罗马书

5 所以，我哋既然因为信心而被称为正义嘅人*，就应该通过*我哋嘅主耶稣基督，同上帝享有和睦嘅关系。 2 由于我哋对基督有信心，我哋得到许可，可以享有上帝嘅分外恩典*。我哋既然有希望得享上帝嘅荣耀，就应该欢欣*。 3 唔单止噉，我哋遭遇患难嗰阵亦都应该欢欣*，因为我哋知道，患难令人学识忍耐， 4 忍耐令人得到上帝嘅认可*，人得到认可就有希望， 5 呢个希望唔会令人失望。因为通过上帝赐俾我哋嘅神圣力量，佢嘅爱已经倾注喺我哋心入面嘞。

6 我哋仲系软弱*嗰阵，基督就喺指定嘅时候为罪人*而死。 7 为正义嘅人死，几乎冇人肯做；为良善嘅人死，或者有人愿意*。 8 但系我哋仲系罪人嘅时候，基督已经为我哋而死，就系噉样，上帝向我哋表明咗自己嘅爱。 9 而家我哋既然凭住基督嘅血而被称为正义嘅人*，就可以更加确定能够通过佢得救，唔需要承受上帝嘅愤怒。 10 由于上帝个仔嘅死亡，我哋仲系上帝嘅敌人嗰阵，就可以同佢和好*。而家我哋已经同佢和好，再加上佢个仔系活着嘅*，我哋就更加肯定可以得救嘞。 11 另外，我哋欢欣，亦都系因为上帝通过主耶稣基督做嘅一切，令我哋而家就同佢和好。

12 罪*通过一个人进入世间，死又通过罪而嚟，于是死就传俾所有人，因为人人都有罪。 13 未有摩西法典，世上已经有罪嘞。不过，由于未有法律，就冇人被定罪。 14 但系由亚当到摩西嘅日子，死亡一直好似君王噉辖制人。虽然世人嘅罪同亚当犯嘅唔同，世人依然一直被死亡辖制。亚当同之后会嚟到嘅嗰一位相似。

15 不过，罪*同恩赐*带嚟嘅结果就好唔同嘞。一个人嘅罪，令到好多人死；而耶稣基督一个人带嚟嘅分外恩典，就令到好多人都得到上帝嘅分外恩典同埋恩赐*，获得无与伦比嘅*福分！ 16 嗰一个人犯罪同上帝俾人嘅恩赐*喺另一方面都好唔同。一个人犯罪，最终受审判，被定罪，而上帝嘅恩赐，就令到好多人虽然犯咗罪，仍然可以被称义*。 17 由于一个人犯罪，死亡就因为佢而成为君王；由于耶稣基督一个人，人就获得丰富嘅分外恩典同埋恩赐*，成为正义嘅人，噉佢哋就更加能够得享生命而成为君王嘞！

18 所以，由于一次犯罪，各种各样嘅人都被定罪。同样，由于一次正义嘅举动*，各种各样嘅人都被称义*，得享生命。 19 因为一个人嘅反叛，好多人就成为罪人。同样，因为一个人嘅服从，好多人就会成为义人。 20 有咗摩西法典，罪就越嚟越多*。不过罪越多，分外恩典亦都越多。 21 为咗乜嘢目的呢？正如罪同死亡成为君王，分外恩典亦都因为正义而成为君王，令人因为我哋嘅主耶稣基督而得享永远嘅生命。