Ana “Liso kulipila Liso” Yikugopolela Chichi?

Yajikusasala Baibulo

Lilamusi lyakuti “liso kulipila liso” lyaliji mbali ja Chilamusi cha Mlungu chaŵachipeleche kwa Aisalaeli ŵakala kupitila mwa Mose. Yesu pa Kulalichila kwa Petumbi, jwalikolasilesoni lilamusili. (Mateyu 5:38; Ekisodo 21:24, 25; Detulonomo 19:21) Lilamusili lyapelechedwe pakusaka kulolechesya kuti chilungamo chitendekwe pakwajamukwa ŵatesile yakusakala. Yeleyi yikugopolela kuti chamukocho chikusosekwa kukamulana ni ukulu wa ulemwa wawutendekwe.a

Lilamusili lyalondesyaga ya mundu jwamwulesye mjakwe mwamele. Pakwamba ya mundu jwawulelejo, Chilamusichi chasalaga kuti, “Naga amtemangwile mjakwe liwupa, nombe najo tamtemangule liwupa, naga amtuswile mjakwe liso, nombe najo amtusule liso, naga akumkula lino mjakwe, nombe najo amkule lino. Chindu chilichose chakusakala chakumtendela mjakwe, nombe najo jwakutenda chindujo tamtendele iyoyopeyo.”—Lefitiko 24:20.

Ana chakulinga cha lilamusi lyakuti “liso kulipila liso” chaliji chichi?

Lilamusi lyakuti “liso kulipila liso” nganilyapaga ŵandu ufulu wakuwuchisya chakusakala chatendeledwe. Mmalo mwakwe lyakamuchisyaga ŵakulamula kuti apelecheje chamuko chakuŵajilwa.

Lilamusili lyakamuchisyagasoni kuti ŵandu akatendaga kapena kuganisya yakwawulasya ŵane mwamelepe. Chilamusichi chikusasala kuti, “Ŵandu ŵane pitachipikana ya chilango chachipelechedwe kwa mundu jwakupeleka umboni wa unami, tachitenda woga, ni pangali mundu jwalijose jutachitenda chakusakala cha mtundu welewo.”—Detulonomo 19:20.

Ana lilamusi lyakuti “liso kulipila liso” likwakwaya Aklistu?

Iyayi, lilamusili ngalikwakwaya Aklistu. Lyaliji mbali ja Chilamusi cha Mose, chichamasile ni chiwa cha Yesu.—Aloma 10:4.

Nambope atamose kuti yili myoyo, lilamusili likusatukamuchisya kumanyilila nganisyo sya Mlungu. Mwachisyasyo, lilamusili likusalosya kuti Mlungu akusanonyela chilungamo. (Salimo 89:14) Likusalosya kuti Mlungu akusiŵapa chilango ŵakulemwa “pakukuya chilungamo.”—Yelemiya 30:11.

Nganisyo syakulemwecheka pakwamba ya lilamusi lyakuti “liso kulipila liso

Nganisyo syakulemwecheka: Lilamusi lyakuti “liso kulipila liso” lyaliji lyangasa mnope.

Yakuwona yakwe: Lilamusili nganiliŵa lyangasa. Mmalo mwakwe lilamusili lyakamuchisyaga ŵakulamula kuti ajilole chenene nganiji kuti amanyilile naga mundu juŵampweteche mjawojo ŵatesile yeleyi mwamele. (Ekisodo 21:28-30; Numeli 35:22-25) Lilamusi lyakuti “liso kulipila liso” lyakamuchisyaga kuti ŵandu akapochelaga chilango chakupundanganya malile.

Nganisyo syakulemwecheka: Lilamusi lyakuti “liso kulipila liso” lyatendekasyaga kuti atamose mundu jwamwulesye mjawojo ali atisile nganijo jiŵepe chiŵela mpaka ali amwuchisye.

Yakuwona yakwe: Chilamusichi chasalaga kuti, “Mkawuchisya chakusakala pa mundu jwalijose kapena kumŵenga mjenu.” (Lefitiko 19:18) Mmalo mwakulimbikasya kuti mundu amwuchisyeje jwamlemwechesya, Chilamusichi chalimbikasyaga ŵandu kumkulupilila Yehofa soni litala lyakwe lyakumachisya yakusakala.—Detulonomo 32:35.

Yesu jwatyosisye nganisyo syakulemwecheka pa lilamusili

Yesu jwamanyililaga kuti ŵandu ŵane ŵakwete nganisyo syakulemwecheka pangani ja lilamusi lyakuti “liso kulipila liso.” Yesu jwajongolele nganisyo syawo syakulemwecheka siŵakwete pajwasasile kuti, “Mwapikene kuti ŵandu ŵakala ŵala ŵalamwile kuti, ‘Liso kulipila liso, lino kulipila lino.’ Yambone, nambo une ngumsalila kuti, mundu jwakusakala ngalimbana najo. Naga mundu jwalijose akumputa pa lijeje lya kumlyo, mumgalawuchisye kumpa soni lijakwelyo.”—Mateyu 5:38, 39.

Aganichisye maloŵe gaŵaŵechete Yesu gakuti “mwapikene kuti.” Jwalakwe jwasalaga yiŵatendaga achimlongola ŵa dini ja Chiyuda ŵele ŵalimbikasya ŵandu kuti akusosekwa kuwuchisya naga ŵane ŵalemwechesye. Jwalijiganye Baibulo jwine lina lyakwe Adam Clarke jwaŵechete kuti, “Yikuwoneka kuti Ayuda ŵapanganyisye lilamusili [liso kulipila liso] . . . kuti ŵawuchisyeje ŵandu ŵaŵalemwechesye mwakupelenganya malile.” Yiŵalimbikasyaga achimlongola ŵa dini ja Chiyuda yakuti awuchisyeje naga jwine amlemwechesye, yaliji yakutindana ni chakulinga cha Yehofa pa lilamusili.—Maliko 7:13.

Mwakulekangana ni yeleyi, Yesu jwagombelechesye kuti Chilamusi cha Mlungu chigonile pa chinonyelo. Jwalakwe jwatite, “Mwanonyeleje Ambuje, Mlungu jwetu . . .’ Lyeleli ni lilamusi lyekulungwa soni lyandanda nditu. Lyaŵili lyakwe lyakulandana nalyo ni ali: Mumnonyeleje mjenu mpela mwamkulinonyelela m’mwe mwasyene. Malamusi gosope ga Mose soni yosope yiŵajiganyisye ŵakulochesya, yikusasimanikwa pa malamusi gaŵiliga.” (Mateyu 22:37-40) Yesu jwajiganyisye kuti chinonyelo ni chachikusamanyikasya Aklistu ŵasyesyene ngaŵaga kuwuchisya naga mundu jwine akulemwechesye.—Yohane 13:34, 35.

a Mfundo jakwayana ni kusamalila magamboji, jele ndaŵi sine ŵajikolangaga m’Chilatini kuti lex talionis jasimanikwagasoni mu malamusi gakusamalilila magambo ga ŵandu ŵane ŵakala.