Sáàmù

78 Ẹ fetí sí òfin* mi, ẹ̀yin èèyàn mi;

Ẹ tẹ́tí sí àwọn ọ̀rọ̀ ẹnu mi.

 3 Àwọn ohun tí a ti gbọ́ tí a sì mọ̀,

Èyí tí àwọn bàbá wa sọ fún wa,+

 4 A ò ní fi wọ́n pa mọ́ fún àwọn ọmọ wọn;

A ó ròyìn fún ìran tó ń bọ̀+

Nípa àwọn iṣẹ́ Jèhófà tó yẹ fún ìyìn àti nípa agbára rẹ̀,+

Àwọn ohun àgbàyanu tó ti ṣe.+

 5 Ó gbé ìránnilétí kan kalẹ̀ ní Jékọ́bù,

Ó sì ṣe òfin ní Ísírẹ́lì;

Ó pa àṣẹ fún àwọn baba ńlá wa

Pé kí wọ́n jẹ́ kí àwọn ọmọ wọn mọ àwọn nǹkan yìí,+

 6 Kí ìran tó ń bọ̀,

Ìyẹn àwọn ọmọ tí wọ́n máa bí, lè mọ̀ wọ́n.+

Wọn ò ní gbàgbé àwọn iṣẹ́ Ọlọ́run+

Kàkà bẹ́ẹ̀, wọ́n á máa pa àwọn àṣẹ rẹ̀ mọ́.+

 8 Wọn ò ní dà bí àwọn baba ńlá wọn,

Ìran alágídí àti ọlọ̀tẹ̀,+

Ìran tí ọkàn wọn ń ṣe ségesège*+

Tí ẹ̀mí wọn ò sì jẹ́ olóòótọ́ sí Ọlọ́run.

 9 Àwọn ọmọ Éfúrémù kó ọfà* dání,

Àmọ́ wọ́n sá pa dà lọ́jọ́ ogun.

10 Wọn ò pa májẹ̀mú Ọlọ́run mọ́,+

Wọn ò sì tẹ̀ lé òfin rẹ̀.+

11 Wọ́n tún gbàgbé ohun tó ti ṣe,+

Àwọn iṣẹ́ àgbàyanu tó fi hàn wọ́n.+

12 Ó ṣe àwọn ohun àgbàyanu níwájú àwọn baba ńlá wọn,+

Ní ilẹ̀ Íjíbítì, ní agbègbè Sóánì.+

13 Ó pín òkun sọ́tọ̀, kí wọ́n lè gbà á kọjá,

Ó sì mú kí omi òkun dúró bí ìsédò.*+

14 Ó fi ìkùukùu* ṣamọ̀nà wọn ní ọ̀sán,

Ó sì fi ìmọ́lẹ̀ iná ṣamọ̀nà wọn ní gbogbo òru.+

15 Ó la àpáta ní aginjù,

Ó jẹ́ kí wọ́n mu àmutẹ́rùn bíi pé látinú ibú omi.+

16 Ó mú kí omi ṣàn jáde látinú àpáta,

Ó sì mú kí omi ṣàn wálẹ̀ bí odò.+

17 Àmọ́ wọ́n ń dẹ́ṣẹ̀ sí i nìṣó,

Bí wọ́n ṣe ń ṣọ̀tẹ̀ sí Ẹni Gíga Jù Lọ ní aṣálẹ̀;+

18 Wọ́n pe Ọlọ́run níjà* nínú ọkàn wọn,+

Bí wọ́n ṣe ń béèrè oúnjẹ tí ọkàn wọn fà sí.*

19 Wọ́n sọ̀rọ̀ òdì sí Ọlọ́run,

Wọ́n ní: “Ṣé Ọlọ́run lè tẹ́ tábìlì nínú aginjù ni?”+

20 Wò ó! Ó lu àpáta

Kí omi lè ṣàn, kí odò sì ya jáde.+

Síbẹ̀ wọ́n ń sọ pé, “Ṣé ó tún lè fún wa ní oúnjẹ ni,

Àbí ṣé ó lè pèsè ẹran fún àwọn èèyàn rẹ̀?”+

21 Nígbà tí Jèhófà gbọ́ wọn, inú bí i gan-an;+

Iná+ jó Jékọ́bù,

Inú rẹ̀ sì ru sí Ísírẹ́lì.+

22 Torí pé wọn ò ní ìgbàgbọ́ nínú Ọlọ́run;+

Wọn ò gbẹ́kẹ̀ lé e pé ó lágbára láti gbà wọ́n là.

23 Torí náà, ó pàṣẹ fún ojú ọ̀run tó ṣú dẹ̀dẹ̀ lókè,

Ó sì ṣí àwọn ilẹ̀kùn ọ̀run.

