Tukatendaga Woga ni Alamagedo

1-2. (a) Ligongo chichi ŵandu ŵambone ngakusosekwa kutenda woga ni Alamagedo? (b) Ana mungani ajino chitukambilane yiwusyo yapi?

ANA pakwete papikene ŵandu ali mkamulichisya masengo maloŵe gakuti “Alamagedo” pakwamba ya ngondo ja nyukiliya nambosoni ngosi syachilengedwe? Mwakulekangana ni yeleyi, yajikusati Baibulo pakwamba ya liloŵeli yikusapwatika yakuyichisya yambone mnope yayichipagwa ligongo lya ngondoji. (Ciw. 1:3) Ngaŵa kuti ngondo ja Alamagedo jichajonanga ŵandu wosope nambo jichakulupusya ŵandu ŵambone. Ana yeleyi yichikomboleka chamtuli?

² Baibulo jikusalosya kuti ngondo ja Alamagedo jichakulupusya ŵandu mwakumasya maulamusi ga ŵandu. Ngondo jeleji jichakulupusya ŵandu ŵambone mwakwajonanga ŵandu ŵakusakala. (Ciw. 11:18) Kuti tupikanichisye chenene yeleyi, kwende tukambilane yiwusyo mcheche yakuyichisyayi: Ana Alamagedo jili chichi? Ana yindu yapi yayichitendekwa Alamagedo mkanijitendekwe? Ana mpaka tutende wuli kuti chitukulupuche pa Alamagedo? Ana mpaka tuŵepe chamtuli ŵakulupichika Alamagedo pajikuŵandichila?

 3. (a) Ana maloŵe gakuti “Alamagedo” gakusagopolela chichi? (b) Mwakamulana ni Chiwunukuko 16:14, 16, ana ligongo chichi Alamagedo nganigaŵa malo gasyesyene?

³ Aŵalanje Ciwunukuko 16:14, 16. Liloŵe lyakuti “Alamagedo” likusasimanikwa kamo m’Malemba, soni likusatyochela ku maloŵe ga Chihebeli gagakusagopolela “Litumbi lya Megido.” (Ciw. 16:16) Megido waliji msinda wa mu Isalaeli jwakala. (Yos. 17:11) Nambo Alamagedo ngajikusajimila malo gasyesyene pachilambopa. Kusala yisyene, jikusagamba gopolela yayichitendekwa pandaŵi jele “ayimwene ŵapachilambo chapasi” chachisongangana kuti alimbane ni Yehofa. (Ciw. 16:14) Nambope, munganiji tukamulichisyesoni masengo maloŵe gakuti “Alamagedo” pakwamba ya ngondo jajichitendekwa panyuma pakuti ayimwene wosope ŵapachilambo chapasi asongangene. Ana tukusamanyilila chamtuli kuti Alamagedo jili malo gakuwanichisya? Chandanda pangali litumbi lisyesyene lyalikusakolanjidwa kuti Megido. Chaŵili, malo ga ku Megido gali gamwana gakuti “ayimwene ŵa pachilambo chapasi” soni asilikali ni yida yawo yangondo nganaŵa akwanile pamalogo. Chatatu, mpela mwachituyiwonele munganiji, ngondo ja Alamagedo jichitanda pandaŵi jele “ayimwene” ŵapachilambo chapasi chachajimuchila ŵandu ŵa Mlungu, ŵakusimanikwa pachilambo chosope chapasi.

 4. Ligongo chichi Yehofa akulandanya ngondo jekulungwa jakumalisya ni Alamagedo?

⁴ Ligongo chichi Yehofa akulandanya ngondo jekulungwa jakumalisya ni Megido? Ku Megido soni Chiŵata cha Yesilele ni kukwatendechelaga ngondo syejinji. Ndaŵi sine Yehofa ŵakamuchisyaga nawo ngondosyo. Mwachisyasyo, Mlungu ŵamkamuchisye Jwakulamula jwa Chiisalaeli lina lyakwe Balaki kuti ŵagomeche asilikali ŵa Chikanani ŵaŵalongoleledwaga ni mwenye Sisela ku “lusulo lwa Megido.” Balaki soni jwakulochesya jwamkongwe lina lyakwe Debola ŵamyamichile Yehofa ligongo lyakupunda pangondojo mwakusimonjesya. Jemanjaji ŵajimbile kuti, ‘Ndondwa syaputile ngondo kutyochela kwinani . . . ni syamputile Sisela. Lusulo lwa Kishoni lwakokosile jemanjajo.’—Ŵak. 5:19-21.

