Ana Buku ja Chiwunukuko Jikusatukwaya Chamtuli Masiku Agano?

1-2. Ana ligongo chichi buku ja Chiwunukuko jili jakusangalasya?

TUWANICHISYE kuti mundu jwine ŵaŵendile kuti alole yipikicha mu abamu jakwe. Ni pakulola yipikichayo, akuyiwona yipikicha ya ŵandu ŵangakwamanyilila. Nambo kaneko akwima ni kuchilolechesya chipikicha chine chakwe. Akutenda yeleyi ligongo lyakuti wawojo apali pa chipikichapo. Pakuchilolechesya myoyo, akutanda kukumbuchila ndaŵi soni malo gaŵajambulisye. Akwakumbuchilasoni ŵandu ŵane ŵali pa chipikichapo. Chipikichachi chili chakusosekwa mnope kwa wawojo.

² Buku ja Chiwunukuko jili mpela chipikicha chelechi. Pana magongo gaŵili gagakututendekasya kuŵecheta yeleyi. Ligongo lyandanda lili lyakuti buku ja m’Baibuloji ŵatulembele m’weji. Mu ndime jandanda ja bukuji tukusaŵalanga kuti, “Bukuji jikulondesya yiŵajuwile Yesu Klistu, ni chakulinga chakuti jwalakwejo ŵasalile ŵakutumichila ŵakwe yindu yakusaka Mlungu kuyitenda pangakaŵa.” (Chiw. 1:1) Myoyo, yayilembedwe m’bukuji, nganiyiŵa ya ŵandu wosope, nambo yili ya m’weji ŵakutumichila ŵa Mlungu. Kusala yisyene, ligongo lyakuti tuli ŵakutumichila ŵa Mlungu ngatukusasimongaga patukuyiwona kuti tukukamuchisya nawo kwanilisya yakulochesya yayikusasimanikwa m’buku jakusangalasyaji. Myoyo, patukuŵalanga buku ja Chiwunukuko tukusapata ngani syasikusatukwaya m’wejo.

3-4. Mwakamulana ni buku ja Chiwunukuko, ana yakulochesya ya m’bukuji yaliji yakuti yichikwanilichikwa mundaŵi japi? Ana yeleyi yikutulimbikasya m’weji kutenda chichi?

³ Ligongo lyaŵili lyakututendekasya kusangalala ni buku ja Chiwunukuko jili ndaŵi ja kukwanilichikwa kwa yakulochesyayi. Ndumetume Yohane jwasasile ndaŵi ja kwanilichikwa kwa yakulochesyayi pajwaŵechete kuti, “Pa lisiku lya Ambuje, msimu walongolelaga.” (Chiw. 1:10) Yohane pajwalembaga maloŵega cha m’ma 96 C.E., ‘lisiku lya Ambuje’ lyaliji lili kwakutalika mnope. (Mat. 25:14, 19; Luk. 19:12) Nambo mwakamulana ni yakulochesya ya m’Baibulo lisikuli lyatandite mu 1914, Yesu pajwaŵichidwe kuŵa Mwenye kwinani. Kutandila chaka chelechi, yakulochesya ya m’buku ja Chiwunukuko yakwamba ŵakutumichila ŵa Mlungu yiŵele yili mkukwanilichikwa. Kusala yisyene apano tukutama mu ‘lisiku lya Ambuje.’

⁴ Ligongo lyakuti tukutama mundaŵi jakusangalasyaji, m’weji ni ŵatukusosekwa kupikanila malangiso gagakusasimanikwa pa Chiwunukuko 1:3. Palilembali pakusati, “Jwana upile mundu jwakuŵalanga bukuji, nambosoni ŵana upile ŵandu ŵele ŵakusapikana ni kutenda yigakuti maloŵe ga bukuji, pakuti ndaŵi jiŵandichile.” Kusala yisyene tukusosekwa ‘kuŵalanga’ kuti tupikane “ni kutenda yigakuti maloŵe ga bukuji.” Ana ni maloŵe gane gapi ga m’bukuji gatukusosekwa kugapikanilaga?

 5. Ana buku ja Chiwunukuko jikusalosya chamtuli umbone wakulolechesya kuti kulambila kwetu kuli kwakwitichika kwa Yehofa?

