Tumpikanileje Yesu Ndaŵi Syosope

1-2. (a) Ana ŵandumetume ŵatatu ŵa Yesu ŵalamwile kuti atendeje chichi, soni ana jemanjaji ŵatesile chichi? (b) Ana mungani ajino chitukambilane chichi?

PASAKA jwa mu 32 C.E. ali amasile, ndumetume Petulo, Yakobo, soni Yohane ŵayiweni yindu yakusimonjesya. Jemanjaji paŵaliji penani pa litumbi lya Helimoni, Yesu jwachenjile kawoneche kakwe. Baibulo jikusati, “Ngope jakwe jaŵasile mpela lyuŵa, soni yakuwala yakwe yagambile kuti mbee, kuswejela.” (Mat. 17:1-4) Ali mkati mwakulola yeleyi, ŵandumetumewo ŵapikene maloŵe ga Mlungu gakuŵecheta kuti, “Aju ni mwanangu jungusinamnonyela, nipo ngusasangalala najo mnope. Mumpikanileje.” (Mat. 17:5) Yaŵatendaga ŵandumetume ŵatatuŵa paumi wawo yalosyaga kuti ŵampikanilaga Yesu. M’wejisoni tukusosekwa kujigalila chisyasyo chawo.

² Mungani jipite jila, twalijiganyisye kuti kupikanila maloŵe ga Yesu kukusagopolela kuleka kutenda yindu yine yakwe. Mungani ajino chitukambilane yindu yiŵili yaŵasasile Yesu kuti tukusosekwa kutenda.

 3. Mwakamulana ni Mateyu 7:13, 14, ana tukusosekwa kutenda chichi?

³ Aŵalanje Mateyu 7:13, 14. Yesu jwakolasile yipata yiŵili yakwawula ku matala gaŵili gakulekangana. Litala “lyangasawusya kwendamo” soni litala “lyakusawusya” kwendamo. Nambo pangali litala lyatatu. Tukusosekwa kusagula jika litala lyatukusosekwa kwendamo. Kusagula kutenda yeleyi chili chindu chakusosekwa mnope paumi wetu, ligongo kuti chitupate umi wangamala yikudalila litala lyatusagwile kwendamo.

 4. Ana litala “lyangasawusya kwendamo” mpaka alilondesye chamtuli?

⁴ Ndaŵi syosope tukusosekwa kumbuchilaga kulekangana kwa matala gaŵiliga. Ŵandu ŵajinji akwenda m’litala “lyangasawusya kwendamo” ligongo ŵangalaga pakwendamo. Chakutesya chanasa chili chakuti asagwile kupitilisya kwenda m’litalali ni kwakuyaga ŵandu ŵajinji ŵakwenda mwelemo. Jemanjaji ŵangamanyililaga kuti Satana ni jwakwatendekasya ŵandu kuti ajendeje m’litali, soni kuti likusalongolelaga ŵandu ku chiwa.—1 Akoli. 6:9, 10; 1 Yoh. 5:19.

