Ana Baibulo Jikusasala Yamtuli Pangani Jakwasa Chitumbo?

Baibulo jangakamulichisya masengo maloŵe gakuti, “kwasa chitumbo” pakwamba yakuwulaga mwanache jwangapagwa. Nambope mavesi gane gakusalosya mwele Mlungu akusawuwonela umi wa mundu, kupwatikapo wa mwanache jwali m’chitumbo cha mamagwe.

Umi uli mtuka wakutyochela kwa Mlungu. (Genesesi 9:6; Salimo 36:9) Mlungu akusawuwona umi wa chindu chilichose kuti uli wakusosekwa, kupwatikapo wa mwanache jwali m’chitumbo cha mamagwe. Mwamti kuwulaga mwamele mwanache jwanganapagwe yili yakulandanasoni ni kuwulaga mundu.

Lilamusi lyele Mlungu ŵapele Aisalaeli lyasalaga kuti, “Ndaŵi jakumenyana achalume, ni ŵamo ŵachalumewo akwatuta ŵakongwe ŵana chilu, ni ŵakongwewo akwasanga chilucho, nambo pangali kuwulala kwine soni, ŵalume ŵamŵulesye ŵakongwewo, akwenela kulipila mtengo uliwose wutalamule wamkwawo, mwakwitichisyana ni achakulungwa ŵakulamula panganya. Nambo naga ŵakongwewo awulele, kulipila kwakwe tikuchiŵa umi kulipila umi.”—Ekisodo 21:22, 23.a

• Ana umi wa mundu ukusatanda chamtuli?

• Ana Mlungu mpaka amkululuchile mundu juŵajasile chitumbo?

• Ana kuli kulemwa kwasa chitumbo naga umi wa mayi kapena wamwanache uli pa ngosi?

Mlungu akusawuwona umi wa mundu kuti ukusatanda pa ndaŵi jele mayi ajigele msigo. Maloŵe ga Mlungu gakusasala kuti mwanache jwele nganapagwe alisoni mundu. Kwende tuganichisye yisyasyo yakuyichisyayi. Yisyasyoyi yikulosya kuti Mlungu jwangalekanganyaga pasikati pa umi wa mwanache jwali m’chitumbo ni mwanache jwapagwile.

• Mwakulongoleledwa ni msimu weswela, Mwenye Daudi jwamsalile Mlungu kuti, “Meso gawo gambweni mkanimbagwe.” (Salimo 139:16) Apatu Mlungu jwammanyililaga Daudi atamose jwaliji mkanapagwe.

• Mlungu jwamanyililaga kuti jwakulochesya Yelemiya chachikola udindo wakusosekwa, atamose kuti jwalakwe jwaliji mkanapagwe. Mlungu jwamsalile kuti, “Mkaninimgumbe mchitumbo mwa mama ŵenu, naliji ndili nam’manyilile kala. Mkanimpagwe naliji ndili namsagwile kala, namsagwile kuti mŵe jwakulochesya kwa ŵandu ŵamitundu josope.”—Yelemiya 1:5.

• Luka juŵalembile nawo Baibulo soni juŵaliji dokotala, jwakamulichisye masengo maloŵe ga Chigiliki gakuti “likandi” pakusala yamwanache jwele nganapagwe nambosoni jwagambile kupagwa kwene.—Luka 1:41; 2:12, 16.

Elo mpaka amkululuchile. Mlungu mpaka ŵakululuchile ŵandu ŵaŵajasile chitumbo. Nambo naga ŵachenjile ni kuwuwonaga umi mpela mwakusawuwonela Mlungu, ngakusosekwape kulijimba magambo. Baibulo jikusati. “AMBUJE ali ŵachanasa ni ŵambone mtima . . . Mpela kungopoko lyuŵa kukutalikangana ni kungapilyo lyuŵa, myoyo akusatyosya yakulemwa yetu kuti yiŵe kwakutalikangana ni uwe.”b (Salimo 103:8-12) Mlungu akusiŵakululuchila ŵandu wosope ŵatesilepo ulemwa, kupwatikapo ŵaŵatyosisye chitumbo naga apitikwiche mtima.—Salimo 86:5.

Mwakamulana ni yajikusasala Baibulo pakwamba ya mwanache jwanganapagwe, mpaka kuŵe kulemwa naga akwasa chitumbo ligongo lyakuti asalilidwe ni adokotala kuti umi wa mwanachejo kapena mayi chiwuŵe pangosi.

Nambi uli pandaŵi jakuŵeleka pasikamanikwe yakusawusya yine yele akusosekwa kusagula kuti akulupusye umi wa mwanache kapena mayi? Naga yitendekwe yeleyi jwalijose akusosekwa kusagula jika kuti akulupusye umi wakwe kapena wamwanache.