Yesu ‘Akutamilisya Chilungamo pa Chilambo Chapasi’

1, 2. Ana ni pa chakutendekwa chapi pajwatumbile Yesu, soni ligongo chichi?

YESU jwakalipe mnope soni yaliji yakupikanika kuti jwalakwe akalipe myoyo. Yili yakusawusya kuganichisya kuti Yesu mpaka akalipe ligongo jwaliji jwakuwusimana mtima. (Mateyu 11:29) Jwalakwe jwaliji jwangatumbilatumbila mwamti naga atumbile, kutumbila kwakwe kwaliji kwachilungamo.a Nambo ana chichi chachatendekasisye mundu jwakuwusimana mtimaju kutumbila? Lyaliji ligongo lyakuti papali ŵandu ŵaŵatendaga yindu yangali chilungamo.

² Nyumba jakulambilila ja ku Yelusalemu jaliji jakusosekwa kwa Yesu. Pachilambo chosope, nyumbaji jaliji malo geswela gakulambililapo Atati ŵakwe ŵakwinani. Ayuda ŵakutyochela mu yilambo yakulekanganalekangana ŵayikaga kukulambila kweleku. Atamose ŵandu ŵanganaŵa Ayuda nambo ŵaŵamjogopaga Mlungu ŵayikaga kunyumba ja Mlunguji. Ŵalinganyichisye malo kuti ŵandu weleŵa alambililejeko. Nambo kundanda kwa utumiki wakwe, Yesu jwajinjile m’nyumbaji ni jwayiweni yindu yanganiyimsangalasya. Nyumbaji jasandwiche kuŵa malo gakusumichisya malonda m’malo mwakuŵa malo gakulambilila. M’nyumbaji mwagumbele ŵandu ŵamalonda soni ŵakuchenga mbiya. Ana ungali chilungamowo waliji papi? Kwa jemanjaji, nyumba ja Mlunguji jagambile kuŵa mpela malo gakwajiŵilila ŵandu. Chamtuli?—Yohane 2:14.

3, 4. Ana ni yindu yangali chilungamo yapi yayatendekwaga pa nyumba ja Yehofa, soni ana Yesu jwatesile chichi?

³ Achimlongola ŵa dini ŵalamwile kuti paŵeje mbiya ja mtundu umo jakomela msongo wa panyumba ja Mlungu. Achalendo ŵasosekwaga kuchenga mbiya syawo kuti apate mbiya sya mtundu welewu. Myoyo, ŵandu ŵakuchenga mbiya ŵayikene pakuŵika matebulo gawo mkati mwa nyumbaji ni kwalipisyaga ŵandu ŵakusaka kuchenga mbiya. Nombe ŵandu ŵaŵasumisyaga yinyama panyumbaji ŵapataga mbiya syejinji. Achalendo pasumile yinyama yakupelechela mbopesi kwa jwamalonda jwa mumsinda, achakulungwa ŵa panyumbaji ŵajikanaga kuti yaliji yangaŵajilwa kupelechela mbopesi. Nambo naga asumile panyumba ja Mlungu, ŵajijitichisyaga. Ŵamalondaŵa ŵasumisyaga yinyamayi mwakatala ligongo lyakuti ŵanduŵa kwaliji kwangali kwine kwakasumile.b Kweleku kwaliji kwiŵa kwekulungwa mnope.

⁴ Yesu ngamkanakundilila ndamo jangali chilungamoji. Jeleji jaliji nyumba ja Atatigwe. Myoyo, jwalakwe jwalinganyisye chikoti changonji ni jwasitopwele ng’ombe soni ngondolo m’nyumbamo. Kaneko jwapite paŵaliji ŵakuchenga mbiya ni ŵapikwisye matebulo gawo. Agambe ganisya kuti akusiwona mbiya syejinji sili mkugwila pasi. Mwawukali jwalamwile achalume ŵaŵasumisyaga ngunda kuti, “Asikoposye amuno ngundasyo!” (Yohane 2:15, 16) Pangali mundu jwakakombwele kulimbana ni mundu jwakulimba mtimaju.

