Kuŵa Ŵamtendele Soni Ŵachasa Mumpingo

PAKWANILISYA yakulochesya ya m’Baibulo, chaka chilichose ŵandu ŵajinji akusajinjila m’nyumba ja Yehofa jakulambila kweswela. (Mika 4:1, 2) Tukusaŵa ŵakusangalala mnope kwapochela jemanjaji ni makono gaŵili ‘mumpingo wa Mlungu.’ (Mase. 20:28) Jemanjaji akusayamichila kola upile wakutumichila Yehofa yimpepe ni m’weji soni akusasangalala ni ndamo ja chasa soni mtendele yayili mu paladaiso jwetu jwa usimu. Msimu weswela wa Mlungu soni chamuko chakamuchisya chachikusasimanikwa m’Baibulo yikusakamuchisya kuti tuŵeje pamtendele soni kuti mpingo uŵeje wachasa.—Sal. 119:105; Sek. 4:6.

² Naga tukukuya yajikusasala Baibulo, tuchiwala “umi wasambano.” (Akolo. 3:10) Yeleyi yichitukamuchisya kuti tukayiŵichilaga munganisyo yindu yamwanamwana yatulemwechesye ŵane. Kuyiwona yindu mpela mwakusayiwonela Yehofa, kuchitukamuchisya kuti tumalane ni gaŵikana kwele chilambo chakusakalachi chikusalimbikasya. Mmalo mwakwe tuchilimbikasya ubale wetu wa pachilambo chosope.—Mase. 10:34, 35.

³ Nambope, ndaŵi sine pakusapagwa yakusawusya yayikusasokonasya mtendele soni mkamulano wa mpingo. Ana chichi chachikusatendekasya yeleyi? Ndaŵi syejinji kukusaŵa kulepela kamulichisya masengo yajikusasala Baibulo. Tukusosekwa kulingalinga kulimbana ni yisyoŵe yetu yakulemwecheka. Wosopewe tuli ŵakulemwa. (1 Yoh. 1:10) Myoyo, ŵane mpaka atande kutenda yindu yakulemwecheka yampaka yitendekasye kuti mumpingo mujinjile ndamo kapena yindu yampaka yisakasye mpingowo mwausimu. Ndaŵi sine mpaka twalemwechesye achimjetu ligongo lyakuŵecheta kapena kutenda yindu mwangaganichisya. Soni mpaka tutenguche ni yaŵechete kapena yatesile mjetu. (Alo. 3:23) Mundaŵi mpela syelesi, ana chichi champaka chitukamuchisye kuti yindu yiŵesoni chenene?

⁴ Yehofa mwachinonyelo, akusatuganichisya pa yosope yayikusatutendechela. Jwalakwe kupitila m’Maloŵe gakwe ŵasasile yampaka yitukamuchisye naga yakusawusya yikupagwa. Ŵakuchinga ŵachinonyelo, ŵali achakulungwa ŵa mumpingo mpaka atukamuchisyesoni. Naga tukukuya chamuko cha m’Malemba chatupele, mpaka yitukamuchisye kuti tuŵesoni pa unasi wambone ni achimjetu soni kupitilisya kuŵa pa unasi wambone ni Yehofa. Naga akutujongolela kapena atupele chamuko ligongo lyakutenda chakulemwa, tukusosekwa kuyiwona kuti Atati ŵetu ŵakwinani akusatunonyela.—Mis. 3:11, 12; Ahe. 12:6.

⁵ Ndaŵi sine ŵandu mumpingo mpaka alekangane nganisyo, kapena mpaka papagwe yakusawusya yamwana pasikati pawo. Naga yeleyi yikutendekwa, pakusosekwa kuyimasya mwachinonyelo. (Aef. 4:26; Afi. 2:2-4; Akolo. 3:12-14) Mwangakayichila, yakusawusya yakwayana ni unasi wetu ni Aklistu achimjetu mumpingo mpaka yimale naga tukukuya yaŵasasile ndumetume Petulo kuti, “Chekulungwa mnope chili chakuti mnonyelaneje, pakuti chinonyelo chikusasisa ulemwa wejinji.” (1 Pet. 4:8) Baibulo jikusati, “Wosopewe tukusalemwa mu yindu yejinji.” (Yak. 3:2) Naga tukusanonyela achimjetu mwakwatendela ŵandu ŵane mpela mutukusachila kuti nombe nawo atutendeleje, nikuti tuchakululuchilaga soni ngasitukosyaga yakulemwa yamwanamwana.—Mat. 6:14, 15; 7:12.