 5. Ana ngondo ja Alamagedo jichilekangana chamtuli ni ngondo jaŵaputile Balaki?

⁵ Balaki ni Debola ŵamalisisye kwimba nyimbo jawo ni maloŵe gakuti, “Aa! Ambuje, amagongo ŵawo wosope awe chamti myoyo nambo achimjawo aŵale mpela lyuŵa lyakopoka kwene!” (Ŵak. 5:31) Pa Alamagedo achimmagongo ŵa Mlungu chachijonanjidwa pele ŵandu ŵakumnonyela Mlungu chachikulupuka. Nambo pana kulekangana kumo pasikati pa ngondo sisyatendekwaga kala ni ngondo ja Alamagedo. Pa ngondo ja Alamagedo ŵandu ŵa Mlungu ngasaputa ngondo. Jemanjaji ngasakolasoni yida yakuputila ngondo. Kupwatika pelepa chachiŵa “ŵamachili mwakuŵa ŵangatenganyika soni kulosya chikulupi” chakuti Yehofa ni asilikali ŵakwe ŵakwinani chiŵakamuchisye.—Yes. 30:15, NW; Ciw. 19:11-15.

 6. Ana Yehofa mpaka akamulichisye masengo matala gapi pakwajonanga ŵandu?

⁶ Ana Mlungu chachagomeka chamtuli achimmagongo ŵakwe pangondo ja Alamagedo? Jwalakwe mpaka akamulichisye masengo matala gejinji. Mwachisyasyo, jwalakwe mpaka akamulichisye masengo yifomelesi, matalila, soni njasi. (Yob. 38:22, 23; Esek. 38:19-22) Jwalakwe mwine mpaka ŵatendekasye achimmagongoŵa kuti aputane achimsyene. (2 Mbi. 20:17, 22, 23) Mwinesoni mpaka akamulichisye masengo malayika kuwulaga ŵakusakala. (Yes. 37:36) Mwangasamala kandu ya litala lyele Mlungu chachikamulichisya masengo, nambo jwalakwe chachiwina. Achimmagongo ŵakwe wosope chachijonanjidwa. Ŵandu wosope ŵambone chachikulupuka.—Mis. 3:25, 26.

7-8. (a) Mwakamulana ni 1 Atesalonika 5:1-6, ana ŵakulamulila ŵa chilambo chachipeleka chimanyisyo chakusimonjesya chapi? (b) Ligongo chichi welewu tiwuchiŵa unami wakogoya?

⁷ Chimanyisyo chakuti “bata ni mtendele” chichipelechedwa “lisiku lya Yehofa” mkaniliyiche. (Aŵalanje 1 Atesalonika 5:1-6, NW.) Pa 1 Atesalonika 5:2, “lisiku lya Yehofa” likwimila “yisawusyo yekulungwa.” (Ciw. 7: 14) Ana tuchimanyilila chamtuli kuti yisawusyoyi yisigele panandi kutanda? Baibulo jikusasala kuti pachipagwa chimanyisyo chakusimonjesya. Chimanyisyochi chichilosya kutanda kwa yisawusyo yekulungwa.

