Akoleje Yakulinga Yausimu Soni Ayikwanilisyeje

 1. Ana mpaka tukole yakulinga yausimu yamtuli?

TUKUSAMNONYELA mnope Yehofa ligongo lyakuti tuli Aklistu ŵasyesyene. Tukusasaka kumtumichila Yehofa mulimose mwampaka tukombolele. Nambo kuti tukombole kutenda yeleyi, tukusasosekwa kola yakulinga yausimu, mpela kola ndamo sya Chiklistu, kulijiganya maluso gane soni kupata matala gakwatumichila ŵane.b

 2. Ligongo chichi tukusosekwa kola yakulinga yausimu soni kulingalinga kuti tuyikwanilisyeje?

² Ligongo chichi tukusasaka kola yakulinga yausimu? Ligongo lyekulungwa lili lyakuti tukusasaka kwasangalasya Atati ŵetu ŵachinonyelo ŵakwinani. Yehofa akusasangalala pakutuwona tuli mkukamulichisya masengo yatukusakombola kutenda soni lunda lwetu pakumtumichila jwalakwe. Nambosoni tukusasaka kuti tujawuleje pasogolo mwausimu kuti twakamuchisyeje abale ni alongo. (1 Ates. 4:9, 10) Chinga tutemi mu usyesyene kwandaŵi jelewu chamtuli, yili yakomboleka kwawula pasogolo mwausimu. Kwende tulole mwampaka tutendele yeleyi.

 3. Mwakamulana ni 1 Timoteo 4:12-16, ana ndumetume Paulo jwamlimbikasisye Timoteo kutenda chichi?

³ Ndumetume Paulo pajwamlembelaga Timoteo chikalata chandanda, Timoteo jwaliji ali jwamkulungwa jwa mumpingo jwakumanyilila yejinji. Nambope Paulo jwamlimbikasisye Timoteo kuti ajawuleje pasogolo mwausimu. (Aŵalanje 1 Timoteo 4:12-16.) Pakuganichisya maloŵe ga Pauloga, mpaka ayiwone kuti jwalakwe jwasakaga kuti Timoteo ajawule pasogolo mu mbali siŵili. Timoteo jwasosekwaga kola ndamo sya Chiklistu mpela chinonyelo, chikulupi, soni ndamo syambone. Nambosoni jwasosekwaga konjechesya luso lwakwe pa kuŵalanga pa gulu, soni kwakamuchisya ŵane. Ana chisyasyo cha Timoteo, mpaka chitukamuchisye chamtuli kola yakulinga ya usimu? Kwende tulole matala gane gampaka tujonjechesye utumiki wetu.

 4. Mwakamulana ni Afilipi 2:19-22, ana chichi chachamkamuchisye Timoteo kuti aŵe mtumiki jwa Yehofa?

⁴ Ana chichi chachamkamuchisye Timoteo kuti aŵe mtumiki jwa Yehofa? Jwalakwe ŵakwete ndamo syapenani sya Chiklistu. (Aŵalanje Afilipi 2:19-22.) Paulo jwasasile kuti Timoteo jwaliji jwakulinandiya, jwakulupichika, jwakulipeleka soni jwakudalilichika. Nambosoni jwaliji jwachinonyelo soni jwaganichisyaga abale ni alongo. Yeleyi yatendekasisye kuti Paulo amnonyele jwalakwe soni ŵampele maudindo gekulungwa. (1 Akoli. 4:17) Mwakulandana ni Timoteo, m’wejisoni naga tukukola ndamo syakusasinonyela Yehofa, jwalakwe chachitunonyela soni tuchiŵa ŵakusosekwa mumpingo.—Sal. 25:9; 138:6.

 5. (a) Ana mpaka amanyilile chamtuli ndamo ja Chiklistu jakusosekwa kongolela? (b) Mpela mwatukuyiwonela pachiwulilipo, ana mlongo jwachisikanajo akutenda yamtuli kuti ŵalosyeje ŵane chanasa?