⁶ Naga ayimanyi kuti amlemwechesye mundu jwine ligongo lya kaŵechete kawo kapena yatesile, akagwa ulesi kutenda yindu yakamuchisya kuti aŵesoni pa mtendele. Akumbuchileje kuti yeleyi yikusakwayasoni unasi wawo ni Yehofa. Yesu ŵasalile ŵakulijiganya ŵakwe kuti, “Ni ligongo lyakwe pakupeleka mtuka wenu kwa Mlungu pa malo gakupelechela mbopesi, nipo ndaŵi jijojo mkukumbuchila kuti mkwete magongo ni mjenu, mleche mtuka wenuwo pa malo gakupelechela mbopesi papopo, nipo mjawule mkatande kaje kwilana ni mlongo mjenujo. Kaneko ni mjawule mkapeleche mtuka wenu ula kwa Mlungu.” (Mat. 5:23, 24) Ndaŵi sine mpaka yikomboleche ngakupikangana ni Mklistu mjawo. Naga yeleyi yili yitendekwe, akaleka kuŵechetana. Kuŵechetana chenene kuli kwakusosekwa mnope mumpingo ligongo kukusakamuchisya kuŵambala ungapikangana soni kumalana ni yakusawusya yayikusapagwa ligongo lya ungali umlama.

⁷ Ndaŵi sine ŵakulolela mumpingo mpaka ayiwone kuŵa yakuŵajilwa kupeleka chamuko pakusaka kumkamuchisya mundu kuchenga nganisyo. Ndaŵi sine kutenda yeleyi kukusaŵa kwakusawusya. Ndumetume Paulo ŵalembele Aklistu ŵa ku Galatiya kuti, “Ŵakulupilila achimjangu, naga jwine jwalijose akusimanikwa ali mkutenda ulemwa, ŵane ŵa jemanja ŵimkulongoleledwa ni msimu mumkamuchisye mundujo ni mtima wakulisinga [“wakufasa,” NWT].”—Aga. 6:1.

⁸ Pakuchinga ngondolo, ŵakulolela mpaka awuchenjele mpingo ku yindu yakonanga mwausimu, soni mpaka yikamuchisye kuti pakapagwa yakusawusya yine yekulungwa. Achakulungwa akusalingalinga kuti akamuleje masengo gawo mwakamulana ni yaŵalochesye Yehofa kupitila mwa Yesaya kuti, “Jwalijose tachiŵa mpela malo gakutilila mbepo, soni kulijuŵisya ku chimbunga. Tachiŵa mpela sulo m’chilambo chejumu, nipo mpela m’bwilili ku luŵala lwekulungwa m’chipululu.”—Yes. 32:2.

⁹ Ndumetume Paulo ŵakalamwisye Aklistu pakwamba ya ŵandu ŵakusalimbikasya yitendo yangalumbana mumpingo. Jwalakwe ŵatite, “Tukumlamula jemanja . . . kuti mwaŵambaleje ŵakulupilila wosope ŵakwete ndamo ja ulesi, ŵangasaka kukuya misyungu jitwajiganyisye.” Jwalakwe ŵagombelechesye maloŵe gelega paŵalembile kuti, “Naga jwine jwalijose akukana kugapikanila maloŵe gitulembile mu chikalatachi, mumlolechesye jwelejo, nambo soni mkasyoŵekana najo, kuti jwalakwejo atende soni. Nambo ngamtenda jwalakwejo mpela mmagongo, mmalo mwakwe mumjamucheje mpela mjenu.”—2 Ates. 3:6, 14, 15.

¹⁰ Ndaŵi sine, mundu mpaka atendeje yindu yakuti ngaŵa mkutyosedwa nayo mumpingo, nambo yakulosya kuti ngakusachimbichisya ndamo sya Mlungu syele Aklistu akusosekwa kuya. Yeleyi yili mpela ulesi wakupundanganya, kwapatila ŵane magongo, kapena usakwa. Munduju komboleka ‘kwinjililaga ya achimjakwe.’ (2 Ates. 3:11) Soni komboleka kwakalamuchilaga achimjakwe pakusaka kupata yipanje, kapena kusangalalaga ni yakusangalasya yangaŵajilwa. Ŵandu mpaka awuwoneje mpingo mwakulemwecheka ligongo lya mundu jwakutenda yangalondeka, soni Aklistu ŵane mpaka ajigalile ndamo jakwejo.