⁸ Chelechi chichiŵa chimanyisyo chachaŵechetedwe kala chakulosya kuti kwana “bata ni mtendele.” Ligongo chichi achimlongola ŵayilambo chachiŵechetaga yeleyi? Ana achimlongola ŵadini chachijigala nawo mbali? Mwine. Nambope chimanyisyochi chichiŵa unami wakutyochela kwa Satana. Unamiwu uchiŵa wakogoya ligongo yichatendekasya ŵandu ganisya kuti ali pamtendele nambo yisyesyene yakwe yili yakuti yisawusyo yekulungwa yisigele panandi kutanda. Yisyene, “Pelepo chonasiko chichasimana mwachisisimuchisya. Tichichasimana mpela mwele yayikusatiji jwamkongwe pakuyiwona yipwetesi pandaŵi jakuti aŵeleche.” Ana ŵakutumichila ŵakulupichika ŵa Yehofa chichatendechela chichi? Komboleka kuti jemanjaji chachisimonga ni kutanda kwa lisiku lya Yehofali nambo chachiŵa ŵakoseka.

 9. Ana Yehofa chachijonanga chilambo chosope cha Satanachi pandaŵi jimo? Alondesye.

⁹ Yehofa ngasajonanga chilambo chosope cha Satanachi pandaŵi jimo mpela muŵatendele mundaŵi ja Nowa. M’malo mwakwe jwalakwe chachijonanga chilambochi mu mbali siŵili. Chandanda, chachijonanga Babiloni Jwamkulungwa jwali dini syosope syaunami. Kaneko pa ngondo ja Alamagedo chachijonanga mbali jine ja chilambo cha Satanachi, pampepe ni ŵandale, asilikali, soni ŵamalonda ŵakwe. Kwende sambano tukambilane yindu yeleyi.

10. Mwakamulana ni Ciwunukuko 17:1, 6 soni 18:24, ligongo chichi Yehofa chachimjonanga Babiloni Jwamkulungwa?

¹⁰ ‘Chilango cha jwamkongwe jwakulijesya jwakupikanika.’ (Aŵalanje Ciwunukuko 17:1, 6; 18:24.) Babiloni Jwamkulungwa atendekasisye kuti ŵandu akalichimbichisyaga lina lya Mlungu. Aŵele ali mkwiganya yawunami pakwamba ya Mlungu. Mpela jwamkongwe jwakulijesya, dini jaunami jiŵele jangakulupichika kwa Yehofa mwakukamuchisya maboma ga ŵandu. Dini jaunami jiŵele jili mkwalagasya ŵandu ŵakwe soni kwajiŵila mbiya. Kupwatika pelepa, dini jaunami jiwuleje ŵandu ŵajinji kupwatikapo ŵakutumichila ŵa Mlungu. (Ciw. 19:2) Ana Yehofa chachimjonanga chamtuli Babiloni Jwamkulungwaju?

11. (a) Ana “chilombo chechejewu” chikwimila chichi? (b) Ana Mlungu chachikamulichisya masengo chamtuli chilombochi pakumjonanga Babiloni Jwamkulungwa?

¹¹ Yehofa chachimjonanga ‘jwamkongwe jwakulijesya jwakupikanikaju,’ pakamulichisya masengo “misengo likumi” ja “chilombo chechejewu.” Chilombo chakuwanichisyachi chikwimila chiŵanja cha United Nations. Misengo likumi jikwimila magulu gandale gagakusakamuchisya chiwanjachi. Pandaŵi jaŵasagwile Mlungu, ŵakulamulila ŵandaleŵa chachimjonanga Babiloni Jwamkulungwa. Jemanjaji ‘chachimsumula jwalakwejo yakwe yosope ni kumleka ali makonope.’ (Ciw. 17:3, 16) Chonasiko chelechi chichasimonjesya ŵandu ŵali kumbali jakwe, ligongo jwamkongweju jwaŵele ali mkuŵecheta mwakupoka kuti, “Une apano ndili mwenye, nganimba jwamkongwe jwamasije, soni une ngakomboleka kulila.”—Ciw. 18:7, 8, NW.

12. Ana Yehofa ngasakunda kuti maboma gakatenda chichi, soni ligongo chichi chachitenda yeleyi?

¹² Mlungu ngasakunda kuti maboma gajonanje ŵandu wakwe. Ŵandu ŵa Mlunguŵa akusasangalala kumanyika ni lina lyakwe soni ŵapikanile lilamusi lyakwe lyakuti akopoche mu Babiloni jwamkulungwa. (Mase. 15:16, 17; Ciw. 18:4) Aŵelesoni ali mkwakamuchisya ŵane kuti akopoche mu Babiloni jwamkulungwa. Myoyo “chilango chawo” ngasichakwaya ŵakutumichila ŵa Yehofa. Nambope chikulupi chawo chichilinjidwa.

