yehofa tukusaciwona pa yaŵatesile kwa Adamu ni Hawa. Paŵagambile kulemwa, Adamu ni Hawa ‘ŵatotile masamba ga mkuju ni kuwala m’ciwunu mwawo.’ Nambope, Yehofa jwamanyilile kuti jemanjaji ŵasosekwe yakuwala yakuŵajilwa kuti akapakombole kutama kusa kwa mgunda wa Edeni, kwacakasimaneje ni ‘miŵa soni masamba gakusoma.’ M’yoyo, Yehofa jwapele yakusosecela yawo mwakwapa ‘yakuwala yayilewu yakupanganyidwa kutyocela ku mapende ga nyama.—Gen. 3:7, 17, 18, 21.

Atamose kuti Yehofa akusalosya canasa kwa jwalijose cinga “jwambone kapena jwakusakala,” jwalakwe akusasacilila kwalosya canasa mnopemnope ŵandumetume ŵakwe ŵakulupicika. Mwacisyasyo, mu ndaŵi ja jwakulocesya Sekaliya, lilayika lyalasile nganisyo pakuyiwona kuti masengo gakutaŵasoni nyumba ja Mlungu ku Yelusalemu gajimi kaje. Yehofa jwapikene kudandawula kwa lilayika lila mwamti jwalijanjile lilayikali ni “maloŵe gacanasa soni gakulimbikasya.” (Sak. 1:12, 13) Yehofa jwatesilesoni yakulandana ni yeleyi kwa jwakulocesya Eliya. Pandaŵiji, jwakulocesyaju jwatengwice mnope mwamti jwamŵendile Yehofa kuti mwine agambe kuwa. Yehofa jwakwayidwe nganisyo ni muŵapikanilaga Eliya mu mtima, mwamti jwatumisye lilayika kuti likamlimbikasye. Mlungu jwamsimicisye jwakulocesyaju kuti nganaŵa jika. Panyuma pakuti Eliya apocele maloŵe gakulimbikasya soni cikamucisyo caŵasosecelaga, jwalakwe jwaliji jwakoseka kwendelecela kutenda undumetume wakwe. (1 Ayi. 19:1-18) Pasikati pa ŵakutumicila wa Mlungu, ana ŵani ŵaŵele ali mkulosya ndamo japajika ja Yehofa ja canasaji?

Pandaŵi ja undumetume wakwe wapacilambo capasi, Yesu jwamanyikaga kuti jwaliji jwacanasa soni jwakwaganicisya ŵane. Jwalakwe nganatendaga yindu mwangalwe soni mwakulamula. Mwacanasa jwalakwe jwatite, “Yikani kwa une wosope ŵakamula masengo gakusitopesya soni ŵakusitopelwa, ni cinjapumusya. . . . Pakuŵa likongwa lyangu lili lyakuweŵa soni ndundu syangu sili syangasitopa.” (Mat. 11:28-30) Ligongo lya maloŵe ga canasaga, ŵandu ŵamkuyaga Yesu kulikose kuŵajawulaga. “Mwacanasa,” Yesu ŵalisisye ŵandu, kwaposya ŵakulwala soni ŵalemale nambosoni kwajiganya “yindu yejinji” yakwamba Atatigwe.—Mak. 6:34; Mat. 14:14; 15:32-38.

Umboni wakulosya kuti Yesu jwakwete canasa cekulungwa mnope uli wakuti jwalakwe jwapikanicisyaga mwaŵapikanilaga mumtima ŵandu ŵane. Atamose kuti ŵandu ŵayikaga kwa Yesu kuti ŵakamucisye pandaŵi jakuti jwalakwe atanganidwe ni yindu yine, “mwacanasa” jwalakwe jwapocelaga wosope ŵaŵamsosagasosaga ni mtima wosope. (Luk. 9:10, 11) Mwambone, pandaŵi jine jwamkongwe juŵalwalaga ulwele wa kwasa miyasi jwakwayiye cakuwala cakusa ca Yesu. Nambo jwalakwe nganamkalipila, atamose kuti mwakamulana ni msyungu wa Ayuda jwaliji jwangaswejela. (Lef. 15:25-28) Yesu jwamsalile jwamkongwe juŵalwasile kwa yaka 12 jweleju maloŵe gacanasa. Jwatite, “Cikulupi cenu cimposisye. Mjawule mwamtendele, soni ulwele wenu wekulungwawo umasile.” (Mak. 5:25-34) Celecitu caliji canasa cekulungwa.

