Lunda Lwa Mlungu Luli Lwakusokoka Mnope

1, 2. Ana chakulinga cha Yehofa pa lisiku lya 7 chaliji chichi, soni ana pa lisikuli lunda lwa Yehofa lwalinjidwe uli?

YIJONASICHE! Ŵandu ali yakupanganyikwa yapenani yaŵayipanganyisye pa lisiku lya 6. Yehofa jwatite “yosope yiŵayipanganyisyeyo yaliji yambone mnope” kupwatikapo ŵandu. Nambo mwachitema ŵandu ŵaŵele ŵakutuluka mnope. (Genesesi 1:31) Palyatandaga lisiku lya 7, Adamu soni Hawa ŵasagwile kuŵa kumbali ja Satana jakwimuchila. Jemanjaji ŵayikasisye ulemwa, ungali umlama soni chiwa.

² Yeleyi yatendekasisye kuwoneka mpela kuti chakulinga cha Yehofa chakwamba lisiku lya 7 chisokonechele. Lisikuli, lyaliji lyelewu kwa yaka masawusande. Yehofa jwaliswejesye lisikuli, soni mkati mwa lisikuli chilambo chosope chikaŵele paladaiso mwele mukagumbele ni ŵandu ŵamlama. (Genesesi 1:28; 2:3) Nambo ana yeleyi yikakomboleche uli panyuma pakwimuchila? Ana Mlungu akatesile uli? Pelepatu lunda lwa Yehofa lwalijidwe mnope.

3, 4. (a) Ligongo chichi yaŵatesile Yehofa kwa ŵandu ŵakwimuchila chili chindu chakutesya lung’wanu chakulosya lunda lwakwe? (b) Ana kulinandiya kukusatutendekasya kukumbuchila chichi patukulijiganya ya lunda lwa Yehofa?

³ Yehofa jwatesilepo kandu mwachitema. Jwalakwe jwapeleche chilango kwa ŵandu ŵakwimuchilawo. Ndaŵi jijojo jwalosisye yachachitenda kuti alinganye yakusawusya yaŵayikasisye jemanjaji. (Genesesi 3:15) Chakulinga cha Yehofa chatandile mu Edeni mpaka mu yaka masawusande yosope ya mbili ja ŵandu soni mpaka msogolo. Chili changasawusya soni chakamuchisya mwamti mundu jwakusaŵalanga ni kuganichisyaga mwakusokoka ya chakulingachi akusapindula. Nambosoni, chakulinga cha Mlungu chikusakwanilichikwa. Chakulinga chakwe chikupwatikapo kumasya yakusakala, ulemwa soni chiwa. Chichitendekasya kuti ŵandu ŵakulupichika aŵe ŵamlama. Yosepeyi yichitendekwa lisiku lya 7 mkanilimale. Yisawusye yikasawusya, Yehofa chachikwanilitsa chakulinga chakwe chakwamba chilambo chapasi soni ŵandu pandawi jakwe.

⁴ Yeleyi yikusatutendekasya lung’wanu. Ngati myoyo? Pakwamba ya Yehofa, ndumetume Paulo jwalembile kuti, “Lunda ni umanyilisi wakwe yili yakusokoka mnope.” (Aloma 11:33) Patukulijiganya mbali syakulekanganalekangana sya ndamo ja Mlunguji, kulinandiya kuchitukamuchisya kukumbuchila kuti nganituŵa tumanyilile lunda losope lwa Mlungu. (Yobu 26:14) Chandanda, kwende tulole ndamo ja Mlunguji kuti jikusagopolela chichi.

5, 6. Ana umanyilisi ni lunda yili yakamulana wuli, soni ana umanyilisi wa Yehofa uli wekulungwa wuli?

⁵ Lunda luli lwakulekangana ni umanyilisi. Makompyuta gakusasunga umanyilisi wejinji, nambo mpaka yiŵe yangapikanika kujila kuti gali galunda. Atamose yili myoyo, umanyilisi ni lunda yikusakamulana. (Misyungu 10:14) Mwachisyasyo, naga akusaka chikamuchisyo kuti apole ku ulwele wawo wekulungwa, ana mpaka awonegane ni mundu jwakumanyilila panandi kapena jwangakumanyilila kwene yachipatala? Yili yakayikasya. Myoyo, umanyilisi ukusamkamuchisya mundu kuti aŵe jwalunda.

