Alimbisyeje Chembecheyo Chawo

 1. Ana Yehofa atupele chembecheyo chapi?

YEHOFA atupele chembecheyo chambone mnope chakutama ni umi wangamala. Ŵane akwembecheya kuja kutama kwinani mpela yakupanganyikwa yausimu yakola umi wangawa. (1 Akoli. 15:50, 53) Nambo ŵane ŵajinji akwete chembecheyo chakutama pachilambo chapasi mpaka kalakala ali akwete yilu yambone soni ali ŵakusangalala. (Chiw. 21:3, 4) Nambope chinga tukwembecheya kuja kutama kwinani kapena pachilambo chapasi, chembecheyo chetu chili chakusosekwa mnope kwa m’weji.

 2. Ana chembecheyo chetu chikusajegamila pa chichi? Ligongo chichi tukuŵecheta yeleyi?

² Baibulo pajikukamulichisya masengo maloŵe gakuti “chembecheyo,” mpaka gagopolele “kukulupilila kuti yindu yineyakwe yambone chiyitendekwe.” Chembecheyo chetu pa yamsogolo chili chisyesyene ligongo lyakuti chikusatyochela kwa Yehofa. (Alo. 15:13) Tukumanyilila kuti jwalakwe ni jwasasile yachachitutendela, soni kuti ndaŵi syosope jwalakwe akusakwanilisya yaŵechete. (Num. 23:19) Nambosoni tuli ŵakusimichisya kuti Yehofa ali jwakusachilila soni akwete machili gakutenda yosope yasasile kuti chachitenda. Myoyo, chembecheyo chetu nganichijegamila pa yindu yatugamba ganisya kapena yatugamba kusaka yili yitendekwe. Mmalomwakwe chikusajegamila pa yindu yatukuyimanyilila kuti yili yisyesyene.

 3. Ana chitukambilane chichi munganiji? (Salimo 27:14)

³ Atati ŵetu ŵakwinani akusatunonyela, soni akusasaka kuti twakulupilileje. (Aŵalanje Salimo 27:14.) Naga chembecheyo chetu pa Yehofa chili chakulimba, tuchikombola kupilila yakusawusya soni tuchiŵape ŵakusangalala ni ŵakulimba mtima atamose tuli tusimene ni yakusawusya yamtuli. Sambano kwende tukambilane yachikusati chembecheyo pakutuchenjela. Pangani jeleji, chitulole mwele chembecheyo mpaka chiŵe mpela nangula soni chisoti. Pakumalisya chitukambilane yampaka tutende kuti tulimbisye chembecheyo chetu.

 4. Ana chembecheyo chetu chikulandana chamtuli ni nangula? (Ahebeli 6:19)

⁴ Mu chikalata chakwe chakwawula kwa Ahebeli, ndumetume Paulo jwachilandenye chembecheyo ni nangula. (Aŵalanje Ahebeli 6:19.) Ndaŵi syejinji Paulo ŵajendaga maulendo ga panyasa, myoyo ŵamanyililaga kuti nangula jikusakamuchisya kuti sitima jikajigalwa ni mesi. Pandaŵi jine jwalakwe ali akwesile sitima, jwasimene ni chimbungo chamachili. Pachatendekwaga chimbungochi, ŵaweni ŵakwendesya sitima ali mkuponya nangula m’mesi kuti sitimajo jikaliputasya mmaganga. (Mase. 27:29, 39-41) Mwakulandana ni nangula jwakusakamuchisya sitima, chembecheyo chetu chikusakamuchisya kuti tuŵepe paunasi ni Yehofa pandaŵi jatukusimana ni yakusawusya yayili mpela mbungo jamachili. Nambosoni chikusatukamuchisya kuwusimana mtima patukusimana ni yakusawusya ligongo lyakumanyilila kuti yindu chiyiŵe chenene pamkaŵapa. Tukaliŵalila kuti Yesu jwasasile kala kuti tuchilagasidwa. (Yoh. 15:20) Myoyo kuganichisya yindu yatusalile Yehofa kuti chatutendele kukusatukamuchisya kuti tupitilisye kumtumichila jwalakwe.

 5. Ana chembecheyo chamkamuchisye chamtuli Yesu paŵajembecheyaga kuwulajidwa?

⁵ Aganichisye yachatite chembecheyo pakumkamuchisya Yesu kuŵape jwakulupichika atamose kuti jwamanyililaga kuti chawe chiwa chakupweteka mnope. Palisiku lya Pentekosite mu 33 C.E., ndumetume Petulo jwasasile maloŵe gakulochesya ga m’buku ja Salimo gagakusalosya kuti Yesu jwaliji jwakuwusimana mtima. Maloŵega gakusati, “Une chinjiŵape ndili mkwembecheya, ligongo wawojo ngasandeka une m’Malembe, soni ngasakunda kuti jwakulupichika jwawo awole. . . . Chinjiŵa jwakusangalala mnope kuŵa pameso pawo.” (Mase. 2:25-28; Sal. 16:8-11) Atamose kuti Yesu jwamanyililaga kuti chawe, jwakwete chembecheyo chakuti Mlungu chachimjimusya soni kuti chachisangalala kutamasoni yimpepe ni Atati ŵakwe kwinani.—Aheb. 12:2, 3.