¹¹ Achakulungwa ŵa mumpingo akusosekwa kumkamuchisya jwakutenda yangalondekajo mwakumpa chamuko cha m’Malemba. Nambope, naga jwalakwe ngakukuya chamuko cha m’Malembacho panyuma pakuchipochela mwakuwilisyawilisya, achakulungwa ŵa mumpingo mpaka alinganye yakuŵecheta ngani jakalamusya mpingo. Achakulungwa ŵa mumpingo akusosekwa kamulichisya masengo lunda kuti amanyilile naga ndamojo jiyikene pakuti jikwasokonasya ŵane mwamti pakusosekwa kuŵecheta ngani jakalamusya mpingo. Jwakuŵecheta nganiji chachipeleka chamuko chakuŵajilwa pakwamba ya ndamo jangalondeka ja mundujo, nambo ngasakolanga lina lya mundu jwakutenda yangalondekajo. Yakuyichisya yakwe yichiŵa yakuti ŵandu ŵayimanyi ya ndamo jakusala munganijo, chachiŵambala kusyoŵekana ni mundu jwangalondekajo. Atamose kuti jemanjajo mpaka apitilisyepe kutenda najo yindu yausimu, nambo akusosekwa ‘kumjamukaga mpela mjawo.’

¹² Mwangakayichila, naga ŵandu ŵa mumpingomo akuŵa ŵakulupichika, nikuti yichimkamuchisya jwangalondekajo kutenda sooni ni ndamo jakwe soni yichimtendekasya kuchenga. Naga jwangalondekajo alesile yitendo yakwe yangalondekayo, nikuti ŵandu mumpingo ngakusosekwa kumwonagasoni mpela jwamŵichidwe chimanyilo.

¹³ Kusachilila kwetu ngayikosya yindu yamwanamwana yatulemwechesye achimjetu, soni kwakululuchila, ngayikugopolela kuti yakulemwayo yangatukwaya soni kuti tukukamulana nayo. Mundu ngaŵa mkumlamula kuti atesile yakulemwa yosope ligongo lya ungali umlama. Yikusaŵa yangaŵajilwa kwamba kulechelela yakulemwa yekulungwakulungwa. (Lef. 19:17; Sal. 141:5) Chilangano cha Chilamusi chalosisye kuti yakulemwa yine yikusaŵa yekulungwa kulekangana ni yijakwe. Mpingo wa Chiklistu ukusakuyasoni yeleyi.—1 Yoh. 5:16, 17.

¹⁴ Yesu ŵasasile litala lyakamuchisya kumasya yakusawusya yekulungwa yampaka yipagwe pasikati pa Aklistu. Kwende tulole yampaka tutende pakuya litala lyaŵasasileli, “Naga mlongo mjenu amlemwechesye, [1] mjawule mkamjamuche mli ŵaŵilipe. Naga akumpikanila, mumkamuchisye mlongo mjenujo. Nambo naga ngakumpikanila, [2] mjigale mundu jumo pane ŵaŵili, kuti maloŵe gosope gasimichisidwe ni mboni siŵili pane sitatu. Naga jwalakwejo akukana kwapikanila jemanjajo, [3] mkawusalile mpingo, nipo naga akukanasoni kuwupikanila ni mpingo wakwe, mumtende kuŵa mpela mundu jwakusa pane mpela jwakomesya msongo.”—Mat. 18:15-17.

¹⁵ Mwakamulana ni chakuwanichisya chaŵachisasile Yesu pa Mateyu 18:23-35, yikuwoneka kuti chimo mwa yakulemwa yaŵayisalaga pa Mateyu 18:15-17 chili chakwayana ni mbiya kapena yipanje, yayili mpela kulepela kuwuchisya ngongole kapena kumkalamuchila mundu pakusaka kupata yipanje. Chakulemwachi kombolekasoni kuŵa kuŵecheta yaunami pakusaka kwajonanjila mbili ŵane.

