Tumlambileje Yehofape

 1. Ligongo chichi tukusosekwa kumlambilaga Yehofape?

TUKUSOSEKWA kumlambila Yehofape ligongo ni juŵatupanganyisye. (Ciw. 4:11) Nambope, tukusasimana ni yakusawusya. Atamose kuti tukusamnonyela soni kumchimbichisya Yehofa, ndaŵi sine yindu yine mpaka yitulepelekasye kumlambila jwalakwejo. Tukusosekwa kumanyilila mwampaka yitendechele yeleyi. Nambo chandanda kwende tumanyilile ngopolelo ja kumlambila Yehofape.

 2. Mwakamulana ni Ekisodo 34:14, ana tuchitenda chichi naga tukusamlambila Yehofape?

² M’Baibulo, kumlambila Yehofape kukusagopolela kumnonyela jwalakwe ni mtima wosope. Kumlambila kukusapwatikasoni ngakunda chilichose kuti chijinjile mmalo mwakumlambila Yehofa.​—Aŵalanje Ekisodo 34:14.

 3. Ligongo chichi kulambila kwetu Yehofa kuli kusyesyene?

³ Kumlambila kwetu Yehofa kuli kusyesyene. Ligongo chichi yili myoyo? Ligongo lyakuti kukusatyochela pa yindu yatwalijiganyisye yakwamba jwalakwe. Tukusasinonyela ndamo syakwe syambone. Tukusamanyilila yindu yakusanonyela jwalakwe ni yakusaŵengana nayo, soni tukusatenda yindu mwakamulana ni mwakusayiwonela jwalakwe. Tukusatenda yindu mwakamulana ni chakulinga chakwete Mlungu kwa ŵandu. Tukusayamichila kuti ŵatupele upile wakuŵa achimjakwe. (Sal. 25:14) Chilichose chatukusalijiganya chakwamba Mlungu jwetu chikusatutendekasya kuti tumŵandichile jwalakwe.—Yak. 4:8.

 4. (a) Ana Satana akusatenda wuli pakusaka kutusokonasya kuti tukamnonyelaga Yehofa? (b) Ana mungani ajino chitukambilane chichi?

⁴ Satana ni jwakulamulila chilambochi, soni akusakamulichisya masengo yindu ya m’chilambochi pakusaka kutusokonasya. (Aef. 2:1-3; 1 Yoh. 5:19) Chakulinga chakwe chili kututendekasya kunonyela mnope yindu ya m’chilambochi mmalo mwakumnonyela Yehofa. Kwende tulole matala gaŵili gampaka atendele yeleyi. Litala lyandanda, jwalakwe akusatutendekasya kuti tunonyeleje mbiya, soni lyaŵili akusatutendekasya kuti tunonyeleje yakusangalasya yakusakala.

 5. Ligongo chichi tukusosekwa kusamala ni mtima wakunonyela mbiya?

⁵ Ŵanduwe tukusasaka kukola yakulya yakwanila, yakuwala yambone soni malo gakutama gambone. Nambope tukusosekwa kusamala ni mtima wakunonyela mnope mbiya. Ŵandu ŵajinji ŵali m’chilambo cha Satanachi, ali “ŵakunonyela mbiya” soni yindu yampaka asume ni mbiyasyo. (2 Tim. 3:2) Yesu jwamanyilile kuti ŵakumkuya ŵakwe mpaka alinjidwe ni mtima wakunonyela mbiyawu. Jwalakwe jwatite, “Mundu ngaŵa mkupakombola kwatumichila achambuje ŵaŵili, pakuti pane chachiŵengana ni jumojo ni kumnonyela jwinejo. Pane tachilipeleka mnope kwa jumojo ni kumnyosyaga jwinejo. Ngaŵa mkupakombola kutumichila wosope ŵaŵili, Mlungu ni yipanje.” (Mat. 6:24) Mundu jwakusalambila Yehofa nambo kwineku ali mkumalila ndaŵi soni machili gakwe pakusosasosa yipanje, nikuti jwalakwe akutumichila achambuje ŵaŵili. Jwalakwe nganaŵa akombwele kumlambila Yehofape.