 5. Ana ŵandu ŵane atesile yamtuli kuti alimanyilile litala “lyakusawusya” kwendamo ni kutanda kwenda m’litalali?

⁵ Mwakulekangana ni litala “lyangasawusya kwendamo,” litala linelyo lili “lyakusawusya” kwendamo, soni Yesu jwasasile kuti ŵandu ŵakuŵalanjika ni ŵakwendamo. Ligongo chichi? Chakusangalasya chili chakuti, mundime jakuyichisya Yesu jwakalamwisye ŵakumkuya ŵakwe yakwamba ŵakulochesya ŵawunami. (Mat. 7:15) Ŵandu ŵane akusasala kuti pana dini masawusande gejinji, soni syejinji mwa dinisi sikusasala kuti sikusajiganya yisyesyene. Ligongo lyakuti kwana dini syejinji, yitendekasisye kuti ŵandu ŵajinji akamanyililaga kuti kwana litala lyakwawula ku umi wangamala. Nambotu ŵandu mpaka alipate litalali. Yesu jwatite, “Naga mkuyitenda yinamjiganyisye une, nditu jemanja mli ŵakulijiganya ŵangu, timchichimanyilila chakuwona, ni chakuwonacho tichichimgopola jemanja.” (Yoh. 8:31, 32) Yili yakusangalasya ligongo lyakuti jemanja nganiŵakuya ŵandu ŵajinji, mmalo mwakwe ŵasagwile kulijiganya usyesyene. Ŵatandite kulijiganya mnope Maloŵe ga Mlungu kuti amanyilile yakusasaka jwalakwe kuti tutendeje, soni ŵatandite kupikanila yakusajiganya Yesu. Yine mwa yindu yaŵalijiganyisye yaliji yakuti, Yehofa akusasaka kuti tuŵambaleje yijiganyo ya dini syaunami soni kuŵambala kutenda nawo maholide gakwayana ni milungu jaunami. Ŵalijiganyisyesoni kuti kutenda yindu yakusasaka Yehofa soni kuleka kutenda yindu yakusayiŵengaga jwalakwe mpaka kuŵe kwakusawusya. (Mat. 10:34-36) Komboleka kuti yaliji yakusawusya kuti achenje yindu yeleyi paumi wawo. Nambo ŵatesile yakomboleka kuti achenje pakusaka kwasangalasya Atati ŵawo ŵakwinani. Kusala yisyene jwalakwe akusiŵanyadila mnope.—Mis. 27:11.

 6. Mwakamulana ni Salimo 119:9, 10, 45, 133, ana chichi champaka chitukamuchisye kuti tupitilisye kwenda pa litala lyakusawusya?

⁶ Ana patutandite kwenda m’litala lyakusawusya chichi champaka chitukamuchise kuti tupitilisye kwenda m’litalali? Kwende tukambilane chisyasyo achi. Mmadela gane akusaŵika yisyano mungulugulu msewu wawupitile m’matumbi ni chakulinga chakuti galimoto jikagwila kwisimbo. Pangali dalayifa jwampaka adandawuleje kuti yisyanoyi yikumlepelekasya gwila kwisimboko. Malamusi ga Yehofa gagakusasimanikwa m’Baibulo gali mpela yisyano yeleyi. Malamusiga gakusatukamuchisya kuti tupitilisyepe kwenda m’litala lyakusawusyali.—Aŵalanje Salimo 119:9, 10, 45, 133.

 7. Ana ŵachinyamata akusosekwa aliwoneje chamtuli litala lyakusawusya kwendamo?

⁷ Ŵachinyamata, ana ndaŵi sine akusalipikana kuti malamusi ga Yehofa gali gakusawusya? Satana akusasaka kuti aganisyeje myoyo. Jwalakwe akusasaka kuti jemanja mkumbileje kutenda yindu yakusatenda ŵandu ŵakwenda pa litala lyangasawusya kwendamo. Satana mpaka akamulichisye masengo yakusatenda achimjawo ŵa kusukulu, kapena yindu yayiweni pa intaneti, pakwatendekasya kuganisya kuti achimjawo akwajima yambone. Satana akusasaka kuti jemanja mganisyeje kuti malamusi ga Yehofa gakumtendekasya kuti mkasangalalaga mnope.b Nambo mkusosekwa kumbuchila ayi, Satana jwangasaka kuti ŵandu ŵakwenda m’litala lyakwe amanyilileje yayikwajembecheya kusogolo. Mwakulekangana ni yeleyi, Yehofa ŵasalile jemanja mwakupikanika chenene yindu yachachatendela kusogolo ŵandu ŵakwenda m’litala lyakwawula ku umi.—Sal. 37:29; Yes. 35:5, 6; 65:21-23.

