Nganisyo sya Mlungu Pangani ja Miyasi

Miyasi jili jakusosekwa. Mwamti pangali jwampaka aŵe ni umi naga nganakola miyasi. Pakuŵa Mlungu ni juŵatupanganyisye, myoyo jwalakwe ni jwakusosekwa kutusalila kakamulichisye masengo kakuŵajilwa ka miyasi. Nambo ana jwalakwe asasile yamtuli yakwamba miyasi? Ana yili yakuŵajilwa kulya miyasi soni kujitaga m’yilu yetu? Ana pangani jeleji mpaka atende yamtuli kuti asagule yakuŵajilwa?

1. Ana nganisyo sya Yehofa pangani ja miyasi sili syamtuli?

Kalakala Yehofa ŵasalile ŵakutumichila ŵakwe kuti: “Umi wa chindu chilichose . . . uli m’miasi.” (Lefitiko 17:14) Yehofa akusayiwona kuti miyasi jikusajimilaga umi. Pakuŵa Mlungu akusawuwonaga umi kuŵa mtuka wakusosekwa mnope, myoyosoni miyasi akusajiwona kuŵa jakusosekwa mnope.

2. Ana ni kakamulichisye masengo kamtuli ka miyasi kakusalekasya Mlungu?

Yehofa ŵalamwile ŵakutumichila ŵakwe ŵakalakala kuti akalyaga miyasi. (Aŵalanje Genesesi 9:4 soni Lefitiko 17:10.) Jwalakwe ŵagombelechesye ya lilamusili pandaŵi jele likuga lyakulongolela lyasalilaga Aklistu kuti “akalyaga [aŵambaleje, NWT] . . . miyasi.”—Aŵalanje Masengo 15:28, 29.

Ana kuŵambala miyasi kukusagopolela chichi? Naga dokotala ali ŵasalile kuti aŵambaleje ukana, nikuti nganaŵa amwele ukanawo. Nambi ana mpaka alye chakulya chewanganye ni ukana? Kapena mpaka agambe kujigala ukanawo ni kuwutotela mitasi? Nganaŵa atesile yeleyi. Mwakulandana ni yeleyi, lilamusi lya Mlungu lyakuti tuŵambaleje miyasi likusagopolela kuti ngatukusosekwa kumwaga miyasi kapena kulya chinyama chakwamba kupopotola. Ngatukusosekwasoni kulya yakulya yewanganye ni miyasi.

Nambi uli pakwamba yakukamulichisya masengo miyasi patulwasile? Matala gane gakusakuya ŵachipatala gakusakasaga lilamusi lya Mlungu. Yeleyi yikusapwatikapo kumtaga mundu miyasi ja mtundu kapena kwamba kumtaga mbali syekulungwakulungwa sya miyasi. Mbalisi sili, maselo gechejewu, geswela, gakulekasya miyasi kopoka, soni mesi ga m’miyasi. Nambo matala gane gakusakuya ŵachipatala gangakasa lilamusi lya Mlungu. Mwachisyasyo, gane mwa matalaga gali kukamulichisya masengo tumbali twamwanamwana twa mbali syekulungwa sya miyasi. Ni pana matala gane gele ŵachipatala akusakamulichisya masengo miyasi ja mundu jwakulwalajo. Pa matala gelega, jwalijose akusosekwa kulisagulila jika.a—Agalatiya 6:5.

KULIJIGANYA YEJINJI

3. Asaguleje chikamuchisyo cha chipatala champaka chimsangalasye Yehofa

Ana mpaka asagule chamtuli chikamuchisyo cha chipatala champaka chikamulane ni nganisyo sya Mlungu? Alolele FIDIYO, kaneko akambilane kusosekwa kwa kukuya mfundo syakuyichisyasi.

FIDIYO: Mwampaka Asagulile Chikamuchisyo cha Chipatala Pangani ja Miyasi (5:47)

• Aŵendeje lunda kwa Mlungu.—Yakobo 1:5.

• Awungunye mfundo sya Baibulo soni alole mwampaka asikamulichisye masengo.—Misyungu 13:16.

• Awungunye yikamuchisyo yampaka asagule yayikusimanikwa kumangwawoko.

• Amanyilile yikamuchisyo yanganaŵa akamulichisye masengo.

