“Mnonyelaneje”

1-3. Ana patukujigalila chisyasyo cha Yehofa pangani jakulosya chinonyelo pakusaŵa yakuyichisya yamtuli?

“KUPELEKA kukusampa upile mundu kulekangana ni kupochela.” (Masengo 20:35) Maloŵe ga Yesuga gakusagombelechesya usyesyene wakusosekwa mnope wakuti mundu jwakusalosya chinonyelo chisyesyene chachipochela mbote. Atamose kuti kunonyeledwa kukusamtendekasya mundu kusangalala, nambo kumnonyela mundu ni kwakukusamtendekasya mundu kusangalala mnope.

² Atati ŵetu ŵakwinani ni ŵakusamanyilila mnope yeleyi kupunda m’weji. Mpela mwatuyiwonele m’mitwe jamunyuma ja mbali ajino, Yehofa ali chisyasyo chambone pangani jakulosya chinonyelo. Pangali mundu jwalosisye chinonyelo chekulungwa soni kwandaŵi jelewu kumpunda jwalakwe. Ni ligongo lyakwe Yehofa akusamsala kuti “Mlungu jwakusangalala.”—1 Timoteo 1:11, NWT.

³ Mlungu jwetu jwachinonyelo akusasaka kuti tuŵeje mpela jwalakwejo, mnopemnope pangani jakulosya chinonyelo. Pa Aefeso 5:1, 2 pakusatusalila kuti, “Ŵanache ŵakunonyelwa ŵa Mlungu, mlinjeje kuŵa mpela jwalakwejo. Mnonyelaneje.” Patukujigalila chisyasyo cha Yehofa pangani jakulosya chinonyelo, tukusaŵa ŵakusangalala mnope. Tukusaŵa ŵakwikutila ligongo lyakumanyilila kuti tukumsangalasya Yehofa, jwele kupitila mmaloŵe gakwe akusatulimbikasya kuti ‘tunonyelaneje.’ (Aloma 13:8) Nambo panasoni magongo gane gagakusatutendekasya kuti ‘tunonyelaneje.’

4, 5. Ligongo chichi tukusosekwa kulosya chinonyelo chisyesyene kwa ŵakulupilila achimjetu?

⁴ Ligongo chichi tukusosekwa kulosya chinonyelo kwa ŵakukulupilila achimjetu? Mwakata mpaka tujile kuti chinonyelo chikusamanyikasya Aklistu ŵasyesyene. Naga nganitukola chinonyelo yili yangakomboleka kuŵa ŵakamulana ni Aklistu achimjetu. Kupunda pelepa nganituŵa tuŵele ŵakusosekwa kwa Yehofa. Kwende tulole yagakusati Maloŵe ga Mlungu pakugombelechesya usyesyene welewu.

⁵ Chilo chakumalisya cha umi wakwe wa pachilambo chapasi, Yesu jwasalile ŵakumkuya ŵakwe kuti, ‘Sambano une ngumpa jemanja lilamusi lyasambano lyakuti: Mnonyelaneje jwine ni mjakwe. Mpela munamnonyele une mula, jemanja mkuŵajilwasoni kuti mnonyelaneje jwine ni mjakwe. Naga mkunonyelana jwine ni mjakwe, pelepo ŵandu wosope tachimanyilila kuti jemanja mli ŵakulijiganya ŵangu.’ (Yohane 13:34, 35) Maloŵe gakuti “mpela munanonyele une mula,” gakulosya kuti tukusosekwa kulosya chinonyelo mpela chiŵalosisye Yesu. Mu Mtwe 29 twayiweni kuti Yesu jwalosisye chisyasyo chambone pangani jakulosya chinonyelo chisyesyene, mwakuŵika yakusaka ya ŵane pasogolo pa yakwe. M’wejisoni tukusosekwa kulosya chinonyelo chisyesyene, soni tukusosekwa kuchilosya mwakuwonechela chenene kuti ŵandu ŵanganaŵa mumpingo Wachiklistu achiwoneje chinonyelocho. Yisyene, chinonyelo chetu chisyesyene chikusatumanyikasya kuti tuli ŵakumkuya ŵasyesyene wa Klistu.

