Aŵeje Mesope Pakwembecheya Lisiku lya Yehofa

 1. Ana tukusosekwa kutenda chichi kuti chitukulupuche palisiku lya Yehofa?

BAIBULO pajikusala ya “lisiku lya Yehofa” jikusaŵa jili mkusala ya ndaŵi jele jwalakwe chachajonanga achimmagongo ŵakwe ni kwakulupusya ŵandu ŵakwe. Mundaŵi ja munyuma, Yehofa aŵele ali mkutenda yeleyi. (Yes. 13:1, 6; Esek. 13:5; Sef. 1:8) Nambo mundaŵi jetu jino, “lisiku lya Yehofa” lichitanda ni kwimuchilidwa kwa Babulo Jwamkulungwa yayichitandikasya ngondo ja Alamagedo. Myoyo, kuti chitukulupuche pa ‘lisikuli’ tukusosekwa kutanda kosechela apano. Ni ligongo lyakwe Yesu jwasasile kuti “mŵeje ŵakoseka” ya kwika kwa “yakusawusya yekulungwa,” yayikulosya kuti tukusosekwa kuŵaga ŵakoseka ndaŵi syosope.—Mat. 24:21; Luk. 12:40.

 2. Ligongo chichi buku ja 1 Atesalonika jili jakamuchisya mnope?

² Mu chikalata chakwe chandanda chakwawula kwa Atesalonika, ndumetume Paulo jwakamulichisye masengo yiwanichisyo yejinji pakwakamuchisya Aklistu kosechela lisiku lyekulungwa lya kulamula kwa Yehofa. Paulo jwamanyililaga kuti lisiku lya Yehofa ngaliyika pandaŵi jelejo. (2 Ates. 2:1-3) Nambope, jwalakwe jwasalile ŵakutumichila achimjakwe kuti akosecheje mpela kuti lisikulyo likwika malaŵi gakwe. M’wejisoni tukusosekwa kukamulichisya masengo malangiso gakwega. Kwende tulole yajwatite jwalakwe pakuyilondesya yindu yakuyichisyayi: (1) Mwalichiyichila lisiku lya Yehofa, (2) ŵandu ŵangasakulupuka palisikulyo, soni (3) yampaka tutende pakukosechela kuti chitukulupuche.

 3. Ana lisiku lya Yehofa lichiyika chamtuli mpela jwawiyi chilo? (Alole chiwulili.)

³ “Mpela mwakusayichila jwawiyi chilo.” (1 Ates. 5:2) Gelega gali maloŵe gandanda gaŵagakamulichisye masengo pakulondesya ya kwika kwa lisiku lya Yehofa. Ŵawiyi akusatenda yindu mwachitema pakwiŵa chilo pandaŵi jele ŵandu ngakwembecheya, soni akusatenda yeleyi kuti akakamulwa. Nombe lisiku lya Yehofa lichiyika mwakusisimuchisya, mwamti yichasimonjesya ŵandu ŵajinji. Atamosesoni Aklistu ŵasyesyene mwine chachisimonga ni mwayichitendechela yindu mwachitema. Nambo mwakulekangana ni ŵandu ŵakusakala, m’weji tuchikulupuka.

 4. Ana lisiku lya Yehofa likusalandana chamtuli ni yakupweteka ya pakuŵeleka?

⁴ “Mpela yakupweteka ya pakuŵeleka ya jwamkongwe jwakwete chitumbo.” (1 Ates. 5:3) Jwamkongwe jwasigele panandi kuŵeleka nganaŵa amanyilile ndaŵi jisyesyene jawuchitanda ulwele wakwe. Nambope, jwalakwe akusakulupilila kuti ndaŵi jilijose ulwelewo chiwutande. Mwamti yikusaŵa kuti uchitanda mwakusisimuchisya, soni kuti yichiŵa yakupweteka mnope. Mwakulandana ni yeleyi, ngatukumanyilila lisiku soni ndaŵi jele lisiku lya Yehofa lichitanda. Nambope, tukusakulupilila kuti lisikuli lichiyika nditu, soni kuti Mlungu pachachalamulaga ŵandu ŵakusakala yichitendekwa mwakusisimuchisya, mwamti jemanjajo ngasakombola kutila.