⁶ Yehofa akwete umanyilisi wangali malile. Mpela “mwenye jwa mpaka kalakala” jwalakwepe ni juŵapali kutandila kalakala. (1 Timoteo 1:17) Soni kwa yaka yangaŵalanjika, jwalakwe aŵele ali mkumanyilila chindu chine chilichose. Baibulo jikusati, “Pangali chakupanganyidwa changanaŵa Mlungu achiweni. Nambo kwa jwalakwe yindu yosope yili pakuwonechela soni akusayiwona, mwamti wosope tuchijanga magambo kwa jwalakwe.” (Ahebeli 4:13, NWT; Misyungu 15:3) Mpela Jwakupanganya, Yehofa akusamanyilila yindu yaŵapanganyisye soni akusamanyilila yitendo ya ŵandu kutandila pandanda. Akusawungunya yosope yayili mumtima mwa mundu. (1 Mbili 28:9) Ligongo lyakuti Yehofa ŵatupanganyisye ni ufulu wakusagula yakutenda, jwalakwe akusasangalala patusagwile yindu mwalunda. Mpela “ŵakupikana lipopelo,” Yehofa akusapikana mapopelo gangaŵalanjika pandaŵi jimo. (Salimo 65:2) Soni yili yangalajila kusala, Yehofa akusakumbuchila yindu.

7, 8. Ana Yehofa akusalosya chamtuli kupikanichisya, kumanyilila yindu soni lunda?

⁷ Yehofa nganagamba kolape umanyilisi. Jwalakwe akusamanyilila kukamulana kwa yakutendekwa soni yosope yakwayana ni yakutendekwayo. Jwalakwe akusawungunya kaneko ni kwelusya, akusalekanganya pasikati pa yambone ni yakusakala, yakusosekwa ni yangasosekwa. Konjechesya pelepa, jwalakwe jwangalola penanipe nambo akusawungunya mtima. (1 Samuele 16:7) Myoyo, Yehofa akusamanyilila soni kupikanichisya yindu. Ndamo syelesi sikusapunda gamba kumanyilila yindu. Nambo lunda lukusapunda yosopeyi.

⁸ Lunda luli kukamulichisya masengo umanyilisi soni kupikanichisya yindu kuti mundu akombole kutenda yakusaka. Nambosoni, maloŵe gandanda ga m’Baibulo gaŵagagopolele kuti “lunda” kusyesyene gakusagopolela kuti “kukamula masengo gakamuchisya” kapena “lunda lwakamuchisya.” Lunda lwakwe nganiluwa lwakwamba kuwecheta. Luli lwakamuchisya soni lukusakamula masengo. Ligongo lyakuti Yehofa akusamanyilila yindu yejinji soni akusapikanichisya yindu mnope, jwalakwe akusatenda yisagula yambone soni akusayitenda m’litala lyambone mnope. Lwelelu luli lunda lusyesyene. Yitendo ya Yehofa yikusalosya kuti yaŵaŵechete Yesu yili yisyene yakuti, “Lunda . . . lukusawoneka kuti luli lwakuwona malinga ni yitendo yakwe.” (Mateyu 11:19) Masengo ga Yehofa ga pachilambo chosope gakusapeleka umboni wamachili wa lunda lwakwe.

9, 10. (a) Ana Yehofa akwete lunda lwamtuli, soni alulosisye chamtuli? (b) Ana selo jikusapeleka umboni wamtuli pakwamba ya Yehofa?