⁵ Akoleje chakulinga. Panyuma pakupopela, mpaka aganichisye soni kusagula ndamo jakusaka kongolela. Mwachisyasyo, mwine mpaka ayiwone kuti akusosekwa kulingalinga kuŵa ŵachanasa kapena kola mtima wakusachilila kwakamuchisya abale ni alongo. Kapena mpaka asosekwe kulingalinga kuti atameje mwamtendele ni ŵane soni kuti ŵakululuchileje achimjawo. Mwine mpaka atende chenene kwawusya ajawo ŵakusiŵadalila kuti ŵasalile pakusosekwa kongolela.—Mis. 27:6.

 6. Ana mpaka atende yamtuli kuti akwanilisye chakulinga chawo chakola ndamo jine jakwe?

⁶ Atendeje yakuti akwanilisye chakulinga chawo. Ana mpaka atende chamtuli yeleyi? Mpaka atende yeleyi mwakulijiganya ya ndamo jakusosekwa kongolelajo. Tuwanichisye kuti akusaka akusye ndamo ja kwakululuchila ŵane. Mpaka atande mwakuŵalanga yisyasyo ya m’Baibulo ya ŵandu ŵaŵakululuchile ni mtima wosope achimjawo ni ya ŵandu ŵanganiŵakululuchila achimjawo. Aganichisye chisyasyo cha Yesu. Jwalakwe jwakululuchile ŵane ni mtima wosope. (Luk. 7:47, 48) Yesu nganaganichisyaga yakulepela ya ŵane nambo jwaganichisyaga yampaka akombole kutenda jemanjajo. Nambo Afalisi ŵa mundaŵi ja Yesu, ‘ŵanyosyaga achimjawo.’ (Luk. 18:9) Panyuma pakuganichisya yisyasyo yeleyi, aliwusye kuti, ‘Ana ngusalola chichi mwa ŵane? Pa ndamo syakwete jemanjaji, ana ngusasagula kuganichisya mnope ya ndamo syapi?’ Naga akulaga kumkululuchila mundu jwine, alinje kulemba ndamo syambone syosope syakwete mundujo. Kaneko aliwusye kuti, ‘Ana Yesu akusamwona chamtuli mundu jweleju? Ana jwalakwe mpaka amkululuchile?’ Kutenda yeleyi mpaka kwakamuchisye kuti achenje kaganisye kawo. Pandanda mpaka tusosekwe kulimbichila kuti tumkululuchile mundu jwatulemwechesye. Nambo patukulingalinga kutenda yeleyi, pambesi pakwe tuchiŵa ŵakoseka kwakululuchila ŵane.

 7. Mwakamulana ni Misyungu 22:29, ana masiku agano Yehofa akusiŵakamulichisya masengo chamtuli ŵandu ŵakwete luso?

⁷ Chakulinga chine champaka akole chili kulijiganya maluso gane. Agambe ganichisya kusosechela kwekulungwa kwakupali kwa ŵandu ŵakuti akamuchisyeje nawo pakutaŵa ma ofesi ga nyambi, malo gakutendela misongano jekulungwakulungwa, soni Nyumba sya Uchimwene. Ŵajinji mwa ŵandu ŵakusakamula masengoga akusalijiganya kwa abale ni alongo ŵawo ŵagamanyi masengogo ŵakusakamula nawo yalumo. Mpela mwayikuwonechela pa chiwulilipo, abale ni alongo akulijiganya maluso gakusosekwa kuti akamuchisyeje nawo pa kulinganya yejonasiche mmalo gakutendela misongano soni m’Nyumba sya Uchimwene. Patukutenda yeleyi soni yindu yine, Yehofa Mlungu jwetu jwali “Mwenye jwampaka kalakala,” soni Yesu Klistu jwali “Mwenye jwa ayimwene,” akukwanilisya yindu yekulungwa pakamulichisya masengo ŵandu ŵakuŵajilwa. (1 Tim. 1:17; 6:15; aŵalanje Misyungu 22:29.) Tukusosekwa tulimbichileje kukamula masengo soni kamulichisya masengo luso lwetu pakumchimbichisya Yehofa ngaŵaga pakusaka kulichimbichisya jika.—Yoh. 8:54.