 5. Ana yakusawusya yekulungwa yikulandana ni lilanguka lya kumasikusiku m’litala lyapi?

⁵ Mpela lilanguka lya kumasikusiku. Paulo pajwasalaga ya chiwanichisyo chatatu jwakolasilesoni ya ŵawiyi ŵakusajiŵa chilo. Nambo pandaŵiji, Paulo jwawanichisye lisiku lya Yehofa ni lilanguka. Ŵandu ŵakusajiŵa chilo pane mpaka alepele kumanyilila kuti kusa kutandite kulanguka. Mwamti mpaka yikomboleche kwachelela ali mkwiŵa ni kamulwa. Mwakulandana ni yeleyi, nombe yakusawusya yekulungwa yichiŵa mpela lilanguka lyele lichaŵika pakuwonechela ŵandu ŵali mpela ŵawiyi ŵakusapitilisya kuŵa pachipi mwakutenda yindu yangamchimbichisya Mlungu. Nambo mwakulekangana ni jemanjaji, m’weji mpaka tuŵe ŵakoseka mwakukana kutenda nawo yindu yayikusamsakalisya Yehofa, soni mwakulingalinga “kutenda yiliyose yambone, kuŵa ŵakuŵajilwa pameso pa Mlungu soni kukuya yisyesyene.” (Aef. 5:8-12) Kwende tulole yiwanichisyo yine yiŵili yajwakamulichisye masengo Paulo pakwalondesya ŵandu ŵele ngasakulupuka.

 6. Ana ŵandu ŵajinji ali mlugono m’litala lyamtuli? (1 Atesalonika 5:6, 7)

⁶ “Ŵele ŵakusagona.” (Aŵalanje 1 Atesalonika 5:6, 7.) Paulo jwalandenye ŵandu ŵangasakulupuka pa lisiku lya Yehofa ni ŵandu ŵagonile. Jemanjaji ngakusamanyilila yayikutendekwa soni yakuti ndaŵi jikumala. Mwamti jemanjaji ŵangamanyililaga ndaŵi jayikutendekwa yindu yine yakwe soni nganaŵa ajigele nawo mbali payakutendekwayo. Masiku aganosoni ŵandu akugona mwausimu. (Alo. 11:8) Jemanjaji ngakusakulupilila yakuti tukutama “m’masiku gambesi” soni kuti yakusawusya yekulungwa yiŵandichile. Yakutendekwa yine m’chilambochi mpaka yatendekasye ŵane kwimuka ku lugono lwausimu ni kwatendekasya kutanda kutenda lung’wanu ni utenga wa Uchimwene watukusalalichila. Nambo atamose yili myoyo akusatanda kugonasoni mwausimu ni kuleka kuŵa mesope. Pele ŵane ŵaŵele ali mkukulupilila ya lisiku lyakulamulali akusatanda kuganisya kuti ngaliyika sampano. (2 Pet. 3:3, 4) Nambope tukumanyilila kuti malangiso gakuti tuŵeje mesope gali gakusosekwa lisiku lililyose.

 7. Ana ŵandu ŵachachajonanga Mlungu akulandana mwamtuli ni ŵandu ŵakolelwe?

⁷ “Ŵakusakolelwa.” Ndumetumeju ŵalandenye ŵandu ŵachachijonanjidwa ni Mlungu ni ŵandu ŵakolelwa. Ŵandu ŵakolelwe akusayikopochela mwakuchelewa yindu yayikutendekwa soni akusasagula yakutenda mwangali lunda. Mwakulandanamo ŵandu ŵakusakala ŵangapikanilaga yakwakalamusya Mlungu. Jemanjaji akusatenda yindu yayikusiyalongolela kuchonasiko. Nambo Aklistu akwasalila kuti aŵe mesope soni ŵaganisya chenene. (1 Ates. 5:6) Jwamlijiganye ya Baibulo jwine jwasasile kuti kuŵa mesope kweleku kuli “kuwusimana mtima soni kutamilichika nganisyo, mwakumanyilila yakuŵajilwa kutenda yayikusatukamuchisya kuti tusaguleje chenene yindu.” Ligongo chichi tukusosekwa kuwusimana mtima soni kutamilichika nganisyo? Yeleyi ni yampaka yitukamuchisye kuti tukajigalika ni yakutendekwa ya m’chilambochi. Lisiku lya Yehofa palikuŵandichila ni pachitulinjidweje mnope kuti tujigaleje nawo mbali mu yandale soni yakusangalasya ya m’chilambochi. Nambope ngatukusosekwa kudandawulaga ni mwampaka tuyiŵambalile yeleyi. Msimu wa Mlungu mpaka utukamuchisye kuti tukajigalikaga ni yeleyi soni kuti tusaguleje yindu mwalunda.—Luk. 12:11, 12.