6, 7. (a) Ana tukusamanyilila chamtuli kuti Maloŵe ga Yehofa gakusagombelechesya kusosekwa kwakulosya chinonyelo? (b) Ana maloŵe ga Paulo gagakusasimanikwa pa 1 Akolinto 13:4-8 gakusasala ya mbali japi ja chinonyelo?

⁶ Nambi uli naga nganitukola chinonyelo? Ndumetume Paulo jwatite, “Naga jwangali chinonyelo, yakuŵecheta yangu yili mpela chisyano chagambaga kusona, kapena chinganga chagambaga kutenda masegwe.” (1 Akolinto 13:1) Chinganga chagambaga kutenda masegwe chikusakoposya lisegwe mnope. Nambi uli chisyano chagambaga kusona? Mabaibulo gane gagopolele kuti “belo jakusinganga.” Chelechi chili chisyasyo chakamula mtima kwabasi. Mundu jwangali chinonyelo ali mpela chida chakwimbila chachikusasinganga mnope mmalo mwakuti chasangalasyeje ŵandu. Ana mundu jweleju mpaka akamulane ni achimjakwe? Paulo jwasasilesoni kuti, “Ngakole chikulupi chekulungwa chakuti mpaka ni kupakombola kusejesya matumbi, nambo naga jwangali chinonyelo, une nganimba kose kandu.” (1 Akolinto 13:2) Agambe kuganichisya. Mundu jwangali chinonyelo ali “jwangali mate” atamose atende uli. (The Amplified Bible.) Yeleyi yikulosya kuti Maloŵe ga Yehofa gakusagombelechesya kusosekwa kwakulosya chinonyelo.

⁷ Nambope ana mpaka tulosye chamtuli ndamoji patukutenda yindu ni ŵane? Kuti tujanje chiwusyochi, kwende tulole maloŵe ga Paulo gagakusasimanikwa pa 1 Akolinto 13:4-8. Lilembali ngalikusala yakusati Mlungu pakutunonyela m’weji kapena yatukusati pakumnonyela Mlungu. Mmalo mwakwe, Paulo akusala yampaka tutende kuti tunonyelaneje jwine ni mjakwe. Jwalakwe akusala yele chinonyelo chikusatenda soni yele ngachikusatenda.

 8 Ana kuwusimana mtima mpaka kutukamuchisye chamtuli patukutenda yindu ni ŵane?

⁸ “Chinonyelo chili chakuwusimana mtima.” Kuwusimana mtima kukusagopolela kundililana. Tukusosekwa kuŵa ŵakuwusimana mtima. Ligongo lyakuti tukusatumichila pampepe soni tuli ŵangali umlama nganikuŵa kulemwa kuganisya kuti ndaŵi sine Aklistu achimjetu mpaka atukuŵasye soni m’weji mpaka twakuŵasye. Nambo kuwusimana mtima mpaka kutukamuchisye kupilila yakusawusya yamwanamwana yayikusapagwa patukutenda yindu ni ŵane kwineku tuli mkulimbikasya mtendele wa mumpingo.

 9. Ana mpaka twalosye ŵane chanasa m’matala gamtuli?

⁹ “Chinonyelo chili . . . chakulisinga [“chachanasa,” NWT].” Chanasa chikusawonechela mu yitendo soni m’maloŵe gakulosya kwaganichisya ŵane. Chinonyelo chikusatutendekasya kupata matala gakulochesya chanasa, mnopemnope kwa ŵandu ŵakusosechela chikamuchisyo. Mwachisyasyo, jwakulupulila mjetu jwamkalambale mpaka alajeje ni lipowo mwamti mpaka asacheje jwine ali amjendele kuti akamlimbikasye. Jwamkongwe jwakulela jika ŵanache kapena mlongo jwele ŵamkwakwe nganaŵa mboni mpaka asosekweje chikamuchisyo. Mundu jwine jwakulwala kapena jwakulaga mlitala line lyakwe mpaka asosekweje maloŵe gakulimbikasya gakutyochela kwa mjawo jwakulupichika. (Misyungu 12:25; 17:17) Patukulosya chanasa m’matala gelega, tukusalosya kuti tukwete chinonyelo chisyesyene.—2 Akolinto 8:8.