 8. Ana mpaka amanyilile chamtuli chakulinga champaka akole?

⁸ Asaguleje chakulinga chakusaka. Ana mpaka amanyilile chamtuli chakulinga champaka akole? Mpaka ŵawusye achakulungwa ŵa mumpingo mwawo, kapena jwakulolela dela jwawo kuti ŵasalile luso lwampaka alijiganye. Mwachisyasyo, naga jemanjajo ali ŵasalile kuti akusosekwa kuputila ngondo pa kaŵechete soni kajiganye kawo, ŵawusyeje yampaka atende kuti akombole kutenda yeleyo. Kaneko alimbichileje kuti ayikombole. Ana mpaka atende chamtuli yeleyi?

 9. Ana akusosekwa kutenda chichi kuti akwanilisye chakulinga chakwete?

⁹ Atendeje yakomboleka kuti akwanilisye yakulinga yawo. Tuwanichisye kuti akusaka ajiganyeje chenene. Mpaka alijiganye mwakusamala mnope kabuku kakuti Ajongolele pa Kaŵalanje Soni Kajiganye. Naga apochele mbali mu msongano wa mkati mwa wiki, mpaka amŵende m’bale jwakusaŵecheta chenene ngani kuti apikanile mbali jawo soni kwasalila mwakusosekwa kongolela. Akosecheleje mbali jawo mkanipaŵe, yeleyo mpaka yakamuchisye ŵandu kuti aloleje kulimbichila kwawo soni kuti ŵadalileje.—Mis. 21:5; 2 Akoli. 8:22.

10. Apeleche chisyasyo chakulosya mwampaka tujawulile pasogolo ni luso lyatukusaka kola.

¹⁰ Ana mpaka atende chichi naga chakulinga chawo chili chakuti akole luso lwakutenda chindu chine chakwe nambo chakusawusya? Akawujila munyuma. M’bale jwine lina lyakwe Garry jwalepelaga kuŵalanga chenene. Jwalakwe akusakumbuchila kuti lisiku line jwatesile sooni pajwalingagalingaga kuŵalanga pamisongano ja mpingo. Nambo jwalakwe jwalinjilelinjile kuti aŵalanjeje chenene. Jwalakwe akusaŵecheta kuti ligongo lya chikamuchisyo chajwapochele, apano akusakombola kuŵecheta ngani mu Nyumba ja Uchimwene, pamisongano jadela soni jachigawo.

11. Mwakulandana ni Timoteo, ana chichi champaka chitukamuchisye kuti tukombole kutenda yejinji pakumtumichila Yehofa?

¹¹ Ana Timoteo jwakombolaga kuŵecheta soni kwiganya chenene? Baibulo jangasala chilichose panganiji. Nambo ngatukukayichila kuti jwalakwe jwatendaga chenene mnope utumiki wakwe pajwapikanilaga malangiso ga Paulo. (2 Tim. 3:10) Mwakulandana ni yeleyi, naga nombe m’weji tukulingalinga konjechesya luso lwetu, tuchikombola kutenda yejinji pakumtumichila Yehofa.

12. Ana wawojo apatile umbone wamtuli ligongo lya masengo gakusakamula ŵane?

¹² Wosopewe tukusapindula ligongo lya masengo gakusakamula ŵane. Mwachisyasyo, patuli kuchipatala, tukusayamichila payiche achakulungwa ŵamumpingo ŵakusatumichila mu Komiti Jakuŵechetana ni Ŵachipatala kapena m’Magulu Gakusonda Ŵakulwala. Patusimene ni yakusawusya pa umi wetu, tukusayamichila naga achakulungwa ŵakusatuganichisya akutupikanila soni kutulimbikasya. Tukusasangalala naga mpayiniya jwatesile utumiki kwandaŵi jelewu akutama nawo patukutendesya lijiganyo lya Baibulo soni kutukamuchisya mwatukusosekwa kongolela. Abale ni alongo wosopeŵa akusasangalala pakutukamuchisya. Nombe m’weji mpaka tusangalale patukwakamuchisya ŵane. Yesu jwatite, “Kupeleka kukusampa upile mundu kulekangana ni kupochela.” (Mase. 20:35) Naga akusaka kuti atendeje chenene mbali syelesi kapena sine mpela syelesi ana chichi champaka chakamuchisye kuti akombole kutenda yeleyo?

