Asangalaleje Pakumpa Yehofa Yampaka Akombole

 1. Ana chichi chachikusatutendekasya kuŵa ŵakusangalala mnope?

YEHOFA akusasaka kuti tusangalaleje. Tukumanyilila yeleyi ligongo kusangalala jili ndamo jimo jawukusakoposya msimu weswela. (Agal. 5:22) Kupeleka kukusamtendekasya mundu kuŵa jwakusangalala mnope kupundana ni kupochela. Myoyo tukusasangalala mnope patukulipeleka pa masengo gakulalichila soni patukwakamuchisya abale ni alongo ŵetu mmatala gejinji.—Mase. 20:35.

2-3. (a) Mwakamulana ni Agalatiya 6:4, ana ni yindu yiŵili yapi yampaka yitukamuchisye kuti tuŵeje ŵakusangalala patukumtumichila Yehofa? (b) Ana chitukambilane chichi munganiji?

² Pa Agalatiya 6:4, ndumetume Paulo jwakolasile yindu yiŵili yampaka yitukamuchisye kuŵa ŵakusangalala. (Aŵalanje.) Chandanda, chakulinga chetu chiŵeje kumpa Yehofa yampaka tukombole. Naga tukumpa jwalakwe yampaka tukombole tuchiŵa ŵakusangalala. (Mat. 22:36-38) Chaŵili, tuŵambaleje kuliwanichisya ni ŵane. Chinga tukusakombola kutenda yindu chenene ligongo lyakola chilu chambone, majiganyo kapena ligongo lya luso lwatukwete, tukusosekwa kumyamichilaga Yehofa. Soni yiliyose yatukwete watupele jwalakwejo. Nambosoni, naga ŵane akusatenda chenene mu mbali sine sya utumiki kutupunda m’wejo, tusangalaleje ligongo jemanjajo akukamulichisya masengo lunda lwawo pakumchimbichisya Yehofa. Myoyo mmalo mwakupikisana nawo, tukusosekwa kulijiganya kwa jemanjajo.

³ Munganiji chitulole champaka chitukamuchisye patutengwiche ligongo lyakuyiwona kuti ngatukukombola kutenda yejinji pakumtumichila Yehofa. Chitulolesoni yampaka tutende kuti tukamulichisyeje masengo lunda lwatukwete, soni yampaka tulijiganye kwa ŵane.

 4. Ana chichi champaka chitutengusye? Apeleche chisyasyo.

⁴ Ŵajinji mwa m’weji nganituŵa tukombwele kutenda yejinji pakumtumichila Yehofa ligongo lya uchekulu kapena ligongo lya kulwala. Yeleyi ni yayamtendechele Mlongo Carol. Pandanda jwalakwe jwakwete upile wakuja kukulalichila kumalo kukwasosechelaga ŵakulalichila ŵajinji. Pandaŵijo jwatendesyaga majiganyo ga Baibulo gakwana 35 soni ŵakamuchisye ŵandu ŵane kwika pakulipeleka soni kubatisidwa. Kusala yisyene mlongoju yamjendelaga chenene mu utumiki. Nambo kaneko jwatandite kulwala mnope mwamti jwagambaga kutama. Jwalakwe jwatite, “Ngumanyilila kuti ligongo lya kulwala ngangukombola kutenda yindu yine mpela mwakutendela ŵane. Yeleyi yikusandendekasyaga kulikayichila mwamti ngusaliwona kuti ndili jwakulepela. Ligongo lyakuti nganimba ngombwele kutenda yiliyose yangusasaka kutenda, yikusandendekasyaga kuŵa jwakutenguka.” Mlongoju akusasaka kumtumichila Yehofa mwampaka akombolele. Kusala yisyene yeleyi ni yayili yakusosekwa mnope. Ngatukukayichila kuti Mlungu jwachanasa akusasangalala ligongo lyakuti mlongoju akusatenda yampaka akombole.

 5. (a) Ana tukusosekwa kumbuchila chichi naga tutengwiche ligongo lyakuti ngatukutenda yejinji? (b) Mwakamulana ni yiwuliliyi, ana m’baleju akupitilisya chamtuli kutenda yampaka akombole pakumtumichila Yehofa?