24 Ó ń rọ̀jò mánà sílẹ̀ fún wọn láti jẹ;

Ó fún wọn ní ọkà ọ̀run.+

25 Àwọn èèyàn jẹ oúnjẹ àwọn alágbára;*+

Ó pèsè èyí tó pọ̀ tó kí wọ́n lè jẹ àjẹyó.+

26 Ó ru ẹ̀fúùfù ìlà oòrùn sókè ní ọ̀run,

Ó sì mú kí ẹ̀fúùfù gúúsù fẹ́ nípasẹ̀ agbára rẹ̀.+

27 Ó rọ̀jò ẹran lé wọn lórí bí eruku,

Àwọn ẹyẹ bí iyanrìn etíkun.

28 Ó mú kí wọ́n já bọ́ sí àárín ibùdó rẹ̀,

Káàkiri àwọn àgọ́ rẹ̀.

29 Wọ́n jẹ àjẹyó àti àjẹkì;

Ó fún wọn ní ohun tí ọkàn wọn fẹ́.+

30 Àmọ́ kí wọ́n tó tẹ́ ìfẹ́ ọkàn wọn lọ́rùn pátápátá,

Nígbà tí oúnjẹ wọn ṣì wà lẹ́nu wọn,

 31 Ìbínú Ọlọ́run ru sí wọn.+

Ó pa àwọn ọkùnrin wọn tó lágbára jù lọ;+

Ó mú àwọn ọ̀dọ́kùnrin Ísírẹ́lì balẹ̀.

32 Láìka gbogbo èyí sí, ṣe ni wọ́n ń dá ẹ̀ṣẹ̀ lé ẹ̀ṣẹ̀,+

Wọn ò sì ní ìgbàgbọ́ nínú àwọn iṣẹ́ àgbàyanu rẹ̀.+

33 Torí náà, ó fòpin sí ọjọ́ ayé wọn bíi pé èémí lásán ni,+

Ó sì fòpin sí ọdún wọn nípasẹ̀ àjálù òjijì.

34 Àmọ́ tó bá ti bẹ̀rẹ̀ sí í pa wọ́n, wọ́n á wá a;+

Wọ́n á pa dà, wọ́n á sì wá Ọlọ́run,

 35 Wọ́n á rántí pé Ọlọ́run ni Àpáta wọn+

Àti pé Ọlọ́run Ẹni Gíga Jù Lọ ni Olùdáǹdè* wọn.+

36 Àmọ́ wọ́n fẹ́ fi ẹnu wọn tàn án jẹ,

Kí wọ́n sì fi ahọ́n wọn parọ́ fún un.

37 Ọkàn wọn ò ṣe déédéé pẹ̀lú rẹ̀;+

Wọn ò sì pa májẹ̀mú rẹ̀ mọ́.+

38 Àmọ́, ó jẹ́ aláàánú;+

Ó máa ń dárí ẹ̀ṣẹ̀ wọn jì wọ́n,* kò sì ní pa wọ́n run.+

Ó máa ń fawọ́ ìbínú rẹ̀ sẹ́yìn lọ́pọ̀ ìgbà,+

Kàkà tí ì bá fi jẹ́ kí gbogbo ìbínú rẹ̀ ru.

39 Nítorí ó rántí pé ẹlẹ́ran ara ni wọ́n,+

Afẹ́fẹ́ tó ń fẹ́ kọjá, tí kì í sì í pa dà wá.*

40 Ẹ wo iye ìgbà tí wọ́n ṣọ̀tẹ̀ sí i ní aginjù,+

Tí wọ́n sì bà á nínú jẹ́ ní aṣálẹ̀!+

41 Léraléra ni wọ́n dán Ọlọ́run wò,+

Wọ́n sì kó ẹ̀dùn ọkàn bá* Ẹni Mímọ́ Ísírẹ́lì.

42 Wọn ò rántí agbára* rẹ̀,

Lọ́jọ́ tó gbà wọ́n* lọ́wọ́ ọ̀tá,+

 43 Bó ṣe fi àwọn iṣẹ́ àmì rẹ̀ hàn ní Íjíbítì+

Àti àwọn iṣẹ́ ìyanu rẹ̀ ní agbègbè Sóánì,

 44 Àti bó ṣe sọ àwọn ipa odò Náílì di ẹ̀jẹ̀,+

Tí wọn ò fi lè mu omi àwọn odò wọn.

45 Ó rán ọ̀wọ́ eṣinṣin mùjẹ̀mùjẹ̀ láti jẹ wọ́n run+

Àti àwọn àkèré láti ba ilẹ̀ wọn jẹ́.+

46 Ó fi àwọn ohun ọ̀gbìn wọn fún àwọn ọ̀yánnú eéṣú,

Ó sì fi èso iṣẹ́ wọn fún ọ̀wọ́ eéṣú.+

47 Ó fi yìnyín pa àjàrà wọn run,+

Ó sì fi àwọn òkúta yìnyín pa àwọn igi síkámórè wọn.