13. Ana akusosekwa kumbuchila chichi pakukola chakulinga?

¹³ Akoleje chakulinga chisyesyene. Mwachisyasyo, mundu jwine mpaka aganisyeje kuti, ‘Ngusaka ndendeje yejinji mumpingo.’ Nambo mpaka yiŵe yakusawusya kumanyilila yampaka atende kuti akwanilisye chakulinga chelecho. Kombolekasoni mpaka ayiwoneje kuti nganaŵa akombwele kukwanilisya chakulingacho. Myoyo asaguleje chakulinga chakumanyika chenene soni chisyesyene. Mwine mpaka alembesoni chakulinga chawocho soni yampaka atende kuti achikwanilisye.

14. Ligongo chichi tukusasosekwa kuŵaga ŵakoseka kuchenga patukuliŵichila yakulinga?

¹⁴ Tuŵambalejesoni kwamba kuti kakaka pa chakulinga chetu. Tukuŵecheta yeleyi ligongo lyakuti nganitukola machili gakutendekasya kuti yindu yitendekwe mwatukusachila m’wejo. Kuti tupikanichisye yeleyi kwende tuganichisye ayi. Ndumetume Paulo jwakamuchisye pakutamilikasya mpingo wasambano ku Atesalonika. Mwangakayichila jwalakwe jwakwete chakulinga chakuti atameje kukoko kuti ŵakamuchisyeje Aklistu achimjakwe ŵasambanowo. Nambo ŵandu ŵakusisya ŵatendekasisye kuti Paulo asame mu msindamo. (Mase. 17:1-5, 10) Yikaŵe kuti Paulo jwakanilile kutama mu msindamo, nikuti achalongo achimjakwewo akasimene ni yakusawusya yejinji. Nambo Paulo nganawujila munyuma. Mmalo mwakwe jwajitichisye kuchengako. Pali papite ndaŵi, jwalakwe jwamtumisye Timoteo kuti akakamuchisye Aklistu ŵa ku Tesalonika kola chikulupi chakulimba. (1 Ates. 3:1-3) Kusala yisyene, Aklistu ŵa ku Tesalonika ŵasangalele mnope paŵayiweni kuti Timoteo jwaliji jwakusachilila mnope kwawula kumalo kujwasosechelaga.

15. Ana yindu yine mpaka yitulepelekasye chamtuli kukwanilisya yakulinga yetu? Apeleche chisyasyo.

¹⁵ Mpaka tulijiganye kutyochela pa yaŵasimene nayo Paulo ku Atesalonika. Mwine mpaka tusacheje kutenda utumiki wine wakwe nambo ligongo lya yindu yine ngayikukomboleka kuti tutende utumikiwo. (Jwak. 9:11) Naga mwelemu ni mwayiŵelele ni wawojo, alinje kusagula chakulinga chine champaka achikwanilisye mwangasawusya. Yeleyi ni yalyatesile liŵasa line lya m’bale ni mlongo Ted. Jemanjaji ŵalesile utumiki wa pa Beteli ligongo lyakulwalalwala. Nambo ligongo lyakuti ŵamnonyelaga Yehofa, ŵasosile matala gane gakonjechesya utumiki wawo. Chandanda ŵatandite upayiniya wakutamilichika. Kaneko ŵaŵichidwe kuŵa apayiniya ŵapadela soni M’bale Ted jwaliji jwakulolela dela jwakamuchisya. Kaneko ligongo lya winji wa yaka yaŵakwete, ngamkanakombolasoni kutumichila mpela jwakulolela dela. M’bale Ted ni ŵamkwakwe ŵamanyilile kuti kuli kwangakombolekasoni kutenda utumikiwu. Atamose kuti yakwayiye mnope, nambope ŵayiweni kuti mpaka amtumichileje Yehofa m’matala gane. M’bale Ted jwatite, “Tulijiganyisye kuti ngatukusosekwa kuliŵichila mtundu umo wa utumiki.”