¹⁶ Naga mundu jwine mumpingo ŵalemwechesye, akawutuchila kukwasalila achakulungwa kuti ajinjilile nganijo. Yesu ŵasasile kuti, chandanda ajawule kuti akaŵechetane ni mundu juŵalemwechesyejo. Alinje kaje kumasya nganijo pa ŵaŵili. Akumbuchile kuti Yesu nganasala kuti ‘ajawuleko kamo kukumjamuka.’ (Maloŵega tugombelechesye m’weji). Myoyo naga mundujo nganajitichisya yakulemwa yakwe, soni kwaŵenda kuti amkululuchile, mpaka yiŵe yakuŵajilwa kumjawulilasoni ndaŵi jine. Naga ngani jikumala mwalitala lyeleli, mundu jwakulemwajo chachayamichila ligongo lyakuti wawojo nganiŵasalila nganijo ŵane kapena konanga mbili jakwe jambone mumpingo. Pelepa chachiŵa kuti ‘amkamuchisye mlongo mjawojo.’

¹⁷ Naga juŵalemwechesyejo akwitichisya yakulemwa yakwe, akuŵenda kuti amkululuchile, soni atandite kulinganya yaŵalemwechesyeyo, nikuti ngasipasosekwa kujijigalila nganijo kwine. Atamose yakulemwa yekulungwa mpela yeleyi, ŵandu ŵayikwakwayawo komboleka kuyimasya achimsyene.

¹⁸ Naga yikusawusya kumkamuchisya mlongo mjawojo pakumjamuka ‘paŵaŵilipe,’ mpaka atende yaŵasasile Yesu kuti, “mjigale mundu jumo pane ŵaŵili,” kuti mkaŵechetesoni ni mlongo mjenujo. Ŵandu ŵachiŵajigalewo chakulinga chawo chiŵejesoni chakumkamuchisya mlongo mjawojo. Mpaka yiŵe yakuŵajilwa kuti ŵandu ŵachiŵajigalewo aŵe ŵakuti ŵayiweni yakulemwechekayo, nambo naga pangali mboni syasyayiweni ni meso yakulemwechekayo, komboleka kujigala mundu jumo kapena ŵaŵili kuti aŵe mboni payakuŵechetanayo. Jemanjaji komboleka kumanyilila yejinji panganiji soni mpaka asimichisye naga jwinejo ŵatesile chakulemwa. Naga asagwile achakulungwa ŵa mumpingo kuti aŵe mboni payakuŵechetanayo, jemanjaji ngakukamula masengo ga mpingo ligongo achakulungwa wosope ŵa mumpingo nganiŵatuma kutenda yeleyo.

¹⁹ Naga nganiji ngajikumala panyuma pakuti wawojo pajika ŵaŵechete najo, soni ŵajawileko ni mundu jumo kapena ŵaŵili, nambope akuyiwona kuti nganiji ngaŵa mkujileka, akusosekwa kwasalila ŵakulolela ŵa mumpingo. Akumbuchile kuti chakulinga cha ŵakulolelaŵa chili kukamuchisya kuti paŵesoni mtendele, soni kukamuchisya kuti mumpingo muŵe chasa. Piŵasalile achakulungwawo nganiji, ajileche m’miyala mwawo soni akulupilile kuti Yehofa chiŵakamuchisye. Akakunda kuti ndamo sya ŵane syatengusye kapena kwatendekasya kuti akasangalalaga pakumtumichila Yehofa.—Sal. 119:165.

²⁰ Achakulungwa ŵa mumpingowo chachiwungunya kaje nganijo. Naga pana umboni wakuti mundujo jwalemwechesye mnope wawojo, nambo ngakupitikuka mtima soni ngakusaka kutenda yakuti alinganye yindu yalemwisyeyo, mpaka yiŵe yakuŵajilwa kuti komiti jajikwete udindo wakusamalila nganijo mpaka jimtyosye jwakulemwajo mumpingo. Achakulungwawo pakutenda yeleyi akusaŵa ali mkusichenjela ngondolo soni kuwuchenjela mpingowo kuti uŵe wachasa.—Mat. 18:17.