 6. Ana m’bale jwine jwasasile chichi pakwamba ya chembecheyo?

⁶ Chembecheyo chetu chakamuchisye abale ni alongo ŵajinji kuŵa ŵakupilila. Aganichisye chisyasyo cha M’bale Leonard Chinn jwakusatama ku England. Ngondo Jandanda Japachilambo Chosope jili mkati, jwalakwe ŵamŵisile mundende ligongo lyakukana usilikali. Jwalakwe ŵamŵisile mu kachipinda kajikajikape kwa myesi jiŵili, soni kaneko ŵampaga masengo gakupweteka mnope. Panyuma pakwe m’baleju jwalembile kuti, “Yanasimene nayoyi yangamuchisye kumanyilila kuti chembecheyo chili chakusosekwa mnope kuti tuŵeje ŵakupilila. Tukwete chisyasyo cha Yesu, ŵandumetume, soni ŵakulochesya. Nambosoni pana yindu yine yasasile Yehofa m’Baibulo kuti chatutendele. Yosopeyitu yikusatupa chembecheyo chambone pa yamsogolo soni kututendekasya kuti tupilileje.” Apatu chembecheyo chaliji mpela nangula kwa Leornad, mwamti mpaka chiŵesoni nangula kwa m’weji.

 7. Ana yakulingwa yikusalimbisya chamtuli chembecheyo chetu? (Aloma 5:3-5; Yakobo 1:12)

⁷ Chembecheyo chetu chikusalimbaga patukupilila yakulingwa soni patukuyiwona kuti Yehofa akutukamuchisya soni kutunonyela. (Aŵalanje Aloma 5:3-5; Yakobo 1:12.) Ni ligongo lyakwe apano tukwete chembecheyo chakulimba mnope kulekangana ni patwagambile kupikana kwene ngani syambone. Satana akusasaka kuti yakulingwa yatukusimana nayo yituwujasyeje munyuma, nambo ni chikamuchisyo cha Yehofa mpaka tupilile yakusawusya yosopeyi.

 8. Ana chembecheyo chikulandana chamtuli ni chisoti? (1 Atesalonika 5:8)

⁸ Baibulo jikusawanichisyasoni chembecheyo chetu ni chisoti. (Aŵalanje 1 Atesalonika 5:8.) Msilikali akusawala chisoti pakusaka kuti akawulala mumtwe ni mipamba jakutyochela kwa adani ŵakwe. Myoyo, pangondo jetu jakulimbana ni Satana, tukusosekwa kusichenjela nganisyo syetu ku yindu yakusokonasya ya Satana. Jwalakwetu akusakamulichisya masengo yindu yejinji pakusaka kutulinga soni kusokonasya kaganisye ketu. Ni mwakulandana ni chisoti chachikusachenjela mtwe wa msilikali, chembecheyo chetu mpaka chichenjele kaganisye ketu ni chakulinga chakuti tuŵepe ŵakulupichika kwa Yehofa.

 9. Ana pakusapagwa yakuyichisya yamtuli naga ŵandu nganakola chembecheyo?

⁹ Chembecheyo chetu chakutama ni umi wangamala mpaka chitukamuchisye kuti tutendeje yindu mwalunda soni mwakuganisya chenene. Nambo naga chembecheyo chetu chimasile machili soni tutandite kuganichisya ya m’wejo jika mpaka tuleche kulupilila yakuti tuchitama ni umi wangamala. Aganichisye yayatendechele Aklistu ŵakalakala ŵa ku Kolinto. Jemanjaji ŵalesile kulupilila chindu chakusosekwa mnope chaŵasasile Mlungu chachili ngani ja kwimuka kwa ŵawe. (1 Akoli. 15:12) Nambo Paulo ŵalembile kuti ŵandu ŵangakusakulupilila kuti ŵawe chachijimuka ni kuti agamba kutama ni umi pakutenda yakusaka yawo basi. (1 Akoli. 15:32) Masiku aganosoni ŵandu ŵajinji ŵanganakola chembecheyo pa yasasile Mlungu, akusagambaga kutenda yakusaka achimsyenewo kuti asangalele mwakusachila. Nambope, m’weji tukusakulupilila yakusatusalila Mlungu. Chembecheyo chetu chikusaŵa mpela chisoti chachikusachenjela nganisyo syetu soni kutukamuchisya kuti tukatendaga yagamba kulisangalasya jika yampaka yijonanje unasi wetu ni Yehofa.—1 Akoli. 15:33, 34.