5-7. (a) Pakuŵa Yesu jwaliji kwinani mkanaŵe mundu, ana yamkamuchisye chamtuli kuŵa jwachilungamo, soni ana mpaka tulijiganye chichi pa chisyasyo chakwe? (b) Ana Klistu alimbene chamtuli ni yindu yangali chilungamo yakwayana ni ulamusi soni lina lya Yehofa?

⁵ Mkupita kwa ndaŵi ŵamalonda ŵala ŵawujilesoni. Panyuma pa yaka yitatu, Yesu jwakamwile maloŵe ga Yehofa msyene gakwajamuka ŵandu ŵaŵajisandwisye nyumba ja Yehofa kuŵa “mbanga jakuŵamo ŵawiyi.” (Mateyu 21:13, NWT; Yelemiya 7:11) Yisyene, Yesu ali ayiweni yindu yangali chilungamo soni kuti ŵandu akusakasya nyumba ja Mlungu, jwalakwe yamsakalisye mpela mwayasakalichisye Atatigwe. Yeleyi ngayikutusimonjesya. Kwa yaka yejiji, Yesu jwajiganyidwe ni Atatigwe ŵakwinani. Yakuyichisya yakwe, jwalakwe jwachiwonaga chilungamo mpela mwakusachiwonela Yehofa. Myoyo, naga tukusaka kumanyilila chenene ndamo ja Yehofa ja chilungamo, tukusosekwa kuganichisya mnope ya chisyasyo cha Yesu Klistu.—Yohane 14:9, 10.

⁶ Mwanache jwa Yehofa jwapali pandaŵi jele Sanata mwangali chilungamo jwasalaga kuti Yehofa Mlungu ali jwaunami soni pajwasisyaga ulamusi wakwe. Yaŵaŵechete Sanatayi waliji unami wekulungwa. Mwanache jwa Mlunguju jwapikenesoni Satana ali mkusala kuti pangali mundu jwampaka atumichile Yehofa ligongo lyakumnonyela. Unami welewu mwangakayichila wampweteche Mwanache jwakunonyela chilungamoju. Komboleka jwasangalele mnope ali apikene kuti chatende mbali jekulungwa mnope pakutyosya unami welewu. (2 Akolinto 1:20) Ana akatesile uli yeleyi?

⁷ Mpela mwatwalijiganyisye mu Mtwe 14, Yesu Klistu jwajanjile unami wa Satana pangani jakwamba kukulupichika kwa yakupanganyikwa ya Yehofa. Yajwatesile Yesuyi yichikamuchisya kuti lina lya Mlungu liswejele soni kuti ŵandu chasimichisye kuti ulamusi wa Yehofa uli wakuŵajilwa. Mpela jwakulongolela jwa Yehofa, Yesu chachitamilikasya chilungamo cha Mlungu mu chilengedwe chosope. (Masengo 5:31) Umi wakwe wa pachilambo chapasi walosyagasoni chilungamo cha Yehofa. Pakwamba ya jwalakwe Yehofa jwatite, “Tinjimpa jweleju msimu wangu, nipo tachilalichila ya chilungamo kwa ŵandu mitundu jine.” (Mateyu 12:18) Ana Yesu jwakwanilisye chamtuli maloŵega?

8-10. (a) Ana malamusi gapakamwa ga achimlongola Ŵachiyuda gatendekasyaga uli ŵandu ŵanganaŵa Ayuda soni achakongwe kuŵa ŵangasosekwa? (b) Ana chilamusi chapakamwa chatendekasisye uli lisiku lyakupumula kuŵa lyakusitopesya?

⁸ Yesu jwanonyelaga Chilamusi cha Yehofa soni jwatamaga mwakamulana ni chilamusicho. Nambo achimlongola ŵadini ŵa mundaŵi jakwe ŵachisokonasisye. Kwa jemanjaji, Yesu jwatite, “Mkwete likungu jemanja achiŵalimu ŵa malamusi ni Afalisi, ŵandu ŵaunami! . . . Jemanja mkusimnyosya yindu yayikulungwa ni yakusoswekwa yisyesyene pa malamusi ga Mlungu, mpela kulamula mwachilungamo soni, kutenda chanasa, ni kuŵa ŵakulupichika.” (Mateyu 23:23) Yisyene, achimlongola ŵadini ŵeleŵa nganasalaga chenene chachili “chilungamo.” Mmalo mwakwe, ŵatendekasyaga kuti chilungamo cha Mlungu chiŵe changamanyika. Ana ŵatendaga chamtuli yeleyi? Kwende tulole yisyasyo yamnono.