 8. Ana pa 1 Atesalonika 5:8 akuwanichisya ndamo syampaka situkamuchisye kuŵa mesope soni ŵaganisya chenene ni chichi? (Alole chiwulili.)

⁸ ‘Tuwale chakuchijila pamtima .  . . soni chisoti.’ Paulo jwatulandenye ni asilikali ŵakusaŵa mesope ali awete yakuwala ya pangondo. (Aŵalanje 1 Atesalonika 5:8.) Ŵandu akusajembecheya kuti msilikali chaŵeje jwakoseka kuputa ngondo pandaŵi jilijose. Yeleyi yikulandanasoni ni m’weji. Tukusakosechela lisiku lya Yehofa mwakuwala chikulupi soni chinonyelo mpela chakuchijila pamtima, soni chembecheyo chakutukulupusya mpela chisoti. Kusala yisyene ndamo syelesi mpaka situkamuchisye mnope.

 9. Ana chikulupi chetu chikusatuchenjela chamtuli?

⁹ Chakuchijila pamtima chikusachenjela mtima wa msilikali. Nombe chikulupi ni chinonyelo chikusachenjelasoni mtima wetu wakuwanichisya. Yindu yeleyi yichitukamuchisya kuti tupitilisye kumtumichila Mlungu soni kumkuya Yesu. Chikulupi chikusatusimichisya kuti Yehofa chachitupa upile patukulingalinga kumsosa jwalakwejo ni mtima wetu wosope. (Aheb. 11:6) Chikusatukamuchisyasoni kupitilisya kuŵa ŵakulupichika kwa Yesu jwakusatulongolela. Tukusakombola kutenda yeleyi atamose yili mkuti chitusosekwe kupilila yakusawusya. Tukusosekwa kulimbisya chikulupi chetu kuti tukombole kupilila yakusawusya. Mpaka tutende yeleyi mwakuganichisya yisyasyo ya ŵandu ŵa masiku agano ŵaŵakombwele kupitilisya kuŵa ŵakulupichika atamose kuti ŵasimene ni yakusawusya. Mpaka tuŵambalesoni kugwila mu chitega chakunonyela yindu yakuchilu mwa kwasyasya ŵandu ŵakusatama umi wangasaka yejinji kuti aŵicheje yindu ya Uchimwene pamalo gandanda.b

10. Ana kumnonyela Mlungu soni kwanonyela ŵandu ŵele ŵangamtumichila jwalakwe kukusatukamuchisya chamtuli kuti tukombole kupilila?

¹⁰ Chinonyelo chikusatukamuchisya kuti tukombole kuŵa mesope soni ŵaganisya chenene. (Mat. 22:37-39) Kumnonyela Mlungu mpaka kutukamuchisyesoni kuti tukombole kupilila patukulalichila atamose kuti mpaka tusimane ni yakusawusya yejinji. (2 Tim. 1:7, 8) Ligongo lyakuti tukusitwanonyela mnope ŵandu ŵele ngakusamtumichila Yehofa, tukusalalichila ndaŵi syosope mmadela getu, mwamti pane tukusayikana pakulalichila kupitila pa foni kapena kulemba yikalata. Tukusatenda yeleyi tuli tukwete chikulupi chakuti lisiku line ŵandu ŵeleŵa chachichenga ni kutanda kutenda yambone.—Esek. 18:27, 28.

