LIJIGANYO 20

Ana Yindu Yijendeje Mwamtuli mu Mpingo wa Chiklistu?

Printed Edition

Yehofa ali Mlungu jwakusatenda yindu mwakulongosoka. (1 Akolinto 14:33, 40) Mwakulandana ni Yehofa, nombe nawo ŵandu ŵakwe akusosekwa atendeje yindu mwakulongosoka kapena kuti mwakulondeka. Ana mu mpingo wa Chiklistu yindu yikusosekwa yijende mwamtuli? Soni ana mpaka tutende yamtuli kuti yindu yijendeje chenene mu mpingo?

1. Ana ŵani ŵakuwulongolela mpingo?

“Klistu ali mtwe wa mpingo.” (Aefeso 5:23) Yesu ni jwakusalongolelaga masengo ga ŵandu ŵa Yehofa pachilambo chosope. Jwalakwe jwasagwile “jwamasengo [“kapolo,” NWT] jwakulupichika ni jwalunda.” Kapoloju apanganyidwe ni achalume ŵakumanyilila chenene yindu ŵakusamanyikwasoni kuti Likuga Lyakulongolela. (Aŵalanje Mateyu 24:45-47.) Mwakulandana ni yiŵatendaga ŵandumetume soni achakulungwa ku Yelusalemu, nombe nalyo Likuga Lyakulongolela likusalolela mipingo pachilambo chosope. (Masengo 15:2) Achalume ŵeleŵa nganaŵa achimlongola ŵa mpingo. Nambo jemanjaji akusaŵalangaga Baibulo kuti amanyilile yakusaka Yehofa kuti ayitendeje pakulolela mipingo. Soni akusampikanilaga Yesu mwakusachilila.

2. Ana achakulungwa ŵamumpingo akusakamula masengo gamtuli?

Achakulungwa ŵamumpingo ali achalume ŵakumanyilila chenene yindu. Jemanjaji akusakamulaga masengo gakwajiganya, kwasamalila soni kwalimbikasya ŵandu ŵa Yehofa pakamulichisya masengo Malemba. Achakulungwaŵa ŵangalipidwaga pakukamula masengo gawo, nambope akusakamulaga masengoga “mwakusachilila, ngaŵa pakusaka kupata malipilo.” (1 Petulo 5:1, 2, NWT) Ŵakutumichila ŵakamuchisya akusiŵakamuchisya achakulungwa ŵamumpingo pamasengo gawo. Mkupita kwandaŵi jemanjaji akusaŵa ŵakuŵajilwa kuŵa achakulungwa ŵamumpingo.

Likuga Lyakulongolela likusasagula achakulungwa ŵane kuŵa ŵakulolela madela. Ŵakulolela madelaŵa akusajijendelega mipingo ni kujisalilaga yajikusosekwa kuya soni kujilimbikasya. Pakukamulichisya masengo Malemba, ŵakulolela madelaŵa akusasagulaga achakulungwa ŵamumpingo soni ŵakutumichila ŵakamuchisya.—1 Timoteo 3:1-10, 12; Tito 1:5-9.

3. Ana jwa Mboni jwalijose akwete udindo wamtuli?

Ŵandu wosope mumpingo akusosekwa ‘kulilumba lina lya Ambuje’ mwakujigala nawo mbali pamisongano soni kukamula masengo gakulalichila.—Aŵalanje Salimo 148:12, 13.

KULIJIGANYA YEJINJI

Chitulijiganye kuti ana Yesu jwaliji mlongola jwamtuli, soni yakusatendaga achakulungwa ŵamumpingo pakumkuya jwalakwe. Soni yampaka tutende kuti tuŵe ŵakamulana ni Yesu soni achakulungwa ŵamumpingo.

4. Yesu ali mlongola jwambone

Alole yakutuŵenda Yesu pa Mateyu 11:28-30 (Aŵalanje), kaneko akambilane chiwusyo chakuyichisyachi:

Ana Yesu ali mlongola jwamtuli, soni ana jwalakwe akusatukamuchisya chamtuli?

Ana achakulungwa ŵamumpingo mpaka amkuye chamtuli Yesu? Alolele FIDIYO.

FIDIYO: Yaŵatesile Achakulungwa Chili Chitendekwe Chisichinya ku Nepal (4:56)

Baibulo jikusasala mwakupikanika chenene yakusosekwa kutenda achakulungwa ŵamumpingo pa masengo gawo.

Aŵalanje Yesaya 32:2 soni 1 Petulo 5:1-3, kaneko akambilane yiwusyo yakuyichisyayi:

Ana akupikana uli mumtima kumanyilila kuti achakulungwa ŵamumpingo akusiŵatendela ŵane chanasa mpela Yesu?
Ana achakulungwaŵa akusamkuyaga Yesu mmatala gane gapi?

5. Achakulungwa akusiŵajiganya ŵane kupitila mu yitendo

Ana Yesu akusasaka kuti achakulungwa ŵamumpingo agawoneje chamtuli masengo gawo? Alolele FIDIYO.

FIDIYO: Achakulungwa Ŵamumpingo Alongoleleje (7:39)

Yesu jwapeleche chisyasyo chambone kwa achakulungwa ŵamumpingo. Aŵalanje Mateyu 23:8-12, kaneko akambilane chiwusyo achi:

Ana pana kulekangana kwamtuli pasikati pa yajikusasala Baibulo ni yayiweni ali mkutenda achimlongola ŵa dini?

A. Chiwulili: Jwamkulungwa akulimbisya unasi wakwe ni Mlungu yimpepe ni liŵasa lyakwe. 1. Akupopela mkanatande kulijiganya Baibulo. 2. Jwalakwe mwakamusyangana ni ŵamkwakwe akumjiganya mwanache jwawo jwamkongwe.

B. Jwamkulungwa julajula, soni ŵamkwakwe apite kukumlola mlongo jwakulwala.

Achakulungwa ŵamumpingo yalumo ni maŵasa gawo akusalolechesya kuti ali paunasi wakulimba ni Yehofa
Achakulungwa akusamsamalilaga jwalijose mumpingo
Achakulungwa akusalalichilaga mwakutamilichika
Achakulungwa akusiŵajiganyaga ŵane, akusakamulaga masengo gakuswejesya soni masengo gane

6. Tukamulaneje ni achakulungwa ŵamumpingo

Baibulo jikusatusalila ligongo lyakwe tukusosekwa kutendaga yindu mwakamulana ni achakulungwa ŵamumpingo. Aŵalanje Ahebeli 13:17, kaneko akambilane yiwusyo ayi:

Ana ligongo chichi Baibulo jikusatusalila kuti twapikanileje ŵakutulolela? Ana wawojo akuyiwona uli?

Aŵalanje Luka 16:10, kaneko akambilane chiwusyo achi:

Ana ligongo chichi tukusosekwa kutendaga yindu mwakamulana ni achakulungwa ŵamumpingo atamose pa yindu yamwanamwana?

YAKUSAŴECHETA ŴANDU ŴANE: “Mpaka tumlambileje Mlungu mwatukusachila.”

Ana pana umbone wamtuli naga mundu akumlambila Mlungu yalumo ni ŵakulupilila achimjakwe?

YALIJIGANYISYE

Yesu ni jwakulongolela mpingo. Mwakusangalala tukusakamulanaga ni achakulungwa ŵakusalongoleledwa ni Yesu. Jemanjaji akusatulimbikasya soni kutujiganya.