彼得前书

2 所以，你哋要摆脱一切恶念、欺诈、虚伪、妒忌同埋各种中伤人嘅说话。 2 要好似初生婴儿一样，对上帝话语纯净*嘅奶养成渴求嘅态度，令你哋可以靠住佢成长，最终得救。 3 只要你哋体验过*主系几咁仁慈嘅，就会噉样做。

4 佢系活石，虽然俾人弃绝，不过系上帝拣选嘅，对上帝嚟讲好宝贵。你哋嚟到佢面前， 5 自己都系活石，而家上帝嘅神圣力量将你哋建造为圣殿，构成圣洁嘅祭司团，通过耶稣基督献上祭牲*，系上帝接纳嘅。 6 圣经话：“睇吓，我要喺锡安放置一块我拣选嘅石头，系宝贵嘅根基房角石*。信从佢嘅人绝对唔会失望*。”

7 所以，对你哋嚟讲，佢系宝贵嘅，因为你哋系信徒；但系对唔信主嘅人嚟讲就唔系噉，圣经话“建造嘅人弃绝嘅石头，成为咗首要嘅房角石”， 8 亦都成为咗“一块绊脚石，一块令人失足跌倒嘅石头”。呢啲人失足，系因为唔服从上帝嘅话语。佢哋难逃噉样嘅下场。 9 不过你哋“系上帝拣选嘅一族人，系有王权嘅祭司，系圣洁嘅国族，系专属于佢嘅子民，应该宣扬佢嘅美德*”，因为佢已经呼召你哋从黑暗出嚟，进入佢奇妙嘅光里面。 10 你哋以前唔系上帝嘅子民，不过而家就系佢嘅子民，以前得唔到怜悯，而家就得到怜悯。

11 亲爱嘅朋友，你哋系外族人，系寄居嘅，我劝你哋要时刻禁戒有罪嘅*欲望，就系呢啲欲望同你哋打紧仗。 12 喺列国嘅人当中，你哋要品行端正。噉样，就算佢哋指控你哋作恶，都可以亲眼见到你哋嘅好行为，结果喺上帝审察嘅日子将荣耀归于上帝。

13 为咗主嘅缘故，你哋要顺服世人创立嘅一切统治安排*。无论系在上嘅君王， 14 定系奉君王嘅命令惩罚恶人、表扬好人嘅总督，你哋都要顺服。 15 因为上帝嘅旨意系要你哋行善*，噉就可以令不明事理嘅人收声*，唔再讲无知嘅说话。 16 你哋要做自由人，但系唔好将自由当成作恶嘅借口*，反而要做上帝嘅奴隶。 17 要尊重各种各样嘅人，爱整个弟兄团体，敬畏上帝，尊重君王。

18 仆人应该深深尊重*主人，顺服佢哋，唔单止顺服良善又通情达理嘅主人，亦都要顺服嗰啲好难服侍*嘅。 19 为咗令良心对得住上帝，人忍受逆境*同埋唔公平嘅对待，呢个系上帝喜悦嘅。 20 你哋如果因为犯罪而忍受责打，有咩值得称赞呢？但系，你哋如果因为行善而忍受苦难，呢个就系上帝喜悦嘅。

21 你哋受呼召就系要噉样做，因为基督都为你哋受过苦，为你哋树立榜样，等你哋紧紧跟随佢嘅脚步。 22 佢从来冇犯过罪，亦都冇讲过呃人嘅说话。 23 佢俾人闹都冇还口*，受苦亦都冇恐吓人，反而将自己交托俾施行正义审判嘅主。 24 佢喺木柱*度用自己嘅身体承担咗我哋嘅罪，等我哋唔再俾罪控制，可以过正义嘅生活*。“因为佢受嘅创伤，你哋已经得到医治。” 25 你哋以前好似迷路嘅绵羊，不过而家就返到看守你哋生命嘅牧人同埋监督身边嘞。