13. (a) Ana Gogi ali ŵani? (b) Mwakamulana ni Esekiele 38:2, 8, 9, ana Gogi chachisimanikwa chamtuli pamalo gakuwanichisya ga Alamagedo?

¹³ Kwimuchila kwa Gogi. (Aŵalanje Esekiele 38:2, 8, 9.) Panyuma pakonanjidwa kwa dini jaunami, ŵandu ŵa Mlungu ni ŵachachisigala. Mwangakayichila, Satana chachitumbila ni yeleyi. Jwalakwe chachilosya kutumbilaku pakamulichisya masengo “misimu jakusakala” gagachiŵa mautenga gaunami gakutyochela kwa yiŵanda yayichitendekasya kuti maboma gajimuchile ŵandu ŵa Yehofa. (Ciw. 16:13, 14) Mkamulano wa maboma welewu, ukusakolanjidwa kuti “Gogi jwa chilambo cha Magogi.” Maboma pigachajimuchilaga ŵandu ŵa Mlungu, ngondo ja Alamagedo jichitanda papopo.—Ciw. 16:16.

14. Ana maboma gachikopochela yamtuli?

¹⁴ Gogi chachidalila “likuga lyangondo lya ŵandu” ŵali asilikali ŵakwe. (2 Mbi. 32:8) M’weji tuchidalila Yehofa Mlungu jwetu yayichiwoneka kwa ŵandu mpela nganitukola jwakutukamuchisya. Yichiwonekaga myoyo, ligongo lyakuti Babiloni Jwamkulungwa jujwaliji jwamachili, milungu jakwe nganijimkulupusya ku “chilombo” soni “misengo likumi.” (Ciw. 17:16) Myoyo maboma ga ŵandu gachiganisyaga kuti gachijonanga ŵandu ŵa Mlungu mwangasawusya. Jemanjaji chachajimuchila ŵandu ŵa Yehofa “mpela mbungo jamachili jakonanga chilambo chapasi.” (Esek. 38:16) Nambo maboma gachikopochela kuti pangali mpata wakutila. Mpela muyaŵelele ni Falao pa Nyasa Jechejewu, Gogi chachiyiwona kuti akulimbana ni Yehofa.—Eks. 14:1-4; Esek. 38:3, 4, 18, 21-23.

15. Ana Yesu chachitenda yamtuli pangondo ja Alamagedo?

¹⁵ Klistu pampepe ni asilikali ŵakwe ŵakwinani chachachenjela ŵandu ŵa Mlungu mwakwajonanga achimmagongo ŵawo. (Ciw. 19:11, 14, 15) Nambi wuli pakwamba ya Satana jwali mmagongo jwamkulungwa jwa Yehofa, jwele jwagalambwisye maboma soni kugalongolela kungondo ja Alamagedo? Yesu chachimponya jwalakwe pampepe ni yiŵanda yakwe kwisimbo kwachachimwugalila kwa yaka 1,000.—Ciw. 20:1-3.

16. (a) Ana tukusalosya chamtuli kuti ‘tukusammanyilila Mlungu’? (b) Ana ŵandu ŵakusammanyilila Mlungu chichatendechela chichi pangondo ja Alamagedo?

