LIJIGANYO 33
Ana Uchimwene wa Mlungu Uchitenda Yamtuli Pachilambopa?
Uchimwene wa Mlungu ukulamulila. Mwamti pachangakaŵapa, Uchimwenewu chiwuchenje yindu mnope pachilambopa. Kwende tukambilane yindu yambone yatukwembecheya kutyochela ku Uchimwenewu.
1. Ana Uchimwene wa Mlungu uchiyikasya mwamtuli mtendele soni chilungamo pachilambopa?
Pangondo ja Alimagedo, Yesu jwali Mwenye jwa mu Uchimwene wa Mlungu chachijonanga ŵandu ŵakusakala soni maboma ga ŵandu. (Chiwunukuko 16:14, 16) Pandaŵijo maloŵe ga m’Baibulo gakuti, “Mwangakaŵilisya ŵangalumbana ngasawoneka pa chilambo,” gachikwanilichikwa. (Salimo 37:10) Kupitila mu Uchimwenewu, Yesu chachilolechesya kuti mtendele soni chilungamo yikutendekwa pachilambopa.—Aŵalanje Yesaya 11:4.
2. Ana umi uchiŵa wamtuli Uchimwenewu pawuchilamulilaga pachilambopa?
Mu Uchimwene wa Mlungu, “ŵandu ŵambone tachipochela chilambo, ni tachitama mwelemo kwa yaka yosope.” (Salimo 37:29) Kusala yisyene yichiŵa yakusangalasya kutama m’chilambo cha ŵandu ŵambone, ŵakumnonyela Yehofa soni ŵakunonyelana. Pangali jutachilwala soni tuchitamaga ni umi mpaka kalakala.
3. Ana Uchimwene wa Mlungu uchitenda yamtuli ŵakusakala pachachajonanga?
Ŵandu ŵakusakala pachachajonanga, Yesu jwali Mwenye chachilamulila kwa yaka 1,000. Pandaŵijo, Yesu ni ŵa 144,000 ŵachachilamulilaga yimpepe ni jwalakwe, chachikamula masengo gakwakamuchisya ŵandu kuti aŵe ŵamlama. Pambesi pa yaka 1000, chilambochi chichiŵa paladaiso. Konjechesya pelepa chilambochi chichigumbala ni ŵandu ŵakusangalala. Yeleyi yichikomboleka ligongo lyakuti ŵandu tachipikanilaga malamusi ga Yehofa. Kaneko Yesu tachipeleka Uchimwenewu kwa Yehofa. Kupundana ni kala kose, lina lya Yehofa “lichichimbichikwa.” (Mateyu 6:9, 10) Yeleyi yichilosya kuti Yehofa ali Jwakulamulila jwambone soni akusiŵaganichisya ŵandu ŵakwe. Kaneko Yehofa chachimjonanga Satana, yiŵanda soni wosope ŵachachijimuchila ulamusi Wakwe. (Chiwunukuko 20:7-10) Uchimwene wa Mlunguwu uchakamuchisya ŵandu kuŵa ni umi wamlama mpaka kalakala.
KULIJIGANYA YEJINJI
Chitulole ligongo lyakwe tukusosekwa kulupilila kuti Mlungu chachikamulichisya masengo Uchimwenewu pakwanilisya yajasasile Baibulo.
4. Uchimwene wa Mlungu uchimasya maboma ga ŵandu
Baibulo jikusati, ‘Ŵandu akwalamulila achimjawo mwa ngalwe.’ (Jwakulalichila 8:9) Myoyo Yehofa chachikamulichisya masengo Uchimwene wakwe pakumasya ungali chilungamo welewu.
Aŵalanje Daniele 2:44 soni 2 Atesalonika 1:6-8, kaneko akambilane yiwusyo ayi:
Ana Yehofa soni Mwanache jwakwe jwali Yesu, chachitenda yamtuli ku maboma ga ŵandu soni ŵali kumbali ja mabomaga?
Ana yalijiganyisye yakwamba Yehofa soni Yesu, yikwasimichisya chamtuli kuti yachachitendayi yichiŵa yambone soni yachilungamo?
5. Yesu ali mwenye jwambone mnope
Yesu jwali Mwenye jwa Uchimwene wa Mlungu, chachakamuchisya ŵandu pachilambopa mmatala gejinji. Alolele FIDIYO kuti amanyilile yatesile Yesu pakulosya kuti ali jwakusachilila kwakamuchisya ŵandu soni kuti Mlungu ampele machili gakwakamuchisya ŵandu.
Yindu yaŵatesile Yesu ali pachilambo chapasi yikusalosya yawuchitenda Uchimwene wa Mlungu. Payindu yakuyichisyayi, ana ni yindu yambone yapi yakwembecheya kuyiwona? Aŵalanje malembago kuti amanyilile yejinji payindu yatukwembecheyayi.
YESU ALI PACHILAMBO CHAPASI . . . |
YESU PACHACHILAMULILAGA PACHILAMBOPA . . . |
|---|---|
|
|
|
|
|
|
|
|
6. Uchimwene wa Mlungu uchitukamuchisya mnope kusogolo
Uchimwene wa Mlungu uchikwanilisya chakulinga cha Yehofa cha pandanda. Ŵandu chachitama mpaka kalakala pachilambo chapasi cha paladaiso. Alolele FIDIYO kuti amanyilile yakutenda Yehofa pakwanilisya chakulinga chakwe pakumkamulichisya masengo Mwanache jwakwe.
Aŵalanje Salimo 145:16, kaneko akambilane chiwusyo achi:
Ana akupikana uli mumtima kumanyilila kuti Yehofa ‘chachichipa chachijumi chilichose chachikusaka,’?
YAKUSAŴECHETA ŴANDU ŴANE: “Naga wosope tukutenda yindu mwakamulana, mpaka tumasye yakusawusya ya pachilambopa.”
Ana ni yakusawusya yapi yawuchimasya Uchimwene wa Mlungu yele maboma ga ŵandu nganigaŵa gakombwele kumasya?
YALIJIGANYISYE
Uchimwene wa Mlungu uchikwanilisya chakulinga chakwe. Uchimwenewu, uchichenga chilambochi kuŵa paladaiso. Mwamti chilambochi chichigumbala ni ŵandu ŵambone ŵele chachimtumichilaga Yehofa mpaka kalakala.
Yiwusyo Yakuwilisya
Ana Uchimwene wa Mlungu uchiswejesya mwamtuli lina lya Yehofa?
Ligongo chichi tukusosekwa kulupilila kuti Uchimwene wa Mlungu uchitenda yajikusasala Baibulo?
Ana ni yindu yapi yawuchitenda Uchimwene wa Mlungu yakusachilila kuyiwona?
YAKULINGA YINESONI
Amanyilile ngopolelo ja Alimagedo.
Aŵalanje kuti amanyilile yayichitendekwa mu ulamusi wa Yesu soni pambesi pa yaka 1,000 ya ulamusi wakwe.
“Ana Palisiku Lyakulamula Pachitendekwa Yamtuli?” (Sanja ja Mlonda, Sepetemba 1, 2012)
Alole yampaka maŵasa gakambilane pakwamba yindu yambone yatukwembecheya mu Uchimwene wa Mlungu.
Mu ngani jakuti “Nakwete Yiwusyo Yejinji Yayalagasyaga,” alijiganye yaŵatesile mundu jwakwimuchila boma kuti apate yaŵayisakaga.
“Baibulo Jikusachenga Umi wa Ŵandu” (Sanja ja Mlonda, Januwale 1, 2012)