11. Ana kwanonyela abale ni alongo ŵetu mpaka kutukamuchisye chamtuli? (1 Atesalonika 5:11)

¹¹ Tukusitwanonyelasoni abale ni alongo ŵetu. Tukusatenda yeleyi mwa “kulimbikasyana soni kukamusyangana.” (Aŵalanje 1 Atesalonika 5:11.) Mpela yakusati pakamusyangana asilikali ŵakuputa ngondo yalumo, m’wejisoni tukusalimbikasyana. Yisyene kuti ndaŵi sine, msilikali mpaka amwulasye mjakwe mwangosi ngondo pajiyiche pakusawusya. Nambope jwalakwe nganaŵa atesile yeleyo mwamelepe. Mwakulandana ni yeleyi, m’wejisoni nganituŵa tutesile mwamelepe yindu yampaka yapweteche abale ni alongo ŵetu kapena kuwuchisya ŵane patutendele yangali chilungamo. (1 Ates. 5:13, 15) Tukusalosyasoni chinonyelo mwakwachimbichisya abale ŵakusalongolela pampingo. (1 Ates. 5:12) Paulo pajwalembaga chikalata chelechi, paliji pali pagambile kumala chaka chimo kutyochela paŵawutamilikasisye mpingo ŵa ku Tesalonika. Komboleka kuti pandaŵijo abale ŵaŵalongolelaga pampingopo nganamanyililaga yejinji, mwinesoni ŵalemwesyaga pa yindu yine. Nambope abale ni alongo ŵasosekwaga kwachimbichisya jemanjajo. Payichitandaga yakusawusya yekulungwa, tuchisosekwa kudalilaga mnope malangiso gachachitupaga achakulungwa ŵa mumpingo kupunda mwatukusatendela apano. Komboleka yichiŵaga yakusawusya kupochela malangiso gakutyochela ku likulu lyetu lyapachilambo chosope kapena gakutyochela ku ofesi ja nyambi. Myoyo, kuti yindu chiyitujendeleje chenene pandaŵijo, tukusosekwa kutanda apano kwachimbichisya soni kwanonyela mnope achakulungwa ŵa mumpingo. Chinga yindu yichiŵa uli, kwende wosopewe tupitilisye kuŵa ŵaganisya chenene, mwakuŵambala ganichisya mnope yindu yakusalepela achakulungwaŵa. Nambo tuganichisyeje mnope yakuti kupitila mwa Klistu, Yehofa akwalongolela abale ŵakulupichikaŵa.

12. Ana chembecheyo chikusachenjela chamtuli kaganisye ketu?

¹² Mpela yachikusati chisoti pakuwuchenjela mtwe wa msilikali, nombe chembecheyo chetu chakuti tuchikulupuka chikusachenjela kaganisye ketu. Chikulupi chakulimba chikusatukamuchisya kumanyilila kuti yachikusapeleka chilambochi yili yangali mate. (Afil. 3:8) Chembecheyo chikusatukamuchisya kuti tukombole kuwusimana mtima soni kutamilichika nganisyo. Yeleyi ni yayamtendechele M’bale Wallace ni ŵamkwakwe lina lyawo Laurinda ŵakusatumichila ku Africa. Kwa mawiki gatatu, yasimanikwe kuti achinangolo ŵa jemanjaji ajasiche. Jwine ŵajasiche mamagwe jwine babagwe. Nambo ligongo lya mlili wa COVID-19 jemanjaji nganakombola kwawula kumangwawo pandaŵi ja yakusawusyayi. M’bale Wallace jwalembile kuti, “Chembecheyo cha kwimuka ku chiwa changamuchisye kuganichisya ya jemanjaji, mnopemnope muchachiwonechelaga m’masiku gawo gandanda mchilambo chasambano, ngaŵa muŵawonechelaga m’masiku gawo gakumalisya m’chilambo chakusakalachi. Kuganichisya yeleyi, kwangamuchisye kuti nawusimaneje mtima pandaŵi janalagasikaga mnope ligongo lya chanasa.”

13. Ana tukusosekwa kutenda chichi kuti tupochele msimu weswela?

¹³ “Mkasokonasya masengo gawukutenda msimu weswela mwa jemanja.” (1 Ates. 5:19) Pelepa Paulo akutusalila kuti tukalekasya masengo gawukusakamula msimu weswela mwetuwe. Patukwete msimu wa Mlungu tukusakamula masengo mwakulipeleka patukumtumichila Yehofa. (Alo. 12:11) Ana tukusosekwa kutendaga chichi kuti tupochele msimu weswela? Tumŵendeje Yehofa kuti atupe msimuwu, tulijiganyeje Maloŵe ga Mlungu, nambosoni tukamulaneje ni gulu ja Mlungu jajikusalongoleledwa ni msimu wakwe. Kutenda yeleyi kuchitukamuchisya kuti tulosyeje ndamo syele ‘msimu weswela ukusatukamuchisya kuti tukole.’—Agal. 5:22, 23.