²¹ Yakulemwa yine yekulungwakulungwa mpela msese, chikululu, gonana kwa achalume kapena achakongwepe, yitendo yakumnyosya Mlungu, kusapuka, kulambila milungu jakupanganyidwa ni ŵandu, soni yakulemwa yine yekulungwa, yangasosekwa kuti tugambe kumkululuchila mundu jwatulemwechesyejo. (1 Akoli. 6:9, 10; Aga. 5:19-21) Tukusosekwa kwasalila achakulungwa ŵa mumpingo ya yakulemwa yeleyi kuti ayisamalile ligongo lyakuti yikusajonanga usimu soni chasa cha mpingo. (1 Akoli. 5:6; Yak. 5:14, 15) Ŵane mpaka ajawule kwa achakulungwa ŵa mumpingo kukwasalila yakwamba chakulemwa chatesile kapena yakumanyilila pakwamba ya yakulemwa ya ŵane. (Lef. 5:1; Yak. 5:16) Chinga achakulungwawo apikene mwamtuli ya chakulemwa chekulungwa chatesile mundu jwam’batisidwe, pakusasosekwa kuti achakulungwa ŵaŵili ajiwungunye kaje nganijo mkanajisamalile. Pasimichisye kuti yapikeneyo yili yisyene soni kuti pana umboni wakulosya kuti mundujo ŵatesile chakulemwa, achakulungwa wosope ŵa mumpingo chachisagula komiti jakwelusya ja achakulungwa ŵa mumpingo ŵatatu kuti asamalile nganijo.

²² Achakulungwa akusasilolela ngondolo mwakusamala mnope, kuti asichenjele ku yindu yampaka yijonanje mwausimu. Jemanjaji akusakamulichisya masengo Maloŵe ga Mlungu mwalunda pakwamuka jwalijose jwalemwisye soni pakwakamuchisya kuti aŵe chenene mwausimu. (Yuda 21-23) Yeleyi yikamulana ni yaŵasasile ndumetume Paulo kwa Timoteyo, paŵalembile kuti, “Pameso pa Mlungu soni pameso pa Klistu Yesu, ŵele ŵitachilamula ŵandu wosope, ŵachijumi ni ŵawe ŵakwe, . . . Mwasalileje yakulemwa yawo, mwajamucheje, ni kwalimbikasya mtima, ni kwajiganya mwakuweŵa mtima kusyesyene.” (2 Tim. 4:1, 2) Kutenda yeleyi mpaka kujigale ndaŵi jejinji, nambope jeleji jili mbali ja masengo gekulungwa ga achakulungwa ŵa mumpingo. Mpingo ukusayamichila yakusatenda achakulungwaŵa mwamti ukusiwawona kuŵa “ŵakwenela kupochela uchimbichimbi.”—1 Tim. 5:17.

²³ Pandaŵi jilijose pasimanikwe mundu kuti ali jwakulemwa, chakulinga chekulungwa cha ŵakulolela chili kumkamuchisya jwakulemwajo kuti aŵe chenene mwausimu. Naga jwalakwejo akupitikuka mtima yisyesyene soni akukomboleka kumkamuchisya, achakulungwawo chachimpa chamuko chinga chapakasyepela kapena pameso pa mboni syasyapali paŵaŵechetaga nganijo kuti amkamuchisye jwalakwejo soni kuti ŵakamuchisye ŵanduwo kola woga wakuŵajilwa. (2 Sam. 12:13; 1 Tim. 5:20) Ndaŵi jilijose jele komiti jakwelusya jimpele chamuko mundu, jikusamlekasyasoni kutenda yindu yine. Kutenda yeleyi kukusamkamuchisya jwakulemwajo kuti ‘ajendeje m’matala gakongoka.’ (Ahe. 12:13) Mkupita kwa ndaŵi, naga mundujo akulosya kuti akongochela mwausimu, akusamkundasoni kuti atendeje yaŵamlekasisye yila.

²⁴ Naga komiti jakwelusya jiyiweni kuti mundujo akupitikuka mtima, nambo kuti nganiji chijimanyiche kwa ŵandu ŵajinji mumpingo kapena mu dela jakutamojo kapenasoni naga mpingowo ukusosekwa kalamuka ni mundu juŵalemwisyejo, chachipeleka chimanyisyo chakata chakwayana ni munduju pa msongano wa Utumiki ni Umi Wetu wa Chiklistu. Chimanyisyocho chiŵeje chamti myi: “[Lina lya mundu] apochele chamuko.”