10. Ana chinonyelo chikusatukamuchisya chamtuli kulimbikasya usyesyene soni kuŵecheta yisyene, atamose pandaŵi jele kutenda yeleyi kuli kwakusawusya?

¹⁰ “Chinonyelo . . . chikusasengwa ni yakuwona yisyesyene.” Baibulo jine jikusati, “Chinonyelo chikusaŵichila kunyuma usyesyene.” Chinonyelo chikusatutendekasya kuti tulimbikasyeje usyesyene soni kuti ‘tuŵecheteje yakuwona kwa jwine ni mjakwe.’ (Sakaliya 8:16) Mwachisyasyo, naga mjetu jwatukusamnonyela atesile ulemwa wekulungwa, chinonyelo chetu pa Yehofa soni pa jwakulemwajo chichitutendekasya kuya malamusi ga Mlungu. Tuchiŵambala kusisa chakulemwacho kapena kupata magongo gakulikululuchila kapenasoni kulambusya. Yisyene, kwitichisya yisyesyene ya nganijo mpaka kuŵe kwakusawusya. Nambo naga tukusamnonyela mjetujo tuchisaka kuti apochele chamuko chachinonyelo chakutyochela kwa Mlungu. (Misyungu 3:11, 12) Mpela Aklistu ŵakusalosya chinonyelo, tusimichisyeje “kutenda yosope mwachilungamo.”—Ahebeli 13:18.

11. Ligongo lyakuti chinonyelo “chikusasilila yindu yosope,” ana tukusosekwa kulingalinga kutenda chichi ni yakulepela ya ŵakulupilila achimjetu?

¹¹ “Chinonyelo changapela pakutenda yindu [“chikusasilila yindu yosope,” NWT].” Pa 1 Petulo 4:8 pakusati, “Chinonyelo chikusasisa ulemwa wejinji.” Yisyene, Mklistu jwakusalongoleledwa ni chinonyelo ngakusatamila kulola yakulepela ya Aklistu achimjakwe. Ndaŵi syejenji, yakulepela ya ŵakulupilila achimjetu yikusaŵa yamwanamwana mwamti mpaka tugambe kuyisilila ni chinonyelo.—Misyungu 10:12; 17:9.

12. Ana ndumetume Paulo jwalosisye chamtuli kuti jwamkulupililaga Filimoni, soni ana mpaka tulijiganye chichi kutyochela pa chisyasyo cha Paulochi?

¹² “Chinonyelo . . . chikusakulupilila ndaŵi syosope.” Baibulo jaŵagopolele Moffatt jikusasala kuti chinonyelo “ndaŵi syosope chikusasachilila kulupilila yambone.” Ngatukusakayichila yakulinga ya ŵakulupilila achimjetu. Chinonyelo chikusatukamuchisya “kulupilila yambone” ya abale ŵetu soni kwadalila.a Kwende tulole chisyasyo chachikusimanikwa mu chikalata cha Paulo chaŵamlembele Filimoni. Paulo jwamlembele Filimoni chikalatachi pakusaka kumlimbikasya kuti ampochele Onesimo juŵatisile jwele sambano jwaŵele Mklistu. Mmalo mwakumkanganichisya, Paulo jwamŵendile Filimoni mwachinonyelo. Jwalakwe jwatite, “Ngumlembela yeleyi ligongo lyakuti ngukulupilila kuti timchiyitenda yingumŵendayi. Soni ngumanyilila kuti timchiyitenda kupunda yele yinamŵendileyi.” (Ndime 21) Yeleyi yikulosya kuti jwalakwe jwakulupililaga kuti Filimoni chatende yakuŵajilwa. Patukulosya kwakulupilila achimjetu m’litala lyeleli, tukusitwakamuchisya kuti atendeje yambone.