 6. Ana mpaka tulijiganye chichi kutyochela pamaloŵe ga Yesu gakwawula kumpingo wa ku Laodikeya?

⁶ Chaka cha 100 C.E. mkanichiyiche, Aklistu ŵa mumpingo wa mumsinda wa Laodikeya ŵaŵechetaga kuti, ‘Uwe tuli ŵakusichila mwakuti tukwete yipanje soni ngatukusoŵa chilichose.’ Nambope pameso pa Yehofa soni Yesu, jemanjaji ŵaliji “ŵakulaga, ŵakutesya chanasa, ŵa ulanda, ŵatatale ni ŵamakonope.” Yesu ŵapele msyungu jemanjaji, ngaŵa ligongo lyakuti ŵaliji ŵakusichila, nambo ligongo lyakuti kunonyela kwawo mbiya kwajonangaga unasi wawo ni Yehofa. (Ciw. 3:14-17) Naga tukuyiwona kuti tutandite kunonyela mnope mbiya, tukusosekwa mwachitema kulinganya kaganisye ketu. (1 Tim. 6:7, 8) Naga ngatukutenda yeleyi nikuti mpaka tutande kunonyela yindu yine, yampaka yitendekasye kuti Yehofa akajitichisya kulambila kwetu. Jwalakwe “akusasaka kuti tumlambileje jwalakwepe basi.” (Det. 4:24, NW) Sambano, ana pelepa mbiya tusiwoneje mwamtuli?

7-9. Ana akulijiganya chichi kutyochela pa chisyasyo cha David?

⁷ Kwende tulole chisyasyo cha jwamkulungwa jwamumpingo jwine jwa ku United States lina lyakwe David. Jwalakwe jwasasile kuti jwaliji jwakulipeleka pamasengo gakwe. Jwalakwe ŵamkwesisye pa udindo pa kampani jaŵakamulaga masengo. Kupwatika pelepa, jwaliji jwakumanyika m’chilambo chakwe ligongo lya masengo gaŵakamulaga. David jwatite, “Naganisyaga kuti upile wanakwetewu watyochelaga kwa Yehofa.” Nambo ana yisyene kuti waliji upile wakutyochela kwa Yehofa?

⁸ David jwatandite kuyikopochela kuti masengo gakwego gakonanga unasi wakwe ni Yehofa. Jwalakwe jwasasile kuti, “Pamisongano jampingo soni kukulalichila nagambaga ganichisya yakusawusya yakumasengo. Napochelaga mbiya syejinji, nambo nalagasikagape nganisyo nambosoni liŵasa lyangu nganilijendaga chenene.”

⁹ David jwasosekwaga kusagula chindu chachaliji chakusosekwa mnope kwa jwalakwe. Jwalakwe jwatite, “Nasosekwaga kulimba mtima kuti sagule yindu mwalunda.” David jwasosekwaga kuchenga kakamule kakwe kamasengo, mwamti ŵasalile abwana ŵakwe yajwasakaga kutenda. Ana yakuyichisya yakwe yaliji yamtuli? David ŵamtyosisye masengo. Ana jwalakwe jwatesile chichi? Jwalakwe jwatite, “Lisiku lyakuyichisya, nalembile fomu ja upayiniya wakamuchisya wakupitilisya.” Kuti apateje yakusosechela ya paumi, David ni ŵamkwakwe ŵatandite kamula masengo gakuswejesya. Pali papite ndaŵi, jwatandite upayiniya wakutamilichika, nombe ŵamkwakwe ŵatanditesoni. Liŵasali lyasagwile kamula masengo gakusagawona ŵandu mpela gakutuluka, nambo mtundu wamasengoga gatendekasyaga ganichisya mnope yindu yausimu. Atamose kuti nganapataga mbiya syejinji mpela pandanda, nambope akusambolaga kupata yakusosechela ya paumi mwesi wuliwose. Jemanjaji akusaka kuŵika yakusasaka Yehofa pamalo gandanda, soni ayiweni kuti Yehofajo akusiŵasamalila ŵandu ŵasagwile kutenda yeleyi.—Mat. 6:31-33.

10. Ana mpaka tuwuchenjele mtima wetu chamtuli?

¹⁰ Chinga tukwete mbiya syejinji kapena iyayi, tukusosekwa kuwuchenjela mtima wetu. Ana mpaka tutende chamtuli yeleyi? Ngatukusosekwa kusachililaga kuŵa ŵakusichila. Soni tukakundaga kuti tugawoneje masengo getu kuŵa gakusosekwa mnope kupunda kumtumichila Yehofa. Ana mpaka tumanyilile chamtuli kuti tukunonyela mnope masengo getu? Tukusosekwa kuliwusya yiwusyo yakuyichisyayi, ‘Ana ngusaganichisya yamasengo gangu pandili kumisongano soni pangulalichila? Panguganichisya yamsogolo, ana ngusadandawulaga naga chinjikola mbiya syakwanila? Ana mbiya soni yindu yakuchilu yikusayikasya yakusawusya kwa une soni kwa mjangu jwa mu ulombela? Ana mpaka ngunde kukamula masengo gakusagawona ŵane kuti gali gakutuluka nambo naga gali mkumba mpata wakumtumichila Yehofa?’ (1 Tim. 6:9-12) Patukuganichisya yiwusyo yeleyi, tukumbuchileje kuti Yehofa akusatunonyela soni kuti jwalakwe akusaŵecheta kwa ŵandu ŵakusalipeleka kwa jwalakwe kuti, “Ngasinamleka kapena kumjasa kose.” Ali ni ligongo lyakwe ndumetume Paulo jwalembile kuti, “Mtima wenu ukaŵaga pa mbiya.”—Aheb. 13:5, 6.