²⁵ Ndaŵi sine, jwakulemwajo komboleka kuŵa kuti aŵele ali mkutenda yakulemwechekayo kwa ndaŵi jelewu ni kwikana pakulepela kupochela chikamuchisyo. Komboleka kuti “masengo gakulosya kuti apitikwiche mtima” ngagakuwonechela mwa jwalakwe pandaŵi jakuŵecheta magambogo. (Mase. 26:20) Naga yili myoyo, mpaka yiŵe yakuŵajilwa kumtyosya mumpingo jwakulemwa jwangapitikukajo kuti akasyoŵekanasoni ni ŵandu ŵaswela ŵa Yehofa. Yitendo yakusakala ya jwakulemwajo ngayikusajambuchilasoni mpingowo, myoyo ukusaŵa weswela mundamo soni mwausimu soni ukusakolape lina lyambone. (Det. 21:20, 21; 22:23, 24) Paŵapikene ya ndamo jakutesya sooni ja mundu jwine mumpingo wa ku Kolinto, ndumetume Paulo ŵakalamwisye achakulungwa ŵa mumpingo kuti ‘ampeleche jwele mundujo kwa Satana . . . , kuti msimu [wa mpingowo] ukulupusidwe.’ (1 Akoli. 5:5, 11-13) Paulo ŵasasilesoni ya kutyosyedwa mumpingo kwa ŵandu ŵane ŵaŵasisyaga usyesyene mu yaka 100 yandanda.—1 Tim. 1:20.

²⁶ Naga komiti jakwelusya jiyiweni kuti akusosekwa kumtyosya mumpingo jwakulemwa jwangapitikukajo, jikusosekwa jimsalile yasagwileyi, soni kumsalila mwakupikanika chenene magongo ga m’Malemba gakumtyochesya mumpingo. Pamsalile jwakulemwajo yasagwileyo, komiti jakwelusya jikusosekwa jimsalile kuti naga jwalakwejo akuyiwona kuti nganajelusya chenene nganijo ni akusaka kutenda apilo, mpaka atende myoyo mwakulemba chikalata chakusala magongo gakupikanika chenene gakutendela apilo. Mpaka ampe masiku msano ni gaŵili kutyochela palisiku lyajelwisye nganijo kuti atende apilo. Naga apochele chikalatacho, achakulungwa ŵa mumpingowo chachimmanyisya jwakulolela dela ya nganiji, jwalakwe chachisagula achakulungwa ŵakuŵajilwa ŵa mu delamo kuti aŵe mu komiti ja apilo kuti apikanesoni nganijo. Jemanjaji papochele chikalata cha apilo, chachitenda yakomboleka kuti jikamala wiki jimo mkanapikane nganijo. Naga mundu atesile apilo, ngasipasosekwa kusala kumpingo chimanyisyo chakutyosedwa kwakwe pandaŵiji. Nambo pandaŵi jeleji, jwakwimbidwa magambojo chachimlekasya kwanga soni kupeleka lipopelo pamisongano soni ngasakola upile uliwose wa utumiki.

²⁷ Upile wakutenda apilo ukusapelechedwa mpela litala lya kumlosya chinonyelo jwakwimbidwa magambojo kuti ŵane akapikanesoni chidandawulo chakwe. Nambo naga jwakwimbidwa magambojo mwamele ngakusimanikwapo pandaŵi jakuti asale yakudandawula yakwe, achakulungwa chachipeleka chimanyisyo chakutyosedwa kwakwe panyuma pakulingalinga kuti asimane najo.

²⁸ Naga jwakulemwajo nganasaka kutenda apilo, komiti jakwelusya jichimlondechesya kusosekwa kwa kupitikuka soni yakusosekwa kutenda kuti cham’wuchisye mumpingo pa ndaŵi jakuŵajilwa. Kutenda yeleyi kuli kumnonyela jwalakwejo soni mpaka kumkamuchisye mnope. Akusosekwa kutenda yeleyi ni chembecheyo chakuti jwalakwejo chachenje yitendo yakwe soni kuti mkupita kwa ndaŵi mpaka aŵajilwe kuwujila m’gulu ja Yehofa.—2 Akoli. 2:6, 7.

²⁹ Naga pakusosekwa kumtyosya mumpingo jwakulemwa jwangapitikuka mtima, akusapeleka chimanyisyo chakata kuti, “[Lina lya mundu] nganaŵasoni jwa Mboni sya Yehofa.” Chimanyisyochi chichakalamusya Aklistu ŵakulupichika ŵa mumpingo kuti aleche kusyoŵekana ni mundujo.—1 Akoli. 5:11.