⁵ Kutandila mu chaputala chandanda cha m’buku ja Chiwunukuko, tukusaŵalanga ngani syasikusalosya kuti Yesu akusamanyilila yayikusatendekwa m’mipingo ja ŵandu ŵakwe. (Chiw. 1:12-16, 20; 2:1) Yeleyi yikusawonechela kupitila m’maloŵe gakwe gaŵapeleche ku mipingo 7 ja ku Asia Minor. M’maloŵega, Yesu jwapeleche malangiso gakupikanika chenene kwa Aklistu ŵa m’yaka 100 yandanda kuti alolechesyeje kuti kulambila kwawo kuli kwakwitichika kwa Yehofa. Nambope, yaŵasasile Yesuyi yikusakamulasoni masengo kwa ŵakutumichila ŵa Mlungu masiku agano. Ana yeleyi yikutujiganya chichi? Yeleyi yikulosya kuti Yesu Klistu jwali Jwakutulongolela jwetu akusamanyilila chenene naga tuli paunasi wambone ni Yehofa kapena iyayi. Jwalakwe akusalola chilichose ligongo lyakuti ni jwakusatulongolela. Akusamanyililasoni yatukusosekwa kutenda kuti tupitilisye kumsangalasya Yehofa. Ana Yesu jwapeleche malangiso gamtuli gatukusosekwa kugapikanila masiku agano?

 6. (a) Mwakamulana ni Chiwunukuko 2:3, 4, ana mpingo wa ku Efeso wakwete chakusawusya chamtuli? (b) Ana yeleyi yikutujiganya chichi?

⁶ Aŵalanje Chiwunukuko 2:3, 4. Ngatukusosekwa kuleka kumnonyela Yehofa mpela mwatwatendelaga pandanda. Maloŵe ga Yesu gakwawula ku mpingo wa ku Efeso galosisye kuti jemanjajo ŵaliji ŵakupilila soni ŵapitilisye kumtumichila Yehofa atamose kuti ŵasimanaga ni yakusawusya. Atamose kuti yaliji myoyo, jemanjaji ŵalesile chinonyelo chawo chaŵakwete pandanda. Yikaŵe kuti nganatandilasoni kola chinonyelo chaŵakwete pandanda nikuti Yehofa ngamkanajitichisya kulambila kwawo. Mwakulandana ni jemanjaji, m’wejisoni masiku agano tukusasosekwa kutenda yejinji kupunda kwamba kupilila. Tukusasosekwa kupilila pamagongo gambone. Mlungu jwetu jwangagamba kulola yatukutenda, nambo akusalolasoni magongo gatukutendela yinduyo. Yehofa akusalolechesya mnope magongo gatukusatendela yine yakwe. Jwalakwe akusasaka kuti tumlambileje ligongo lyakumnonyela mnope.—Mis. 16:2; Maliko 12:29, 30.

 7. (a) Mwakamulana ni Chiwunukuko 3:1-3, ana mpingo wa ku Sadisi wakwete chakusawusya chamtuli? (b) Ana m’weji tukusosekwa kutenda chichi?

⁷ Aŵalanje Chiwunukuko 3:1-3. Tukusosekwa kupitilisya kuŵa mesope. Nombe Aklistu ŵa mu mpingo wa ku Sadisi ŵakwete chakusawusya. Pandanda jemanjaji ŵamtumichilaga Yehofa, nambo kaneko ŵalesile. Myoyo Yesu ŵasalile jemanjaji kuti ‘atameje mpela Aklistu’ kapena kuti aŵe mesope. Ana yeleyi yikutujiganya chichi? Yisyene kuti Yehofa nganaŵa aliŵalile masengo getu. (Aheb. 6:10) Nambope, yeleyi yikatutendekasyaga ganisyaga kuti apano ngatukusosekwa kumtumichila Yehofa ligongo lyakuti twatesile yejinji munyumamo. Yisyene kuti ligongo lya yakusawusya yine, ŵane mwa m’weji nganituŵa tukombwele kutenda yejinji mpela mwatwatendelaga pandanda, nambope tukusosekwa kutanganidwaga ni “masengo ga Ambuje,” soni kuŵa mesope mpaka kumbesi.—1 Akoli. 15:58; Mat. 24:13; Maliko 13:33.

 8. Ana tukulijiganya chichi pa maloŵe ga Yesu gakwawula ku mpingo wa ku Laodikeya gagakusasimanikwa pa Chiwunukuko 3:15-17?