11. Ana yakusangalasya yakusasagula mundu mpaka yikole yakuyichisya yamtuli?

¹¹ Yehofa akusasaka kuti tuwuwoneje umi kunong’a. Soni yakusangalasya yikusakamuchisyaga kuti umiwu unonyeje. Maloŵe ga Mlungu gakusasala mwangapita mumbali kuti, “Pangali chindu chine chambone champaka mundu akomboleche kutenda pa masengo gakwe kupunda kulya, kumwa ni kwikutila pamasengo gakwego.” (Jwak. 2:24) Nambope, yakusangalasya yejinji m’chilambochi yili yakusakala kwa m’weji. Yakusangalasya yeleyi yikusalimbikasya ŵandu kutenda ndamo syakutindana ni Maloŵe ga Mlungu.

12. Mwakamulana ni 1 Akolinto 10:21, 22, ligongo chichi tukusosekwa kusagula mwalunda yakusangalasya?

¹² Tukusasosekwa kumlambila Yehofape, myoyo nganituŵa tulile “patebulo ja Ambuje” soni “patebulo ja misimu jakusakala.” (Aŵalanje 1 Akolinto 10:21, 22) Kulila chakulya yimpepe ni mundu jwine yikusalosya kuti ŵanduwo akusakamulana. Naga tukusagula yakusangalasya yayikusalimbikasya yachiwawa, yamisimu, yachikululu, kapena yakumbila yachilu, nikuti tukulya patebulo jimpepe ni achimmagongo ŵa Mlungu. Yakuyichisya yakwe, ngaŵa kuti yakusangalasyayi yikusagamba kutujonanga m’wejipe, nambo yikusajonangasoni unasi wetu ni Yehofa.

13-14. Mwakamulana ni Yakobo 1:14, 15, ligongo chichi tukusosekwa kusamala mnope ni yakusangalasya yatukusasagula? Apeleche chisyasyo.

¹³ Ana yakusangalasya mpaka tuyiwanichisye ni yakulya m’litala lyapi? Patukulya mpaka tusagule chakulya chatukusaka kuŵika mkamwa mwetu. Nambo patugambile kumila, ngatukusasagulasoni mwampaka chikamulile masengo chakulyacho m’chilu mwetu. Chakulya chambone mpaka chitutendekasye kola chilu chambone, soni chakulya chakusakala mpaka chijonanje chilu chetu. Yakuyichisya yakwe mpaka yijigale ndaŵi mkaniwonechele, nambo mkupita kwandaŵi mpaka yitande kuwonechela.

¹⁴ Mwakulandana ni yeleyi, patukusagula yakusangalasya mpaka tusagulesoni yatukusaka kuŵika munganisyo mwetu. Panyuma pakwe, yakusangalasyayo mpaka yikwaye kaganisye ketu soni mtima wetu. Yakusangalasya yambone mpaka yitukamuchisye, nambo yakusangalasya yakusakala mpaka yitujonanje. (Aŵalanje Yakobo 1:14, 15.) Yakuyichisya ya yakusangalasya yakusakala mpaka yijigale ndaŵi mkaniyiŵe kuwonechela, nambo mkupita kwandaŵi yikusawonechelape. Ni ligongo lyakwe Baibulo jikusatukalamusya kuti, “Mkasimlambusidwa: Mlungu ngaŵa mkomboleka kumloŵesya. Yele yakusapanda mundu, tachigowola iyoyo. Naga mundu akuyikosya mnope yakusaka ya mtima wakwe yakuyichisya yakwe yili chiwa.” (Aga. 6:7, 8) Kusala yisyene, yili yakamuchisya mnope kuyiŵambala yakusangalasya yosope yayikusalimbikasya yindu yele Yehofa akusaŵengana nayo.—Sal. 97:10.