⁹ Ana pakwete patesile lung’wanu ni chindu chapanganyisye mundu jwakusakamula masengo gapayala? Yeleyi yikusalosya kuti mundujo ali jwalunda mnope. (Ekisodo 31:1-3) Lunda lwelelu lukusatyochela kwa Yehofa jwali msyene lunda. Pakwamba ya Yehofa, mwenye Daudi jwalembile kuti, “Ngwalumba ŵalakwe pakuŵa ŵangumbile mwakogoya ni mwakusimonjeka, masengo gawo gosope gali gakusimonjeka, ŵalakwe akumanyilila une chenene.” (Salimo 139:14) Yisyene, patukulijiganya mwachiŵelele chilu cha mundu, ni patukusasimonga mnope ni lunda lwa Yehofa.

¹⁰ Mwachisyasyo, umi wa mundu ukusatanda ni selo jimo. Selo ja lindanda lya ŵakongwe likusasimana ni ulume wa ŵalume. Ndaŵi jijojo jikusatanda kugaŵikangana. Pambesi pakwe pakusapangwa mundu jwakusakola maselo 100 tililiyoni. Maseloga gali gamwanamwana. Chiŵandika maselo 10,000 mpaka gakwane pa kambeju ka linyololo. Nambo, jilijose japanganyidwe m’litala lyakusawusya kulipikanichisya. Selo jikwete tuyindu twamwanamwana twejinji mkati mwakwe kupunda machini kapena fakitale jilijose. Ŵasayansi akusati selo jili mpela msinda wakola lutenje. Wakola milango jakwijilila ni jakopochela, matala gakutumichisya yindu, matala gakutumichisya utenga, malo gakupanganyichisya machili, malo gakupanganyila yindu, kwakwasila yindu ni kuyipanganyasoni, msinda wakola yindu yakuwuchenjela, soni pasikati paselo lili likulu lyasindawo. Nambosoni, kwa maawala gamnono selo jikusakombola kugaŵikangana nikuŵa maselo gaŵili gakulandana.

11, 12. (a) Ana ni chichi chachikusatendekasya kuti maselo ga mwanache jwangapagwa galilekanganyeje, soni ana yeleyi yikukamulana chamtuli ni lilemba lya Salimo 139:16? (b) Ana ututu wa mundu ukusalosya chamtuli kuti ŵatugumbile “mwakusimonjeka”?

¹¹ Yili yisyene kuti maselo gosope nganigaŵa gakulandana. Maselo gamwanache jwangapagwa pagakugaŵikangana, gakusakamula masengo gakulekangalekangana. Maselo gane gakusaŵa ga meso, ga mawupa, ga minowu, ga miyasi, kapena ga mitasi ja mu ututu. Yindu yosopeyi yikusapanganyidwa mu “layibulale” jamapulani ga mwachachiŵela mundu, jakolanjidwa DNA. Yili yakusangalasya kuti Daudi jwasalilidwe kuwecheta ya Yehofa kuti, “Meso gawo gambweni ndili m’chitumbo, yiŵalo yangu yosope yalembedwe m’buku jawo.”—Salimo 139:16, NWT.

¹² Mbali sine sya chilu syapanganyidwe mwakusakuwusya kusipikanichisya. Mwachisyasyo, kwende tukambilane ya ututu wa mundu. Ŵane akusati pachilambo chapasi chindu chakusawusya kuchipikanichisya chili ututu. Ukwete maselo ga mitasi jakutumisya soni kopochela ma utenga chiŵandika 100 biliyoni. Winji wakwe uli wakulandana ni likuga lya ndondwa lya uchinga usiku wetuwu. Selo jilijose jikusapanganya nyambi masawusande ni kuja kulumbikana ni maselo gane. Ŵasayansi akusaŵecheta kuti ututu mpaka usunje umanyilisi wosope wawuli m’malayibulale gosope gapachilambo chapasi, mwamti ŵandu nganaŵa amanyilile winji wa yindu yampaka ututu usunje. Ŵasayansi ajitichisye kuti nganaŵa akombwele kupikanichisya mwawukusakamuliga masengo ututu, atamose kuti yaka yejinji yipite ali kulijiganya ya chiŵalo chachapanganyidwe ‘mwakusimonjekachi.’