⁸ Aŵalanje Chiwunukuko 3:15-17. Tukusosekwa kulipeleka ni mtima wetu wosope pakulambila kwetu. Maloŵe ga Yesu gakwawula ku mpingo wa ku Laodikeya galosisye kuti nombe jemanjajo ŵakwete chakusawusya chine. Jemanjaji ŵaliji “ŵamoto panandipe” pakulambila kwawo. Ligongo lya kulikwesya kwawo, Yesu ŵasalile jemanjajo kuti ŵaliji ‘ŵakulaga soni ŵakutesya chanasa.’ Mwamti ŵasosekwaga kulipeleka mnope pakumlambila Yehofa. (Chiw. 3:19) Ana yeleyi yikutujiganya chichi? Naga twawujile munyuma pakumtumichila Yehofa, tukusosekwa kutandilasoni kumnonyela jwalakwe kuti tuŵe ŵakusichila mwausimu mpela pandanda. (Chiw. 3:18) Tukamalilaga ndaŵi jetu tuli mkusosasosa yindu yakuchilamboku kuti tukole umi wambone apano, ligongo mpaka yitutendekasye kuyiwonaga yindu yausimu kuŵa yangasosekwa mnope pa umi wetu.

 9. Mwakamulana ni maloŵe ga Yesu gakwawula kwa Aklistu ŵa ku Pegamamu soni ku Tiyatila, ana tukusosekwa kuŵambala chichi?

⁹ Tuŵambaleje kukulupilila yakusajiganya ŵampatuko. Yesu ŵajamwiche ŵandu ŵane ŵa mumpingo wa ku Pegamamu ligongo lyakutandisya kugaŵikangana pasikati pawo. (Chiw. 2:14-16) Nambo jwalakwe jwawuyamichile mpingo wa ku Tiyatila ligongo lyakuŵambala yindu “yakusokoka ya Satana,” nambosoni jwalimbikasisye jemanjajo kuti ‘awukamulisye mnope’ usyesyene. (Chiw. 2:24-26) Aklistu ŵane ŵaŵatandite kwakuya ŵampatuko ŵasosekwaga kupitikuka mtima. Nambi uli pakwamba ya m’weji masiku agano? Tukaneje yijiganyo yiliyose yakutindana ni nganisyo sya Yehofa. Ŵampatuko mpaka awoneche mpela akusatenda yajikusasala Baibulo, nambo yitendo yawo yikusalosya kuti ŵangatendaga yeleyo. (2 Tim. 3:5) Mpaka yiŵe yangasawusya kumanyilila soni kana yijiganyo yaunami naga tukusalijiganya Maloŵe ga Mlungu ndaŵi syosope.—2 Tim. 3:14-17; Yuda 3, 4.

10. Ana yaŵasasile Yesu ku mpingo wa ku Pegamamu soni wa ku Tiyatila mpaka yitujiganyesoni chichi?

¹⁰ Tukusosekwa kuŵambala yitendo yiliyose yakusakala. Papalisoni chakusawusya chine ku mpingo wa ku Pegamamu soni wa ku Tiyatila. Yesu jwajamwiche ŵandu ŵane m’mipingo jeleji ligongo lyakuti ŵatendaga yakusakala. (Chiw. 2:14, 20) Ana pelepa tukulijiganya chichi? Komboleka kuti tuŵele tuli mkumtumichila Yehofa kwa yaka yejinji, kapenasoni apanopano tukwete maudindo gejinji. Atamose kuti yili myoyo tukaganisyaga kuti Yehofa mpaka asecheleleje yakusakala yiliyose yampaka tutende. (1 Sam. 15:22; 1 Pet. 2:16) Jwalakwe akusajembecheya kuti chitukuyejepe ndamo syakwe syapenani atamose kuti yitendo ya ŵandu mchilambochi yisakele mnope.—Aef. 6:11-13.

11. Ana pakwika apano mpaka tujile kuti tulijiganyisye yamtuli? (Alole libokosi lyakuti “Yatukulijiganya Masiku Agano.”)

¹¹ Ana pakwika apano mpaka tujile kuti tulijiganyisye yamtuli? Tuyiweni kuti tukusosekwa kutenda yakuti Yehofa ajitichisyeje kulambila kwetu. Naga tukutenda yindu yampaka yisokonasye kulambila kwetu, tukusosekwa kuchenga mwachitema kuti tutande kumsangalasya Mlungu. (Chiw. 2:5, 16; 3:3, 16) Nambope Yesu jwasasilesoni chindu chine ku mipingo jine ja ku Asia Minor. Ana jwalakwe jwasasile yamtuli?