³⁰ Maloŵe gakuti “kulilekanganya ni mpingo” gakusasala yakusatenda mundu jwam’batisidwe jwakusakana mwamele kukuya ndamo sya Chiklistu mwakusala kuti ngakusakasoni kuti amanyikweje kuŵa jwa Mboni sya Yehofa. Jwalakwe kombolekasoni kulosya kuti ngakusaka kamulana ni mpingo kupitila mu yakutenda yakwe, mpela kwinjila mu bungwe jakuchilambo jele chakulinga chakwe chili changakamulana ni yijiganyo ya m’Baibulo, soni chili chakuti Yehofa Mlungu chachichijonanga.—Yes. 2:4; Chiw. 19:17-21.

³¹ Pakwamba ya ŵandu ŵaŵasasile pelanga kuti ngakusakasoni kuŵa Aklistu, ndumetume Yohane ŵalembile kuti, “Ŵandu ŵelewo ŵatesile kutyoka pasikati petu, nambope nganaŵa ŵa mwikuga kapena kuti mu gulu mwetu kusyesyene, pakuti jemanjajo akaŵe kuti ali ŵa mwikuga mwetu akaliji chiŵela ni uwe.”—1 Yoh. 2:19.

³² Pameso pa Yehofa, mundu jwalilekangenye ni mpingo akusalekangana mnope ni mundu jwafoweche mwausimu, mpela jwangakwawulasoni mu utumiki wa mumgunda. Mundu komboleka kufowoka mwausimu ligongo lyakuti nganalijiganyaga Maloŵe ga Mlungu mwakutamilichika. Kombolekasoni kuti ŵasimene ni yakusawusya kapena yipwetesi yine yayamtendekasisye kuti kulimbichila kwakwe pakutumichila Yehofa kumale. Achakulungwa ŵa mumpingo nambosoni ŵane mumpingomo mpaka apitilisye kumpa m’Klistu jwafoweche mwausimujo chikamuchisyo chakuŵajilwa chausimu.—Alo. 15:1; 1 Ates. 5:14; Ahe. 12:12.

³³ Mwakulekangana ni yeleyi, naga Mklistu asagwile jika kulilekanganya ni mpingo, chimanyisyo chakata chichipelechedwa kumpingo kuti, “[Lina lya mundu] nganaŵasoni jwa Mboni sya Yehofa.” Tukusam’wona mundu jwalilekangenye mpela mwatukusam’wonela jwamtyosyedwe.

³⁴ Mundu jwatyosyedwe, kapena juŵalilekangenye ni mpingo mpaka awujile mumpingo naga akulosya kuti apitikwiche mtima soni panyuma pa ndaŵi jakuŵajilwa akulosya kuti alesile matala gakwe gakulemwecheka. Jwalakwe akusalosya kuti akusachilila mnope kuŵasoni pa unasi wambone ni Yehofa. Pakujigalila mwiyiŵelele yindu, achakulungwa akusalolechesya kuti pamale ndaŵi jakuŵajilwa mwine miyesi jejinji, kapena chaka, soni atamose kupunda pelepo pakusaka kuti mundu alosye kuti apitikwiche mtima yisyesyene. Achakulungwa wosope ŵa mumpingo papochele chikalata chakuŵenda kuti mundu awujilesoni mumpingo, komiti jakuwuchisya jichisosekwa kukambilana ni mundujo. Komitijo jichiwungunya naga mundujo akulosya “Masengo gakulosya kuti apitikwiche mtima,” ni jichisagula naga yili yakuŵajilwa kumwuchisya mumpingo pandaŵiji kapena iyayi.—Mase. 26:20.

³⁵ Naga jwakuŵenda kuwujila mumpingojo ŵamtyosisye ali mumpingo wine, komiti jakuwuchisya ja mpingo waliwo jikusosekwa kusimana ni mundujo kuti jiganichisye yaŵendile mundujo. Kaneko, komitijo jichamanyisya yeleyi achakulungwa wosope ŵa mumpingo wawasamalile nganijo, soni jichisala mwakumwonela mundujo. Makomiti gosopega gachikamulila masengo pampepe pakulolechesya kuti gapatile maumboni gakwanila gakwakamuchisya kusagula mwakuŵajilwa. Nambope, komiti jakuwuchisya jandandajo ni jajichisagula yakumwuchisya mundujo.

³⁶ Naga komiti jakuwuchisya jisimichisye kuti jwakutyosyedwajo kapena juŵalilekangenyejo apitikwiche mtima yisyesyene, soni akusosekwa kumwuchisya mumpingo, chachipeleka chimanyisyo chakusala yeleyi kumpingo wawasamalile ngani ja mundujo. Naga mundujo ali mumpingo wine, chachipelekasoni chimanyisyocho kumpingo waliwo. Chimanyisyocho chiŵeje mwamti myi, “[Lina lya mundujo] alisoni jwa Mboni sya Yehofa.”