10. Ana chembecheyo mpaka chituchenjele chamtuli kuti tukaganisyaga mwakulemwecheka?

¹⁰ Chembecheyo chetu chikusatukamuchisyasoni kuti tukaganisyaga kuti nganituŵa tukombwele kumsangalasya Yehofa. Mwachisyasyo, ŵane mpaka aganisyeje kuti, ‘Nganiyiŵa yikomboleche kuti une mbenawo mu gulu ja ŵandu ŵakutama ni umi mpaka kalakala ligongo nganimba mundu jwakuŵajilwa. Sonitu nganimba ngombwele kutenda yakusaka Mlungu kuti ndendeje.’ Akaliŵalila kuti Elifasi juŵayiche kukumlimbikasya Yobu mwachinyengo jwaŵechete yakulandana ni yeleyi. Jwalakwe jwatite, “Ana mundu mpaka alitende kuti aŵe jwakulungama?” Ni jwasasilesoni ya Mlungu kuti, “Mlungu jwangagakulupilila malayika gakwe, atamose gakwinani nganigaŵa gakulungama pameso pa Mlungu.” (Yob. 15:14, 15) Welewutu waliji unami. Akumbuchileje kuti Satana ni jwakusatendekasya kaganisye keleka. Jwalakwe akusamanyilila kuti naga wawojo akukola nganisyo syelesi, chembecheyo chawo mpaka chimale. Myoyo, akaneje kaganisye keleka ni kuganichisyaga yasasile Yehofa. Akakayichilaga kuti Yehofa akusaka kuti wawojo chatame ni umi wangamala, mwamti chiŵakamuchisye kuti yeleyi chiyikomboleche.—1 Tim. 2:3, 4.

11. Ligongo chichi tukusosekwa kuwusimana mtima patukwembecheya kuti Mlungu akwanilisye yosope yasasile?

¹¹ Kulimbisya chembecheyo chetu ngajikusaŵa ngani jamwana. Pane mpaka tulepele kuwusimana mtima patukumjembecheya Mlungu kuti akwanilisye yajwasasile. Nambope, Yehofa ali jwampaka kalakala, mwamti ndaŵi jampaka tujiwoneje kuŵa jelewu, kwa jwalakwe jikusaŵa jejipi. (2 Pet. 3:8, 9) Jwalakwe chachikwanilisya chenene yosope yasasile, nambo nganaŵa ayitesile pandaŵi jatukusaka m’wejo. Sambano ana chichi champaka chitukamuchisye kuti chembecheyo chetu chiŵejepe chakulimba patukwembecheya mwakuwusimana mtima kuti Mlungu akwanilisye yosope yasasile?—Yak. 5:7, 8.

12. Ana maloŵe ga pa Ahebeli 11:1, 6, gakulosya kuti pana kukamula kwamtuli pasikati pa chembecheyo ni chikulupi?

¹² Tuchilimbisya chikulupi chetu naga tukuŵape paunasi wambone ni Yehofa juŵatupele chembecheyo. Sonitu Baibulo jikusalosya kuti mundu mpaka akole chembecheyo naga akukulupilila yakuti Yehofa apali soni kuti “akusapeleka yindu yambone kwa ŵandu ŵakusamsosasosa ni mtima wosope.” (Aŵalanje Ahebeli 11:1, 6.) Patukumwona Yehofa kuti ali jusyesyene, ni patuchikulupilila mnope kuti jwalakwe chachitenda yosope yasasile. Kwende sambano tukambilane yindu yakutukamuchisya kuti tukusye unasi wetu ni Yehofa yampaka yitendekasyesoni kuti chembecheyo chetu chiŵe chakulimba.

13. Ana mpaka tutende chichi kuti tuŵe paunasi ni Mlungu?

¹³ Apopeleje kwa Yehofa, soni aŵalanjeje Maloŵe gakwe. Atamose kuti ngatukusamwona Yehofa, nambope mpaka tuŵe najo paunasi. Yili yakomboleka kuŵechetana ni jwalakwe kupitila mwipopelo tuli tukwete chikulupi chakuti chatupikanile. (Yel. 29:11, 12) M’wejisoni mpaka tumpikanile Mlungu mwakuŵalanga Maloŵe gakwe soni kugaganichisya. Patukuŵalanga yaŵatite Yehofa pakwakamuchisya ŵandu ŵaŵaliji ŵakulupichika kwa jwalakwe munyumamu, chembecheyo chetu chichikula mnope. Pajatu yosope yayikusasimanikwa m’Maloŵe ga Mlungu “yalembedwe kuti yitujiganye. Soni tukwete chembecheyo ligongo Malembaga gakusatukamuchisya kupilila soni gakusatulimbikasya.”—Alo. 15:4.

