Cakulya Caligulo ca Ambuje Cili Cakutendekwa Cacikusamcimbicisya Mlungu

AKLISTU akulamuligwa kuti atendeje cikumbucilo ca ciwa ca Yesu. Cakutendekwaci cikusakolanjikwasoni kuti “Cakulya Caligulo ca Ambuje.” (1 Akolinto 11:20, NW) Ana ligongo cici cakutendekwaci cili cakusosekwa mnope? Ana tukusosekwa tutendeje cikumbuciloci cakaci, soni mwatuli?

Yesu ŵatandisye cakutendekwaci paligulo lya lisiku lyaŵatendaga Ayuda Pasaka m’caka ca 33 C.E. Ayudaŵa, ŵatendaga Pasaka kamo pacaka, palisiku lya 14 lya mwesi waŵawusalaga kuti Nisani. Mwesi wa Nisani watandaga paluwonece lwesi, ndaŵi sine cili cimasile cijuma candanda ca m’mwesi wa March. Kaneko Ayuda ŵatendaga Pasaka ligulo lya palisiku lya 14 kutyocela palisiku lyaluwonece lwesi.

Yesu ŵatesile Pasaka yalumo ni ŵakulijiganya ŵakwe. Palisikuli Yudasi Isikaliyoti ŵamtopwele. Kaneko Yesu ŵatandisye cakutendekwa cakolanjikwa kuti Cakulya Caligulo ca Ambuje. Cakutendekwaci cajinjile mmalo mwa Pasaka jwaŵatendaga Ayuda. M’yoyo cikusosekwa kutendekwaga kamo pacaka.

Ngani syambone sya Matayo sikusati: “Yesu ŵajigele mkate, ni ŵamtogolele Mlungu, ŵawugaŵenyegaŵenye, kaneko ŵapele ŵakulijiganya ŵala, jwalakwejo ali mkuŵeceta kuti, ‘Pocelani, mlye celeci cili cilu cangu.’ Kaneko ŵajigele mgawo, ŵamtogolele Mlungu ni ŵawupelece kwa ŵakulijiganya ŵala. Ŵasalile kuti, ‘Mwani jemanja wosope. Pakuti aji ni miyasi jangu jakusimicisya cilanga ca Mlungu. Miyasi jeleji jinasulwisye ligongo lya ŵandu ŵajinji kuti Mlungu ŵakululucile ulemwa wawo.’”​—Matayo 26:26-28.

Ŵandu ŵane akusakulupilila kuti Yesu ŵagalawisye mkate kuŵa cilu cakwe cisyesyene, soni finyo kuŵa miyasi jakwe jisyesyene. Nambope cilu ca Yesu pandaŵi jaŵapelekaga mkate, caliji cangakatika palipose. Ana mpaka tujile kuti ŵakulijiganya ŵa Yesu ŵalyaga cilu cakwe, soni kumwa miyasi jakwe yisyesyene? Iyayi, ligongo kutenda yeleyi kukaliji kulya mundu, kwakuli kasa lilamusi lya Mlungu. (Genesis 9:3, 4; Levitiko 17:10) Mwakamulana ni lilemba lya Luka 22:20, Yesu ŵaŵecete kuti: “Mgawo awu cili cilanga casambano ca Mlungu cakusindicisidwa ni miyasi jangu jijajitice ligongo lya jemanja.” Ana yeleyi yikugopolela kuti mgawo usyesyenewo waŵele “cilanga casambano”? Yeleyi yaliji yangakomboleka, ligongo cilanga cikusaŵa kamulana yakutenda, ngaŵaga cindu mpela mgawo.

M’yoyo, mkate ni finyo yigambile kuŵa yimanyilo. Mkate ukusajimila cilu cangali ulemwa ca Klistu. Yesu ŵakamulicisye masengo mkate wakusigala pa Pasaka. Mkatewo waliji wangali cakusasaŵilisya cilicose. (Eksodo 12:8) Baibulo jikusakamulicisya masengo maloŵe gakuti cakusasaŵilisya mpela cimanyilo ca ulemwa. M’yoyo mkate ukusajimila cilu cangali ulemwa caŵapelece Yesu mpela mbote. Cilu cakwe caliji cangali ulemwa.​—Matayo 16:11, 12; 1 Akolinto 5:6, 7; 1 Petulo 2:22; 1 Yohane 2:1, 2.

Finyo jwamcejewu akusajimila miyasi ja Yesu. Miyasiji ni jajikusatendekasya kuti cilangano casambano cikamuleje masengo. Yesu ŵaŵecete kuti miyasi jakwe ŵajisulwisye kuti Mlungu ‘ŵakululucile ŵandu ulemwa.’ Yeleyi yikugopolela kuti ŵandu komboleka kuŵa ŵaswela pameso pa Mlungu, ni kuŵa pa cilangano casambano ni Yehofa. (Ahebeli 9:14; 10:16, 17) Cele cilanganoci cikusatendekasya kuti Aklistu ŵakulupicika 144,000 akole upile wakwawula kwinani. Pakusaka kwakamucisya ŵandu wosope, jemanjajo cacitumicilaga mpela mayimwene ni ŵambopesi.​—Genesis 22:18; Yeremiya 31:31-33; 1 Petulo 2:9; Ciunukuko 5:9, 10; 14:1-3.

Ana ŵakusosekwa kulya, soni kumwa yimanyilo ya Pacikumbucilo ali ŵani? Ali ŵandu ŵali mu cilangano casambanope basi. Kapena kuti ŵakwete cembeceyo cakwawula kwinani ni ŵakusosekwa kulya mkate, soni kumwa finyo. Msimu weswela wa Mlungu ni wawukusiwasimicisya jemanjajo kuti Mlungu ŵasagwile kuti akaŵe mayimwene kwinani. (Aloma 8:16) Jemanjaji akusaŵasoni pa cilangano ca Ucimwene ni Yesu.​—Luka 22:29.

Nambi wuli pakwamba ya ŵandu ŵakwete cembeceyo cakutama kwangamala pacilambo capasi ca Paladaiso? Jemanjaji akusapikanila yaŵalamwile Yesu, mwakusimanikwa pa Cakulya Caligulo ca Ambuje. Mwaucimbicimbi, akusagamba kupikanila yakutendekwa yosope, nambo ŵangalya yimanyilo. Ŵa Mboni sya Yehofa akusakumbucila cakutendekwa ca Cakulya Caligulo ca Ambuje kamo pacaka pa Nisani 14 lyuŵa lili likapile. Atamose kuti ŵandu ŵapanandi ni ŵakusati akwete cembeceyo cakwawula kwinani, cakutendekwaci cili ca penani kwa Aklistu wosope. Cakutendekwaci cikusatendekasya wosope kuti aganicisyeje ya cinonyelo cekulungwa caŵalosisye Yehofa Mlungu ni Yesu Klistu.​—Yohane 3:16.