腓立比书

1 呢封信系基督耶稣嘅奴隶保罗同提摩太，写俾腓立比所有同基督耶稣联合嘅圣民，仲有各位监督同助理仆人嘅。

2 愿上帝我哋嘅爸爸，仲有主耶稣基督，赐分外恩典同安宁*俾你哋。

3 每次我谂起你哋，为你哋所有人恳切祈求嘅时候，都感谢我嘅上帝。 4 我每次恳切祈求，都好开心， 5 因为你哋由接受好消息嗰一日到而家，一直努力参与宣扬好消息*嘅工作*。 6 我深信，上帝会完成喺你哋当中已经开始嘅美善工作，直至基督耶稣嘅日子嚟到。 7 我对你哋所有人有噉样嘅谂法系冇错嘅，因为我深爱你哋，而且你哋同我都因为分外恩典而得益。无论我被监禁，定系为好消息辩护，通过法律途径确立传好消息嘅权利，你哋都支持我。

8 上帝知道我好想见到你哋所有人，我对你哋充满温情，就好似基督耶稣对你哋一样。 9 我一直祷告，希望你哋越嚟越有爱心，有确切嘅知识，能够透彻噉明辨事理， 10 睇清楚边啲事更加重要，纯洁无瑕，唔好令人跌倒*，直到基督嘅日子。 11 我亦都希望你哋靠住耶稣基督嘅帮助，结满正义嘅果实，令上帝得到荣耀同赞美。

12 各位弟兄*，我想话俾你哋知，我而家嘅处境其实有助于宣扬好消息。 13 全体禁卫军同其他人，都知道我系因为基督嘅缘故而被囚禁。 14 我被囚禁呢件事，亦都令大多数为主服务嘅弟兄更有信心，更有勇气传讲上帝嘅话语。

15 有啲人的确系出于妒忌同竞争而传讲基督嘅好消息，不过都有啲人系出于正确嘅动机*。 16 有正确动机嘅人系因为爱而宣扬基督，佢哋知道我系被派嚟为好消息辩护嘅。 17 而嗰啲怀有竞争心态，唔系怀住正确动机嘅人，佢哋宣扬基督，系想令我被囚禁嘅时候更加痛苦。 18 结果呢？无论佢哋嘅动机系咪正确，只要基督受到宣扬，我就好开心嘞。将来我都会咁开心， 19 因为我知道，由于你哋嘅恳切祈求，加上得到耶稣基督嘅力量*，呢件事最终会为我带嚟拯救*。 20 我热切盼望喺任何事上都无愧于心，亦都深信自己可以继续放胆发言。噉样，无论我生存定系死去，而家我都能够一如既往噉令基督得到荣耀*。

21 对我嚟讲，我生存系为咗基督，而死去系更有益处嘅*。 22 如果我以呢个身体继续生存，我就能够工作，结出果实。至于要拣边样，我都唔知道*。 23 呢两件事令我好难取舍，其实我好想自己嘅身体得到释放，能够同基督一齐，因为噉样的确好好多。 24 不过，为咗你哋嘅益处，我更加应该以呢个身体生存。 25 我深信呢件事，所以我知道我会继续同你哋所有人一齐，帮助你哋进步，等你哋因为有信心而喜乐。 26 噉我再次同你哋见面嘅时候，就可以因为大家都系基督耶稣嘅门徒而欢欣快乐。

27 我只系希望，你哋处世为人*配得上基督嘅好消息。噉样，无论我可唔可以嚟见你哋*，都听到你哋嘅情况，知道你哋有坚定嘅立场同团结*嘅精神，同心协力*为关于好消息嘅信仰并肩奋斗， 28 一啲都唔怕反对嘅人。呢个系佢哋会灭亡、你哋会得救嘅明证，系出于上帝嘅。 29 你哋因为基督，唔单止有殊荣信从佢，而且有殊荣为佢受苦。 30 你哋而家面对嘅考验，我以前都面对过，当时你哋都见到。而家我仲面对紧同样嘅考验。