 8. Ana mpaka alijiganye chichi kwa Olaf?

⁸ Aganichisye yampaka alijiganye pa yindu yaŵasimene nayo jwachinyamata jwine lina lyakwe Olaf.c Achimjakwe ŵa kusukulu ŵamkanganichisyaga kuti atendeje ndamo syakusakala. Jwalakwe paŵasalile achimjakwewo kuti ŵa Mboni sya Yehofa akusakuya ndamo syambone sya m’Baibulo, asikana ŵane ŵa mkalasi mwakwe ŵatandite kumlagasya mnope kuti agone najo. Nambo Olaf nganakunda kuti yeleyi yitendekwe. Nambotu ngaŵa kuti jwalakwe jwagambile kusimana ni chakusawusya chichichi. Jwalakwe jwatite, “Atichala ŵangu ŵalimbikasyaga kuti ndende majiganyo gapenani, ni chakulinga chakuti ŵandu anjimbichisyeje mnope. Ŵasalilesoni kuti naga ngangutenda majiganyoga yindu nganiyiŵa yinjendele chenene.” Ana chichi chachamkamuchisye Olaf kuti akombole kulimbana ni yakusawusya yosopeyi? Jwalakwe jwasasile kuti, “Natandite kamulana mnope ni abale ni alongo ŵa mumpingo mwangu. Jemanjaji ŵaliji mpela ŵamwiŵasa mwangu. Natanditesoni kulijiganya mnope Baibulo. Panalijiganyaga mnope, ni panayiwonagasoni kuti welewo uli usyesyene. Yakuyichisya yakwe nasagwile kuti namtumichileje Yehofa.”

 9. Ana ŵandu ŵakusasaka kupitilisya kwenda palitala lyakusawusya akusasosekwa kutenda chichi?

⁹ Satana akusasaka kuti wawojo aleche kwenda m’litala lyakwawula ku umi wangamala. Jwalakwe akusasaka kuti wawojo ajendeje yimpepe ni ŵandu ŵakwenda m’litala lyangasawusya kwendamo lyalikwawula “kuchonasiko.” (Mat. 7:13) Nambope, tuchipitilisya kwenda pa litala lyakusawusya naga tukumpikanila Yesu ndaŵi syosope soni naga tukusaliwona litalali kuti likusatuchenjela. Sambano kwende tulole chindu chine chaŵasasile Yesu kuti tutendeje.

10. Mwakamulana ni Mateyu 5:23, 24, ana Yesu jwasasile kuti tutendeje chichi?

¹⁰ Aŵalanje Mateyu 5:23, 24. Pelepa, Yesu jwasasile chindu chiŵasosekwaga kutenda Ayuda. Aganichisye ya mundu jwasigele panandi kuti apeleche mbopesi kunyumba ja Mlungu. Naga mundujo akukumbuchila kuti akwete magongo ni mlongo mjakwe, jwasosekwaga kuleka mbopesijo ni ‘kwawula.’ Ligongo chichi jwasosekwaga kutenda yeleyi? Ligongo lyakuti papali chindu chakusosekwa mnope chakuti atende mkanaŵe kupeleka kwa Yehofa mbopesi jakwejo. Yesu jwasasile mwakupikanika chenene kuti chandanda “mkatande kaje kwilana ni mlongo mjenujo.”