13, 14. (a) Ana mbamba soni yakupanganyikwa yine yikusalosya chamtuli kuti yili “yalunda” soni ana yeleyi yikusatujiganya chichi pakwamba ya juŵayipanganyisye? (b) Ligongo chichi mpaka tuŵechete kuti yakupanganyidwayi mpela ulusi wa lundandambuli, yapanganyidwe “mwalunda”?

¹³ Nambo, ŵandu agambile kuŵa chisyasyo chimo cha lunda lwa Yehofa lwakupanganya yindu. Lilemba lya Salimo 104:24 likusati, “Ŵalakwe Ambuje, masengo gawo gali gamajinji, ŵagapanganyisye gosope mwalunda; ni chilambo chapasi chigumbele ni yindu yiŵayipanganyisye.” Lunda lwa Yehofa lukusawonechela mwangasawusya mu yindu yiŵayipangasye. Mwachisyasyo, mbamba sili ‘syakalamuka kapena kuti syalunda.’ (Misyungu 30:24) Yisyene, likuga lya mbamba likusatenda yindu mwadongosolo. Makuga ga mbamba gane gakusalanga tulombo twatukusasimanikwa mu yakumela, nikupataga yakulya kutyochela mu tulomboto. Mbamba sine sikusatenda mpela alimi. Sikusalima yakumela yine yayikusaŵa yangali masamba kapena maluŵa soni yangali mtundu. Yakupanganyikwa yine yapanganyidwe kuti yitendeje yindu mwakutesya lung’wanu. Membe sikusakombola kuligalawusyaga pasikuguluka. Ŵandu nganaŵa akombwele kupanganya ndege ni kugulukaga chati myoyo. Yijuni yikusasama mwakulongoleledwa ni ndondwa, machili gakuwuta ga chilambo kapena mwakamulichisya masengo mapu ga mutwe mwawo. Kwayaka yejinji, ŵasayansi ŵakulola ya yindu ya umi aŵele ali kulijiganya ndamo syakusawusya kusipikanichisya syele Yehofa jwaŵisile muyakupanganyikwa. Yeleyi yikulosya kuti Mlungu ali jwalunda mnope.

¹⁴ Ŵasayansi alijiganyisye yejinji kutyochela ku lunda lwakupanganya yindu lwa Yehofa. Akwete gulu jajikusawungunya yakupanganyikwa ni kupanganyaga yindu kutyochela kuyakupangayikwayi. Mwachisyasyo, mwine tukusasimonga ni kusalala kwa ulusi wa lundandambuli. Ŵasayansi akusati kapanganyidwe kaulusiwu kali kakusimonjesya. Ulusi wa lundandambuli wine wawukusawoneka kuŵa wangalimba, ukusaŵa wakulimba mnope kupunda chisyano chakulimba kapena chakuwala chakuchijila bomba. Ana kusyesyene ukusaŵa wakulimba chamtuli? Ulusi wa lundandambuliwu ali awukusisye mpaka kwika pakulandana ni ukulu wa likoka, mpaka utanjisye ndege pajikuguluka. Yisyene, Yehofa jwapanganyisye yindu yosopeyi “mwalunda.”

15, 16. (a) Ana ndondwa sikusapeleka umboni wamtuli wa lunda lwa Yehofa? (b) Ana udindo wa Yehofa mpela Jwakulongolela Jwamkulungwa jwa malayika ukusapeleka umboni wamtuli wakwamba lunda lyakwe?

¹⁵ Lunda lwa Yehofa lukusawonechela mu yajwapanganyisye mu chilengedwe chosope. Ndondwa, syatwakambilene mu Mtwe 5, nganisiŵichidwa mwachisawawa. Pakukuya lunda lwa Yehofa lwa “malamusi gakusajendechesya kwinani,” ndondwa syaŵichidwe m’makuga ga ndondwa. Makuga ga ndondwaga nombe nago gaŵichidwe m’makuga gagakusapanganya makuga gekulungwa mnope ga ndondwa. (Yobu 38:33) Ni ligongo lyakwe Yehofa akusayikolanga yindu yakwinani kuti “likuga.” (Yesaya 40:26) Panasoni likuga line lyalikusalosya mnope lunda lwa Yehofa.