48 Ó fi yìnyín pa àwọn ẹran akẹ́rù wọn,+

Ó sì sán ààrá* pa àwọn ẹran ọ̀sìn wọn.

49 Ó tú ìbínú rẹ̀ tó ń jó bí iná lé wọn lórí,

Ìbínú ńlá àti ìrunú àti wàhálà,

Ó rán àwùjọ àwọn áńgẹ́lì láti mú àjálù wá.

Kò dá wọn* sí;

Ó sì fi wọ́n* lé àjàkálẹ̀ àrùn lọ́wọ́.

51 Níkẹyìn, ó pa gbogbo àkọ́bí Íjíbítì,+

Ìbẹ̀rẹ̀ agbára ìbímọ wọn nínú àwọn àgọ́ Hámù.

52 Lẹ́yìn náà, ó mú àwọn èèyàn rẹ̀ jáde bí agbo ẹran,+

Ó sì darí wọn bí ọ̀wọ́ ẹran ní aginjù.

53 Ó darí wọn láìséwu,

Wọn ò sì bẹ̀rù ohunkóhun;+

Òkun bo àwọn ọ̀tá wọn mọ́lẹ̀.+

54 Ó mú wọn wá sí ìpínlẹ̀ mímọ́ rẹ̀,+

Agbègbè olókè tí ọwọ́ ọ̀tún rẹ̀ gbà.+

55 Ó lé àwọn orílẹ̀-èdè jáde níwájú wọn;+

Ó fi okùn ìdíwọ̀n pín ogún fún wọn;+

Ó mú kí àwọn ẹ̀yà Ísírẹ́lì máa gbé inú ilé wọn.+

56 Àmọ́ wọn ò yéé pe Ọlọ́run Ẹni Gíga Jù Lọ níjà,* wọ́n sì ń ṣọ̀tẹ̀ sí i;+

Wọn ò fiyè sí àwọn ìránnilétí rẹ̀.+

58 Wọ́n ń fi àwọn ibi gíga wọn mú un bínú ṣáá,+

Wọ́n sì fi àwọn ère gbígbẹ́ wọn mú kí ìbínú rẹ̀ ru.*+

59 Ọlọ́run gbọ́, inú sì bí i gidigidi,+

Torí náà, ó kọ Ísírẹ́lì sílẹ̀ pátápátá.

60 Níkẹyìn, ó pa àgọ́ ìjọsìn Ṣílò tì,+

Àgọ́ tí ó gbé inú rẹ̀ láàárín àwọn èèyàn.+

61 Ó jẹ́ kí àmì agbára rẹ̀ lọ sóko ẹrú;

Ó jẹ́ kí ọlá ńlá rẹ̀ bọ́ sọ́wọ́ àwọn ọ̀tá.+

62 Ó jẹ́ kí wọ́n fi idà pa àwọn èèyàn rẹ̀,+

Inú sì bí i gidigidi sí ogún rẹ̀.

63 Iná jó àwọn ọ̀dọ́kùnrin rẹ̀ run,

A kò sì kọ orin ìgbéyàwó fún* àwọn wúńdíá rẹ̀.

64 Wọ́n fi idà pa àwọn àlùfáà rẹ̀,+

Àwọn opó wọn ò sì sunkún.+

65 Nígbà náà, Jèhófà jí bíi pé láti ojú oorun,+

Bí akíkanjú ọkùnrin+ tí wáìnì dá lójú rẹ̀ nígbà tó jí.

66 Ó lé àwọn ọ̀tá rẹ̀ pa dà;+

Ó mú kí ìtìjú ayérayé bá wọn.

67 Ó kọ àgọ́ Jósẹ́fù sílẹ̀;

Kò sì yan ẹ̀yà Éfúrémù.

68 Àmọ́, ó yan ẹ̀yà Júdà,+

Òkè Síónì, èyí tí ó nífẹ̀ẹ́.+

69 Ó mú kí ibi mímọ́ rẹ̀ lè máa wà títí lọ bí ọ̀run,*+

Bí ayé tí ó fìdí rẹ̀ múlẹ̀ títí láé.+

70 Ó yan Dáfídì+ ìránṣẹ́ rẹ̀,

Ó sì mú un kúrò nínú ọgbà àgùntàn,+

71 Kúrò ní ibi tó ti ń tọ́jú àwọn abo àgùntàn tó ń fọ́mọ lọ́mú;

Ó fi í ṣe olùṣọ́ àgùntàn lórí Jékọ́bù, àwọn èèyàn rẹ̀+

Àti lórí Ísírẹ́lì, ogún rẹ̀.+

72 Ó fi òtítọ́ ọkàn ṣe olùṣọ́ àgùntàn wọn,+

Ó sì darí wọn lọ́nà tó já fáfá.+