⁹ Yehofa ŵalamwile ŵandu ŵakwe kuti akakamulanaga ni ŵandu ŵamitundu jine ŵaŵasyungulile. (1 Ayimwene 11:1, 2) Nambope, achimlongo ŵadini ŵakuyipundasya ŵalimbikasyaga ŵandu kuti ŵawoneje wosope ŵanganaŵa Ayuda kuŵa ŵakunyalaya. Buku jatujisasile kundanda jila jakwetesoni lilamusi ali, “Mkaleka ng’ombe pa nyumba ja ŵandu ŵamitundu jine ligongo lyakuti akusakayichilidwa kuti akugona ni yinyama.” Kuŵa ni nganisyo syelesi pa wosope ŵanganaŵa Ayuda nganichiŵa chilungamo soni yaliji yakutindana ni Chilamusi cha Mose. (Lefitiko 19:34) Malamusi gane gakupanganyidwa ni ŵandu gatendekasyaga achakongwe kuwoneka kuŵa ŵakutuluka. Chilamusi chapakamwa chasalaga kuti naga jwamkongwe akusa kwenda yimpepe ni ŵamkwawo, ŵakuyeje kunyuma kwawo. Jwamlume nganaŵajilwaga kuŵecheta ni jwamkongwe pagulu, atamose aŵe ŵamkwakwe. Mpela mwayaŵelaga kwa achikapolo, jwamkongwe nganasosekwaga kupeleka umboni kukoti. Papalisoni lipopelo lyaŵapelekaga achalume lyakumyamichila Mlungu ligongo lyakuti nganiŵapanganya kuŵa achakongwe.

¹⁰ Achimlongola ŵadini ŵachisilile Chilamusi cha Mlungu pasi pa malamusi gakupanganyidwa ni ŵandu. Mwachisyasyo, lilamusi lyakwayana ni lisiku lyakupumula lwalekasyaga kamula masengo pa lisikuli. Lisiku lyakupumula lyaliji lyakulambila, kutenda yindu yine yausimu soni kupumula. Nambo Afalisi ŵalitendekasisye lilamusili kuŵa lyakusitopesya. Ŵalisagulile jika gagaliji “masengo,” ganganasosekwaga kukamula pa lisikuli. Jemanjaji ŵasasile kuti papali masengo 39, kupwatikapo kugowola kapena kusakula yinyama. Yeleyi yatendekasisye kuti papagwe yiwusyo yejinji. Naga mundu awuleje ngunguni, ni kuti asakwileje yinyama? Naga mundu akutikita m’miyala tiligu kuti alye, ni kuti akugowola? Naga mundu amposisye jwakulwala, ni kuti akamwileje masengo? Yiwusyo yeleyi yajanjidwaga m’malamusi gangachenga soni gakupikanika chenene.

11, 12. Ana Yesu jwasisisye chamtuli Afalisi ligongo lya yijiganyo yawo yangaŵa ya m’Malemba?

¹¹ Muyakutendekwa mpela yeleyi, ana Yesu ŵakamuchisye chamtuli ŵandu kupikanichisya chachili chilungamo? Kupitila mu yaŵajiganyaga soni muŵatamilaga pa umi wakwe, jwalakwe jwasisisye achimlongola ŵadini. Chandanda kwende tulole yaŵajiganyaga. Mwangapita mumbali, jwalakwe jwajamwiche jemanajaji ligongo lya malamusi gaŵapanganyisye. Jwalakwe jwatite, “Maloŵe ga Mlungu mkugachembulusya ligongo lya misyungu jenu jimkusalechelana.”—Maliko 7:13.