• Alolechesye kuti yachasagule yikatendekasyaga kulijimba magambo.—Masengo 24:16.b

• Amanyilile kuti ŵamkwawo, jwamkulungwa jwamumpingo kapena jwakusiŵajiganya Baibulo nganaŵa ŵasagulile yakutenda pangani syele wawojo akusosekwa kulisagulila jika.—Aloma 14:12.

• Alembe yasagwileyo.

4. Ŵa Mboni akusawungunya chikamuchisyo chambone cha chipatala

Yili yakomboleka kukuya lilamusi lya Mlungu lyakwamba miyasi ni kupochela chikamuchisyo chambone changasaka kumtaga mundu miyasi. Alolele FIDIYO.

FIDIYO: Kunguluka ni Pulofesa Massimo P. Franchi Jwali Dokotala. (1:36)

Aŵalanje Tito 3:2, kaneko akambilane chiwusyo achi:

• Ligongo chichi patukuŵechetana ni madokotala tukusosekwa kwachimbichisya soni kuŵecheta mwakuwusimana mtima?

Yanganaŵa akundile	Yampaka Mklistu asagule
A. Mesi ga m’miyasi	Tumbali twa mesi ga m’miyasi
B. Maselo geswela	Tumbali twa maselo geswela
C. Maselo gakulekasya miyasi kopoka	Tumbali twakulekasya miyasi kopoka
D. Maselo gechejewu	Tumbali twa maselo gechejewu

5. Naga pakusosekwa kamulichisya masengo tumbali twa miyasi

Miyasi jana mbali mcheche syekulungwakulungwa. Mbalisi sili, maselo gechejewu, geswela, gakulekasya miyasi kopoka soni mesi ga m’miyasi. Mbali syekulungwakulungwasi sikwetesoni tumbali twamwanamwana.c Tumbali twamwanamwana twine akusatukamulichisya masengo pakupanganya mtela wakamuchisya kulimbana ni yilwele kapena kulekasya miyasi kuti jikakopokaga.

Nambo pangani jakwayana ni tumbali twamwanamwana twa miyasi, Mklistu jwalijose akusosekwa kulisagulila jika yakutenda mwakamulana ni mfundo sya m’Baibulo. Ŵane mpaka asagule ngapochela chikamuchisyo chakwayana ni tumbali twa miyasi. Nambo ŵane mtima wawo mpaka wajitichisye kupochela chikamuchisyo chakwayana ni tumbalitu.

Mkanasagule yakutenda, akusosekwa kuganichisya chiwusyo achi:

• Ana ni magongo gapi gampaka namsalile dokotala naga ngusaka kupochela tumbali twa miyasi kapena iyayi?

YALIJIGANYISYE

Yehofa akusasaka kuti tuŵambaleje kukamulichisya masengo miyasi mwakulemwecheka.

Yiwusyo Yakuwilisya

• Ligongo chichi Yehofa akusajiwona miyasi kuŵa mtuka wakusosekwa mnope?

• Ana tukumanyilila chamtuli kuti lilamusi lya Mlungu lyakuti tuŵambaleje miyasi likusakwayasoni kutajidwa miyasi?

• Pangani jakamulichisya masengo miyasi, ana mpaka atende yamtuli kuti asagule yindu mwalunda?

YAKULINGA YINESONI

Ana ni yindu yapi yakusosekwa kuyiganichisya mkanasagule chikamuchisyo cha chipatala chakwayana ni kukamulichisya masengo miyasi jawo?

“Yiwusyo Yakutyochela Kwa Ŵakuŵalanga” (Sanja ja Mlonda, Okotoba 15, 2000)

Ana ni yindu yapi yakusosekwa kuyiganichisya mkanasagule kupochela tumbali twa miyasi?

“Yiwusyo Yakutyochela Kwa Ŵakuŵalanga” (Sanja ja Mlonda, Juni 15, 2004)

Ana ni chichi chachamkamuchisye dokotala jwine kukulupilila kuti nganisyo sya Mlungu pangani ja miyasi sili syakupikanika?

“Nakamulene ni Nganisyo sya Mlungu Pangani ja Miyasi” (Ajimuche!, Disemba 8, 2003)

Amanyilile yakusatenda achakulungwa ŵa mumpingo ŵakusaŵa m’Makomiti Gakuŵechetana ni Ŵachipatala pakwakamuchisya abale ni alongo.

Yehofa Akusiŵakamuchisya Ŵakulwala (10:23)