12. Ana mpaka tulijiganye chichi pa maloŵe ga Yesu gakwawula ku mpingo wa ku Similina soni ku Filadefiya? (Chiwunukuko 2:10)

¹² Kwende sambano tulole maloŵe ga Yesu gakwawula ku mpingo wa ku Similina soni ku Filadefiya. Jwalakwe jwasalile Aklistu ŵa kumipingo jeleji kuti akajogopaga kulagasidwa ligongo naga akuŵa ŵakulupichika Yehofa chachapa upile. (Aŵalanje Chiwunukuko 2:10; 3:10) Ana m’weji masiku agano tukulijiganya chichi pelepa? Tujembecheje kuti chitulagasidweje soni tuŵeje ŵakoseka kupilila. (Mat. 24:9, 13; 2 Akoli. 12:10) Ligongo chichi kumbuchila yeleyi kuli kwakusosekwa mnope?

13-14. Ana ŵakutumichila ŵa Mlungu asimene ni yakusawusya yamtuli ligongo lya yakutendekwa yakusayikolanga m’buku ja Chiwunukuko chaputala 12?

¹³ Buku ja Chiwunukuko jasasile kuti ŵandu ŵa Mlungu chachilagasidwa mundaŵi jetu jino. Chaputala 12 cha bukuji, chikusatusalila kuti kwinani kwapali ngondo Yesu pajwaŵele Mwenye. Mikaele jwali Yesu Klistu pampepe ni malayika gakwe gangondo ŵamenyene ni Satana soni yiŵanda yakwe. (Chiw. 12:7, 8) Yakuyichisya yakwe adani ŵa Mlunguŵa ŵalusile ngondojo mwamti ŵaponyisye pachilambo chapasi. Yeleyi yatendekasisye kuti ŵandu pachilambopa asimaneje ni yipwetesi. (Chiw. 12:9, 12) Nambo ana yeleyi yakwayiye chamtuli ŵakutumichila ŵa Mlungu?

¹⁴ Buku ja Chiwunukuko jikusatusalila yajwatesile Satana yili yitendekwe yeleyi. Ligongo lyakuti jwalakwe nganaŵa akombwelesoni kuwujila kwinani, akusalimbana ni ŵasagulwe ŵali chiŵela pachilambopa ŵakusawujimila Uchimwene wa Mlungu soni ‘ŵakumtendela umboni Yesu.’ (Chiw. 12:17; 2 Akoli. 5:20; Aef. 6:19, 20) Ana yakulochesya yeleyi yikwanilichikwe chamtuli?

15. Ana ŵani ŵaŵajimilaga ‘mboni siŵili’ syakusasikolanga m’buku ja Chiwunukuko chaputala 11? Ana jemanjaji ŵasimene ni yamtuli?

¹⁵ Satana jwatendekasisye kuti achimmagongo ŵa Mlungu ŵajimuchile abale ŵaŵalongolelaga masengo gakulalichila ya Uchimwene. Abaleŵa ŵajimilaga ‘mboni siŵili’ syaŵasisasile kuti syawulajidwe.b (Chiw. 11:3, 7-11) Mu 1918, abale 8 ŵaŵalongolelaga yindu m’gulu ja Yehofa ŵalambuchisye magambo, mwamti ŵalamwile kuti akatame mundende kwandaŵi jelewu. Yeleyi yili yitendekwe, kwa ŵandu yawonekaga kuti masengo ga ŵasagulwewo basi gamasile.

16. Ana mu 1919 mwatendekwe chindu chapi chakusimonjesya? Ana Satana aŵele ali mkutenda chichi kutandila pandaŵi jelejo?

¹⁶ Yakulochesya ya m’buku ja Chiwunukuko chaputala 11 chila, yasasilesoni kuti ‘mboni siŵili’ sila sichijimuka ni kolasoni umi mkanipapite ndaŵi jelewu. Yakulochesyayi, yakwanilichikwe mwakusimonjesya mkanipamale chaka abaleŵa ali aŵichidwe mundende. Chakundanda kwa chaka cha 1919 abale ŵasagulwe ŵala ŵakopwesye mundende, kaneko magambo gawo gamasile. Abale ŵala ŵatanditesoni kulongolela masengo ga Uchimwene. Nambo yeleyi nganiyitendekasya kuti Satana aleche kwalagasya ŵandu ŵa Mlungu. Kutandila ndaŵi jelejo, Satana aŵele ali mkutendekasya kuti ŵakutumichila ŵa Mlungu alagasidweje, yayili mpela kujigalwa ni mesi ga ‘m’lusulo.’ (Chiw. 12:15) Kusala yisyene “pelepa ni pele ŵandu ŵa Mlungu akwenela kulosya kupimilila kwawo ni kulimbichila mchikulupi chawo.”—Chiw. 13:10.