Yisyasyo yatuyiweni mwinaniyi yikulosya kuti canasa cisyesyene cikusawonecela mu yitendo yetu. Pakusaka gombelecesya kusosekwa kwa kulosya canasa mu yitendo yetu, Yesu jwasasile citagu ca Msamaliya jwacanasa. Atamose kuti Asamaliya ni Ayuda nganamwelanaga mesi, Msamaliya jwa mu citaguci camkamwile canasa paŵam’bweni mundu juŵasimene ni ŵaciswamba, ali agonile mungulugulu msewu, ali asigele panandi kuwa. Canasa ni cacamtendekasisye Msamaliyaju kutendapo kandu. Jwalakwe jwasamalile maŵanga ga jwakuwulalajo. Kaneko ŵamjigalile kunyumba jakwicila acalendo. Msamaliya jwacanasaju jwapelece mbiya kwa jwakulolela nyumba jakwicila acalendo kuti amsamalile mundu jwakuwulalajo. Jwasalilesoni kuti naga pacipagwa mbiya sine syakonjecesya, cacipeleka.—Luk. 10:29-37.

Atamose kuti canasa tukusacilosya mu yitendo yetu, mpaka tucilosyesoni kupitila mu yakuŵeceta yetu yakulosya kuti tukusitwaganicisya ŵane. Atamose kuti “kudandawula kwa mundu kukusaŵa mpela cindu cakusitopesya mumtima mwakwe,” nambope Baibulo jikusajonjecesya kuti “maloŵe gambone gakusamsangalasya.” (Mis. 12:25) Mpaka tukombole kwakamucisya ŵane naga tukwete canasa soni umbone mtima. Yeleyi mpaka yitukamucisye kuti twasalileje maloŵe gakulimbikasya.a Maloŵe getu ga canasa mpaka galosye kuti tukusitwaganicisyaga. Ligongo lya maloŵe gakulimbikasyaga, yicikamucisya kuti apakombole kupilila pasimene ni yakulingwa.—Mis. 16:24.

Ligongo lyakuti ŵatupanganyisye “m’ciwanicisyo ca Mlungu,” jwalijose mpaka akombole kusya ndamo ja canasa. (Gen. 1:27) Mwacisyasyo, jwamkulungwa jwa asilikali jwa Loma lina lyakwe Juliyasi, jwamlondelega Paulo paŵaliji mkayidi. Jwalakwe jwamtendelaga canasa ndumetume Paulo mwamti ŵamkundaga kwawula mumsinda wa Sidon, kwa acimjakwe kuti akapate cikamucisyo. (Mase. 27:3) Ndaŵi jine, ŵandu ŵaŵatamaga pa cilumba ca Malta ŵalosisye “canasa cekulungwa” kwa Paulo soni acimjakwe ŵacakasicile combo. Ŵandu ŵapacilumbapa ŵakolesisye moto kuti ajote ŵandu ŵacakasicile comboŵa. (Mase. 28:1, 2) Mpela muŵatendele jemanjaji, kulosya canasa kukusapwatikapo yejinji m’malo mwakwamba kutenda yambone kamope.

Kuti tumsangalasye Mlungu, tukusosekwa kukusya ndamo ja canasa soni jiŵeje mbali ja umi wetu. Pa ligongo lyeleli, Yehofa akusatusalila kuti ‘tuwale canasa.’ (Akolo. 3:12) Kusala yisyene, ndaŵi sine yikusaŵa yakusawusya kuti tulosye ndamo ja Mlunguji. Ligongo cici? Mwine mpaka yitulemeje kulosya canasa ligongo lya sooni, kulikayicila, kogopa kutusisya, kapena ligongo lya ndamo jakulikwesya jajiwandile mnope m’cilamboci. Nambope mpaka tumalane ni yeleyi mwakwegamila msimu weswela soni mwakujigalila cisyasyo ca Yehofa.—1 Akoli. 2:12.

Ana pana mbali sine paumi wetu syatukusosekwa kongolela pangani jakulosya canasa? Tuliwusyeje kuti, ‘Ana jwine pakuŵeceta ngusinampikanilaga mwacanasa? Ana ngusamanyilila yakusosecela ya ŵandu ŵane? Ana cakaci canamlosisye canasa mundu jwanganaŵa jwamwiŵasa mwangu kapena mjangu jwapamtima?’ Tukusosekwa kola yakulinga yakuti tummanyilile jwalijose, mnopemnope abale ni alongo mumpingo. Naga tukutenda yeleyi, tucimanyililaga mwayiŵelele yindu paumi wawo nambosoni yakusosecela yawo. Kaneko tucilingalinga kwatendela ŵane canasa mpela mwatukasicile kuti ŵane atutendele. (Mat. 7:12) Pambesi pakwe, naga tukusamŵenda Yehofa kuti atukamucisye kola ndamoji, jwalakwe cacitupa majali ligongo lya kulingalinga kwetu.—Luk. 11:13.