¹² Yesu jwasasile mwamachili kuti Afalisi ŵalemwesyaga pa lilamusi lyakwamba ya lisiku lyakupumula soni nganapikanichisyaga chakulinga cha lilamusili. Jwalakwe jwatite, Mesiya “akwete ulamusi wosope . . . pa lisiku lyakupumula,” mwamti akwete ufulu wakuposya ŵandu pa lisiku lyakupumula. (Mateyu 12:8) Pakugombelechesya chiwundochi, jwalakwe jwaposyaga ŵandu pa lisikuli mwangasisa. (Luka 6:7-10) Kuposya kweleku kwaliji chiwulili cha yachachitenda msogolomu pachilambo chosope mkati mwa Ulamusi wa Yaka 1000. Yaka yeleyi yichiŵa lisiku lyekulungwa lyakupumula. Pandaŵi jeleji ŵandu ŵakulupichika chachipumula ku yakusawusya yasimene nayo kwa yaka yejinji ligongo lya ulemwa ni chiwa.

13. Panyuma pa umi wa Klistu wa pachilambo chapasi, ana payiche lilamusi lyapi, soni lyaliji lyakulekangana chamtuli pakulandanya ni Chilamusi cha Mose?

¹³ M’chilamusi chasambano chachili “lilamusi lyaŵajiganyisye Klistu,” Yesu jwasasilesoni mwakupikanika chenene pangani ja chilungamo. Chilamusichi ŵachitamilikasisye jwalakwe ali amalisisye utumiki wakwe wapachilambo chapasi. (Agalatiya 6:2) Mwakulengana ni Chilamusi cha Mose, chilamusi chasambano nganichidalilaga malamusi gakulembedwa nambo chadalilaga yiwundo. Nambope, chakwete malamusi gangapita mumbali. Limo mwa malamusiga ŵalikolasile Yesu kuti “lilamusi lyasambano.” Yesu jwajiganyisye ŵakumkuya ŵakwe kuti anonyelaneje mpela yaŵatite jwalakwe pakwanonyela jemanjaji. (Yohane 13:34, 35) Yisyene, chinonyelo chelechi chaliji chimanyilo cha ŵandu ŵaŵatamaga mwakamulana ni “lilamusi lyaŵajiganyisye Klistu.”

14, 15. Ana Yesu jwalosisye chamtuli kuti jwamanyililaga malile ga udindo wakwe soni ligongo chichi yeleyi yili yakulimbikasya?

¹⁴ Yesu jwatesile yejinji kupwatika pa kwiganya yakwamba chinonyelo. Jwalakwe jwakuyaga “lilamusi lyaŵajiganyisye Klistu.” Lilamusili lyawonechelaga pa umi wakwe wosope. Chisyasyo cha Yesu pangani ja chilungamo chawonechele m’matala gatatu. Kwende tulole matalaga.

¹⁵ Chandanda, Yesu jwaŵambalaga kutenda chilichose chakutindana ni chilungamo. Mwine tuyiweni kuti yindu yangali chilungamo yejinji yikusatanda ligongo lya kulikwesya kwa ŵandu ŵangali umlama kapena ligongo lyakutenda yindu mwakupundasya malile ga udindo wawo. Nambo Yesu nganatenda yeleyi. Pachakutendekwa chine, mundu jwayiche kwa Yesu ni jwatite, “Chemwalimu, ŵalakwe ŵasalile akulu ŵangu kuti angaŵile mbali jimo ja yipanje ya masije.” Yesu jwajanjile kuti, “Ana ŵani ŵaŵasagwile une kuti mbe jwakulamula kapena kugaŵanya yipanje ya masije sikati ja jemanja ŵaŵili?” (Luka 12:13, 14) Ana yeleyi nganiyiŵa yakusimonjesya? Yesu jwakwete lunda, jwamanyililaga chenene kulamula soni Mlungu ŵampele udindo wekulungwa. Pangali mundu juŵalandanaga ni Yesu pambali syelesi. Nambope jwalakwe jwakanile kwinjilila munganiji ligongo nganakola udindo wakutenda yeleyi. Kutandila pandaŵi jaŵaliji kwinani, Yesu aŵele ali mkumanyilila malile gakwe. (Yuda 9) Yesu mwakulinandiya akusadalila Yehofa kuti ni jwachasaguleje chachili chambone. Yeleyi yikusatendekasya kuti ndamo jakwe jambone jiwonechele.

16, 17. (a) Ana Yesu jwalosisye chamtuli chilungamo pajwalalichilaga ngani syambone sya Uchimwene wa Mlungu? (b) Ana Yesu jwalosisye chamtuli chilungamo mwachanasa?