11. Alondesye yaŵatesile Yakobo kuti ajilane ni Esawu.

¹¹ Mpaka tulijiganye yindu yakamuchisya pangani ja kwilana ni ŵane kutyochela kwa Yakobo. Jwalakwe ali atemi kumalo kuŵatilile kwa yaka chiŵandika 20, Mlungu ŵamlamwile jwalakwe kupitila mwa lilayika kuti awujile kumangwakwe. (Gen. 31:11, 13, 38) Nambo papali chakusawusya. Esawu juŵaliji mkulugwe jwasakaga kumwulaga Yakobo. (Gen. 27:41) Jwalakwe “ŵajogwepe mnope mwamti ŵajasile mtima” soni jwaganisyaga kuti mkulugwe jula ali chiŵela jwakutumbila. (Gen. 32:7) Ana Yakobo jwatesile chichi pakusaka kwilana ni mkulugwe jula? Chandanda, jwapopesile kwa Yehofa ni kumsalila nganijo. Kaneko, jwamtumichisye mituka Esawu. (Gen. 32:9-15) Pambesi pakwe, pajwasimene meso ni meso, Yakobo jwatesile yindu yakulosya kumchimbichisya Esawu. Jwalakwe jwatindiŵele pameso pa Esawu kwa maulendo gakwana 7. Ligongo lya kulinandiya soni ulemu waŵalosisye, Yakobo jwakombwele kuŵa pamtendele ni mlongo mjakwe.—Gen. 33:3, 4.

12. Ana tukulijiganya chichi pa chisyasyo cha Yakobo?

¹² Yaŵatesile Yakobo pakosechela kusimana ni Esawu soni yaŵatesile ali asimene, yikutujiganya chindu chikusosekwa mnope. Mwakulinandiya Yakobo ŵamŵendile Yehofa kuti amkamuchisye. Kaneko, jwalakwe jwatesile yindu mwakamulana ni yaŵamŵendile Yehofa mwakutenda yakakombwele kuti ajilanesoni ni Esawu. Ŵanduŵa paŵasimene pampepe, Yakobo nganakangana ni Esawu pakwamba ya juŵalemwisye soni jwanganalemwa. Chakulinga cha Yakobo chaliji kwilana ni mlongo mjakwejo. Ana mpaka tumsyasye chamtuli Yakobo?

13-14. Ana tukusosekwa kutenda chichi naga tumleŵele Mklistu mjetu?

¹³ Naga tukusaka kwenda pa litala lyakwawula ku umi wangamala tukusosekwa kuŵa pamtendele ni achalongo achimjetu. (Alo. 12:18) Ana tukusosekwa kutenda chichi patuyimanyi kuti tumleŵele Mklistu mjetu? Mwakulandana ni Yakobo, tukusosekwa kupopela kwa Yehofa mwakutyochela pasi pa mtima. Mpaka tumŵende jwalakwe kuti atukamuchisye kuŵa pamtendele ni mlongo mjetujo.

¹⁴ Tukusosekwasoni kuganichisya yatukusosekwa kutenda. Mpaka tuliwusye yiwusyo mpela yakuti, ‘Ana ndili jwakoseka kupepesya soni kusala mwakulinandiya kuti nalemwisye, ni kuŵasoni pamtendele? Ana Yehofa soni Yesu mpaka apikane wuli naga ngulingalinga kuŵa pamtendele ni m’bale kapena mlongo?’ Kwanga kwetu pa yiwusyo yeleyi mpaka kutulimbikasye kupikanila maloŵe ga Yesu soni kutenda yindu mwakulinandiya kuti tukajilane ni mlongo mjetu. Naga tukutenda yeleyi nikuti tukusyasya yaŵatesile Yakobo.

15. Ana kamulichisya masengo mfundo ja pa Aefeso 4:2, 3 mpaka kutukamuchisye chamtuli kwilana ni mlongo mjetu?

¹⁵ Agambe ganisya yayikatendekwe yikaŵe kuti Yakobo jwalimbene ni Esawu pakwamba juŵalemwisye soni jwanganalemwa. Yikaŵe kuti yatendekwe yeleyi komboleka ngamkanalekangana chenene. Patukwawula kwa mlongo mjetu kuti tukamasye kutindana nganisyo tukusosekwa kutenda yindu mwakulinandiya. (Aŵalanje Aefeso 4:2, 3.) Baibulo jikusasala kuti, “Mlongo mjetu jwaleŵeledwe akusapunda msinda wakulimba, soni pana kangana kwakukusaŵa mpela chitela chakuwugalila pa chipata cha sanja jakutama.” (Mis. 18:19, NWT.) Naga tukumpepesya mlongo mjetujo, mpaka yimkamuchisye kuti ajilanesoni ni m’weji.