13. Ana tukusalosya chamtuli kuti tukusajembecheya yambone mwa abale ŵetu?

¹³ “Chinonyelo . . . changajasa mtima.” Kupwatika pa kukulupilila, chinonyelo changajasa mtima. Ligongo lyachinonyelo, tukusajembecheya yambone kutyochela kwa abale ŵetu. Mwachisyasyo, naga m’bale “akusimanikwa ali mkutenda ulemwa,” tukusajembecheya kuti chapikanile yiliyose yakumkamuchisya kuti ajongolele. (Agalatiya 6:1) Tukusajembecheyasoni kuti ŵandu ŵawujile munyuma mwausimu lisiku line chachitandilasoni kutenda yindu chenene. Tukusaŵa ŵakuwusimana mtima patukwakamuchisya jemanjaji kuti chikulupi chawo chiŵe chakulimba. (Aloma 15:1; 1 Atesalonika 5:14) Atamose naga mjetu jwatukusamnonyela alesile usyesyene, tukusajembecheyape kuti lisiku line chachiwujila kwa Yehofa, mpela muŵatendele mwanache jwamsokonechele mu chisyasyo cha Yesu.—Luka 15:17, 18.

14. Ana kupilila kwetu mpaka kulinjidwe chamtuli mumpingo, soni ana chinonyelo mpaka chitukamuchisye kutenda chichi?

¹⁴ “Chinonyelo . . . chikusapilila ndaŵi syosope.” Kupilila kukusatukamuchisya kuti tukawujila panyuma patusimene ni yakusawusya. Yindu yampaka yilinje kupilila kwetu ngayikusatyochelape kusa kwa mpingo. Ndaŵi sine mpaka tusimaneje ni yakusawusya kutyochela mumpingo. Ligongo lya ungali umlama, abale ŵetu ndaŵi sine mpaka atukuŵasye. Jwine paŵechete mwangaganisya chenene, mpaka yitupweteche mumtima. (Misyungu 12:18) Mwinesoni ngani sine mumpingo nganisiŵa sisamalilidwe mpela mwatuganichisyeje. M’bale jwatukusamdalila mpaka atende yindu yakutukuŵasya, mwamti mpaka tuliwusyeje kuti, ‘Mklistu mpaka atende yeleyi?’ Patusimene ni yindu mpela yeleyi, ana tuchileka kusongana soni kuleka kumtumichila Yehofa? Naga tukwete chinonyelo, nganituŵa tutesile yeleyi. Yisyene, chinonyelo chikusatukamuchisya kuti yakulepela ya ŵakulupilila achimjetu yikatusiŵa m’meso mwamti ni kulepelaga kulola yambone yakutenda. Chinonyelo chikusatukamuchisya kuti tupitilisye kuŵa ŵakulupichika kwa Mlungu soni kuwukamuchisya mpingo mwangasamala kandu ni yampaka atende kapena kuŵecheta mundu ligongo lya ungali umlama.—Salimo 119:165.

15. Ana jelasi ni chichi, soni ana chinonyelo chikusatukamuchisya chamtuli kuti tuŵambale ndamo jakonangaji?

¹⁵ “Chinonyelo changali wiwu” kapena kuti jelasi. Jelasi mpaka jimtendekasye mundu kusaka yindu yakwete ŵane kuti yiŵe yakwe, chinga katundu, maudindo kapena yakusakombola kutenda. Jelasi jeleji jili jakonanga mwamti naga ngasamala mpaka jijonanje mtendele mumpingo. Ana chichi champaka chitukamuchisye kuŵambala ndamoji? Chinonyelo ni champaka chitukumuchisye. Chinonyelochi mpaka chitukamuchisye kusangalala ni ŵandu ŵakuwoneka kuti yindu yikwajendela chenene kupunda m’weji. (Aloma 12:15) Chinonyelo chikusatukamuchisya kuti tukatumbilaga naga mundu jwine akupochela uchimbichimbi ligongo lya yindu yambone yatesile.

16. Naga tukusitwanonyela abale ŵetu, ligongo chichi tukusosekwa kuŵambala kulikwesya ligongo lya yatukutenda pakumtumichila Yehofa?