Ndumetume Paulo pajwasalaga ya ndamo syasikusalekanganya pasikati pa mundu jwakutumicila Mlungu ni jwangatumicila, jwalakwe jwapwaticemo ndamo ja “canasa.” (2 Akoli. 6:3-6) Ŵandu ŵayikaga kwa Paulo ligongo lyakuti jwalakwe jwalosyaga lung’wanu ŵanduwo. Lung’wanulu lyawonecelaga mu yitendo soni maloŵe gakwe ga canasa. (Mase. 28:30, 31) Mwakulandana ni Paulo, m’wejisoni mpaka twakamucisye ŵandu kumanyilila usyesyene ligongo lya ndamo jetu ja canasa. Patukulosya canasa kwa mundu jwalijose, kupwatikapo ŵandu ŵakusatusisya, mpaka yitendekasye kuti mitima jawo jicenje. (Alo. 12:20) Lisiku line mpaka asace kulijiganya Baibulo.

Cilambo ca Paladaiso cacikwikaci, ŵandu ŵajinji ŵakwimuka kumalembe mwangakayicila cacisangalala kwawona ŵandu ali mkulosyana canasa cisyesyene. Kwa ŵane, kaciŵa kandanda kutendeledwa canasa. Yakuyicisya yakwe, nombenawo cacitanda kwatendela ŵane canasa. Pandaŵijo, mundu jwalijose jucacikana kwatendela ŵane canasa kapena kwakamucisya ŵane, ngasamkunda kutama mu Ucimwene wa Mlungu. Nambo ŵandu ŵacacikola cinonyelo soni kwatendela canasa ŵane, Mlungu cacajiticisya kuti atame ni umi kwangamala. (Sal. 37:9-11) Kusala yisyene, pacilambo cosope paciŵa mtendele. Nambope, patukwembeceya kupocela majaliga, ana apanopano mpaka tupindule camtuli ligongo lyakulosya ndamo ja canasa?

Baibulo jikusasala kuti, “Mundu jwambone mtima akusalitendela msyene yambone.” (Mis. 11:17) Ŵandu akusasangalala kutama ni mundu jwakwete ndamo ja canasa. Yakuyicisya yakwe nombenawo akusiŵalosya canasa. Yesu jwatite, “Mpimo umkwapimila nawo ŵane, cacimpimilasoni uwowo.” (Luk. 6:38) M’yoyo, mundu jwacanasa akusapata acimjakwe mwangasawusya.

Ndumetume Paulo ŵalimbikasisye abale ni alongo ŵa mumpingo wa ku Efeso kuti, ‘Aŵe ŵambone mtima kwa jwine ni mjakwe, ŵacanasa cekulungwa, soni ŵakululucilana kutyocela pasi pa mtima.’ (Aef. 4:32) Abale ni alongo akusapindula mnope naga jwalijose mumpingomo akulingalinga kulosya ndamo ja canasa. Tukusasaka kuŵambala kuŵecetana maloŵe ga ukali, kusisyana mnope, kapena kuŵeceta maloŵe gakunyosya. M’malo mwa kuwandisya mabosa, tukusalingalinga kukamulicisya masengo lulimi lwetu pakwakamucisya ŵane. (Mis. 12:18) Yakuyicisya yakwe, mpingo wosope ukusaŵa wakulimba mwausimu.

Mpela mwatuyiwonele munganiji, ndamo ja canasa mpaka tujilosye kupitila mu yakuŵeceta yetu soni yitendo yetu. Patukuŵa ŵacanasa, tukusalosya ndamo ja Yehofa Mlungu jwetu jwali jwakoloŵa magasa soni jwacinonyelo. (Aef. 5:1) Yeleyi yikusakamucisya kuti mpingo wetu ujendelecele kuŵa wakulimba. Yikusakamucisyasoni kuti ŵandu ŵane atande kumtumicila Yehofa. M’yoyo, kwende wosope tulinjelinje kola ndamo ja canasaji.