14. Ana tukusosekwa kuŵambala kutenda chichi kuti tupitilisye kupochela msimu wa Mlungu? (Alole chiwulili.)

¹⁴ Mlungu patupele msimu weswela, tukusasosekwa kutendaga yindu mwakusamala kuti ‘tukasokonasya masengo gawukutenda msimu weswela mwa m’weji.’ Jwalakwe akusapeleka msimu weswela kwa ŵandu ŵakwete ndamo soni nganisyo syambone. Yehofa nganaŵa apitilisye kutupa msimu weswela naga tukwete nganisyo syakusakala. (1 Ates. 4:7, 8) Nambo kuti tupitilisye kupochela msimu weswela tukusasosekwasoni ‘nganyosyaga maloŵe ga ŵakulochesya.’ (1 Ates. 5:20) “Maloŵe ga ŵakulochesya” gatukugasala pelepa gali utenga wa msimu weswela wa Mlungu, wawukupwatikapo lisiku lya Yehofa nambosoni ya ndaŵi jatukutama jino. Myoyo, ngatukusosekwa kulitutila kusogolo lisikuli tuli mkuganisya kuti Alamagedo ngajitendekwa mundaŵi jetu jino. Mmalomwakwe tukusosekwa kuliwonaga lisikuli kuti chiliyiche pamkaŵapa. Mpaka tutende yeleyi, mwakupitilisya kukola ndamo syambone, mwakuŵa ŵakutanganidwa mnope soni “ŵakulipeleka kwa Mlungu” lisiku lililyose.—2 Pet. 3:11, 12.

15. Ana mpaka tuŵambale chamtuli kujigalika ni mabosa ga Satana? (1 Atesalonika 5:21)

¹⁵ Pamkaŵapa, ŵandu ŵakumsisya Mlungu chachigumila kuti “Sambano tuli pamtendele soni pangali chakutujogoya!” (1 Ates. 5:3) Mabosa ga Satana chigagumbale pachilambopa mwamti yichasokonasya ŵandu ŵajinji. (Chiw. 16:13, 14) Uli pakwamba ya m’weji? Ngasitujigalika ata panandi naga ‘tusimichisye yindu yosope.’ (Aŵalanje 1 Atesalonika 5:21.) Liloŵe lya Chigiliki liŵaligopolele kuti “msimichisyeje” lyakamulaga masengo pakuchilinga chisyano kuti amanyilile naga chili chisyano chisyesyene. Myoyo tukusosekwa kuyilingaga yatukupikana soni yatukuŵalanga kuti tumanyilile naga yili yakuwona. Yeleyi ni yaŵasosekwaga kutenda Aklistu ŵa ku Tesalonika soni ni yatukusosekwa kutendaga m’weji masiku agano payikuŵandichila yakusawusya yekulungwa. Mmalo mwakujigalika ni yakusaŵecheta ŵandu ku chilamboku, tukusosekwa kukamulichisyaga lunda lwetu lwakuganisya chenene pakuyilandanya yatukupikana soni kuŵalangayo ni yajikusajiganya Baibulo soni gulu ja Yehofa. Kutenda yeleyi kuchitukamuchisya kuti tukajigalika ni yitendo kapena kuti yitega ya yiŵanda.—Mis. 14:15; 1 Tim. 4:1.

16. Ana tukwete chembecheyo chapi changakayikasya? Ana wosopewe tukusosekwa kuganichisyaga ya chichi?

¹⁶ Tukumanyilila kuti ŵakutumichila ŵa Yehofa chachikulupuka pandaŵi ja yakusawusya yekulungwa. Nambope, jwalijose jwetuwe jwangamanyililaga yampaka yitendekwe malaŵi. (Yak. 4:14) Myoyo, chinga chituŵepe ŵachijumi mpaka payichitanda yakusawusya yekulungwa, kapena chituwe mkaniyitande, mulimose mwampaka yiŵele tuchipochela umi wangamala naga tukupitilisya kuŵa ŵakulupichika. Ŵasagulwe chachipochela mbote jawo mwa kuja kutama kwinani ni Klistu. Nambo ŵangondolo sine chachipochela chilambo chapasi cha paladaiso. Myoyo, kwende wosopewe tuganichisyeje mnope ya chembecheyo chakusangalasya chatukwete ni kuŵaga mesope patukwembecheya lisiku lya Yehofa.