16. Ana mpaka tulijiganye chichi pa Agalatiya 6:4?

¹⁶ M’weji nganitukola machili gakuchenga chilichose chachikutendekwa pa umi wetu. Myoyo tuŵambaleje ganisya kuti tukusaŵa ŵakusosekwa kwa Yehofa ligongo lya utumiki watukusatenda. Nambosoni tuŵambaleje kuwanichisya utumiki wetu ni wakusatenda achimjetu. Ŵamkwakwe Ted ŵasasile kuti, “Mundu jwangaŵaga jwakusangalala naga akusatamila kuwanichisya umi wakwe ni mwawuŵelele umi wa ŵane.” (Aŵalanje Agalatiya 6:4.) Chindu champaka chitukamuchisye chili kwambaga kulola mapesa gampaka tukombole kwatumichila ŵane soni kumtumichila Yehofa.c

17. Ana mpaka atende chichi kuti aŵajilwe utumiki?

¹⁷ Mpaka akombole kutenda yejinji pakumtumichila Yehofa naga akutama ni umi wangasaka yejinji soni naga akuŵambala ngongole syangasosekwa. Aliŵichileje yakulinga yamwanamwana yampaka yakamuchisye kuti akwanilisye yakulinga yekulungwakulungwa. Mwachisyasyo, naga chakulinga chawo chili chakuti chatende upayiniya wakutamilichika, mpaka atande kaje kutenda upayiniya wakamuchisya wandaŵi jelewu. Naga chakulinga chawo chili chakuti chaŵe mtumiki jwakamuchisya, apanopano mpaka atende chenene kumalilaga ndaŵi jelewu ali mkulalichila soni kuja kukwalola ŵakulwala ni ŵachekulupe ŵa mumpingo mwawo. Yachachilijiganya pelepo yichakamuchisya kuti awugule litala lyakonjechesya utumiki msogolo. Atendeje yiliyose yampaka akombole pa utumiki wuliwose wampaka apochele.—Alo. 12:11.

18. Mwakamulana ni chiwililicho, ana akulijiganya chichi kutyochela kwa Beverley?

¹⁸ Wosopewe mpaka tukombole kola yakulinga ya usimu mwangasamala kandu ya msingu wetu. Mwachisyasyo, agambe ganisya ya Mlongo Beverley jwakwete yaka 75. Mlongoju jwangakombolaga kwenda ligongo lya kulwala. Nambope jwalakwe jwalinganyisye yakuti akamuchisye nawo pakwaŵilanjila ŵandu ku Chikumbuchilo. Jwalinganyisye kuti chelechi chiŵe chakulinga chakwe. Mlongoju pajwakombwele kwanilisya chakulinga chakwechi jwasangalele mnope. Kulimbichila kwa mlongoju kwatendekasisye ŵane kuti nombe nawo alipelecheje mnope pa masengo gakulalichila. Yehofa akusayamichila mnope masengo gakusakamula abale ni alongo ŵetu ŵachikulile atamose kuti ŵangakombolaga kutenda yejinji ligongo lya yakusawusya yakusasimana nayo.—Sal. 71:17, 18.

19. Ana ni yakulinga yine yapi yausimu yampaka tukole?

¹⁹ Aliŵichileje yakulinga yampaka ayikwanilisye. Akoleje ndamo syasikusamsangalasya Yehofa. Alijiganyeje maluso gampaka gakamuchisye kuti atumichileje nago Mlungu soni gulu jakwe. Apateje matala gakwatumichila abale ni alongo.d Mpela muyaŵelele ni Timoteo, ni chikamuchisyo cha Yehofa, ‘ŵandu wosope chachiyiwona kuti umi wawo wa kutumichila ukuja msogolo.’—1 Tim. 4:15.