³⁷ Naga mwanache jwachinondipile jwam’batisidwe atesile chakulemwa chekulungwa, akusosekwa kwasalila achakulungwa ya nganiji. Achakulungwa pakusamalila ngani jakwayana ni mwanache jwachinondipile jwam’batisidwe jwatesile chakulemwa chekulungwa, mpaka yiŵe chenene kuti achinangolo ŵabatisidwe ŵa mwanachejo asimanikwepo. Pandaŵi jele komitijo jikumpa chikamuchisyo chakwenela, achinangolowo akusosekwa kutenda yindu mwakamulana ni komiti jakwelusyajo, ngaŵaga kulingalinga kumchenjela mwanachejo. Mpela mwakusatendela ni mundu jwamkulungwa jwatesile chakulemwa, komitijo jikusalingalinga kumjamuka soni kumkamuchisya mwanachejo kuti ajongolele yitendo yakwe. Nambope, naga mwanachejo ngakupitikuka mtima, akusamtyosa mumpingo.

³⁸ Ana chichi chachikusosekwa kutendekwa naga ŵakulalichila ŵangabatisidwa atesile chakulemwa chekulungwa? Pakuŵa jemanjaji nganaŵa Mboni syebatisidwe, nikuti ngaŵa mkwatyosya mumpingo. Jemanjaji komboleka kuti nganapikanichisya chenene malamusi ga m’Baibulo, ni akusosekwa kwakamuchisya mwachinonyelo kuti ‘ajendeje m’matala gakongoka.’—Ahe. 12:13.

³⁹ Naga jwakulalichila jwangabatisidwa jwatesile chakulemwa ngakupitikuka mtima panyuma pakuti achakulungwa ŵa mumpingo ŵaŵili asimene najo ni kulinga kumkamuchisya, mpaka yiŵe yakuŵajilwa kuwusalila yeleyi mpingo. Akusosekwa kupeleka chimanyisyo chakuti, “[Lina lya mundu] nganaŵasoni jwakulalichila jwangabatisidwa.” Myoyo mpingowo uchimwonaga jwalakwejo mpela mundu jwakuchilambo. Atamose kuti munduju ngakusamtyosya mumpingo, Aklistu akusosekwape kusamala kuti akasyoŵekanaga najo. (1 Akoli. 15:33) Jwalakwe ngakusasosekwasoni kupeleka malipoti ga utumiki wa mumgunda.

⁴⁰ Kupita kwa ndaŵi mundu jwangabatisidwa juŵamlekasisye kuŵa jwakulalichila mpaka asachililesoni kuŵa jwakulalichila. Naga yeleyi yitendekwe, achakulungwa ŵaŵili chachisimana najo kuti asimichisye ya kwawula kwakwe pasogolo. Pasimichisye kuti mundujo aŵajilwe kuŵasoni jwakulalichila, akusosekwa apeleche chimanyisyo kumpingo kuti, “[Lina lya mundu] alisoni jwakulalichila jwangabatisidwa.”

⁴¹ Wosope ŵakusasongana ni mpingo wa Mlungu lelo jino mpaka asangalaleje ni mgunda wausimu wapeleche Yehofa kwa ŵandu ŵakwe. Tukwete yakulya yambone yejinji yausimu, soni tukwete mesi gausyesyene gejinji gakutukamuchisya kumasya njota jausimu. Konjechesya pelepa, Yehofa akusatuchenjela kupitila mu kajendesye kakwe ka yindu pasi pa ulamusi wa Klistu. (Sal. 23; Yes. 32:1, 2) Kuŵa mu paladaiso jwausimu m’masiku gambesi gakusawusya gano, kututendekasisye kola mtendele wa mumtima.

⁴² Patukupitilisya kuŵa ŵamtendele soni ŵachasa mumpingo, tukusakunda kuti lilanguka lyetu lya usyesyene wa Uchimwene liŵaleje. (Mat. 5:16; Yak. 3:18) Ni chikamuchisyo cha Yehofa, tuchisangalala kwawona ŵandu ŵajinji ali mkummanyilila Yehofa soni kutumichila nawo yalumo patukutenda chakulinga chakwe.