⁵ Naga ndaŵi sine tukusatenguka ligongo lyakuti ngatukukombola kutenda yejinji, tuliwusyeje kuti, ‘Ana Yehofa akusasaka kuti ndendeje chichi?’ Jwalakwe akusasaka kuti atendeje yampaka akombole. Tuwanichisye kuti mlongo jwa yaka ya m’ma 80 atengwiche ligongo lyakuti ngakukombola kulalichila mpela muŵatendelaga ali akwete yaka ya m’ma 40. Jwalakwe akuganisya kuti atamose kuti akutenda yampaka akombole nambope akuyiwona kuti yakutendayo ngayikumsangalasya Yehofa. Nambo ana yeleyi yili yisyene? Agambe ganichisya. Naga mlongoju pajwakwete yaka ya m’ma 40 jwatendaga yampaka akombole soni pakwete yaka ya m’ma 80 akutendape yampaka akombole, pelepa nikuti jwalakwe akutenda chenene. Naga tutandite kuganisya kuti ngatukutenda yejinji pakusaka kumsangalasya Yehofa, tukumbuchileje kuti Yehofajo ni jwakusasagula yindu yampaka yimsangalasye. Naga tukutenda yampaka tukombole, Yehofa chachitusalila kuti, ‘Mtesile chenene kwabasi.’—Alole Mateyu 25:20-23.

 6. Ana mpaka tulijiganye chichi kutyochela kwa Maria?

⁶ Yichiŵa yangasawusya kuŵa ŵakusangalala naga tukusaganichisya mnope yampaka tukombole kutenda mmalo mwaganichisya yindu yanganituŵa tukombwele kutenda. Aganichisye ya mlongo jwine lina lyakwe Maria. Jwalakwe akusalwala ulwele wawukusamtendekasya kuti akatendaga yejinji mu utumiki. Pandanda jwalakwe jwatengwiche mnope mwamti jwaliwonaga kuti ali jwangasosekwa. Nambo kaneko jwaganichisye ya mlongo jwine jwa mumpingo mwawo juŵaliji jwachigonele, mwamti jwayiweni kuti mpaka atendepo kandu. Jwalakwe jwatite, “Nalinganyisye yakuti lalichileje yalumo ni mlongojo kupitila pa foni soni mwakulemba yikalata. Ndaŵi jilijose patulalichile yimpepe ni mlongoju naŵaga jwakusangalala ligongo lyakumkamuchisya mlongoju.” M’wejisoni mpaka tusangalaleje mnope patukuganichisya yindu yampaka tukombole kutenda mmalo mwaganichisya yanganituŵa tukombwele kutenda. Nambi uli naga mpaka tukombole kutenda yejinji kapena tukutenda chenene pambali sine pakumtumichila Yehofa?

 7. Ana ndumetume Petulo jwapeleche malangiso gamtuli kwa Aklistu?

⁷ M’chikalata chakwe chandanda, ndumetume Petulo jwalimbikasisye wakulupilila achimjakwe kuti akamulichisyeje masengo mituka jawo pakwalimbikasya achimjawo. Petulo jwalembile kuti, “Jwalijose juŵapochele mtuka wakutyochela kwa Mlungu atumichileje nawo kwa achimjakwe.” (1 Pet. 4:10) Ngatukusosekwa kulepela kamulichisya masengo mtuka watukwete pakogopa kuti ŵane chatende jelasi kapena chatenguche nayo. Naga tukulepela kutenda yampaka tukombole ligongo lyakogopa muchapikanileje ŵane mumtima, nikuti tuchilepela kumpa Yehofa yampaka tukombole.

 8. Mwakamulana ni 1 Akolinto 4:6, 7, ligongo chichi tukusasosekwa kuŵambala kulikwesya patukukamulichisya masengo mtuka wetu?

⁸ Patukukamulichisya masengo mtuka wetu mwampaka tukombolele, tuŵambalejesoni kulikwesya. (Aŵalanje 1 Akolinto 4:6, 7.) Mwachisyasyo, mpaka akomboleje kutandisya majiganyo ga Baibulo. Akamulichisyeje masengo mtuka welewo. Nambo akusosekwa kukumbuchila kuŵambala kulikwesya. Tuwanichisye kuti akusangalala mnope ligongo lyakuti paŵaliji mu utumiki akombwele kutandisya lijiganyo lya Baibulo. Mwamti akusaka kuti akasalile nganiji achimjawo ŵa m’kagulu ka utumiki kawo. Payiche pa kagulu kawo ka utumiki kala, mlongo jwine akulondesya mwakusangalala kuti akombwele gaŵila magasini. Jwalakwe akombwele gaŵila magasini nambo wawojo atandisye lijiganyo lya Baibulo. Ana pelepa mpaka atende chichi? Yisyene kuti abale ni alongo ŵa mkagulu kawoko mpaka yalimbikasye kupikana yasimene nayo wawojo. Nambo mwine mpaka ajembecheye mpaka ndaŵi jine jambone kuti asale yasimene nayoyo. Kutenda yeleyi mpaka kukamuchisye kuti mlongo jwagaŵile magasini jula akaliwona kuti atesile yamnono. Chelechitu mpaka chiŵe chinonyelo chekulungwa. Nambo ngakusosekwa kuleka kutandikasya majiganyo ga Baibulo. Welewo uli mtuka wawo, akusosekwa awukamulichisyeje masengo basi.