¹⁶ “Chinonyelo . . . changalilumba kapena kulikwesya.” Chinonyelo chikusatukamuchisya kuŵambala kulilosya ni yatukombwele kutenda kapena umanyilisi watukwete. Naga tukusitwanonyela abale ŵetu, ana ndaŵi syosope tuchilikwesya ligongo lya yatutesile mu utumiki kapena maudindo gatukwete mumpingo? Kulikwesya kwamti myoyo mpaka kwatengusye ŵane, mwamti mpaka aliwoneje kuŵa ŵangali mate pakulindanya ni m’weji. Chinonyelo changatutendekasya kulilumba ni yatukusakombola kutenda pakumtumichila Mlungu. (1 Akolinto 3:5-9) Kupwatika pelepa, chinonyelo ‘changalikwesya.’ Baibulo jine jagopelele kuti chinonyelo ‘changaŵichila kunyuma nganisyo syakwe syakuwoneka mpela sili syakusosekwa.’ Chinonyelo chikusatukamuchisya kuŵambala kulikwesya.—Aloma 12:3.

17. Ana chinonyelo chikusatulimbikasya kuti twaganichisyeje ŵane m’litala lyamtuli, soni ana tukusosekwa kuŵambala ndamo japi?

¹⁷ “Chinonyelo changatenda chipongwe [“yakusakala,” NWT].” Mundu jwakusatenda yakusakala akusatenda yindu m’litala lyakwakuŵasya ŵane. Mundu jwakusatenda yeleyi nikuti jwangali chinonyelo ligongo akusalosya kuti ali jwangasamala mwakusapikanila ŵane mumtima. Mwakulekangana ni yeleyi, chinonyelo chikusatulimbikasya kwaganichisya ŵane. Chinonyelo chikusatutendekasya kwachimbichisya ŵakulupilila achimjetu soni kola ndamo syambone, syasikusamchimbichisya Mlungu. Myoyo, naga tukwete chinonyelo, ‘ngasituŵecheta yakuŵagula’ kapena ndamo jilijose jampaka jasimonjesye kapena kwakuŵasya Aklistu achimjetu.—Aefeso 5:3, 4.

18. Ligongo chichi mundu jwakwete chinonyelo ngakusiŵakanganichisya ŵane kukuya nganisyo syakwe?

¹⁸ “Chinonyelo . . . changalinonyela.” Baibulo jine jikusagopolela kuti, “Chinonyelo changakanganichila nganisyo syakwe.” Mundu jwakwete chinonyelo ngakusiŵakanganichisya ŵane kukuya nganisyo syakwe mpela kuti nganisyo syakwepe ni syasili syakamuchisya. Jwalakwe ngakusiŵanyenjelela ŵane pakamulichisya masengo machili gakwe kuti ŵandu akuyeje nganisyo syakwe. Mundu jwamakani ni kuti ali jwakupoka. Pakwamba ya ndamo jeleji Baibulo jikusati, “Kupoka kukusamlongolela mundu ku chonasiko.” (Misyungu 16:18) Naga tukusitwaganichisya abale ŵetu, tuchichimbichisya nganisyo syawo soni naga yili yakomboleka tuchikundilila nganisyo syawo. Naga tukukundilila nganisyo sya ŵane tuchikamulana ni maloŵe ga Paulo gakuti, “Mundu akagambaga kulisosela jikape yambone, nambo mnopemnope ŵasosele achimjakwe yambone.”—1 Akolinto 10:24.

19. Ana chinonyelo chikusatukamuchisya chamtuli ŵane patulemwechesye?

¹⁹ “Chinonyelo . . . changatumbila, soni changasunga ngani naga jwine achilemwechisye.” Chinonyelo changatumbila chitema ligongo lya yakuŵecheta kapena yakutenda ya ŵane. Yisyene, chili chipago kutumbila naga jwine atukuŵesye. Nambo atamose tuli tukwete magongo gakupikanika gakutumbilila, chinonyelo changatumbila kwandaŵi jelewu. (Aefeso 4:26, 27) Ngatukusasunga munganisyo maloŵe kapena yitendo yakupweteka yatutendele jwine mpela kuti tukulemba m’buku ni chakulinga chakuti tukayiliŵalila. Mmalo mwakwe, chinonyelo chikusalimbikasya kumsyasya Mlungu jwetu jwachinonyelo. Mpela mwatwalijiganyisye mu Mtwe 26, Yehofa akusatukululuchila naga pana magongo gakupikanika gakutendela myoyo. Yehofa patukululuchile akusaliŵalila, kugopolela kuti jwangasunga yakulemwa yetu kuti chatupe chamuko msogolo. Tukusayamichila mnope ligongo lyakuti Yehofa jwangasunga yakulemwa yetu.