17. Ana ŵandu ŵa Mlungu akusapochela chikamuchisyo chamtuli, atamose kuti Satana akulimbana nawo?

¹⁷ Kaneko buku ja Chiwunukuko chaputala 12 jasasile kuti ŵandu ŵa Mlungu chachipata chikamuchisyo kutyochela kumalo ganganagajembecheyaga. Yeleyi yichiŵa mpela kuti “chilambo” chimisile “mesi” gagali mpela yakusawusya. (Chiw. 12:16) Yeleyi ni yayiŵele yili mkutendekwa. Ndaŵi sine mbali sine sya chilambo cha Satanachi mpela maluŵala ga magambo, gakusigachenjela ŵakutumichila ŵa Mlungu. Ndaŵi syejinji ŵakutumichila ŵa Yehofa akusawina magambo yayikusiyatendekasya kola ufulu wakulambila. Ana jemanjaji akusawukamulichisyaga masengo chamtuli ufuluwu? Jemanjaji akusajikamulichisya masengo ndaŵi jeleji mwalunda pakutenda masengo gaŵapele Yehofa. (1 Akoli. 16:9) Ana masengoga gakusapwatikapo kutenda chichi?

18. Ana m’masiku gakumalisya gano tukwete masengo gekulungwa gapi?

¹⁸ Yesu jwasasile kuti ŵakulijiganya ŵakwe chachilalichila ‘ngani syambone syakwamba ya Uchimwene wa Mlungu’ pachilambo chosope mbesi mkanijiyiche. (Mat. 24:14) Jemanjaji pakulalichila, malayika gakusigakamuchisyaga. Malayikaga akusagasala kuti “gakwete ngani syambone syakuti akalalichile kwa ŵandu ŵachilambo chapasi, kwa ŵandu ŵa mtundu wuliwose, ŵalukosyo lulilose, ni ŵachiŵecheto chilichose.”—Chiw. 14:6.

19. Ana ŵakutumichila ŵa Yehofa akusalalichila utenga wine wapi?

¹⁹ Kupwatika pa kulalichila ngani syambone syakwamba ya Uchimwene, ŵakutumichila ŵa Mlungu akusasosekwasoni kutenda chindu chine. Jemanjaji akusasosekwa kamuchisya nawo pa masengo ga malayikaga gakusagakolanga m’buku ja Chiwunukuko chaputala 8 mpaka 10. Malayikaga gakusapeleka chimanyisyo chakwamba yakusawusya yachachisimana nayo ŵandu ŵakusakana Uchimwene wa Mlungu. Ni ligongo lyakwe ŵa Mboni sya Yehofa aŵele ali mkulalichila maloŵe gakulandana ni “matalila ni moto” gakusala yachachitenda Mlungu pakuchilamula chilambo cha Satana chakusakalachi. (Chiw. 8:7, 13) Ŵandu akusosekwa kumanyilila kuti mbesi jiŵandichile. Yeleyi mpaka yakamuchisye kuti achenje umi wawo kuti chakulupuche palisiku lya ukali wa Yehofa. (Sef. 2:2, 3) Nambope utenga watukusasosekwa kwasalila ŵanduwu nganiwuŵa wakuwanda. Myoyo tukusasosekwa kulimba mtima kuti tukombole kutenda yeleyo. Mundaŵi ja yisawusyo yekulungwa, utenga welewu uchiŵa wakupweteka mnope kwa ŵandu.—Chiw. 16:21.

20. Ana mungani siŵili syakuyichisya tuchikambilana chichi?

²⁰ Kusala yisyene, tukusosekwa kupikanila ‘maloŵe ga m’buku’ ja Chiwunukuko ligongo tukwete mbali pa kwanilichikwa kwa maloŵe gatukusaŵalanga m’bukuji. (Chiw. 1:3) Nambo ana mpaka tutende wuli kuti tukombole kupilila yakusawusya mwakulupichika soni kupitilisya kulalichila mwakulimba mtima? Tuchilijiganya yeleyi mungani siŵili syakuyichisya. Mungani jandanda tuchilijiganya yajikusasala buku ja Chiwunukuko pakwamba ya achimmagongo ŵa Mlungu. Soni jaŵili jichisala yakwamba upile watuchipata kusogoloku naga tukupitilisyape kuŵa ŵakulupichika.