 9. Ana tukusosekwa kamulichisya masengo chamtuli mituka jatukwete?

⁹ Ndaŵi syosope tukumbuchileje kuti lunda lwachipago lwampaka tukole ukusaŵa mtuka wakutyochela kwa Mlungu. Tukusosekwa kamulichisyaga masengo mtuka welewo pakwalimbikasyaga abale ni alongo ngaŵaga pakulikwesya. (Afil. 2:3) Naga tukukamulichisya masengo machili getu soni lunda lwetu pakutenda yakusasaka Mlungu tuchiŵa ŵakusangalala mnope. Kusangalalaku ngasikuyika ligongo lyakwapunda ŵane, nambo ligongo lyakuti tukukamulichisya masengo mtuka wetu pakumtumichila Yehofa.

10. Ligongo chichi nganiluŵa lunda kuliwanichisyaga ni ŵane?

¹⁰ Naga ngasamala, mundu mpaka atande kulandanya yindu yakusakombola kutenda ni yakusalepela ŵane. Mwachisyasyo, m’bale mpaka aŵe jwakombola kuŵecheta chenene ngani. Yeleyi ni yakusakombola jwalakwe. Nambo mumtima mwakwe mpaka aganisyeje kuti jwalakwe akusatenda chenene pakulandanya ni m’bale jwine jwakusalepela kuŵecheta chenene ngani. Nambo ndaŵi jijojo yili mkuti m’bale jwakusalaga kuŵecheta nganijo akusakombola kwapochela chenene achalendo, akusiŵajiganya chenene ŵanache ŵakwe kapena akusalipeleka mnope mu utumiki. Kusala yisyene tukusaŵa ŵakusangalala mnope kola abale ni alongo ŵajinji ŵakusakamulichisya masengo mituka jawo pakumtumichila Yehofa soni pakwakamuchisya ŵane.

11. Ligongo chichi tukusosekwa kukuya chisyasyo cha Yesu?

¹¹ Atamose kuti ngatukusasosekwa kuliwanichisyaga ni ŵane, nambope mpaka tulijiganye yejinji kutyochela ku yisyasyo ya ŵandu ŵakulupichika. Kuti tupikanichisye yeleyi kwende tulole chisyasyo cha Yesu. Atamose kuti jwalakwe jwaliji jwamlama, nambope mpaka tulijiganye kutyochela kwa jwalakwejo. (1 Pet. 2:21) Patukulingalinga kusyasya chisyasyo chakwe, tuchimtumichilaga chenene Yehofa nambosoni tuchilalichilaga mwakamula mtima.

12-13. Ana mpaka tulijiganye chichi kwa Mwenye Daudi?

¹² M’maloŵe ga Mlungu, tukusapata yisyasyo sya achalume soni achakongwe ŵakulupichika. Atamose kuti jemanjaji ŵaliji ŵangali umlama mpaka tujigalile chisyasyo chawo. (Aheb. 6:12) Aganichisye ya Mwenye Daudi juŵakolanjidwe ni Yehofa kuti ali ‘jwapamtima pakwe’ kapena mpela mwagakusaŵechetela ma Baibulo gane kuti “mundu jwakusasangalasya mnope.” (Mase. 13:22) Nambotu Daudi jwaliji jwangali umlama. Sonitu pandaŵi jine jwatesile yakulemwa yekulungwakulungwa. Mwangasamala kandu ya yeleyi, mpaka tulijiganye yejinji kwa jwalakwe. Tukuŵecheta yeleyi ligongo lyakuti Daudi paŵajamuchidwe nganalinga kuliŵichila kunyuma. Mmalo mwakwe, jwapochele upungu waŵampele, mwamti jwalitendele chanasa pa yindu yajwatesile. Yeleyi yatendekasisye kuti Yehofa amkululuchile.—Sal. 51:3, 4, 10-12.