¹⁶ Chaŵili, Yesu jwalosisye chilungamo m’litala lyaŵakamulichisyaga masengo pakulalichila ngani syambone sya Uchimwene wa Mlungu. Jwalakwe jwaliji jwangali lusagu. Mmalo mwakwe jwalingagalingaga kwalalichila ŵandu wosope chinga ŵakulaga kapena ŵakusichila. Nambo Afalisi ŵanyosyaga ŵandu ŵakulaga soni ŵandu wamba mwamti ŵapele lina lyakunyosya lyakuti ʽam-ha·ʼaʹrets, kapena kuti “ŵandu ŵakutuluka.” Yesu mwakulimba mtima jwalimbene ni ungali chilungamo welewu. Pajwalalichilaga ngani syambone, soni kulya ni ŵandu, kwalisya, kwaposya, kapena kwajimusya kuŵawe, jwalakwe jwaŵichilaga kunyuma chilungamo cha Mlungu jwakusasaka kwayichila “jwalijose.”c—1 Timoteo 2:4.

¹⁷ Chatatu, chilungamo cha Yesu ŵachilosyaga mwachanasa. Jwalakwe jwakamuchisyaga ŵandu ŵakulemwa. (Mateyu 9:11-13) Jwalakwe jwaliji jwakoseka kwakamuchisya ŵandu ŵaŵaliji ŵangali ŵakwachenjela. Mwachisyasyo, Yesu nganalimbikasyaga yakwawona ŵandu ŵanganaŵa Ayuda kuti ŵaliji ŵangasosekwa, mpela muŵatendelaga achimlongola ŵadini. Atamose kuti jwalakwe jwayichile Ayuda, nambo mwachanasa jwakamuchisye soni kwajiganya ŵandu ŵanganaŵa Ayuda. Jwalakwe jwakundile kutenda chakusimonjesya mwakumposya juŵalamulilaga likuga lya asilikali ŵa Chiloma. Jwalakwe jwatite, “Une nganinachisimane chikulupi mpela chelechi sikati ja Aisalaeli.”—Mateyu 8:5-13.

18, 19. (a) Ana Yesu jwachimbichisye chamtuli achakongwe? (b) Ana chisyasyo cha Yesu chikusatukamuchisya chamtuli kumanyilila kukamulana kwa kulimba mtima ni chilungamo?

¹⁸ Mwakulandana ni yeleyi, Yesu nganiŵawonaga achakongwe kuŵa ŵangasosekwa. Mmalo mwakwe, jwalakwe mwakulimba mtima jwatendaga chilungamo. Afalisi ŵawonaga achakongwe Ŵachisamaliya kuŵa ŵasakasidwe mpela muŵawonelaga ŵandu ŵamitundu jine. Nambope, Yesu jwamlalichile jwamkongwe Jwachisamaliya pachisima cha ku Sukali. Nambosoni kwandanda kulimanyikasya Yesu msyene kuti ali Mesiya kwaliji kwa jwamkongweju. (Yohane 4: 6, 25, 26) Afalisi ŵasalaga kuti achakongwe nganasosekwaga kwajiganya Chilamusi cha Mlungu. Nambo Yesu jwamalile ndaŵi soni machili pakwajiganya achakongwe. (Luka 10:38-42) Atamose umboni wakupelechedwa ni achakongwe nganaudalilaga, nambo Yesu jwachimbichisye achakongwe mwakwapa upile wakuŵa ŵandanda kum’wona jwalakwe ali ajimwiche kuŵawe. Jwasalilesoni kuti ajawule akasalile ŵakulijiganya ŵakwe ŵachilume pakwamba ya chakutendekwa chakusosekwachi.—Mateyu 28:1-10.

¹⁹ Yisyene, Yesu jwalosisye chilungamo ku mitundu jejinji. Payakutendekwa yejinji, jwalakwe jwaŵikaga umi wakwe pangosi pakusaka kulosya chilungamo. Chisyasyo cha Yesu chikusatukamuchisya kumanyilila kuti kulosya chilungamo kukusasaka kulimba mtima. Yili yakuŵajilwa kumkolanga jwalakwe kuti “Lisimba lya lukosyo lwa Yuda.” (Chiwunukuko 5:5) Akumbuchile kuti lisimba likusajimila kulimba mtima pakulosya chilungamo. Myoyo, pachangakaŵapa Yesu chachiyikasya chilungamo. Jwalakwe tachitamilikasya “chilungamo pa chilambo chapasi.”—Yesaya 42:4.