20. Ana tukusosekwa kutenda chichi naga jwakulupilila mjetu atesile chakulemwa mwamti akulaga ni yakuyichisya ya ulemwawo?

²⁰ “Chinonyelo changasangalala naga jwine atesile yangalumbana.” Baibulo jine jagopolele kuti, “Chinonyelo . . . changasangalala ni yakulemwa ya ŵane.” Baibulo ja Moffatt jila jasasile kuti, “Chinonyelo changasangalala ata panandi jwine patesile chakulemwa.” Chinonyelo changasangalala ni chakusakala. Myoyo, ngatukusanandiya chakulemwa chilichose. Ana tukusatenda uli naga jwakulupilila mjetu atesile chakulemwa mwamti akulaga ni yakuyichisya ya chakulemwacho? Chinonyelo changasangalala, ni kuŵechetaga munganisyo kuti, ‘Bola pele. Akuŵajilwa kusimana ni yeleyo.’ (Misyungu 24:17) Nambope, tukusasangalala naga mundu jwakulemwajo apitikwiche mtima.

21-23. (a) Ana Paulo jwagopolelaga chichi pajwatite “chinonyelo chili changamala”? (b) Ana mumtwe wakuyichisya tuchijanga chiwusyo chapi?

²¹ “Chinonyelo chili changamala.” Ana Paulo jwagopolelaga chichi pelepa? Mwakamulana ni ngani jaŵalondesyaga, jwalakwe jwasalaga ya mituka jakusimonjesya ja msimu jaŵakwete Aklistu ŵandanda. Mituka jeleji jalosyaga kuti Mlungu akusangalala ni mpingo wasambanowo. Nambo ngaŵa Aklistu wosope ŵakakombwele kuposya, kulochesya kapena kuŵecheta yiŵecheto yachilendo. Nambope, jeleji nganijiŵa ngani ligongo mituka jakutenda yakusimonjesya jaliji jakuti jichimala. Nambo pana chindu chine chachikasigalile chele Mklistu jwalijose jwasosekwaga kola. Chaliji chapajika soni chikatemi kwa ndaŵi jelewu kupunda mtuka uliwose wakutenda yakusimonjesya. Ni ligongo lyakwe Paulo chinduchi ŵachisasile kuti, “litala lyakupunda yosope yene.” (1 Akolinto 12:31) Ana “litala lyakupunda yosope yene” lili chichi? Lyaliji litala lyachinonyelo.

²² Yisyene, chinonyelo cha Chiklistu chaŵachisasile Paulo “chili changamala,” kugopolela kuti chichitama mpaka kalakala. Mpaka masiku agano, chinonyelo chisyesyene chikusichamanyikasyaga ŵakuya ŵa Yesu ŵasyesyene. Ana ngatukuwuwona umboni wa chinonyelochi mumpingo wa ŵakulambila ŵa Yehofa pachilambo chosope? Chinonyelochi ngasichimala, ligongo lyakuti Yehofa akwasalila ŵakutumichila ŵakwe ŵakulupichika kuti chachapa umi wangamala. (Salimo 37:9-11, 29) Kwende tupitilisye ‘kunonyelana.’ Naga tukutenda yeleyi tuchisangalala. Kupunda pelepa tuchipitilisya kuŵa ni umi, elo kupitilisya kulosya chinonyelo mpaka kalakala kwineku tuli mkumsyasya Mlungu jwetu jwachinonyelo, Yehofa.

²³ Mumtwe awuno tulijiganyisye yampaka tutende kuti tulosyeje chinonyelo. Nambo ligongo lyakuti tukusapindula ni chinonyelo cha Yehofa nambosoni machili gakwe, chilungamo soni lunda lwakwe, mwine mpaka tuliwusye kuti, ‘Ana mpaka losye chamtuli kuti ngusinamnonyela Yehofa yisyesyene?’ Chiwusyochi chichijanjidwe mumtwe wakumalisya wa bukuji.