¹⁶ Chinga twatandite usyesyene kalakala kapena sampano, kuti tukakulupuche pa Alamagedo tukusosekwa ‘kummanyilila Mlungu’ soni “kupikanila Ngani Syambone syakwamba Ambuje ŵetu Yesu.” (2 Ates. 1:7-9) ‘Tukusammanyilila Mlungu’ patukumanyilila yakusasakaga soni yakusayiŵengaga nambosoni malamusi gakwe. Tukusalosyasoni kuti tukusammanyilila patukumnonyela, kumpikanila, soni kumlambila jwalakwe jika. (1 Yoh. 2:3-5; 5:3) Patukulosya kuti tukusammanyilila Mlungu, tukusakola upile ‘wakumanyika ni jwalakwe,’ yayichitutendekasya kuti chitukulupuche pa Alamagedo. (1 Akoli. 8:3) Mwamtuli? Ligongo ‘kumanyika ni jwalakwe’ mpaka kugopolele kuti Mlungu akutuwona kuŵa ŵakuŵajilwa.

17. Ana “kupikanila Ngani Syambone syakwamba Ambuje ŵetu Yesu” kukusagopolela chichi?

¹⁷ “Ngani syambone syakwamba Ambuje ŵetu Yesu” sikupwatikapo usyesyene waŵajiganyisye jwalakwe wawukusimanikwa m’Maloŵe ga Mlungu. Tukusapikanila ngani syambone patukukamulichisya masengo yiwundo yakwe paumi wetu. Kupikanila kweleku kukupwatikapo kuŵika yindu ya Uchimwene pamalo gandanda, kupikanila malamusi gakulungama ga Mlungu, soni kulalichila yakwamba Uchimwene wa Mlungu. (Mat. 6:33; 24:14) Yikupwatikaposoni kwakamuchisya abale ŵasagulwe ŵa Klistu pakukamula masengo gawo gakusosekwa.—Mat. 25:31-40.

18. Ana abale ŵasagulwe ŵa Klistu chachilosya chamtuli kuyamichila umbone mtima waŵalosisye ŵangondolo sine?

¹⁸ Pachangakaŵapa ŵakutumichila ŵa Mlungu ŵasagulwe chachilosya kwayamichila ‘ŵangondolo sine.’ (Yoh. 10:16) Ana chachitenda yeleyi chamtuli? Ngondo ja Alamagedo mkanijitande, ŵa 144,000 wosope, chachiŵa ali apite kwinani, kweleko chachikola yilu yausimu yangakomboleka kuwa. Jemanjaji chachiŵa mbali ja asilikali ŵakwinani ŵachachimjonanga Gogi soni kulichenjela “likuga lya ŵandu” ŵali mpela ngondolo. (Ciw. 2:26, 27; 7:9, 10) Likuga lya ŵanduli lichiŵa lyakusangalala pakumanyilila kuti lyakwete upile wakwakamuchisya ŵakutumichila ŵasagulwe ŵa Yehofa, pandaŵi jiŵaliji pachilambo chapasi.

19-20. Mwangasamala kandu ya yisawusyo, ana mpaka tuŵe ŵakulupichika chamtuli Alamagedo pajikuŵandichila?

¹⁹ M’masiku gakusawusya gambesiga, ŵakutumichila ŵajinji ŵa Yehofa akusimana ni yipwetesi. Atamose yili myoyo mpaka tuŵe ŵakupilila kwineku tuli mkusangalala. (Yak. 1:2-4) Chindu champaka chitukamuchisye chili kupopela mwakutyochela pasi pamtima. (Luk. 21:36) Ngatukusosekwa kwamba kupopelape, nambo tukusosekwasoni kuŵalanga Maloŵe ga Mlungu soni kugaganichisya lisiku lililyose kupwatikapo yakulochesya yakusimonjesya yakwamba ndaŵi jetu jino. (Sal. 77:12) Masengoga yimpepe ni kulalichila, kuchitendekasya chikulupi soni chembecheyo chetu kuŵa chakulimba.

²⁰ Aganichisye mwatuchisangalalila pachachimjonanga Babiloni Jwamkulungwa soni Alamagedo jili jimasile. Soni aganichisye mwatachiŵela ŵakusangalala pele jwalijose chachichimbichisyaga lina lya Mlungu soni ulamusi wakwe. (Esek. 38:23) Yisyene, Alamagedo jili jangajogoya kwa ŵandu ŵakummanyilila Mlungu, kumpikanila mwanagwe, soni ŵakupilila mpaka kumbesi.—Mat. 24:13.