20, 21. Ana Mwenye Jwaumesiya julimbikasisye chamtuli chilungamo pachilambo chosope soni mumpingo Wachiklistu mundaŵi jetu jino?

²⁰ Kutandila pajwaŵele Mwenye Jwaumesiya mu 1914, Yesu akusalimbikasya chilungamo pachilambo chapasi. Chamtuli? Jwalakwe jwakamuchisye kuti chakulochesya chachikusasimanikwa pa Mateyu 24:14 chikwanilichikwe. Ŵakumkuya ŵa Yesu ŵa pachilambo chapasi ŵajiganyisye ŵandu ŵam’yilambo yosope yakwamba Uchimwene wa Yehofa. Mpela mwaŵatendele Yesu, jemanjaji alalichile mwangali lusagu soni mwachilungamo. Alalichile kwa ŵachinyamata, ŵachikulile, ŵakulaga, ŵakupata, achalume soni kwa achakongwe, kwapa wosope upile wakummanyilila Yehofa.

²¹ Yesu mpela mtwe wa mpingo, akusalimbikasya chilungamo mumpingo Wachikhlistu. Mpela mwayikusasalila yakulochesya, jwalakwe akusapeleka “mituka,” ŵali achakulungwa ŵa mumpingo ŵakulupichika, kuti alongoleleje mpingo. (Aefeso 4: 8-12) Pakusamalila ngondolo sya Mlungusi, achalumeŵa akusakuya chisyasyo cha Yesu chakulimbikasya chilungamo. Jemanjaji akusakumbuchila yakusasaka Yesu yakuti ngondolo syakwe asisamalileje mwachilungamo mwangajigalila udindo, kumanyika kapena chipanje cha mundu.

22. Ana Yehofa akusapikana uli ni yangali chilungamo yayitupile m’chilambochi, soni asagwile Mwanache jwakwe kuti chatende chichi ni yeleyi?

²² Pachangakaŵapa, Yesu chachitamilikasya chilungamo m’litala lyasambano. Ungali chilungamo utupile m’chilambo chakusakalachi. Mwanache jwalijose jwakusawa ni sala akusaŵa kuti alasile ni kusowa kwachilungamo. Yili myoyo mnopemnope patukuganichisya ya msimu wakulinonyela wakwete ŵandu soni winji wa mbiya ni ndaŵi jakusamalila pakupanganya yida ya ngondo. Ŵandu ŵakusawa chaka chilisose, ŵajinji akusawa ligongo lya ungali chilungamo, yayikusamtumbilikasya Yehofa. Jwalakwe asagwile Mwanache jwakwe kuti chajonanje chilambo chakusakalachi ni kumasya yangali chilungomo yosope.—Chiwunukuko 16:14, 16; 19:11-15.

23. Panyuma pa Alimagedo, ana Klistu chachilimbikasya chamtuli chilungamo kwa ndawi syosope?

²³ Nambope, chilungamo cha Yehofa chikusapunda pagamba konanga ŵandu ŵakusakala. Jwalakwe jwasagwile Mwanache jwakwe kuti chalamulile mpela “Mwenye jwa Mtendele.” Panyuma pa Alimagedo, ulamusi wa Yesu uchitamilikasya mtendele pachilambo chosope chapasi soni jwalakwe chachilamulila pakamulichisya masengo “chilungamo.” (Yesaya 9:6, 7) Yesu chachisangalala kutyosya yangali chilungamo yiliyose, yayitendekasisye kuti ŵandu alajeje pachilambo chapasi. Mwakulupichika jwalakwe chachilolechesya kuti chilungamo cha Yehofa chikutendekwa kwa ndaŵi syosope. Myoyo, yili yakusosekwa kutanda kusyasya chilungamo cha Yehofa apanopano. Kwende tulole mwampaka tutendele yeleyo.