15. Ana Yehofa atupele mtuka wapi kuti tusangalaleje nawo?

¹⁵ Ŵakutumichila ŵajinji ŵa Yehofa akusasangalala kulolela JW Broadcasting^®, jajili TV jambone ja pa Intaneti. Mlongo jwine lina lyakwe Marilyn jwatite, “Pologalamu ja JW Broadcasting jingamuchisye mnope, ligongo yindu yosope yayikusasimanikwa pa pologalamuji yili yambone. Palingamwile lipowo, ngusapata ngani syakulimbikasya. Nganisyo sikusandendekasya kulipikana kuti ndili pakuŵandikana ni Yehofa soni likuga lyakwe? Pologalamu ja JW Broadcasting jichenjile mnope umi wangu.” Ana wawojo akupindula ni mtuka wakutyochela kwa Yehofawu? Kupwatika pa pologalamu jajikusakopoka mwesi wuliwose, pa JW Broadcasting pakusapagwasoni yindu yine yakulolela soni yakwamba kupikanila nambosoni nyimbo syakulimbikasya.

16-17. Ana mpaka anandiye chamtuli ndaŵi jakusamalila ali mkutenda yakusangalasya, soni mpaka atende chamtuli yeleyi?

¹⁶ Tukusosekwa kusamala ni mtundu wa yakusangalasya yatukusasagula nambosoni winji wandaŵi jatukusamalila. Naga ngatukusamala mpaka tumalileje ndaŵi jejinji tuli mkutenda yakusangalasya mmalo mwakumtumichila Yehofa. Ŵajinji akusayiwona kuŵa yakusawusya kuliŵichila ndaŵi jakutendela yakusangalasya. Mlongo jwine jwa yaka 18 lina lyakwe Abigail jwatite, “Kulolela TV kukusandendekasya kuŵa jwakusangalala panyuma pakuŵeluka kumasengo. Nambo naga ngasamala, ngusamalila ndaŵi jejinji ndili mkulolela TV.” M’bale jwachinyamata jwine lina lyakwe Samuel jwatite, “Ngusamalila ndaŵi jejinji ndili mkulolela tumafidiyo pa Intaneti. Ngusatanda ni kulolela jimo, soni ngangusamanyilila kuti malile maawala galingwa ndili mkulolela.”

¹⁷ Ana mpaka anandiye chamtuli ndaŵi jakusamalila payindu yakusangalasya? Chandanda akusosekwa kumanyilila ndaŵi jakusamalila ali mkutenda yakusangalasya. Uli ngalinga kutenda yakuyichisyayi? Alembe pa kalendala jawo ndaŵi jakusamalila ali mkulolela TV, kulola yindu pa Intaneti, soni kung’anda magemu pafoni. Naga apatile kuti yeleyi yikwamalila ndaŵi jejinji nikuti akusosekwa kulinganya ndandanda. Akusosekwa kutenda yakomboleka kuti aŵiche yindu yakusosekwa mnope pamalo gandanda, ni kukamulichisyaga masengo ndaŵi jamnono kutendela yakusangalasya yine. Chindu chine, amŵendeje Yehofa kuti ŵakamuchisye kutenda yindu mwakamulana ni ndandanda jawo. Kukuya yeleyi mpaka kwakamuchisye kuti akoleje ndaŵi soni machili gakutendela lijiganyo lyapajika, kulambila kwa peŵasa, kutenda nawo misongano jampingo soni kumtumichila Yehofa mwakukamula nawo masengo gakulalichila. Kutenda yeleyi, kuchitukamuchisya kuti tusangalaleje patukutenda yakusangalasya ligongo lyakuti tuŵisile yindu yausimu pamalo gandanda.

18-19. Ana mpaka tulosye chamtuli kuti tukusamlambila Yehofape?

¹⁸ Panyuma pakulemba yakwamba mbesi ja chilambo cha Satanachi soni pakwamba ya chilambo chasambano chachili mkwika, ndumetume Petulo jwatite, “Ŵakunonyelwa achimjangu, pakuti mkwembechela yeleyi, mlinjilileje kuti Ambuje tamsimane mli ŵangali liŵala kapena liŵasi lililyose nambosoni mli mkutama pamtendele.” (2 Pet. 3:14) Naga tukupikanila maloŵega soni kutenda yakomboleka kuŵa ŵaswela mwausimu, nikuti tuchilosya kuti tukusamlambila Yehofape.

¹⁹ Satana ni chilambo chakwechi, chapitilisyejepe kutendekasya kuti tuŵicheje yindu yakuchilu pandanda mmalo mwa ya Yehofa. (Luk. 4:13) Nambo ngasitukunda chilichose kutulepelekasya kuŵika yindu ya Yehofa pamalo gandanda paumi wetu. Tuli ŵakusachilila kumlambila Yehofape basi.