14. Ligongo chichi tukusosekwa kuganisyaga yaŵatendele Yehofa ŵandu ŵane?

¹⁴ Aganichisyeje yaŵele mkutenda Yehofa pakwanilisya yaŵaŵechete. Aganichisye yaŵatesile Mlungu kwa Abulahamu ni Sala. Jemanjajitu ŵayiche pamsingu wakuti ngaŵa mkuŵeleka ŵanache. Nambope, Mlungu ŵasalile jemanjaji kuti chachikola mwanache. (Gen. 18:10) Ana Abulahamu jwatesile yamtuli pajwajembecheyaga yaŵamsalile Yehofa? Baibulo jikusasala kuti jwalakwe jwakwete chikulupi chakuti “chachiŵa baba jwa ŵandu ŵamitundu jejinji.” (Alo. 4:18) Atamose kuti kwa ŵandu yinduyi yawonekaga kuŵa yangakomboleka, nambo Abulahamu ŵakwete chikulupi chakuti Yehofa chakwanilisye yasasile. (Alo. 4:19-21) Ngani mpela syelesi sikusatujiganya kuti yili yakomboleka kulupilila kuti Yehofa mpaka akwanilisye yosope yasasile, atamose m’wejo tuli mkukayichila.

15. Ligongo chichi tukusosekwa kuganichisya yatutendele Mlungu m’wejo pajika?

¹⁵ Aganichisyeje yaŵatendele Yehofa wawojo. Aganichisye ya yindu yine yayikwanilichikwe yaŵasasile Yehofa m’Maloŵe gakwe yakuyiwona kuti yakamuchisye wawojo paumi wawo. Mwachisyayo, Yesu jwasasile kuti Atati ŵakwe chachapa wawojo yakusosechela yawo ya paumi. (Mat. 6:32, 33) Yesu ŵasimichisyesoni wawojo kuti Yehofa chachapa machili ga msimu weswela pandaŵi jakuŵenda. (Luk. 11:13) Yehofatu aŵele ali mkukwanilisya yosopeyi. mwakulandana ni yeleyi, wawojosoni mpaka aganichisye yaŵatendele Mlungu paumi wawo. Mwachisyasyo, jwalakwe akusasala kuti ali jwakoseka kwakululuchila, kwatondoya, soni kwapa yindu yakwakamuchisya kuŵa najo paunasi wambone. (Mat. 6:14; 24:45; 2 Akoli. 1:3) Pakuganichisya yaŵatendele Mlungu, chachilimbisya chembecheyo chawo pa yindu yachachatendelasoni jwalakwe kusogoloku.

16. Ligongo chichi chembecheyo chili mtuka wakusosekwa mnope?

¹⁶ Chembecheyo chetu chakutama ni umi wangamala chili mtuka wakusosekwa mnope watupele Mlungu. Apanopano tukwembecheya sogolo jambone jele nganituŵa tukayichile yakuti jichiyika. Chembecheyo chetu chili mpela nangula jwakusakamuchisya kuti tuŵe ŵakutamilichika ni chakulinga chakuti tukomboleje kupilila patukusimana ni yakulingwa, patukulagasidwa, soni ata yili yiyiche pakuti chituwe kwene. Chikusaŵasoni mpela chisoti chakutukamuchisya kuchenjela kaganisye ketu kuti tukaneje yakusakala ni kutendaga yayili yambone. Chembecheyo cha m’Baibulo chikusatukamuchisyasoni kuti tuŵe paunasi ni Mlungu soni chikusalosya yakusati jwalakwe pakutunonyela. Kusala yisyene, tukusapindula mnope patukulimbisya chembecheyo chetu.

17. Ligongo chichi chembecheyo chikusatutendekasya kuŵa ŵakusangalala?

¹⁷ Mu chikalata chakwe chakwawula ku Loma, Paulo jwalimbikasisye Aklistu ŵakweleko kuti ‘asangalaleje ni chembecheyo chawo.’ (Alo. 12:12) Paulo jwasangalalaga ligongo jwaliji jwakusimichisya kuti naga akuŵape jwakulupichika nikuti chachitama ni umi wangamala kwinani. Myoyo, m’wejisoni mpaka tusangalale ni chembecheyo chetu ligongo tuli ŵakusimichisya kuti Yehofa chachikwanilisya yosope yasasile. Yeleyi yikusakamulana ni yajwaŵechete jwamasalimo kuti, ‘Jwana upile mundu . . . jwakukulupilila AMBUJE Mlungu jwakwe, . . . jwakusasunga chilanga chakwe ndaŵi syosope.’—Sal. 146:5, 6.