¹³ Mpaka tulijiganye kutyochela kwa Daudi mwakuliwusya yiwusyo yakuyichisyayi. ‘Ana ngusatenda wuli pambochele upungu? Ana ngusajitichisya mwachitema yindu yandemwisye, kapena ngusalinga kuliŵichila kunyuma? Ana ngusajanguya kwajimba magambo ŵane? Ana ngusatenda yakomboleka kuti ngawilisyasoni yakulemwa yanatesile?’ Mpaka aliwusyesoni yiwusyo mpela yeleyi paŵalasile m’Baibulo yakwamba achalume soni achakongwe ŵakulupichika. Ana jemanjajo ŵasimene ni yakusawusya mpela yakusimana nayo wawojo? Ana ŵakwete ndamo syapi syambone? Aliwusyejesoni kuti ‘Ana mpaka ndende wuli kuti mbe mpela jwakutumichila jwa Yehofa jwakulupichikaju?’

14. Ana yisyasyo ya ŵakulupilila achimjetu mpaka yitukamuchisye chamtuli?

¹⁴ Tukusalijiganyasoni yejinji kutyochela kwa ŵakulupilila achimjetu chinga ali ŵachinandipile kapena ŵachikulile. Mwachisyasyo, ana mumpingo mwawo mwana ŵandu ŵane ŵakupilila yakusawusya mpela yilwele, kulagasidwa ni ŵa mwiŵasa mwawo kapena achimjawo? Ana jemanjaji akwete ndamo syambone syampaka asosekwe kujigalila? Kuganichisya chisyasyo chawo mpaka kutukamuchisye kupata matala gampaka gatukamuchisye kupilila yakusawusya yetu. Kusala yisyene tukusayamichila mnope ligongo lyakola yisyasyo ya ŵandu ŵakulupichika ŵa m’masiku agano yampaka tuyisyasye.—Aheb. 13:7; Yak. 1:2, 3.

15. Ana ndumetume Paulo jwapeleche malangiso gamtuli gampaka gatukamuchisye kuŵa ŵakusangalala patukumtumichila Yehofa?

¹⁵ Kuti ŵandu aŵeje ŵakamulana soni ŵamtendele mumpingo, jwalijose jwetuwe akusasosekwa kutenda yampaka akombole. Aganichisye ya Aklistu ŵa m’yaka 100 yandanda. Jemanjaji ŵakwete ma utumiki soni mituka jakulekanganalekangana. (1 Akoli. 12:4, 7-11) Nambo yeleyi nganiyatendekasyaga kuti apikisaneje kapena kulimbana. Mmalo mwakwe, Paulo jwaŵendile jemanjajo kuti atendeje yayasosekwaga kuti ‘alimbisye mpingo wele wawuli chilu cha Klistu.’ Paulo jwalembilesoni kuti, “Nipo naga chiŵalo chilichose chikusakamula masengo gakwe mwakwenela, nikuti chilu chosope chikusakula ni kulilimbikasya ni chinonyelo.” (Aef. 4:1-3, 11, 12, 16) Ŵandu ŵaŵatendaga yeleyi ŵalimbikasyaga mtendele soni mkamulano. Ndamo syelesi sikusawonekasoni m’mipingo jetu masiku agano.

16. Ana tukusosekwa kulingalinga kutenda chichi? (Ahebeli 6:10)

¹⁶ Tulinjelinjeje kuŵambala kuwanichisya yatukusatendaga ni yakusatenda ŵane. Mmalo mwakwe tulijiganyeje kutyochela kwa Yesu, soni tulinjelinjeje kusyasya ndamo syakwe. Tujigalileje yisyasyo ya ŵandu ŵakulupichika ŵakusiŵakolanga m’Baibulo soni ya ŵandu ŵane ŵa masiku agano. Pakutenda yiliyose yampaka akombole, akumbuchileje kuti Yehofa ‘ali jwakulungama. Ngasaliŵalila masengo gawo gaŵatesile.’ (Aŵalanje Ahebeli 6:10.) Myoyo apitilisyeje kuŵa ŵakusangalala pakumtumichila Yehofa, kwineku ali mkumanyilila kuti jwalakwe akusayamichila yiliyose yakusakombola kutenda pakusaka kumsangalasya.