¹⁶ Mpela mwatwalijiganyichisye mu Mtwe 4, Mlungu akusakolanjidwa kuti “Yehofa jwamakuga” ligongo lya udindo wakwete mpela Jwakulongolela Jwamkulungwa jwa likuga lyekulungwa lya yakupanganyidwa yausimu mamiliyoni gejinji. Welewu uli umboni wakuti Yehofa akwete machili. Ana yeleyi yikukwaya chamtuli lunda lwakwe? Aganichisye ayi. Yehofa soni Yesu akukamulape masengo. (Yohane 5:17) Nambosoni, yili yakupikanika kusala kuti malayika gagakusamtumichila Jwakwinani Mnope, nombe nago gakusakamula masengo ndawi syosope. Soni tukumbuchileje kuti malayikaga gali galunda soni gamachili mnope kupunda mundu. (Ahebeli 1:7; 2:7) Nambope,Yehofa aŵele ali mkupeleka masengo kwa malayika gagakusakamula masengoga mwakusangalala. Kwa yaka mabiliyoni gejinji malayikaga gaŵele gali ‘mkupikanila maloŵe gakwe’ soni ‘kutenda lisosa lyakwe’ (Salimo 103:20, 21) Jwakulolela jweleju akwete lunda lwakutesya lung’wanu.

17, 18. Ligongo chichi Baibulo jikusasala kuti Yehofa ali “jume pejo, jwali jwalunda,” soni ligongo chichi lunda lwakwelu luli lwakutesya lung’wanu?

¹⁷ Kutyochela pa maumboni gelega, ana mpaka tusimonje Baibulo pajikusala yakuti Yehofa akwete lunda lwekulungwa? Mwachisyasyo, Baibulo jikusasala kuti, Yehofa ali “jumo pejo, jwali jwalunda.” (Aloma 16:27) Yehofa jika ni jwakwete lunda pa chilichose. Jwalakwe ali chisima cha lunda losope. (Misyungu 2:6) Ni ligongo lyakwe Yesu ali pachilambo chapasi, atamose kuti ali jwalunda mnope pa yakupanganyidwa yosope, jwalakwe nganadalilaga lunda lwakwe nambo jaŵechetaga yaŵamtumile Atatigwe.—Yohane 12:48-50.

¹⁸ Ndumetume Paulo jwalondesisye lunda lwa Yehofa mwaluŵelele lwapajika. Jwalakwe jwatite, “Chipanje cha Mlungu chili chekulungwa nditu. Lunda ni umanyilisi wakwe yili yakusokoka mnope. Pangali ŵampaka alondesye nganisyo syakwe, pangali ŵampaka agapikanichisye matala gakwe.” (Aloma 11:33) Mu chiŵecheto chandanda, lilembali lyatandite ni chilembo chakulosya kukwayidwa mtima. Yeleyi yalosyaga muŵapikanile soni mwayamkwayile Paulo mumtima. Maloŵe ga Chigiliki gaŵagakamulichisya masengo gakuti “kusokoka” gali gakulandana ni maloŵe gagakusagopolela, “lisimbo lyesokoche mnope.” Myoyo, maloŵe gakwega gakusatupa chiwulili chakuwoneka chenene munganiso mwetu. Patukuganichisya ya lunda lwa Yehofa, yikusaŵa mpela tukulingulila mulisimbo lyangawoneka palipelele, lyakusokoka soni lyekulungwa mnope mwamti nganituŵa tumanyilile chenene ukulu wakwe soni nganituŵa tukombwele kulijambula. (Salimo 92:5) Ana yeleyi ngayikututendekasya kuŵa ŵakulinandiya?

19, 20. (a) Ligongo chichi yili yakuŵajilwa kuti ngwasi jikwimila lunda lwa Yehofa? (b) Ana Yehofa alosisye uli kuti kwete lunda lwakulola yindu yamsogolo?