16. Ana ni chindu chine chapi chatukusasosekwa kuchiganichisya? Ligongo chichi tukusosekwa ganichisya yeleyi?

¹⁶ Tukusosekwasoni ganichisya mwakusamala yindu yatukusaka kuja kuŵecheta soni mwampaka tukaŵechetele. Patuyiweni kuti tukoseche chenene mpaka tukamyichile mundu jutwamleŵelejo tuli tukwete chakulinga chakusaka kumkamuchisya kuti tuŵe najosoni pamtendele. Jwalakwe mpaka akomboleche kutuŵechetela yindu yampaka yitupweteche. Naga yeleyi yili yitendekwe, mpaka yiŵe yangasawusya kutumbula kapena kutanda kuliŵichila kunyuma. Nambo kutenda yeleyi nganikuŵa kumasisye nganijo mwamtendele. Akumbuchileje kuti kutamilikasya mtendele ni mlongo mjawo kuli kwakusosekwa mnope kupunda kwimbana magambo kuti jwakulemwa amanyiche.—1 Akoli. 6:7.

17. Ana akulijiganya chichi pa chisyasyo cha M’bale Gilbert?

¹⁷ M’bale jwine lina lyakwe Gilbert akusalingalinga kutama mwamtendele ni ŵane. Jwalakwe jwatite, “Natindene nganisyo ni mwanache jwangu jwamkongwe. Kwa yaka yiŵili, nalingaga kambilana najo mwakulinandiya ni chakulinga chakuti tujilanesoni.” Ana m’baleju jwatesilesoni chichi? Jwalakwe jwatite, “Ndaŵi jilijose jangukosechela kuja kukuŵechetana ni mwanacheju, napopelaga kuti ngaja kutumbila ni maloŵe galigose gakupweteka gampaka akambechetele. Nasosekwaga kuŵa jwakoseka kumkululuchila. Nalijiganyisye kuti ngangusosekwa kuliŵichila kunyuma, soni namanyililaga kuti udindo wangu uli kutamilikasya mtendele.” Ana yakuyichisya yakwe yaliji yamtuli? M’baleju jwatite, “Apano ngusasangalala mnope ligongo ndili pamtendele ni ŵandu wosope ŵa mwiŵasa mwangu.”

18-19. Ana tukusosekwa kulingalinga kutenda chichi naga tumleŵele mundu jwine? Ligongo chichi tukusosekwa kutenda yeleyi?

¹⁸ Ana ni chindu chine chapi chakusosekwa kutenda payimanyi kuti amleŵele Mklistu mjawo? Akusosekwa kupikanila maloŵe ga Yesu gakwamba kutamilikasya mtendele. Amsalileje Yehofa nganijo, soni adalileje msimu wakwe weswela kuti wakamuchisye kutamilikasya mtendele. Naga akutenda yeleyi, chachiŵa ŵakusangalala, soni chachilosya kuti akusampikanila Yesu.—Mat. 5:9.

¹⁹ Tukusasangalala mnope kuti Yehofa ŵatupele malangiso gambone kupitila mwa Yesu Klistu jwali “mtwe wa mpingo.” (Aef. 5:23) Mwakulandana ni ndumetume Petulo, Yakobo, soni Yohane, m’wejisoni tukusosekwa kulingalinga ‘kumpikanila’ Yesu. (Mat. 17:5) Tulijiganyisye mwampaka tutendele yeleyi mwa kwilanasoni ni Aklistu achimjetu ŵatwaleŵele. Naga tukutenda yeleyi, tuchiŵa ŵakusangalala apano, soni tuchisangalala mnope kusogoloku.