启示录

21 我见到新天新地。以前嘅天、以前嘅地已经消失，海都冇埋。 2 我亦都见到圣城新耶路撒冷由上帝嗰度从天而降，好似新娘为新郎打扮好自己，准备妥当。 3 我听到宝座嗰度有一个洪亮嘅声音，话：“睇吓！上帝嘅帐幕喺人间，佢会同人一齐住，佢哋要做佢嘅子民。上帝要亲自同佢哋同在。 4 上帝要抹走佢哋每一滴眼泪，唔再有死亡，亦都唔再有悲伤、哀哭、痛苦。以前嘅事已经过去嘞。”

5 坐喺宝座嗰位话：“睇吓！而家我更新一切。”佢又话：“你要写低呢啲说话，呢啲说话都系真嘅，系可靠*嘅。” 6 佢同我讲：“全部都实现喇！我系阿尔法，亦都系奥米加*；我系开始，亦都系终结。边个口渴，我都会将生命水嘅泉源嘅水，不求回报噉*赐俾佢饮。 7 战胜嘅人会得到呢啲福分，我要做佢嘅上帝，佢要做我嘅仔。 8 至于胆怯嘅、不信嘅、可憎嘅、杀人嘅、淫乱*嘅、通灵嘅、拜偶像嘅，同埋所有讲大话嘅，佢哋嘅下场就系被揼入烧住烈火硫磺嘅湖里面。呢个湖象征第二种死亡。”

9 嗰七个分别拎住碗，碗里面装满最后七场灾祸嘅天使当中，有一个嚟同我讲：“嚟吖，我带你去睇吓新娘，佢系绵羊羔嘅妻子。” 10 于是，佢用神圣力量带我去到一座雄伟嘅高山，俾我睇到圣城耶路撒冷由上帝嗰度从天而降。 11 呢座城有上帝嘅荣耀，光芒四射，好似极之贵重嘅宝石，亦都好似晶莹剔透嘅碧玉石。 12 城墙又高又大，有12道门，12道门前面都有个天使，门上面写住以色列12个部族嘅名。 13 东面有3道门，北面有3道门，南面有3道门，西面有3道门。 14 城墙有12块基石，上面有绵羊羔12个使徒嘅12个名。

15 同我讲说话嘅嗰位拎住一条金色嘅芦苇，要度一度嗰座城，仲有城门同埋城墙。 16 城系正方形嘅，长同阔都一样。佢用芦苇度一度嗰座城，系1万2000斯塔迪安*，长、阔、高都相等。 17 佢亦都度吓城墙，高144肘尺*。呢个系人用嘅测量标准，亦都系呢个天使所用嘅测量标准。 18 城墙系碧玉造嘅。城系纯金嘅，好似明亮嘅玻璃。 19 城墙嘅根基用各种宝石装饰：第一个根基用嘅系碧玉，第二个系蓝宝石，第三个系玉髓，第四个系绿柱玉， 20 第五个系缠丝玛瑙，第六个系肉红玉髓，第七个系贵橄榄石，第八个系绿柱石，第九个系黄玉，第十个系绿玉髓，第十一个系风信子石，第十二个系紫晶。 21 嗰12道门系12粒珍珠，每道门都系用一粒珍珠造嘅。城里面嘅大街系用纯金造嘅，好似透明嘅玻璃。

22 我见唔到城里面有圣殿，因为全能嘅上帝耶和华*同绵羊羔，就系呢座城嘅圣殿。 23 呢座城唔需要日月照耀，因为上帝嘅荣耀照亮咗呢座城，绵羊羔就系呢座城嘅灯。 24 呢座城嘅光会照亮列国嘅人所行嘅路，地上嘅君王会将佢哋嘅荣耀带入城里面。 25 城门永远都唔会闩埋，因为嗰度只有日头，冇夜晚。 26 列国嘅荣耀同尊荣都会被带入城。 27 任何被玷污嘅嘢，任何行为可憎、行事诡诈嘅人，都绝对唔能够入城。只有记录喺绵羊羔嘅生命册上面嘅人先可以入去。