¹⁹ Yehofa ali “jumo pejo, jwali jwalunda” m’litala lyakuti jwalakwe jika ni jwakusakombola kulola yamsongolo. Akumbuchile kuti ngwasi jajikusalola kwakutalika jikusajimila lunda lwa Yehofa. Ngwasi jechejewu mlukosi mpaka jisitope makilogalamu 5, nambo meso gakwe gali gekulungwa kupunda ga mundu jwamkulungwa. Meso ga ngwasi gali gakutesa lung’wanu. Gakusalola kachindu kamwana kakali pasi atamose jili mkuguluka mwinani mnope lutando lwa mamita masausande. Yehofa jwaŵechete pakwamba ya ngwasi kuti, “Meso gakwe gakusachiwonela chinducho kwakutalika.” (Yobu 39:29) Mwakulandana ni yeleyi, Yehofa akusalola “kwakutali” kapena kuti msogolo.

²⁰ M’Baibulo mwana mawumboni gejinji gakulosya kuti yeleyi yili yisyene. Mwana yakulochesya mahandiledi gejinji yaŵayilembile kalakala mkaniyitendekwe. Baibulo jasasile mkanipaŵe yakuyichisya yangondo, kutanda ni kumala kwa maulamusi soni matala gele ŵakulongolela ngondo chachikamulichisya masengo. Yakutendekwa yine, ŵayisasile kuli kusigele yaka mahandiledi kuti yitendekwe.—Yesaya 44:25–45:4; Daniele 8:2-8, 20-22.

21, 22. (a) Ligongo chichi nganituŵa tusasile kuti Yehofa akusalola yatuchitenda pa umi? Apeleche chisyasyo. (b) Ana tukusamanyilila chamtuli kuti Yehofa ngaŵa kuti ali jwangasamala ya ŵane kapena jwangali chanasa?

²¹ Ana yeleyi yikugopolela kuti Mlungu jwayiweni kala yachachisagula kutenda pa umi wawo? Ŵandu ŵakusajiganya kuti Mlungu jwalembile kala yosope yayichimtendechela mundu, mpaka ajanje kuti elo. Nambo, nganisyosi sikusanyosa lunda lwa Yehofa. Sikusalosya kuti jwalakwe nganaŵa akombwele kulamulila lunda lwakwe lwakulola yindu yamsogolo. Tuwanichisye myi, naga akakole umanyilisi wakwimba nyimbo, ana akagambaga kwimba ndaŵi syosope? Yeleyi ngakomboleka. Mwakulandanamo, Yehofa akwete lunda lwakumanyilila yamsogolo, nambo ngaŵa kuti ndaŵi syosope akusatenda yeleyi. Akaŵe kuti akutendaga yeleyi, kukaliji kutusumula ufulu waŵatupele, jajili mtuka japenani ja Yehofa.—Detulonomo 30:19, 20.

²² Chakusakala mnope chili chakuti, nganisyo syakuti Mlungu jwalembile kala yosope yayichimtendechela mundu, sikusatendekasya ŵandu kuganisya kuti Yehofa jwangaganichisya ya ŵane, jwangali chinonyelo, kapena jwangali chanasa. Nambo yeleyi yili yaunami. Baibulo jikusajiganya kuti Yehofa “ali chinonyelo.” (1 Yohane 4:8) Mpela mwakusatendela ni ndamo syakwe sine, lunda lwakwesoni lukusalongoleledwa ni chinonyelo.

23. Ana lunda lwapenani lwa Yehofa lutulimbikasyeje kutenda chichi?

²³ Yisyene, lunda lwa Yehofa luli lwakudalilichika. Luli lwapenani kupunda lunda lwetu mwamti Maloŵe ga Mlungu gakusatulimbikasya mwachinonyelo kuti, “Mwakulupilile Ambuje ni mtima wenu wosope, mkasigambaga kulupilila pa lunda lwenupe mchiganisyaga kuti mkusamanyilila. Myindu yosope yamkusitenda, mkumbuchileje kwitichisya kuti kusa kuno kwana Mlungu, jwalakwejo ni jutachigagolosya matala genu.” (Misyungu 3:5, 6) Kwende tulinjejelinjeje kulijiganya lunda lwa Yehofa ni chakulinga chakuti tumŵandichile jwalakwe.